Chhiartute Zawhna

Dik taka thisen hman dân chungchânga Bible thute ṭanchhanin, Jehova Thuhretute chuan mahni thisen hmanga inenkawlna chu engtin nge an thlîr?

Kristian tinte chuan mahni duhna emaw, damdawi lam nêna inkûngkaih thurâwn ṭhenkhatte emaw ṭanchhana thu tlûkna siam aiin, Bible sawite chu ngun takin an ngaihtuah tûr a ni. Chu chu Jehova nêna an inkâra thil pawimawh tak a ni.

Min siamtu Jehova chuan thisen chu ei lo tûrin thu a pe a. (Genesis 9:3, 4) Hmân lai Israelte tâna Dânah thisen chu nunna aiawhtu a nih avângin, chumi hman dân chungchângah Pathianin chin tâwk neiin a khuahkhirh a. Ani chuan: “Tisa nunna chu thisenah chuan a awm si a; in nunna atâna inremna siamna tûra maichâm chunga ka pêk che u a ni,” tiin a sawi a ni. Miin ran chu ei atâna a talh a nih chuan engtin nge ni ang? Pathian chuan: “A thisen chu a tichhuak ang a, vaivutin a vûr tûr a ni,” tiin a sawi a ni. * (Leviticus 17:11, 13) Ani chuan chu thupêk chu a pe nawn fo va. (Deuteronomy 12:16, 24; 15:23) The Jewish Soncino Chumash chuan: “Thisen chu dah khâwl lovin, ei tlâk loh a nih theih nân leia leih buak tûr a ni,” tiin a târ lang. Thil siam dang thisen chu Pathian ta a nih avângin, Israel mite tân chûng thisen dah khâwl emaw, hman emaw chu a dik lo a ni.

Mosia Dân zâwm tûra mawhphurhna chu Messia a thih khân a tâwp a. Mahse, thisen thianghlimna chungchânga Pathian thlîr dân chu a la ngai reng a ni. Pathian thlarau thianghlim chuan Kristiante chu ‘thisen laka inthiar fihlîm’ tûra kaihhruaina pe tûrin tirhkohte chu a chêttîr a. Chu thupêk chu ho lam taka lâk tûr a ni lo. Chu chu mipat hmeichhiatna lama nungchâng khaw lohna leh milem biakna laka inthiar fihlîmna nên a pawimawh dân inang chiah a ni. (Tirhkohte 15:28, 29; 21:25) Kum zabi 20-naah chuan thisen thun leh pêk chhuah chu a hluar chhoh ta hle a, chu thiltih chu Jehova Thuhretute chuan Bible nên a inkalh tih a hria a ni. *

A châng chuan, doctor-in dam lo chu a inzai hma chawlhkâr eng emaw zâtah a thisen chu (inzai hmaia mahni thisen lo dah khâwlna, a nih loh leh PAD) thisen dah khâwlna hmuna lo dah lâwk tûrin a fuih thei a, thisen thun a mamawh a nih chuan a thisen lo dah khâwlsa chu thun leh a nih theih nân a ni. Mahse, chutianga thisen dah ṭhat te, dah khâwl te leh thisen inpêkte chu Bible-a Leviticus leh Deuteronomy sawite nên chuan a inkalh chiang hle. Thisen chu dah ṭhat tûr a ni lo va, leih buak tûr a ni—chu chu Pathian hnêna kîr leh ang a ni. Tûnah chuan Mosia Dân hnuaiah kan awm tawh lo ngei mai. Mahse, Jehova Thuhretute chuan chu dâna tel Pathian thu bulte an zah avângin ‘thisen laka inthiar filhlîm’ an tum a ni. Chuvângin, ‘leih buak’ tûr thisen chu kan dah ṭhat loh bâkah, thun leh tûr atân kan dah khâwl lo bawk. Chu thiltih chuan Pathian dân a khalh si a.

Mahni thisen hmanga inenkawl emaw, enchhin emaw chu Pathian thu bulte nên a inkalh tih chiang taka sawi theih a ni lo. Entîr nân, Kristian tam tak chuan an thisen ṭhenkhat chu enchhin atân emaw, endik tûr atân emaw lâk chhuah an phal a, a hnuah chu thisen chu an paih leh mai ṭhîn a ni. Mi dangte chuan mahni thisen tela inenkawlna chipchiar tak dang nei tûrin an hrilh mai thei che bawk.

Entîr nân, inzai laiin thisen pawlh dalna humodilutian hmanga inenkawl nân thisen ṭhenkhat chu taksa aṭangin lâk pên a ni a. Chu chuan dam lo thisen la bâng chu a tidal a ni. A hnuah, pâwn lama thisen luan kualtîr chu chhûng lamah a ngai angin a luang lût leh a, thisen chuan ngai a awh leh a ni. Chutiang bawkin, chu dam lo taksaa luang lût leh tûrin thisen cell te chu a mankhâwmin, a thli fîm thei a; chu chu cell salvage tia koh a ni. Inenkawlna dang chu, taksa pênte zînga ṭhenkhat (entîr nân, thin, chuap, leh kal) chuan dân pângngaia thisen luan kualtîr theih tûrin khâwlah a pe a, thisen chu rei lo te chhûng a luang kual thei a. Chu thisen chu khâwl aṭang chuan dam lo hnênah a kîr leh a ni. Inenkawlna dang leh chu, a chhe lai te, a nih loh leh ṭha tâwk lohna laite nuai bo theih nân thisen chu khâwla lâk pên a ni a. A tum ber chu taksa hmun danga hman leh theih tûra thisen pêng bul pui aṭanga ṭhenkhat lâk hran hi a ni a. Thisen ṭhat dân leh tam lam hriat nân, a nih loh leh thisena damdawi chawhpawlh nân thisen ṭhenkhat chu la chhuakin, chûngte chu dam lo taksaa thun lehna hmanga enchhinna pawh a awm bawk.

Chu enkawl dânte chu chipchiar taka sawi chuan a danglam mai thei a, inenkawl dân thar chi hrang hrang te, enkawl dân te leh enchhinnate chu a pung chhoh hle ngei ang. Chûngte chu a mal tê têa enfiah a, thu tlûkna siam tûrin mawhphurhna kan nei lo. Krstian tân inzai ngaia inenkawlnaah te, damdawi enchhinnaah te, a nih loh leh tihdam tuma enkawl mêk kan nih laite hian mahni thisen hman dân tûr chungchângah mahni ngeiin thu tlûkna kan siam tûr a ni. A inenkawl chhûnga a thisen sâwngbâwl dân tûr chungchângah doctor te emaw, mi thiamte emaw a râwn lâwk hmasa tûr a ni a. Tichuan, mahni chhia leh ṭha hriatnain rem a tih angin thu tlûkna a siam tûr a ni. (Bâwm chu en rawh.)

Kristiante chuan Pathian hnêna inpumpêk tawh an nih avângin, ‘an thinlung zawng zawng, chakna zawng zawng, rilru zawng zawnga amah hmangaih tûrin’ mawhphurhna an nei tih an hre reng tûr a ni. (Luka 10:27) Khawvêl mite ang lo takin, Jehova Thuhretute chuan Pathian nêna inlaichînna ṭha an neih chu an ngaihlu hle a. Nunna Pe-Tu chuan Isua thisena rinna nghat ṭheuh tûrin min fuih a. Heti hian kan chhiar a ni: “A thisen avângin amahah chuan kan tlanna kan nei a ni - a khawngaihna ngahzia ang zêla kan bawhchhiatnate ngaihdamna chu,” tiin.—Ephesi 1:7.

[Footnote-te]

[Bâwm/Milem]

I INZAWH TUR ZAWHNATE

Ka thisen ṭhenkhat chu pâwn lama luantîr a, a luang laia hun engemawti chhûng a châwl dâwn a nih pawhin, chu chu ‘leia leihbuak’ ngai lo ka taksa pêng chhûnga mi angin ka chhia leh ṭha hriatnain a pawm thei ang em?’

Ka inenkawl laiin, ka thisen la chhuaka khawih danglam a nih hnuah, ka taksaa thun luh leh ni ta se, chu chuan Bible zirtîr ka chhia leh ṭha hriatna a tibuai ang em?