Chhiartute Zawhna

Korinth thawn hnih 6:14-a “ring lo mite,” tia Paula’n a sawite hi tute nge ni?

Korinth thawn hnih 6:14-ah chuan: “Ring lo mite nên rual lo takin nghâwngkawl bât dûnin awm suh u,” tiin kan chhiar a. A chung leh hnuai thute kan chhiar chuan, helai thu hi Paula’n Kristian kohhran chhûnga mi ni lote a sawina a ni tih chiang takin kan hre thei a. He hriatthiam dân hi Bible châng danga Paula’n “ring lo mi,” tih leh “ring lo mite [a nih loh leh, ring lote],” tih ṭawngkam a hmannate nên pawh a inmil a ni.

Entîr nân, Paula chuan Kristiante chu “ring lote” hmaa rorêlna hmuna an kal avângin na takin a zilhhau va. (1 Korinth 6:6) Hetah hian, ring lote tih ṭawngkam hi Korinth khuaa rorêlna ina rorêltute sawina a ni. A lehkhathawn pahnihnaah, Paula chuan Setana’n ‘ring lote rilru a tihdelsak’ thu a sawi a. Chûng ring lo mite mit chu chanchin ṭha lakah ‘khuhin a awm a ni.’ Anni chuan Jehova rawngbâwl tumna an nei lo; a hmain Paula chuan: “An thinlung chu Lalpa lama a hawi tik apiangin, khuhna chu lâk bo a ni,” tiin a lo sawi tawh si a.—2 Korinth 3:16; 4:4.

Ring lo mite zînga ṭhenkhat chu suahsualna leh milem biakna kawnga inhnamhnawihte an ni a. (2 Korinth 6:15, 16) Mahse, ring lo mi zawng zawngte chu Jehova chhiahhlawhte dodâltu an ni vek lo. A ṭhen chuan thutak an ngaihven a. An zînga tam tak chu Kristian sakhaw vuantu an kawppuite nên hlim takin an chêng dûn a ni. (1 Korinth 7:12-14; 10:27; 14:22-25; 1 Petera 3:1, 2) Mahse, Paula chuan a chunga kan târ lan tâk Kristian kohhran zînga mi ni lote sawi nân “ring lote,” tih ṭawngkam chu a hmang fo va, chu chu Bible châng danga “Lalpa ringtute,” tih ṭawngkam aṭanga lo chhuak a ni.—Tirhkohte 2:41; 5:14, C.L. Re-edited; 8:12, 13.

Korinth thawn hnih 6:14-naa kan hmuh thu bul hi Kristiante nun kawng hrang hranga kaihruaitu pawimawh tak a nih bâkah, kawppui zawng mêkte hnêna thurâwn pawimawh tak pêk a nih hian sawi tel fo a ni ṭhîn a. (Matthaia 19:4-6) Inpumpêka baptisma chang tawh Kristian chuan chûng ring lo mite zîngah chuan a kawppui tûr a zawng lo; kan thil ngaihhlut te, thiltum te, leh rinnate chu a inang lo hle si a.

A nih leh, chanchin ṭha pawma Kristian kohhrana rawn inkhâwm ṭhînte chungchâng hi eng nge ni ve? Baptisma la chang lo thuchhuahtute chungchâng pawh hi engtin nge ni ang? Anni chu ring lo mite zînga mi an ni em? Ni lo. Chanchin ṭha pawm a, baptisma chang thei tûra zawi zawia hmasâwn mêkte chu ring lo mite tia sawi tûr an ni lo. (Rom 10:10; 2 Korinth 4:13) Kornelia pawh kha baptisma a chan hma khân ‘Pathian ngaihsak mi leh Pathian ṭih mi,’ tia koh a ni si a.—Tirhkohte 10:2.

A nih chuan, 2 Korinth 6:14-naa Paula ṭawngkam khauh tak hian baptisma la chang lo thuchhuahtute a huam tel loh avâng maiin, inpumpêk tawh Kristian tân chutiang mi kawppuia atâna thlan chu a finthlâk ang em? Chu chu a finthlâk loh hle. Engvângin nge? Pasal sûn tawh Kristian hmeithaite tâna Paula pêk fuihna tlang takah hian a chhan kan hmu thei a ni. Ani chuan: “A duh apiang a nei thei ang; amaherawhchu, Lalpaa awm mi chauh a ni tûr a ni,” tiin a sawi. (1 Korinth 7:39) Chu fuihna nêna inmilin, inpumpêk tawh Kristiante chu “Lapaa awm mi chauh” kawppui atâna zawng tûra fuih an ni

“Lalpaa awm mi,” tih leh chumi anpui ṭawngkam “Kristaa mi,” tih awmzia chu eng nge ni? Paula chuan “Kristaa mi,” a nih loh leh “Lalpaa awm mi” chungchâng chu Rom 16:8-10 leh Kolossa 4:7-ah a sawi a. Hêng Bible chângte hi i chhiar a nih chuan, chûng mite chu ‘hnathawpuite,’ ‘duh takte,’ ‘unau duh takte,’ ‘rawngbâwltu rinawmte,’ leh ‘bawihpuite’ an ni tih i hria ang.

A nih leh, mi chu eng hunah nge ‘Lalpa bawih’ a rawn nih? Mahni hrehawm pawisa lo va, bawihin a tih tûrte inhuam taka a tih hian a ni. Isua chuan: “Tu pawhin mi zui a duh chuan, mahni hrehawm pawisa lovin, a kraws puin mi zui rawh se,” tiin a sawi. (Matthaia 16:24) Mi chu Pathian hnêna a inpumpêk hian, Isua hnungzui ṭanin Pathian duh zâwngte chu theih tâwp chhuaha tih a tum tlat a. Chumi hnuah, mahni duh thu ngeia baptisma changin, Pathian Jehova hmaa ding tlâka ruat rawngbâwltu a rawn ni ta a ni. a Chuvângin, ‘Lalpaa awm mi nupui pasala nei,’ tih awmzia chu ringtu dik tak a nihzia lantîrtu, “Pathian leh Lalpa Isua Krista bawih” ni tûra inpumpêk tawhte chauh nupui pasalah kan nei tûr tihna a ni.—Jakoba 1:1.

Jehova Thuhretute nêna Bible zir a, thlarau lama hmasâwn tu emaw chuan fak a phu a. Mahse, ani chu Jehova hnêna inpumpêk a la nih loh bâkah, rawngbâwl tûin a nun chu a la hlân rih lo a ni. A ṭûl angin a inthlâk danglam chho mêk a. Nupui pasal neih ang chi nun thlâk danglamtu thu tlûkna pawimawh tak siam tûr chuan, inpumpêka baptisma chang thei tûrin inthlâk danglamna lian tak a siam hmasak a ngai a ni.

A nih leh, Kristian chu Bible zirlai hmasâwn chak tak tu emaw nêna inhmêlhriattîrin, baptisma a chan hma loh nupui pasal atâna nghâk rih tûrin kan fuih tûr a ni em? Ni lo. Inpumpêk tawh Kristianin ani chu baptisma a chan hnuah chauh neih a tum tih a hriatna chuan zirlai chu ngaih dân dik lo a neihtîr thei a ni.

A enga pawh chu ni se, tute pawh hi baptisma la chang lo thuchhuahtu kan nih chhûng chu hun eng emawti chhûng chauh a ni a. Chuvângin, Lalpaa awm mi chauh nupui pasala nei tûra fuihna hi a inâwm hle a ni. A nih leh, nupui pasal nei tûra kum tling tawh Kristian chhûngkuaa seilian, kum tam tak chhûng baptisma la chang lo thuchhuahtu nia rawngbâwl tawh leh inkhâwmte pawh pelh ngai lo tu emaw chungchâng chu engtin nge ni ang? Tûn thlenga Jehova hnêna inpumpêka a nun a la hlan loh chhan chu eng nge ni? Engvângin nge chutianga tih chu a hreh? Rinhlehna eng emaw a nei a ni thei ang em? Ani chu ring lo mi ni lo mah se, “Lalpaa awm mi,” tia sawi theih erawh a ni lo.

Nupui pasal neih chungchânga Paula fuihna chu kan hlâwkpui atâna pêk a ni a. (Isaia 48:17) Nupate chu Jehova hnêna inpumpêk ve ve tawh an nih hian, an inneihnaa thlarau lam lungphûm chu a nghet lehzual a ni. An thil ngaihhlutte a inan bâkah, thiltum inang an nei a. Chu chuan nupa hlim tak a nihtîr a ni. A pawimawh ber chu, miin ‘Lalpaa awm mi nupui pasala a neih’ hian Jehova chunga a rinawmzia a lantîr a, ‘a laka rinawmte tân Jehova chu a rinawm’ avângin, chutiang mi chuan malsâwmna tam tak a dawng a ni.—Sâm 18:25, C.L. Re-edited.

[Footnote-te]

[Thu lâk chhuate]

‘A laka rinawmte tân Jehova chu a rinawm’