Montreal khawpui, mi rethei vêngah ka seilian a. Thla ruk mi lek ka nih laiin ka pa a boral a, chhûngkaw mawhphurhna zawng zawng chu ka nu kovah a tla ta a. Unau pariat zînga a naupang ber ka ni.

Ka puitlin chhoh lai vêl chuan damdawi khawih te, pawisa khelh te, tharum thawh te, leh dân bawhchhetute nêna inkawmte chu ka nî tin nunphung a lo ni ta a. Kum sâwm mi ka nih chuan nawhchizawrhna hmun ka hawng a, a pung tam tak neiin pawisa ka pûktîr ṭhîn a ni. Dâwt sawi ka hrâtin, ka theih ang anga mite bum kual chu nuam ka ti hle a. Chu chu ka tân chuan damdawi ang mai a ni.

Kum 14 mi ka nih chuan, mite bum dân kawng thar ka ngaihtuah chhuak a. Entîr nân, rangkachaka siam sana te, bânbun te, leh zungbunte chu ka lei ṭeuh va. Chûngahte chuan chhinchhiahnate ker chawpin rangkachak carrat 14 hmanga siam a ni tih lehkha ziakin ka bel a; tichuan, kawngpuiahte leh bazâr hmunpuia motor dahna hmunahte chuan ka zuar chhâwng leh a. Awlsam taka pawisa hmuh chu nuam ka ti hle a ni. Ṭum khat phei chu, ni khatah U.S. dollar 10,000 man lai ka hralh a nih chu!

Kum 15 mi ka niha school ka bânsan chuan, chênna tûr ka nei lo va. Kawngsîrah te, vântlâng lên vahna hmunah te, leh ka ṭhiante inahte ka riak kual ṭhîn a ni.

Mite ka bum ṭhin avâng chuan police-te’n vawi tam tak thu min zâwt ṭhîn a. Mahse, ka thil zawrhte chu ka rûk a nih miau loh avângin jail êm chu ka tâng ngai lo. Chutih rualin, mi bum avângte leh phalna nei lova thil ka zawrh avângte chuan pawisa tam tak chawitîr ka ni ṭhîn. Hlauh nei lo tih takah, a pung tam tak neiin pawisa ka pûktîr ṭhîn a. Ka thiltih chu a hlauhawm avângin, a châng chuan silai ka pai ru ṭhîn. A châng phei chuan dân bawhchhe pâwlte ka thawhpui ṭhîn.

Kum 17 mi ka nih laiin, a vawikhatna atân Bible chungchâng ka hre ṭan a. Ka bialnu nên kan chêng dûn a, ani chu Jehova Thuhretute’n Bible an zirpui a ni. Mahse, nungchang lama Bible tehnate chu ka duh lo va; tichuan, ka bialnu dang bula chêng tûrin ani chu ka bân ta a ni.

Ka bialnu pakhat zâwk pawhin Thuhretute nêna Bible a zir veleh tâkah chuan ka nun chu a inthlâkthleng ta! Ani chuan a nunah inthlâk danglamna a nei a, a zaidamin, a dawhthei tawh hle tih ka hriat chuan mak ka ti hle. Kingdom Hall-a inkhâwm tûra sâwmna chu pawmin ka va inkhâwm a. Mi hawihhâwm leh ngilnei tak takte chuan min lo lâwm a ni. Ka khawvêl hriat nên chuan a va inang lo tak êm! Ka chhûngte’n min thlahlel ngai lo; chuvângin, ka naupan chhûng zawng khân hmangaihna leh ngaihsakna ka dawng ngai lo. Jehova Thuhretute zînga ka dawn hmangaihna chu a ni, ka thil thlâkhlelh êm êm chu. Tichuan, Thuhretute’n Bible zir ka duh leh duh loh min zawh chuan, lâwm takin ka pawm ta a ni.

Bible aṭanga ka thu zirte chuan ka nun a chhanhim a ni. Pawisa khelh avânga ka leiba U.S. dollar 50,000 ka rulh theih nân, ka thurualpui mi dang pahnih nên mi rawk kan tum a. Ka tel ve ta lo chu ka va lâwm tak êm! Ka thurualpui pahnihte chuan inrawkna chu an kalpui ta ngei a. Mahse, pakhat zâwk chu man a ni a, a thianpa chu thah a ni.

Bible ka zir chhoh zêl chuan, inthlâk danglam ka ngaih nasatzia ka hre ta a. Entîr nân, 1 Korinth 6:10-a Bible sawi: “Rûk hmangte emaw, mi duhâmte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang,” tih chu ka chhiar a. Chu Bible châng ka han chhiar chiah chu, ka nun hman mêk dân chuan ka lung a tichhe hial a. Ka nun chu ka thlâkthleng pumhlûm a ngai tih ka hre thiam ta a ni. (Rom 12:2) Tharum thawh ka chîngin, ka thin a chhe hle a, ka nun pumhlûm hi dâwt hlîr a ni ringawt mai.

Amaherawhchu, Bible ka zirna aṭangin Jehova chu zahngai thei tak leh ngaihdam peih tak a ni tih ka zir a. (Isaia 1:18) Ka nun hluite bânsan thei tûrin, Jehova hnênah tih tak zeta ṭawngṭaiin a ṭanpuina ka dîl a. A ṭanpuinain, ka miziate chu zawi zawiin ka thunun thei ta a. Ka bialnu nêna dân ang thlapa kan inneihna kan tihfel tâkah chuan, thil pawimawh tak ka tih a ngai ta a ni.

Kum 24 mi ka nih chuan, fa pathum ka nei a. Tûnah chuan dân kalh ni lo hna pângngai ka thawh a ngai ta. Mahse, lehkha ka zir sâng lo va, kut thiam lah ka nei hek lo. Jehova hnênah tih tak zetin ka ṭawngṭai leh a. Tichuan, hna chu ka zawng ṭan ta. Hnathawktu tûr zawngtute hnênah chuan ka nun thlâk danglam ka duh thu leh hna pângngai thawh ka duh thu ka hrilh a. A châng chuan, Bible ka zir mêk thu leh khua leh tui ṭha tak nih ka duh thu ka sawi tel ṭhîn. Mahse, hna chu ka hmu thei chuang lo. A tâwpah, tûn hmaa ka thiltih ka sawi hnu chuan, min interview-tu chuan: “Eng nge a chhan ka hre lo takzet; mahse, hna pe tûr chea min hrilhtu eng emaw a awm tlat,” a ti a. Chu chu ka ṭawngṭai chhânna a ni tih ka ring thlap. Hunte a liam zêl chuan, ka nupui nên Jehova Thuhretute zînga mi niin baptisma kan chang ta a ni.

Nung dama ka la awm chhan hi Bible thu bulte ka nunpui vâng leh Kristian nun kawng ka zawh vâng chauh a ni tih ka hria. Chhûngkaw ṭha tak ka nei a. Jehova’n min ngaidam tih ka ring nghet tlat a, chhia leh ṭha hriatna thiang tak ka nei bawk a ni.

Kum 14 chhûng chu Bible zirtîrnate hre tûra mite ṭanpuinaah hunbi kimin rawng ka bâwl tawh a. Tûn hnai lawk aṭang khân ka nupui pawhin ka rualin hunbi kimin rawng a bâwl ve ta a ni. Kum 30 kalta chhûng khân, ka hnathawhpuite zînga mi 22 lai chu Pathian Jehova be tûra ka ṭanpui theih avângin ka hlim hle. Bazâr hmunpuiahte chuan ka la kal reng ṭhîn; mahse, tûn hma anga mite bum tuma kal ka ni tawh lo. Mi dangte hnêna ka rinna chungchâng hrilhin ka kal tawh zâwk a. Anni chu thil eng emaw pêk ka duh a ni: bum hmangte awm tawh lohna khawvêl thar lo awm tûra nun beiseina chu.—Sâm 37:10, 11.