1, 2. (a) Sakhaw hruaitute chu thu hrilh rawngbâwlna an dodâlnaah hlawhtling mah se, engtin nge tirhkohte’n an chhân lêt? (b) Engvângin nge tirhkohte’n thu hrilh khap behna chu an zawm duh loh?

 C.E. 33 Pentikost hnu lawkah a ni a. Jerusalem khuaa Kristian kohhran din a nihna chu chawlhkâr tlêm tê chauh a la ni. Setana’n chu hun chu hma lâk nâna hun remchâng tak a ni tih a hria a. Kohhran chu a ngheh tak tak hmaa tihchhiat a duh a ni. Chuvângin, sakhaw hruaitute’n Lalram thu hrilh rawngbâwlna an khap beh theih nân Setana chuan thilthlengte chu a herkawi nghâl vat a. Mahse, tirhkohte chuan huaisen taka thu an hrilh zawm zêl avângin a hmei a pa mi tam tak chuan “Lalpa chu an ring ta” a ni.—Tirh. 4:18, 33; 5:14.

² Dodâltute thinrim chuan an rawn bei leh a, tûn ṭumah chuan, tirhkoh zawng zawngte chu tân inah an khung a ni. Mahse, zânah, Jehova vântirhkoh pakhatin tân in kawngka chu a rawn hawng a, khua a vâr veleh, tirhkohte chuan thu an hril zawm leh ta a! Tichuan, man an tâwk leh a, thu hril lo tûra thupêk bawhchhia nia puhtu thuneitute hmaa hruai an ni. Tirhkohte chuan, “Mihring thu aiin Pathian thu kan zâwm zâwk tûr a ni,” tiin huaisen takin an chhâng lêt a ni. Chûng thuneitute chuan an thinrim êm avângin tirhkohte chu “tihhlum” hial an duh a. Chu hun khirh tak an tawh lai chuan, mi zahkai tak leh Dân zirtîrtu Gamaliela chuan: “Fîmkhur rawh u. . . . Hêng mite hi tawk suh ula, awm mai rawh se,” tiin thuneitute chu a vaukhân a ni. Mak tak maiin, thuneitute chuan a thusawi chu ngaithlain, tirhkohte chu an chhuah leh a. Chûng mi rinawmte chuan eng nge an tih? Anni chu lunghnual lovin, “‘Isua chu Krista a ni,’ tiin zirtîr leh hrilh an bâng chuang lo.”—Tirh. 5:17-21, 27-42; Thuf. 21:1, 30.

3, 4. (a) Setana chuan hun rei tak aṭanga a lo hman tawh eng tih dân hmangin nge Pathian mite a beih? (b) He bungah leh a dawta bung hnihahte chuan eng nge kan sawiho vang?

³ C.E. 33-naa chu thilthleng chu dân hmanga Kristian kohhran beihna hmasa ber a ni a; mahse, a hnuhnûng ber erawh a ni lo. (Tirh. 4:5-8; 16:20; 17:6, 7) Tûn laiah pawh, Setana chuan biakna dik dodâltute chu kan thu hrilh rawngbâwlna khap bet tûra thuneitute chawk tho tûrin a fuihpawrh a. Dodâltute chuan Pathian mite chu dân bawhchhetute angin kawng hrang hrangin min puh a. Min puhna pakhat chu vântlâng tibuaitute, thu danga sawi chuan, buaina siamtute tih hi a ni. Chu bâkah, sawrkâr thuneitute laka helte angin leh Pathian Thu sumdâwn nâna hmangtute angin min puh bawk a. A hun takah, unaute chuan chûng min puhnate a dik lohzia finfiah nân court-ah an thlen a ni. Eng nge a rah chhuah? Kum sâwmbi liam taa court thu tlûkna siamte chuan tûnah, i chungah eng nghawng nge a neih? Thu buai ṭhenkhatin ‘chanchin ṭha thiamna thu leh tihnghehna’ kawnga a ṭanpui dânte chu i lo en ang u.—Phil. 1:7.

⁴ He bungah hian zalên taka thu hril tûra dikna kan neihte kan humhim dân sawiho a ni ang a. A dawta bung pahnihah chuan khawvêla mi kan nih lohzia leh Lalram tehnate mila nun kan tumzia chungchânga dân hmanga kan beihna ṭhenkhat sawiho a ni ang.

5. Kum 1930 tâwp dâwn lam khân, engvângin nge Lalram thupuangtute chu man an nih a, hma hruaitu unaute’n eng ruahmannate nge an siam?

⁵ Kum 1930 hnu lam chho khân, United States of America rama khawpui leh state-a awm Jehova Thuhretute chu an thu hrilh rawngbâwlna atâna phalna dîl tûrin emaw, license nei tûrin emaw tihluih an ni a. Mahse, unaute chuan license neih ngai an ti lo. License chu tihchhiat a ni thei a; chu bâkah, Kristiante hnêna Lalram thuchah puang tûra Isua thupêk chu eng sawrkâr mahin khap bet tûrin thuneihna an nei lo tih an hria a ni. (Mk. 13:10) Chutiang a nih avângin, Lalram puangtu tam takte chuan man an tâwk a. Chu chu chhâng lêtin, inawpna pâwla hruaitu atâna ruat unaute chuan court-a chinfel an tum ta a ni. Zalên taka thu hril tûra Thuhretute neih dikna chu sawrkârin dân kalhin a khuahkhirh tih hailan an inbeisei a. Kum 1938-ah, kan thu buai chaiah chuan thilthleng chhinchhiah tlâk tak a lo awm ta. Chu chu eng nge ni?

6, 7. Unau Cantwell-a te chhûngkaw chungah eng thil nge thleng?

⁶ Kum 1938, April 26, Thawhleh zîngah, kum 60-a upa Newton Cantwell-a; a nupui Esther-i; an fapa pathum Henry-a, Russell-a leh Jesse-a—an pangaa special pioneer—te chu Connecticut bial, New Haven khawpuiah ni lênga thu hril tûrin an chhuak a. Dik tak chuan, chu khuaah chuan ni khat aia tam awm tumin an inbuatsaih a ni. Engvângin nge? Vawi tam tak man an lo tâwk tawh ṭhîn a, tûn ṭumah pawh man an tâwk leh thei tih an hriat vâng a ni. Mahse, chu chuan Lalram thuchah hrilh duhna an neih chu a tikiam chuang lo. Tichuan, motor pahnihin New Haven khawpui lam panin an kal ta a. Newton-a chuan Bible ṭanchhan thu leh hla chhuahte leh ken theih chi thingremzaithei phur motor a khalh a, kum 22 mi Henry-a’n aurinna phur motor a khalh thung. An rin lâwk ang ngeiin, dârkâr rei vak lovah police-te’n an lo tiding ta a ni.

⁷ A hmasain, kum 18 mi Russell-a an man a, chumi hnuah, Newton-a leh Esther-i an man leh a. Kum 16 mi Jesse-a chuan police-te’n a nu leh pa leh a u an man lai chu râl khat aṭangin a hmu a. Henry-a chuan chu khawpui chhûng hmun danga thu a hrilh avângin, Jesse-a chu amah chauhvin a awm a. Chuti chung pawhin, ani chuan thingremzaithei chu lain, thu a hril zawm zêl a ni. Jesse-a chuan Catholic mi pahnih hnênah “Hmêlmate” tih thupui hmanga Unau Rutherford-a thusawi record chu a chhuahsak a. An ngaihthlâk chuan an thinrim ta êm êm mai a, Jesse-a chu sawisak hrep an duh hial a ni. Jesse-a chu rilru chi-ai lovin a kal leh mai a; mahse, rei vak lovah, police pakhatin rawn manin, tân ina khung a ni ve leh a. Police-te chuan Unaunu Cantwell-i chu thu buai an siamsak lo va; amaherawh chu, Unau Cantwell-a leh a fate chu thu buai an siamsak a. Mahse, anni pawh chumi nî vêk chuan tlan chhuah leh nghâl an ni.

8. Engvângin nge court-in unau Jesse Cantwell-a chu buaina siamtu nia thiam loh a chantîr?

⁸ Thla rei vak lo a liam hnu, kum 1938, September thla-ah, Cantwell-a te chhûngkua chu New Haven khawpuia court-ah an inlan a. Newton-a, Russell-a, leh Jesse-a te chu license nei lova thawhlâwm khawn nia puh an ni. Connecticut biala Supreme Court-ah thlen leh mah se, court chuan Jesse-a chu buaina siamtu, remna tichhetu niin thiam loh a chantîr a ni. Engvângin nge? Thusawi record ngaithlatu Catholic mi pahnih khân chu thusawi chuan an sakhua a sawichhiain, thinur tûrin a chawktho nia court-a an sawi vâng a ni. Mawhphurhna nei unaute chuan Court thu tlûkna siam dik lo tak chu ngaihtuah ṭha leh tûrin, U.S. rama rorêlna sâng ber Supreme Court-ah an thlen leh a ni.

9, 10. (a) Engtin nge U.S. Supreme Court-in Cantwell-a chhûngkaw thu buai chu a rêl? (b) Engtin nge chu court thu tlûkna siam chu kan la hlâwkpui?

⁹ Kum 1940, March 29 aṭangin Chief Justice Charles E. Hughes-a leh a rorêlpui dang pariatte chuan Jehova Thuhretute ukil Unau Hayden Covington-a a chhân lêtna chu an ngaithla a. * Connecticut biala ukil pakhatin Thuhretute chu buaina siamtute an ni tih finfiah a han tum chuan, rorêltu pakhat chuan: “Krista Isua thuchah puan pawh kha a hun laia thuchah lâr lo tak a ni lâwm ni?” tiin a zâwt a. Chu ukil chuan: “Ni e, Bible sawi ka hriat sual loh chuan, Bible vêkin Isua’n chu thuchah a sawi avânga a chunga thilthleng pawh a târ lang bawk,” tiin a chhâng a. Chhânna dik tak a va ni êm! Tum loh taka chu ukil thusawi chuan Thuhretute leh Isua chu pâwl khat a nihtîr a, Isua thiam loh chantîrtute leh Connecticut bial chu pâwl khat a nihtîr a ni. Kum 1940, May 20-ah Court chuan inlungrual takin Thuhretute chu thiam a chantîr ta a ni.

¹⁰ Court thu tlûkna siam chuan entiang khawpin nge nghawng a neih? Chu thu tlûkna chuan sakhaw zalênna a humhim avângin, sawrkâr te, bial te, leh tualchhûng thuneitute pawhin sakhaw zalênna chu dân angin an dang thei tawh lo a ni. Chu bâkah, Court chuan Jesse-a thiltihin “vântlâng remna leh muanna a tibuai lo,” tiin thu tlûkna a siam bawk. Chuvângin, chu thu tlûkna chuan Jehova Thuhretute chu vântlâng mipui tibuaitute an nih lohzia a nemnghet a ni. Pathian chhiahhlawhte tâna dân lama hnehna ropui tak a va ni êm! Engtin nge chu chu vawiin nî thlenga kan la hlâwkpui? Thuhretu ukil pakhat chuan: “Dik lo taka khap behnate chu hlauh ngai lova sakhaw zalênna kan neih theih avângin, tûnah chuan Thuhretute chuan khawtlâng mite hnênah beiseina thuchah kan hrilh thei tawh a ni,” tiin a sawi.

11. Canada rama kan unaute’n eng beihpui thlâkna nge an neih a, engvângin nge?

¹¹ Kum 1940 chho bâwr vêl khân, Canada rama Jehova Thuhretute chuan dodâlna nasa tak an tâwk a. Unaute chuan sawrkârin zalên taka biakna a ngaihthah lui tih vântlâng mipui hriattîr an duh avângin, kum 1946 khân, ni 16 awh campaign neiin, Pathian leh Krista leh Zalênna chunga Quebec Huatna Mei Alh Hi Canada Mite Tâna Thil Zahthlâk A Ni tih thupui nei tract chu an sem a. Phêk li nei chu tract-ah chuan Quebec biala awm unaute chunga râwng taka an thiltih te, police-ho nunrâwnna te, leh sakhaw hruaitute fuihpawrhna avânga buainate chungchâng chipchiar takin a chuang a. Chu bâkah, “Jehova Thuhretute chu dân lo anga man a ni zawm zêlin, Greater Montreal khawpuiah Jehova Thuhretute chunga thu buai 800 vêl siam a nih thu” pawh a chuang bawk.

12. (a) Engtin nge dodâltute chuan tract sem chhuahna chu an chhân lêt? (b) Kan unaute chu eng thil sual ti anga puh nge an nih? (Footnote pawh en rawh.)

¹² Quebec biala Lal Maurice Duplessis-a chuan Catholic Cardinal Villeneuve-a chu thurualpuiin, Thuhretute chu “khawngaihna tel lova do” tûra puangin chu tract chu a chhâng lêt a. Chuvângin, Thuhretute chunga thu buai an siam chu 800 aṭangin 1,600-ah a pung chho nghâl a ni. Pioneer unaunu pakhat chuan: “Police-te hian min man zing lutuk a, min man zât chiah pawh kan hre sêng tawh lo,” tiin a sawi. Chu tract semtute zînga an man Thuhretute chu “sawrkâr pawisawina lehkha semtute” tia puhin an chungah thu buai an siamsak a ni. *

13. Sawrkâr sawisêltute nia puh hmasak berte chu tute nge ni a, engtin nge court-in chumi chungchângah thu tlûkna a siam?

¹³ Kum 1947 khân, Unau Aimé Boucher-a leh a fanu pahnih, kum 18 mi Gisèle-i leh kum 11 mi Lucille-i te chu sawrkâr pawisawitute nia thu buai siamsak an nih avânga court hmaa inlan hmasa berte an ni a. Man an nih chhan chu Quebec khawpui chhim lama awm thingtlângahte Quebec Huatna Mei Alh tih tract an sem vâng a ni a; mahse, anni chu dân kalha buaina siamtute anga thlîr chu thil har tak a ni. Unau Boucher-a chu thlawhhma zau vak lo enkawltu, mi inngaitlâwm tak leh ngawichawi tak a ni a, a châng chuan sakawr tawlailîr khalhin khawchhûngah a kal ṭhîn. Mahse, an chhûngkua chuan tract-a târ lan thute avângin sawichhiatnate an tâwk a. Thuhretute hawtu court rorêltu chuan unau Boucher-a’n thiam lohna a nei lohzia finfiahnate chu a pawm duh lo va. Chu aiin, tract chuan inhuatna a tihpunlun avângin Boucher-a chu thiam loh chantîr ngei tûr a ni tia ukil puhna chu a pawmsak a. Chuvângin, chu rorêltu thlîr dân chu: Thu dik sawi chu dân bawhchhiatna a ni tih ang a ni. Aimé Boucher-a leh Gisèle-i chu sawrkâr pawisawina lehkha semtute nia thiam loh chantîr an ni a, Lucille-i pawh tân inah ni hnih khung a ni. Unaute chuan chu thu buai chu, chumi rama rorêlna sâng ber, Supreme Court of Canada-ah an thlen leh a, ngaihtuah tûra pawmsak an ni.

14. Engtin nge Quebec biala kan unaute chuan a kum têla tihduhdahna an tawrh chu an chhân lêt?

¹⁴ Chutih hun chhûng chuan, Quebec biala awm kan unau huaisen takte chuan sawichhiatna leh râwng taka beihna kârah pawh Lalram thuchah an hrilh zawm zêl avângin, malsâwmnate an hmu a. Kum 1946-a tract hmanga campaign neih aṭanga kum li chhûngin Thuhretute chu mi 300 aṭangin 1,000-ah an pung chho ta! *

15, 16. (a) Engtin nge Supreme Court of Canada chuan Unau Boucher-a chhûngkaw thu buai chu a rêl? (b) Chu hnehna chuan kan unaute leh mi dangte chungah eng nghawng nge a neih?

¹⁵ Kum 1950, June thla-ah, rorêltu pakua awmna Supreme Court of Canada chuan unau Aimé Boucher-a thu buai chu a ngaihtuah a. Thla ruk a liam hnu, kum 1950, December 18-ah Court chuan Thuhretute chu hnehna a chantîr a ni. Engvângin nge? Thuhretute tâna ding ukil unau Glen How-a sawi dân chuan thu buai siamsaka awm unaute thusawi Court-in a pawm chhan chu, “sawrkâr pawisawina,” tih ṭawngkam chuan râwng taka thilti tûra fuihpawrhna leh sawrkâr laka helnate a huam a. Mahse, tract-ah chuan “chutiang thilte a tel loh avângin, zalên taka thusawi chu dân phal a ni.” Unau How-a chuan, “Jehova’n hnehna min chantîr dân chu chiang takin ka hmu,” tiin a sawi belh a ni. *

¹⁶ Supreme Court thu tlûkna siam chu Pathian Lalram tâna hnehna ropui a ni tak meuh va. Chu chuan sawrkâr pawisawitu thu leh hlate chhuah a, sem chhuak nia puh Quebec biala Thuhretute chunga thu buai siam, la endik loh 122 chu a titâwp a ni. Chu bâkah, Canada khua leh tuite leh United Kingdom ram hamṭhatna ngainatu pâwlte chuan sawrkâr thiltihte chunga an ngaih dânte chu zalên takin an sawi chhuah theih phah bawk. He hnehna hian Jehova Thuhretute neih zalênna beitu Quebec biala awm Church leh sawrkâr ṭangrual chu a tlâwmtîr a ni. *

17. Engtin nge sawrkâr ṭhenkhatin kan thu hrilh rawngbâwlna chu thunun an tum?

¹⁷ Kristian hmasate ang bawkin, tûn laia Jehova chhiahhlawhte chuan ‘Pathian thu hi mite buma sumdâwn nân an hmang lo.’ (2 Korinth 2:17 chhiar rawh.) Mahse, sawrkâr ṭhenkhat chuan sumdâwnna lama dân siamte hmangin kan rawngbâwlna chu thunun an tum a. Jehova Thuhretute chu mite buma sumdâwng nge an nih a, Pathian rawngbâwltute zâwk tih tifiahtu court thu buai pahnih i lo ngaihtuahho vang u.

18, 19. Engtin nge Denmark rama thuneitute chuan kan thu hrilh rawngbâwlna chu khap beh an tum?

¹⁸ Denmark. Kum 1932, October 1 khân, sumdâwn theihna license tel lo chuan, thu leh hla chhuahte chu zawrh phal a ni lo tih dân chu nemngheh a ni a. Mahse, kan unaute chuan eng license mah an siam lo. A tûkah, thuchhuahtu pangate chuan Copenhagen khawpui aṭanga thlang lam mêl 20 vêla hlaa awm Roskilde-ah thu an va hril a. Nilênga thu an hrilh hnu chuan, an zînga pakhat Unau August Lehmann-a chu a awm lo tih an hria a. Ani chu license tel lova thu leh hla chhuahte a zawrh avângin man a ni.

¹⁹ Kum 1932, December 19-ah August Lehmann-a chu court hmaa hruai a ni a. Sumdâwng a nih loh thu leh mite hnêna Bible ṭanchhan thu leh hla chhuahte a sem thu a sawi a. Court chuan a thusawi chu a pawmsak a. Court chuan: “Hêkna tawktu hi . . . mahnia inchâwm thei a ni a, sum hlêp rûk eng mah a nei lovin, chutiang rilru lah a pu hek lo. Thu leh hla chhuahte a sem avângin sum a sêng zâwk mah a ni,” tiin a sawi. Court chuan Unau Lehmann-a thiltih chu “sumdâwnna thil anga” ngaih theih a nih loh thu sawiin Thuhretute chu thiam a chantir a ni. Mahse, Pathian mite hmêlmate chuan ram chhûnga thu hrilh rawngbâwlna chu khap beh an tum tlat a. (Sâm 94:20) Chuvângin, hêktu lama ukil chuan chumi rama Supreme Court-ah a thlen leh a ni. Engtin nge unaute’n an chhân lêt?

20. Engtin nge Supreme Court of Denmark chuan thu tlûkna a siam a, engtin nge kan unaute chhân lêt?

²⁰ Supreme Court-a thu buai ngaihthlâk hma chawlhkârah chuan, Denmark rama Thuhretute chuan ram pum puiah nasa lehzualin thu an hril a. Kum 1933, October 3, Thawhlehniah, Supreme Court chuan a thu tlûkna siam chu a puang a. Unau August Lehmann-a’n dân a bawhchhe lo tia court hniam zâwkin thu tlûkna a lo siam tawh chu a pawmpui a ni. Chu thu tlûkna siam avângin Thuhretute chuan zalên takin thu an hril zawm thei a ni. Unaute chuan Jehova’n hnehna a chantîr avânga an lâwmzia lantîr nân nasa lehzualin thu an hril a. Court-in thu tlûkna a siam hnu aṭang chuan, Denmark rama kan unaute chuan sawrkâr tihbuaina awm lovin, an rawngbâwlna chu an thawk zawm thei ta a ni.

21, 22. U.S. Supreme Court-in Unau Murdock-a chung thu-ah eng thu tlûkna nge a siam?

²¹ United States. Kum 1940, February 25, Chawlhniah, pioneer Rober Murdock, Jr., leh Thuhretu dang pasarihte chuan Pennsylvania bial, Pittsburgh khawpui bula awm Jeannette hmuna thu an hrilh laiin man an tâwk a. Thu leh hla chhuahte an sem theih nâna license an siam loh avânga thil sual tia puh an ni. Chu an puhna chu U.S. Supreme Court-ah ngaihtuah tûrin a thlen leh a, court chuan a lo pawmsak a ni.

²² Kum 1943, May 3 khân, Supreme Court chuan a thu tlûkna chu puangin, Thuhretute chu thiam a chantîr a. Court chuan license siam tûra phûtna chu a hnâwl a, a chhan chu chutianga phûtna chuan “Sawrkâr Dânpuiin a pêk zalênna a kalh” vâng a ni. Court chuan khawpui chhûnga rorêltute’n, “zalên taka lehkhabu tihchhuahna leh zalên taka biakna chungchânga an dân siamte” chu a hlihsak a. Rorêltu William O. Douglas-a’n rorêltu a tam zâwkte ngaih dân a han sawi chhuah chuan Jehova Thuhretute rawngbâwlna chu “thu hrilh mai emaw, sakhaw lam lehkhabu sem chhuah mai emaw ni lovin, a pahnihin an tikawp a ni,” tiin a sawi a. Chumi hnuah, “He an sakhaw thiltihte hi church-a biakna neihte leh pulpit aṭanga thusawite ang bawkin . . . dân nên a inrem,” tiin a sawi belh a ni.

23. Engvângin nge kum 1943-a court thu buaia kan hnehnate chu vawiin nî thlenga kan tân a pawimawh?

²³ He Supreme Court thu tlûkna siam hi Pathian mite tâna dân lama hnehna pawimawh tak a ni a. Chu chuan sumdâwng kan nih lohzia leh Kristian rawngbâwltute kan nihzia a tihnghet a ni. Kum 1943-a chu ni chhinchhiah tlâkah chuan, Jehova Thuhretute chuan Murdock thu buai pawh tiamin, Supreme Court-ah, an thu buai neih 13 zînga 12-ah hnehna an chang a. Vântlâng hmaa thu hril tûr leh in tin kala rawngbâwl tûra kan neih dikna chungchânga dodâltute’n tûn hnaia min beih lehna court thu buai tam takah, a chung kan târ lan tâk court thu tlûkna siamte chuan thiam min chantîr a ni.

24. Sawrkârin kan thu hrilh rawngbâwlna a khap beh hunah engtin nge kan chhân lêt?

²⁴ Jehova Thuhretute kan nih angin, sawrkârin zalên taka Lalram thuchah hril tûra dân ang thlapa min phalsak hian kan lâwm tak zet a. Mahse, kan thu hrilh rawngbâwlna min khap behsak hunah, kan thu hrilh dânte chu thlâk danglamin, a theih dân kawngin kan hril zawm zêl a. Tirhkohte ang bawkin, “Mihring thu aiin Pathian thu kan zâwm zâwk tûr a ni.” (Tirh. 5:29; Mt. 28:19, 20) Chutih rualin, kan rawngbâwlna min khap behsaknate chu hlîp tûrin court-ahte kan thlen ṭhîn a ni. Entîrna pahnih hi lo ngaihtuah ta ila.

25, 26. Nicaragua rama eng thilthlengin nge Supreme Court-ah thu buai awmtîr a, a rah chhuah chu eng nge ni?

²⁵ Nicaragua. Kum 1952, November 19 khân, missionary leh branch servant Donovan Munsterman-a chu Managua khawpuia Immigration Office-ah a va kal a. An office-a lal ber, Captain Arnoldo Garcia-a’n amah hmu tûra a tih vânga kal a ni. Chu captain chuan Unau Donovan-a hnênah Nicaragua rama Jehova Thuhretu zawng zawng chu “an thurinte puang chhuak tawh lo tûr leh an sakhaw thiltihte ti zawm tawh lo tûra khap beh” a nih thu a hrilh a. Unaupa’n a chhan a zawh chuan, Captain Garcia chuan Thuhretute’n rawngbâwl tûrin sawrkâr hnên aṭanga phalna an neih loh thu leh anni chu communist-te nia puh an nih thu a hrilh a ni. Chutianga min puhtute chu tute nge? Roman Catholic sakhaw hruaitute an ni.

²⁶ Unau Munsterman-a chuan Ministry of Government and Religious leh President Anastasio Somoza Garcia-a hnênah a thlen nghâl a; mahse, eng mah danglamna a awm lo. Chuvângin, unaute chuan an tih dân an thlâk danglam a. An Kingdom Hall-te chu khârin, group tê têin an inkhâwm a, kawtthlêra thu hrilhnate chu chawlhsan rih mah se, Lalram thuchah chu an la hril tho a ni. Chutih rual chuan, Supreme Court of Nicaragua-ah khap behna chu hlihsak tûrin ngenna an theh lût a. Chanchinbute chuan khab behna leh ngenna chungchângte chu nasa takin an tihdarh a, Supreme Court pawhin unaute ngenna chu ngaihtuah tûrin a rem ti ta a ni. Eng nge a rah chhuah? Kum 1953, June 19-ah Supreme Court chuan inlungrual takin Thuhretute chu hnehna a chantîr a ni. Khap behna chuan ram dân puiin a pêk zalên taka ngaih dân sawi chhuah theihna te, mahni chhia leh ṭha hriatna hman theihna te, leh mahni thurin puan chhuah theihnate chu a bawhchhia tih Court chuan a sawi a. Chu bâkah, Nicaragua sawrkâr leh Thuhretute inlaichînna chu tûn hma anga neih leh a nih tûr thu a puang bawk.

27. Engvângin nge Nicaragua rama mite chuan Court thu tlûkna siam chu mak an tih a, engtin nge unaute’n chu hnehna chu an thlîr?

²⁷ Nicaragua rama mite chuan Thuhretute lama Supreme Court a ṭan avângin mak an ti hle a. Chutih hun hma zawng chuan, sakhaw hruaitute’n thil an tih theih êm avângin, Court chuan anmahni kalh zâwnga thiltih a duh ngai lo. Chu bâkah, sawrkâr thuneitute pawhin an thuneihna an kenkawh tlat ṭhin avângin, an thu tlûkna siamte chu court-in a dodâl ngai mang lo. Chutiang a nih avângin, unaute chuan an Lal Isua hnên aṭanga humhimna an dawn avâng leh thu an hrilh zawm zêl avâng chauhva hnehna chang an ni tih an ring tlat a ni.—Tirh. 1:8.

28, 29. Kum 1985 chho bâwr vêl khân, Zaire ramah eng thil nge thleng?

²⁸ Zaire. Kum 1980 chho bâwr vêl khân, Zaire ram tia hriat, tûna Democratic Republic of Congo ni ta-ah hian Thuhretu mi 35,000 vêl an awm a. Branch chuan Lalram rawngbâwlnain hma a sâwn zêl theih nân biakna atâna hman tûr inte a sak belh a. Kum 1985, December thla khân, an khawpui ber Kinshasa-ah international inkhâwmpui neih a ni a, khawvêl hmun hrang hrang aṭanga lo kal palai mi 32,000-te chuan inkhâwmpuina stadium chu an luah khat a ni. Mahse, chumi hnu chuan, Jehova chhiahhlawhte dinhmun chu a inthlâk danglam ta. Eng thil nge thleng?

²⁹ Duplessis sipaite tihduhdahna lo tuar tawh ṭhîn, Canada ram, Quebec biala missionary Unaupa Marcel Filteau-a chu, chutih hun lai chuan Zaire ramah rawngbâwlin a awm a. Ani chuan thil awm dânte chu heti hian a sawi a ni: “Kum 1986, March 12-ah, mawhphurhna nei unaute chuan Zaire rama Jehova Thuhretute rawngbâwlna chu dân anga khap beh a ni tih thu ziahna lehkha an dawng a ni,” tiin. Chu khap behna lehkha chu ram president Mobutu Sese Seko-a’n hming a ziah hnan a ni.

30. Branch Committee-in eng thu tlûkna pawimawh tak nge a siam a ngaih a, eng ti tûrin nge thu tlûkna an siam?

³⁰ A tûkah sawrkâr radio chuan: “Zaire ramah hian Jehova Thuhretute aw chu hriat a ni leh tawh ngai lo vang,” tiin a puang a. Tichuan, tihduhdahnain a rawn zui ta nghâl a. Kingdom Hall-te chu tihchhiat a ni a, kan unaute chu an rawk a, an man a, tân inahte an khung a ni. Kum 1988, October 12-ah sawrkârin kan inawpna pâwl thil neihte chu a chhuhsak a, sipai pâwl pakhat chuan branch compound-te chu a lâksak a ni. Mawhphurhna nei unaute chuan President Mobutu-a hnênah ngenna an theh lût a; mahse, chhân lêtna an dawng lo. Chuvângin, Branch Committee chuan “Supreme Court-ah kan thlen dâwn ngei nia, kan nghâk rih dâwn,” tih chungchângah thu tlûkna pawimawh tak a siam a ngai ta a ni. Chutih hun laia missionary leh Branch Committee coordinator Timothy Holmes-a chuan heti hian a sawi a ni: “Finna leh kaihhruaina atân Jehova kan rinchhan tlat a,” tiin. Ṭawngṭaina nêna ngun taka an ngaihtuah hnuah, Branch committee chuan dân anga hma lâk chu a la hun lo niin a hria a. Chu aiin, an unaute ngaihsak leh thu hrilh rawngbâwlna chhun zawm theih dân kawngte chu an ngaihven zâwk a ni.

31, 32. Zaire rama Supreme Court-in eng thu tlûkna chhinchhiah tlâk tak nge a siam a, chu chuan unaute chungah eng nghawng nge a neih?

³¹ Kum eng emaw zât a liam ta a. Thuhretute chunga nêksâwrnate pawh a kiamin, ram chhûngah mihring dikna chanvo zahnate pawh a rawn pung chho ta zêl a. Branch Committee chuan Thuhretute chunga khap behna chu Zaire rama Supreme Court of Justice-a thlen a hun ta niin an hria a ni. Chhinchhiah tlâk takin, Supreme Court chuan ngaihtuah a remti a. Tichuan, President hminga khap behna thupêk chhuah a nih aṭanga kum sarih dâwn lai a liam hnu, kum 1993, January 8-ah, Court chuan Thuhretute chunga sawrkâr thiltih chu dân kalh a ni tih puangin, khap behna chu a hlihsak ta a ni. Chumi awmzia chu han ngaihtuah teh! Rorêltute chuan an nunna thâpin ram President thu tlûkna siam chu an paih thla a ni chu! Unau Holmes-a chuan: “Thu buai chai a nih chhûng chuan, Jehova’n thilte a thlâk danglam theih dânte chu kan hmu a ni,” tiin a sawi. (Dan. 2:21) Chu hnehna chuan unaute rinna a tichak hle a. Anni chuan an Lal Isua’n a mite chu hma lâk hun leh hma lâk dân tûrte chungchângah kaihhruaina a pe niin an hria a ni.

³² Khap behna hlih a nih tâkah chuan, branch office chuan missionary-te chu ram chhûngah a luhtîr leh a, branch tharte chu sak leh a ni a, Bible ṭanchhan thu leh hla chhuahte pawh lâk luh leh a ni ta a ni. * Jehova’n thlarau lama a mite a humhim dân khawvêl pum huapa Pathian chhiahhlawhte’n an hmu chu a va lâwmawm tak êm!—Is. 52:10.

33. Court-a thu buai ṭhenkhat kan thlîr lêtna aṭangin eng nge kan hriat?

³³ Kan enho tâk dân lama beihna ṭhenkhat chuan Isua chu: “In hmêlma zawng zawngin an dodâla an hnial theih lohna tûr kâ leh finna ka pe dâwn si che u,” tia a thutiam nêna milin a nung tih a finfiah a ni. (Luka 21:12-15 chhiar rawh.) A châng chuan, Jehova’n a mite humhim nân tûn laia Gamaliela anga sawi theih mite chu a din chhuahtîr, a nih loh leh dik taka rorêl tûrin rorêltute leh ukil huaisen takte chu a chêttîr tih a chiang hle. Jehova chuan min dodâltute hriam chherte chu a tihbilsak a ni. (Isaia 54:17 chhiar rawh.) Dodâlnate chuan Jehova rawngbâwlna chu a dang thei lo.

34. Engvângin nge dân lama hnehna kan channate chu chhinchhiah tlâk tak a nih a, chûngte chuan eng nge a finfiah? (“ Lalram Puanchhuahna Tihmasâwntu High Court-a Hnehna Chhinchhiah Tlâkte,” tih bâwm chu en bawk rawh.)

³⁴ Engvângin nge dân lama kan hnehna chante chu chhinchhiah tlâk tak a nih? Hei hi han ngaihtuah teh: Jehova Thuhretute chu mi hmingthang tak emaw, thiltithei tak emaw an ni lo va. Vote kan thlâk lo va, politics thiltihahte kan inhnamhnawih lo va, politician-te lah kan thlâwp hek lo. Chu bâkah, high court-a thu buai neiha ṭanpuitu unaute chu a tlângpui thuin, “lehkha thiam lo, mi mâwl” mai an ni. (Tirh. 4:13) Chuvângin, mihring thlîrna aṭang chuan, court-te chuan min dodâltu sakhaw lam leh politics lama thiltithei tak takte kalh a, min ṭanpuina tûr chhan a awm lo. Nimahsela, court-te chuan hnehna min va chantîr zing tak êm! Dân lama kan hnehnate chuan “Pathian mithmuhin Kristaah chuan thu kan sawi ṭhîn,” tih a finfiah a ni. (2 Kor. 2:17) Chuvângin, tirhkoh Paula angin, “Lalpa chu mi ṭanpuitu a ni, ka hlau lo vang,” tiin kan sawi thei a ni.—Heb. 13:6.