BIBLE-IN NUN A THLAK DANGLAM

SCOTLAND rama pa pakhat chuan sumdâwnna lama hlawhtlinna aia hlu zâwk eng thil nge a hmuh chhuah? Engin nge Brazil rama pa pakhat chu nungchang bawlhhlawhna leh damdawi ruih theih nêna chawhpawlh mei zial zûk chu bânsan tûra ṭanpui? Engtin nge Slovenia rama pa pakhat chuan zu ngawl vei chu a bânsan theih? An thusawite hi chhiar ang che.

“Ka Nun Chu A Nuam Hle.”—JOHN RICKETTS-A

PIAN KUM: 1958

PIANNA RAM: SCOTLAND

CHANCHIN: SUMDAWNG HLAWHTLING TAK

KA TUN HMA NUN: Chhûngkaw pângngai taka seilen chu nuam ka ti hle a. Ka pa hi British officer a nih avângin kan chhûngkua chu kan insawn zing hle. Scotland ram mai bâkah, England te, Germany te, Kenya te, Malaysia te, Ireland te, leh Kupra-ahte kan chêng a. Kum riat ka nih aṭangin Scotland rama boarding school-ahte ka lût kual a. A tâwpah Cambridge University aṭangin ka graduate ta a ni.

Kum 20 mi ka nihin, kum riat chhûng ka thawhna tuialhthei hmanga sumdâwnna lamah chuan ka inhmang ṭan a. A tîr chuan chu hna chu South America-ah ka thawk a, a hnuah Africa khawmual lamah ka thawk leh a, a tâwpah Western Australia lamah ka thawk leh a ni. Australia-a ka awm lai chuan, investment firm ka din a; mahse, a hnuah ka hralh leh a ni.

Chu ka firm hralhna aṭanga ka sum hmuhte chuan kum 40 nia pension thei tûrin min ṭanpui a. Tichuan, ka hunte chu zin kual vêl nân ka hmang a. Australia chu vawi hnih ngawt bike hmangin ka fang chhuak tawh a; chu bâkah, khawvêl hmun hrang hrangah ka zin kual bawk. Ka nun chu a nuam hle a ni.

BIBLE-IN KA NUN A THLAK DANGLAM DAN: Ka eizawnna ka chawlhsan hma aṭang tawhin, nun nuam tak min pêk avânga Pathian chunga ka lâwmzia lantîr theih dân kawngte ka zawng ṭhîn a. Ka naupan lai aṭanga ka inkhâwm ṭhinna Anglican Church chu ka bêl leh ṭan a. Mahse, chu kohhran chuan an mi leh sate chu Bible zirtîrnate an hrilh ngai mang lo. A hnuah, Mormon sakhua chu ka zawm leh a; mahse, Bible an rin loh avângin ka chhuahsan leh a ni.

Ni khat chu, Jehova thuhretute’n ka kawngka an rawn kik a. An zirtîrnate chuan Bible a ṭanchhan tih ka hre nghâl thuai a. Bible châng min chhiarsak zînga pakhat chu 1 Timothea 2:3, 4 a ni a. Chûng Bible chângte chuan Pathianin “mi zawng zawng chhandama awmah leh thutak hriaah a duh,” tih a sawi. Thuhretute chuan hriatna satliah mai ni lovin, Bible ṭanchhan hriatna dik tak an sawi uar tih ka hriatna chuan ka rilru a khawih hle.

Jehova Thuhretute nêna Bible zirna chuan chutiang hriatna dik chu nei tûrin min ṭanpui a. Entîr nân, Pathian leh Isua chu hriatthiam theih loh Trinity zînga mi ni lovin, mi hrang ve ve an ni zâwk tih ka hre ta a ni. (Johana 14:28; 1 Korinth 11:3) Chu thutak mâwlmang tak ka han hria chu ka lâwm hle a. Chutih rualin, hriatthiam theih loh thilte hriatthiam tuma ka hun leh tha ka lo sên tawhnate kha uihawm ka ti hle!

Jehova Thuhretute inkhâwmahte chuan ka tel ṭan ta thuai a. An nêlawmnate leh nungchang lama tehna sâng takte an nunpuinate ka hmuh chuan mak ka ti hle a—mi thianghlim ang mai an ni. Thinlung taka an mi hmangaihna chuan sakhaw dik ka hmu ta tih rinnghehna min neihtîr a ni.—Johana 13:35.

KA HLAWKPUI DAN: Baptisma ka chan hnu chuan, hmeichhe fel tak Diane-i nên kan intawng a. Jehova Thuhretu chhûngkuaa seilian a ni a, ka thinglung hnehtu mize ṭha tam tak a nei a ni. A hnuah kan innei a. Ka tâna ṭhian ṭha tak a nihna leh a mi thlâwp tlatnate chu Jehova hnên aṭanga ka dawn malsâwmna a ni tak meuh a ni.

Kan nupain chanchin ṭha puang chhuaktute mamawh zualna hmuna rawngbâwl chu kan duh hle a. Kum 2010-ah Central America-a Belize-ah kan insawn a. Chutah chuan Pathian hmangaih a, a chanchin hriat chian lehzual duhtute hnênah thu kan hril ṭhîn a ni.

Pathian leh a Thu, Bible chungchânga thu dik ka hriatna chuan rilrua thlamuanna min pe a. Hunbi kima rawngbâwltu ka nih angin, mi tam takte hnêna Bible chungchâng ka zirtîr thei chu ka lâwm hle a. Ka chunga a thlen ang bawka, Bible thutakin mi dangte nun a ṭha zâwnga a thlâk danglam hmuh aia ṭha thil dang a awm lo. A tâwpah, nun nuam tak min pêk avânga Pathian chunga ka lawmzia lantîr theih dân kawng ṭha ber chu ka hre ta a ni.

“Ka Chungah An Ṭha Hle.”—MAURÍCIO ARAÚJO-A

PIAN KUM: 1967

PIANNA RAM: BRAZIL

CHANCHIN: NUNGCHANG BAWLHHLAWHNAA INHMANG ṬHIN

KA TUN HMA NUN: Brazil ram, São Paulo state-a khaw te tak tê Avaré-ah ka piang a. Chuta chêngte chu mi rethei tê tê kan ni tlângpui.

Ka nuin min pai lai hian ka pain min boralsan a. Ka naupan lai chuan ka nu awm loh hlânin a thawmhnawte chu ka ha chhin ṭhîn a. Hmeichhe mizia leh rilru ang chu ka nei chhovin, mite chuan anpui kawp chîng angin min thlîr ṭan a. Hunte a liam zêl chuan, ka kum rualpui mipate leh kum tling tawh mipa dangte nên sex kan hmang ṭhîn a ni.

Kum 20 ka tlin dâwn hnaih lam chuan, zu dâwrah te, nightclub-ah te, leh biak inahte hial pawh, ka hmuh theihna tûr hmun apiangah sex hmanpui tûr (mipa an ni emaw, hmeichhia an ni emaw) ka zawng kual ṭhîn a. Carnival kût a lo thlen chuan hmeichhe thawmhnaw hain, samba-school parade-ahte ka lâm ṭhîn a. Ka lâr thei hle a ni.

Ka ṭhian ṭhenkhat chu anpui kawp chîngte an nih mai bâkah, inzuarte leh damdawi ngawl veite an ni hlawm a. An zînga ṭhenkhat chuan damdawi ruih theih nêna chawhpawlh mei zial zu ve tûrin min ti ṭhîn a, a hnu rei lo têah a ngawl ka vei ve ta a ni. A châng chuan zan khuain ka zu ṭhîn a. A châng leh ṭhiante kâwm lovin ni lêngin ka zu ṭhîn. Ka chêr chho ta hle a, mite chuan AIDS vei niin min sawi hial a ni.

BIBLE-IN KA NUN A THLAK DANGLAM DAN: Chutih hun lai vêl chuan Jehova Thuhreute nên kan intawng a. Anni chu ka chungah an ṭha hle. Bible châng min chhiarsak zînga pakhat chu Roma 10:13-na: “Tu pawh Lalpa hming lam apiangte chu chhandamin an awm,” tih hi a ni a. Chu Bible châng chuan Jehova hming lam a pawimawhzia hre tûrin min ṭanpui a. Zankhuaa damdawi ruih theih nêna chawhpawlh mei zial ka zûk chângte chuan, tukverh hawngin vân lam ka en chho va, ṭap chunga Jehova hnêna ṭawngṭaiin min ṭanpui tûrin ka ngên ṭhîn a ni.

Damdawi hman sualnain ka nun a tihchhiat dân a hmuh avânga rilru na taka awm ka nu chu ka ngaihtuah hle a; tichuan, ka thil chînte bânsan chu ka tum ta a ni. A hnu lawkah, Thuhretute nêna Bible zir chu ka remti ta a. Anni chuan Bible zirna hian damdawi khawih bânsan tum nghet tlat tûra min ṭanpui tûr thu min hrilh a​—an sawi ang ngeiin min ṭanpui ta rêng a ni!

Bible ka han zir chhoh zêl chuan, ka nun dân ka thlâk a ngai tih ka hre ta a. Ka naupan lai aṭanga ka nihna a nih avangin, a bîk takin, anpui kawp bânsan chu harsa ka ti hle. Mahse, min ṭanpuitu pakhat chu, ka ṭhian kawmte thlâk hi a ni. Tûn hmaa ka ṭhiante chu ka kâwm tawh lo va, zu dâwr leh nightclub-a kal pawh ka bânsan bawk.

Chûng inthlâk danglamnate siam chu awlsam lo mah se, Jehova’n min ngaihsakin ka harsatnate hi min hriatthiampui tih hriatna chuan thlamuanna min pe a. (1 Johana 3:19, 20) Kum 2002-ah chuan anpui kawpna nêna inkûngkaih thil zawng zawng chu ka bânsan vek a, chumi kum vêk chuan Jehova Thuhretu pakhat niin baptisma ka chang ta a ni

KA HLAWKPUI DAN: Ka nu chuan ka inthlâk danglam tih a hmuh chuan mak a ti hle a; tichuan, ani pawhin Bible a zir ṭan ve ta a. Mahse, lungchhiatthlâk takin a zeng ta thut a. Chuti chung pawhin, Pathian Jehova a hmangaihna leh Bible thutak a ngainatna chu a ṭhang chho zêl a ni.

Kum riat chhûng chu hunbi kima rawngbâwlnaah inhmang tawhin, ka hun tam zâwk chu Bible chungchâng mite zirtîr nân ka hmang ṭhîn a. Chutih rualin, châkna dik lo ka do a ngaih chângte a lawm ṭhîn. Mahse, chûng châknate tihpuitlin lohnain Jehova a tilâwm tih ka hriatna chuan thlamuanna min pe a ni.

Jehova nêna inlaichînna ṭha neihna leh amah tilâwm zâwnga nun hmanna chuan mahni inzahna min neihtîr leh a. Tûnah chuan, mi hlim thei tak ka ni tawh a ni.

“Barrel Mawng Nei Lo Ang Mai Ka Ni.”—LUKA ŠUC-A

PIAN KUM: 1975

PIANNA RAM: SLOVENIA

CHANCHIN: ZU HEH TAK

KA TUN HMA NUN: Slovenia khawpui Ljubljana-ah ka piang a. Kum li ka tlin hma kha chuan ka naupan lai nun chu a nuam hle. Mahse, ka pa chu mahni a intihlum a. Chu thilthleng lungchhiatthlâk tak a thlen hnu chuan, kan unau hniha min châwm tûrin ka nu chu a thawkrim hle a ni.

Kum 15 mi ka nih chuan ka pi hnênah ka awm a. Ka ṭhian tam takte chu ka pi in bul hnaia an awm hlawm avângin, ka pi hnêna awm chu nuam ka ti hle a. Ka nu bula ka awm lai aiin ka zalên zâwk bawk. Kum 16 mi ka nih chuan, chawlhkâr tâwpa zu in ṭhîn mite chu ka kâwm ṭan a. Ka sam ka zuah sei a, maksak tak taka inchheiin, mei zial ka zu ṭan bawk.

Damdawi ruih theih hrang hrangte chu ti chhin mah ila, zu ruih chu nuam ka tih ber avângin zu ka in deuh ber a. A hnu lawkah, wine no hnih khat vêl in ṭhîn kha, ṭum khatah ûm khat aia tamte ka in chho ta a. Ka dose a sângin, ka inthup thiam hle a. Zu rim ka nam deuh reng a ni ber mai. Mahse, tu mahin wine leh beer ûm eng emaw zât ka in tih leh a châng chuan vodka nên ka chawhpawlh ṭhîn tih rin ngaihna rêng an hre lo!

Ka ṭhiante aia a lêt hniha zu ka in theih avângin, zâna lamna hmun aṭanga kan haw dâwn te hian kan zu in zât chu in ang vek mah se, ka ṭhiante bawihsâwmtu ka ni ziah a. Ni khat chu, ka ṭhiante’n tui zêm mawng nei lo ang mai ka nih thu an sawi chu ka hre ru a—chu chu Slovenian ṭawng chuan zu in thei uchuak tu emaw hmuhsitna leh ngaihnêpna ṭawngkam a ni. An mi sawi dân chuan ka rilru a tina hle.

Ka nuna ka thiltihte chu ka ngaihtuah ṭan ta a. Hlutna rêng nei lo nia inhriatna ka nei a. Ka nuna ka thiltih eng pawh hian awmzia a nei lo ni ber hian ka hria.

BIBLE-IN KA NUN A THLAK DANGLAM DAN: Chutih hun lai vêl chuan, ka classmate pakhat chu a danglam ta hle tih ka hmu a; ani chu a zaidam tawh hle a ni. A inthlâk danglam chhan hriat ka châk avângin coffee dâwra chawlhpuiah ka sâwm a. Kan inkawm lai chuan, Jehova Thuhretute nêna Bible a zir ṭan thu min hrilh a. A thu zir ṭhenkhat chu min hrilh chhâwng a, sakhaw lam chungchâng eng mah zirtîr ka nih ngai loh avângin a thu min hrilhte chu ka tân chuan thil thar vek a ni. Tichuan, keipawh Thuhretute inkhâwmahte chuan tel ṭanin, anmahni nên Bible ka zir ve ta a ni.

Bible zirna chuan thutak thiltithei leh rilru khawih thei tak takte hre thiam tûrin min ṭanpui a. Entîr nân, Bible-in ‘ni hnuhnûng,’ tia a sawi hunah kan chêng mêk tih ka zir a. (2 Timothea 3:1-5) Chu bâkah, Pathianin lei ata mi sual zawng zawngte chu tiboral vekin, mi ṭhate chu Paradis-a chatuana nun theihna hun remchâng a pe dâwn tih ka zir bawk. (Sâm 37:29) Chûng mi ṭhate zînga ka tel ve theih nân, ka nun dân thlâk danglam duhna nghet tak ka nei ta a ni.

Bible ka zirna aṭanga ka hriat thutakte chu ka ṭhiante hnênah ka hrilh chhâwng ṭan a. An zavai deuhthaw chuan ka thusawite avângin min nuihsawh mah se, ka chunga an rilru put hmang dik tak ka hriat tâk avângin ka lâwm hle. Min chhân lêt dân chuan ṭhian dik tak an ni lo tih hre thiam tûrin min ṭanpui a. Chu bâkah, zu ka in ṭhinna leh ka ṭhian thlante hian inzawmna a nei tih ka hre chhuak bawk. Anni chuan chawlhkâr tâwpa zu in hun tûr chu an nghâkhlel thei hle.

Chûng ka ṭhiante chu kâwm tawh lovin, Jehova Thuhretute zîngah ṭhian ṭha takte ka nei tawh a. Anni chu thinlung taka Pathian hmangaihtute leh a tehnate nunpui tum tlattute an nih avângin, an zînga tel vena chuan chakna nasa tak min pe a. Zawi zawiin, a lutuka zu in pawh chu ka bânsan thei ta a ni.

KA HLAWKPUI DAN: Ka hlim theih nâna zu ka in kher a ngaih tawh loh avângin Jehova chungah ka lâwm tak zet a. Tûn hma ang khân ka nun la hmang zawm zel ila chuan, ka chungah eng thilte nge thleng ang tih pawh ka hre lo. Amaherawhchu, tûna ka nun hi a ṭha zâwk hle tih erawh ka chiang a ni.

Slovenia rama Jehova Thuhretute branch office-ah kum sarih lai rawng ka bâwl tawh a. Pathian Jehova hriatna leh a rawngbâwlna hian nun awmze dik tak min neihtîr a ni.