KRISTIANTE zînga mi maktaduai tam takte chuan Krisma an lâwm lo. Engtin nge an thu tlûkna siam chu an ngaih? Thil eng emaw kim lo awm angin an inhria em? An fate chuan chân nei niin an inhria em? Chumi chungchânga khawvêl puma Jehova Thuhretute thusawi hi i lo en ang u.

Isua Krista hriat rengna: “Jehova Thuhretute zînga mi ka nih hma chuan ka inkhâwm khât hle a. Ka inkhâwm a nih pawhin, Krismas leh Easter hunah chauh ka inkhâwm ṭhîn. Chutih hun lai chuan Isua Krista chungchâng hi ka ngaihtuah ngai lo rêng rêng. Tûnah chuan Krismas ka lâwm tawh lo; mahse, kâr khata vawi hnih neih ṭhin Kristian inkhâwmahte ka tel ṭhîn a, Isua chungchanga Bible sawite chu mite ka zirtîr ṭhîn bawk a ni.”—EVE-I, AUSTRALIA.

Pêk chhuahna aṭanga hlimna: “Ka beisei loh huna mite’n thil min pek hian ka lâwm thei hle a. Rin loh deuhva thil intihsak hi nuam ka ti thei lutuk! Lehkhathawn ziahte leh mi dangte tâna lem ziahsaknate chuan a dawngtu a tihhlim lehzual bâkah, keimah ngei pawh min tihhlim avângin, chutiang thilte tih chu nuam ka ti hle a ni.”—REUBEN-A, NORTHERN IRELAND.

Ṭanpui ngaite ṭanpuina: “Dam lote tâna eirawng bâwlsak chu nuam kan ti hle a. A châng chuan anmahni tiphûr tûrin pangpâr te, cake te, leh thilpêk chhe tête chu kan kensak ṭhîn a. Eng hunah pawh dam lote chu kan va tlawh theih avângin, chutianga tih chu nuam kan ti hle a ni.”—EMILY-I, AUSTRALIA.

Chhûngkuaa inhmuhkhâwmna: “Kan chhûngte nêna kan inhmuhkhâwm hian, kan fate chuan boruak nuam tak hnuaiah an patea leh putea te, an nite leh nutei te, an pi leh pute bâkah, an unau dangte (cousin) hriat chian theihna an nei a. Kût ni hman bîk kan neih ve loh avângin, kan chhûngte kan va tlawh hian kan hmangaih avânga va tlawh kan ni tih an hria a ni.”—WENDY-I, CAYMAN ISLANDS.

Remna: “Krismas boruakah chuan mite chu thil dang tia an buai theih hlawm êm avângin, mi tlêm tê chauhvin remna chungchâng an ngaihtuah a. Mihringte tâna Bible thutiam chu ka zir a, chu chuan min tihahdam sawt mai. Bible aṭangin ka fate hian nakin hun hlimawm tak an chên thei dâwn tih ka zir a ni.”—SANDRA-I, SPAIN.