BIBLE-IN NUN A THLAK DANGLAM

ENGTIN nge a naupan laia chanchin lungchhiatthlâk tak nei ṭhalai hmeichhe pakhat chuan nun awmze dik tak a zawn hmuh? Engin nge politics kal phung dodâltu râwng tak pakhat chu sakhaw rawngbâwltu nunnêm tak ni tûra chêttîr? A chhânna hre tûrin he thuziak hi chhiar ang che.

“Hmangaihna Leh Ngaihsakna Ka Dawng Lo.”—INNA LEZHNINA-I

PIAN KUM: 1981

PIANNA RAM: RUSSIA

CHANCHIN: NAUPAN LAIA CHANCHIN LUNGCHHIATTHLAK TAK NEI

KA TUN HMA NUN: Ka nu leh pate chu bengngawng an ni a, kei pawh bengngawngsaa piang ka ni. Kum ruk ka nih thlengin ka nun chu a hlimawm hle a. A hnuah ka nu leh pate chu an inṭhen a. La naupang hle mah ila, inṭhen awmzia chu ka hretthiam tawh a, chu chuan ka rilru a tina tak zet a ni. An inṭhen hnu chuan, ka pa leh ka u mipa chu Troitsk-ah an awm a, kei leh ka nu chu Chelyabinsk-ah kan insawn a ni. A hnuah ka nu chuan pasal dang a nei leh a. Ka pahrawn chu zu ngawl vei a ni a, ka nu nên kan pahnihin kut min thlâk fo ṭhîn a ni.

Kum 1993-ah ka u chu tuiah a tla hlum a. Chu thilthleng chuan kan chhûngkua chu nasa takin a nghawng a ni. Ka nu chuan zu in ṭanin, ka pahrawn ang bawkin ṭha lo takin min cheibâwl ṭan a. Nun ṭha zâwk neih tumin theih tâwp chhuah mah ila, hmangaihna leh ngaihsakna ka dawng lo. Thlamuanna zawngin kohhran hrang hrangah ka inkhâwm kual a; mahse, khawiah mah thlamuanna ka hmu lo.

BIBLE-IN KA NUN A THLAK DANGLAM DAN: Kum 13 mi ka nihin, Jehova Thuhretute zînga mi ka classmate pakhat chuan Bible-a mi ṭhenkhat chanchin chu min hrilh a. Dinhmun khirh tak an tâwk chung pawha Pathian rawng bâwltu Nova leh Joba te ang chanchin zir chu nuam ka ti thei hle. A hnu rei vak lovah, Jehova Thuhretute chuan Bible min zirpui a, an inkhâwmnaahte ka tel ṭhîn a ni.

Bible ka zirna chuan thutak ngaihvenawm tak takte min hriatthiamtîr a. Pathianin hming a nei tih hriatna chuan ka rilru a khawih hle. (Sâm 83:18) Bible-in “ni hnuhnûnga” thil thleng tûrte dik takin a lo sawi lâwk tih ka hriat chuan mak ka ti hle a. (2 Timothea 3:1-5) Chu bâkah, thawhlehna beiseina chungchâng ka han zir chuan, chu chuan min tihlim tak zet a ni. Han ngaihtuah teh—ka u ka hmu leh dâwn a nih chu!—Johana 5:28, 29.

Amaherawhchu, ka thu hriat tharte chu mi zawng zawngin an hlimpui vek lo. Ka nu leh ka pahrawn chuan Jehova Thuhretute chu an haw hle a. Ka Bible zir chu tâwpsantîr min tum a. Mahse, ka thu zirte chu ka duh êm avângin tâwpsan mai ka tum lo.

Chhûngte dodâlna hmachhawn hi thil awlsam a ni lo. Inkhâwmnaa min zui ṭhîntu ka nau mipa tuia a tlâk hlum veleh chuan, chu chuan kan chhûngkua chu a ṭhawng leh hle a. Mahse, Thuhretute chu englai pawhin ka tân an awm reng a. An zîngah chuan ka nuna ka thlâkhlelh êm êm hmangaihna leh ngaihsakna ka dawng a ni. Hei hi sakhaw dik a ni tih ka hria. Tichuan, kum 1996-ah Jehova Thuhretute zînga pakhat niin baptisma ka chang ta a ni.

KA HLAWKPUI DAN: Ka pasal duh tak Dmitry-a nên hian kum ruk ka innei tawh a. Kan pahnihin St. Petersburg-a Jehova Thuhretute office-ah rawng kan bâwl a. Hunte a liam zel rualin, ka rinna chungchânga ka chhûngte rilru put hmang pawh a inthlâkthleng ve ta a ni.

Jehova ka hria hi ka lâwm tak zet a! A rawngbâwlna hian nun awmze dik tak min neihtîr a ni.

“Min Tibuaitu Zawhna Tam Tak Ka Nei.”​—RAUDEL RODRÍGUEZ RODRÍGUEZ-A

PIAN KUM: 1959

PIANNA RAM: CUBA

CHANCHIN: POLITICS KALPHUNG DODALTU

KA TUN HMA NUN: Cuba ram, Havana-ah piangin, khawlaia insual a hluar êm êmna hmun mi rethei vêngah ka seilian a. Ka han puitlin chhoh zêl chuan, judo leh chutiang lam hawi infiamna dangte chu ka ngaina ta hle a ni.

Lehkha thiam thei tak ka ni a, ka nu leh pate chuan university kal tûrin min fuih ṭhîn. Chutih hun lai vêl chuan, kan rama politics kalphung chu thlâkthleng a ngai niin ka hre ṭan a. Politics kal phung chu ka dodâl ṭan ta a ni. Ka classmate pakhat nên police officer pakhat beiin, a silai lâksak kan tum a. Officer chuan a lu-ah hliam na tak a tuar a. Chu beihna avâng chuan ka classmate nên chuan tân ina khung kan ni a, thi tûra kan chungthu rêl a ni. Kum 20 mi chauh la ni mah ila, thihna ka hmachhawn ta reng mai!

Tân ina keimah chauhva ka awm lai chuan, min kâp hlumtu tûrte hmaa ka awm dân tûr chu ka tichhin a. Hlau hmêl put ka duh lo. Chutih rualin, min tibuaitu zawhna tam tak ka nei a. ‘Engvângin nge khawvêlah hian rorêl dik lohna a tam êm êm? Nun hi heti zawng hi em ni?’ tih ang chi zawhnate chuan min tibuai a ni.

BIBLE-IN KA NUN A THLAK DANGLAM DAN: A hnuah thi tûra kan chung thu rêl tawh chu kum 30 chhûng tâng tûra tih kan ni leh ta a. Tichuan, an sakhaw rinna avânga tân ina awm Jehova Thuhretu ṭhenkhat nên kan intawng a. Thuhretute huaisenna leh nunnêmna chuan ka rilru a khawih hle. Dik lo taka tân ina khung a ni chung pawhin an thinrim lo.

Thuhretute chuan Pathianin mihringte tân thiltum a neih thu min hrilh a. Kan chênna leilung hi dân bawhchhiatna leh rorêlna dik lo awm lohna paradis-a a chantîr tûr thu Bible aṭangin min hmuh a ni. Khawvêlah hian ṭha famkima chatuana nun theihna hun remchâng nei tûr mi ṭhate chauh an awm tawh tûr thu min zirtîr bawk.—Sâm 37:29.

An thu min zirtîrte chu ṭha ka ti hle a; chutih rualin, an miziate leh ka mizia chu a inpersan hle. Politics-a tualdawih leh ka bianga min bêngtu hnêna a lehlam pawh dawh chu ka tih theih ka inring lo. Tichuan, mahniin Bible ka chhiar ṭan a. Bible bu pum ka han chhiar chhuah chuan, Jehova Thuhretute hi Kristian hmasate neih ang mize nei awm chhun an ni tih ka hre ta a ni.

Bible ka zir chhoh zêlna aṭangin, ka nunah inthlâk danglamna lian tham tak ka siam a ngai tih ka hre ta a. Entîr nân, ṭawngkam ṭha lo hman ka chîn êm avângin, ka ṭawngkam hman ṭhinte chu ka thlâk a ngai a. Mei zûk pawh ka bânsan a ngai a ni. Chu bâkah, Politics lama ka tualdawih a ngai bawk. Chutianga inthlâk danglamna siam chu thil awlsam a ni lo; mahse, Jehova ṭanpuina zârah zawi zawiin ka hlawhtling thei ta a ni.

Inthlâk danglam harsa ka tih ber zînga pakhat chu ka thinchhiatna thunun hi a ni a. Hemi kawnga mahni ka inthun theih nân ṭawngṭaiin ṭanpuina ka la dîl reng ṭhîn. Thufingte 16:32-a: “Mi thinnel chu mi chak aiin a ṭha zâwk a. A rilru thunun hneh chu khaw latu aiin,” tih ang chi Bible châng ṭha tak takte chuan nasa takin min ṭanpui a ni.

Kum 1991-ah Jehova Thuhretu pakhat niin baptisma ka chang a. Tân in chhûnga tuizêmah ka chang a ni. A kum lehah chuan, tâng ṭhenkhat chu chhuah kan niin, kan chhûngte awmna Spain ram lama thawn kan ni a. Spain ka thlen hnu chuan, Jehova Thuhretute inkhâwmnaah ka tel nghâl a. Chuta awm Thuretute chuan kum tam tak inhmêlhriat tawh ang maiin min lo lâwm a, nun bul ṭan ṭha leh tûrin min ṭanpui bawk a ni.

KA HLAWKPUI DAN: Ka nupui leh fanute nên Pathian rawngbâwlin ka hlim tawh hle a. Ka hun neih zawng zawng deuhthaw chu mi dangte Bible zirpui nân ka hmang ṭhîn a ni. Ṭhalai tihhlum mai tawh tûr dinhmuna ka awm laite ka han ngaihtuah lêt châng hian, tûna ka hmasâwnate avâng hian ka lâwm tak zet a. Ka la dam mai ni lovin, beiseina ka nei tawh bawk. Paradis thutiam—dik taka rorêlna leh ‘thihna a awm leh theih tawh lohna’ hmun—chu ka beisei tlat a ni.—Thu Puan 21:3, 4.

[Thu tâwi]

“Pathianin hming a nei tih hriatna chuan ka rilru a khawih hle”

[Milem]

Bengngawngte tâna zaizir ṭawnga thu leh hla tihchhuahnaah kan nupaa kan ṭanpui theih avângin kan hlim hle