ISUA chuan, “I inah, i chhûngte hnênah haw la, Lalpan i tân thil a tihsak che leh a khawngaihzia che hi va hrilh zâwk tawh,” tiin a sawi a. Chu thu chu Galili Tuipui chhim chhak lama awm Gadara biala a awm laia a hnungzui duhtu mi pakhat hnêna a sawi niin a lang. Isua thusawite chuan mihringte pianpui mizia—thilthleng ngaihvenawm leh pawimawhte chhûngte hrilh châkna kan neih tih—a hriatthiamzia a târ lang a ni.—Mk. 5:19, C.L. Re-edited.

Chutiang mizia chu tûn laiah pawh kan hmu ṭhîn a, hnam ṭhenkhatah phei chuan hnam dangte aiin a hluar hle. Chutiang a nih avângin, mi tu emaw chu Pathian dik Jehova betu a rawn nih hian, a rinna thar chungchâng chu a chhûngte hnênah hriattîr a duh tlângpui ṭhîn. Mahse, engtin nge a hrilh ang? Engtin nge sakhaw dang vuantu, a nih loh leh sakhuanaa rinna nei lotu a chhûngte thinlung thlen thei zâwnga an hnêna a sawi theih ang? Chumi chungchângah chuan Bible-in fuihna ṭha leh rin tlâk tak min pe a ni.

Andria chu kum zabi khatnaa Isua chu Messia a ni tih hre hmasa bertute zînga mi a ni a. A thil hriat chu tu hnênah nge a hrilh nghâl vat? “[Andria] chuan a hmasa berin ama unau Simona a hmu a, a hnênah: ‘Messia’ (chu chu Krista tihna a ni) kan hmu ta,” tiin a hrilh a. Andria chuan Petera chu Isua hnênah a hruai a, chu chuan Petera chu Isua zirtîrte zînga tel theihna hun remchâng a pe a ni.—Joh. 1:35-42.

A hnu kum ruk vêlah Jopa khuaa Petera a awm laiin, Kaisari khua hmâr lama awm sipai za hotu Kornelia ina kal tûra sâwm a ni a. Chutah chuan tute nge a va hmuh? “Kornelia chuan a laichînte leh a ṭhian duh berte chu ko khâwmin, [Petera leh a ṭhiante] chu a lo nghâk reng a.” Kornelia chuan a laichînte chu Petera thusawi ngaithla thei tûr leh an thu ngaihthlâk ṭanchhana thu tlûkna siam theihna hun remchâng a pe a ni.—Tirh. 10:22-33.

Andria leh Kornelia’n an chhûngte an cheibâwl dân aṭangin eng nge kan zir theih?

Andria leh Kornelia chuan hun remchâng chu an bawh pelh lo. Andria chuan Petera chu Isua nên mi mal takin a hmêlhriattîr a, Kornelia pawhin a laichînte’n Petera thusawi an ngaihthlâk theih nân ruahmanna a siam a ni. Mahse, Andria leh Kornelia chuan an laichînte chu Krista hnungzuitu nih luihtîr an tum lo. Chuta ṭanga kan zir theih chu eng nge ni? Keini pawhin chutiang chuan kan ti a ni. Kan thurinte chu kan chhûngte hnênah hrilhin, Bible thutak hriat theihna leh kan Kristian unaute nêna inhmêlhriat theihna hun remchâng kan pe a. Chutih rualin, zalên taka an duh thlan theihna chu kan zahsak a, inâwm lo taka anmahni nawr luih chu kan pumpelh bawk a ni. Kan chhûngte ṭanpui theih dân chungchânga Germany rama nupa tuak khat Jürgen-a leh Petra-i te entawn tûr siam hi han ngaihtuah teh.

Petra-i chuan Jehova Thuhretute nên Bible zirin, a hnuah baptisma a chang a. A pasal Jürgen-a chu sipai officer a ni. A tîr chuan, Jürgen-a chuan a nupui thu tlûkna siam chu a pawmpui lo va. Mahse, hun eng emaw chen hnuah chuan Thuhretute chuan Bible thutak an zirtîr tih a hre thiam ta a. Ani pawh Jehova hnênah inpumpêk tawhin, a lawina tualchhûng kohhranah upa niin rawng a bâwl mêk a ni. Rin hran nei chhûngte thinlung thlen dân chungchângah eng thurâwn nge a pêk?

Jürgen-a chuan: “Thlarau lam chungchângah kan chhûngte chu kan nawr lui tûr a ni lo. Chutianga nawr luihna chuan thutak pawm a tihreh zual zâwk mah thei a ni. Khua rei atân, an ngaihvên zâwng thute a khât tâwka fing thiam taka hrilh ṭhin chu a ṭha zâwk thei a. Kohhran unaute zînga an kum rualpuite leh an ngainat zâwng ang ngainatute nêna inhmêlhriattîr chu a ṭangkai hle bawk. Chutianga tihna chuan thutak a hnaihtîr thei a ni,” tiin a sawi.

Tirhkoh Petera leh Kornelia chhûngte chuan Bible thuchah chu an chhâng lêt nghâl vat a. Mahse, kum zabi khatnaa thutak pawmtu mi ṭhenkhat tân chuan, chutianga thu tlûkna siam tûrin hun eng emaw chen a ngai a ni.

Isua chhûngte zînga ṭhenkhat chuan vântlâng hmaa thu a hrilh lai khân a chungah rinna an lantîr a. Jakoba te, Johana te, leh an nu Salomi te chu Isua laichînte an ni a. Salomi chu ‘[hmeichhe] dang tam tak, mahni neiha [Isua leh a tirhkohte] rawng bâwlsak ṭhîntute’ zînga mi a nih ngei a rinawm.—Lk. 8:1-3.

Mahse, Isua chhûngte zînga ṭhenkhat dangte chuan ani chu an ring nghâl mai lo. Entîr nân, Isua’n baptisma a chan aṭanga kum khat hnu vêlah, ṭum khat chu a thusawi ngaithla tûrin in pakhatah mipui an lo pung khâwm a. “A chhûngte chuan chu chu an hriatin, ‘A â a nih chu le,’ tiin amah man tumin an thawk a.” Chumi hnu rei vak lo vah, a unaute’n zin kual a tum dân chungchâng an zawh chuan, kim chang takin a hrilh lo. Engvângin nge? “A unaute pawh chuan amah an ring si lo va.”—Mk. 3:21; Joh. 7:5.

Isua’n a chhûngte a cheibâwl dân aṭangin eng nge kan zir theih? A chhûngte zînga ṭhenkhatin a â nia an ngaih pawhin thinrim phah nân a hmang lo. A thih a, a thawhleh hnuah pawh, a unaupa Jakoba hnênah inlârin, a chhûngte tân fuihna ṭha tak takte a pe a ni. Chu a inlârna chuan Jakoba chauh ni lovin, a unau dangte pawh Messia a ni ngei tih ring tûrin a ṭanpui niin a lang. Chuvângin, anni chuan Jerusalema pindan chungnungah tirhkohte leh mi dangte zînga awmin, thlarau thianghlim an dawng ve a. Hunte a liam zêl chuan, Isua unau Jakoba leh Juda chuan chanvo hlu tak takte an dawng a ni.—Tirh. 1:12-14; 2:1-4; 1 Kor. 15:7.

Kum zabi khatna hun lai ang bawkin, tûn laiah pawh kan chhûngte zînga ṭhenkhat chuan nunna kawnga kal tûrin hun eng emaw chen an mamawh a. Entîr nân, Roswitha-i chu kum 1978-a a pasalin Jehova Thuhretute nia baptisma a chan lai chuan Roman Catholic ruh tak a ni. Ama sakhaw thurinte avângin, a tîr chuan a pasal chu a dodâl a. Mahse, kumte a han liam zêl chuan a dodâlnate chu zâwi zâwiin a tâwpsan a, Thuhretute chuan thutak an zirtîr tih a hre ta a ni. Tichuan, kum 2003-ah amah ngei pawhin baptisma a chang ta a ni. Engin nge ani chu inthlâk danglam tûra ṭanpui? A tîr lama a dodâlnate avânga thinrim aiin, a pasal chuan a ngaih dânte a thlâk theihna hun remchâng a pe a ni. Roswitha-i chuan eng thurâwn nge a pêk? Ani chuan, “Dawhtheihna lantîr fan fanna chuan rah ṭha a chhuah thei a ni,” tiin a sawi a ni.

Monika-i chu kum 1974-ah baptisma a chang a; mahse, a fapa pahnihte erawh a hnu kum sâwmah chauh Thuhretute an rawn ni a. A pasal Hans-a pawhin a nupui fanaute chu dodâl lo mah se, kum 2006-ah baptisma a chang chauh a ni. An thiltawn aṭangin, an chhûngkua chuan eng thurâwn nge an pêk? Anni chuan, “Jehova chungah rinawm tlat la, i rinna chungchânga zawhna i dawnte chu ngaihthah mai suh ang che,” tiin an sawi. Ni e, chhûngkaw pa ber Hans-a chunga hmangaihna an lantîr zawm zêl chu a pawimawh tak zet a. Engtik nîah emaw chuan thutak a la pawm ngei ang tih an beisei tlat a ni.

Ṭum khat chu Isua’n thutak chu chatuan nunna min pe theitu tui angin a sawi a. (Joh. 4:13, 14) Kan chhûngte chu tui vawt tak, thutak tui inna hmanga tihharha an awm chu kan duh a ni. Chutih rualin, vawikhata hmanhmawh taka an in ṭeuh avânga an hâk erawh kan duh lo ngei ang. Tihharhin an awm nge ni a, an hâk zâwk tih chu an hnêna kan rinna chungchâng kan hrilhfiah dânah a innghat a ni. Bible chuan: “Mi fel thinlung chuan a chhân hmain ngun takin a ngaihtuah ṭhîn,” tia a sawi bâkah, “mi fing thinlung chuan a ka a zirtîr ṭhîn a, a hmuiah thiamna a belhchhah ṭhîn,” tiin a sawi bawk. Chu thurâwn chu engtin nge kan nunpui theih?—Thuf. 15:28, New World Translation; 16:23.

Nupui chuan a pasal hnênah a rinna chungchâng hrilhfiah a duh pawh a ni thei. A hrilhfiah hmaa ‘ngun taka a ngaihtuah’ hmasak chuan, a thusawi tûrte chu fîmkhur takin a thlang thei ang a, hahdam takin a sawi thei bawk ang. Fel leh ṭha zâwk nia lan a tum tûr a ni lo. Ngun taka a ngaihtuah lâwk hnua a thusawite chu mi dangte tiharhtu leh remna thlentu a ni thei a ni. A pasal hahdam hun leh tîtîpui theih hun chu eng hun nge? Eng chungchâng nge sawi leh chhiar nuam a tih? A ngaihven zâwng chu science lam nge, politics lam nge, infiamna lam zâwk? A pasal rilru put hmang leh ngaih dânte chu zahsak tho siin, engtin nge Bible chungchâng a hriat châkna chu a chawhthawhsak theih? Chûngte ngaihtuah rengna chuan, hriatthiamna nei taka thu sawi tûr leh thil ti tûrin a ṭanpui ang.

Thuhretu la ni lo kan chhûngte thinlung thlen tûr chuan kan rinna chungchânga thil ṭhenkhat hrilhfiah mai chu a tâwk lo. Kan thusawite leh kan thiltihte chu a inmil tûr a ni.

A chunga kan târ lan tâk Jürgen-a chuan: “I nî tin nunah Bible thu bulte chu nunpui reng rawh. Kan chhûngte chuan kan rinna chu min pawmpui lo mah se, Bible thu bulte kan nunpui rengna chu thutak ngaihven tûra anmahni kan ṭanpui theih dân kawng ṭha tak a ni,” tiin a sawi. A nupuiin baptisma a chan aṭanga kum 30 dâwn hnua baptisma chang ve Hans-a pawhin: “Thutakin kan nunah a ṭha zâwngin nghawng a nei tih kan chhûngte’n an hriat theih nâna Kristian miziate lantîr chu a pawimawh hle,” tiin a sawi. Kan rinna chuan a chhe lam leh a duhawm lo lam ni lovin, mi dangte laka a ṭha lama min danglamtîr dân chu kan chhûngte chuan an hmu thei tûr a ni.

Tirhkoh Petera chuan ring lotu pasal nei hmeichhiate hnênah thurâwn pawimawh tak a pe a ni: “Mahni pasalte thu thuin awm rawh u; chutichuan, an zîngah tu pawhin thu chu awih lo mah sela, thu lovin an nupuite chêtziaa hnehin an awm thei ang, ṭih dêk chunga in chêtze thianghlim enin. In incheina chu pâwn lam incheina-sam phiar te, rangkachak ṭhi awrh te, silhfêna inthuamte chu-ni lovin, thinlunga mihring thurûk chu, rilru thuhnuairawlh leh nunnêm, silhfên chhe thei lova inthuam ni zâwk rawh se, chu chu Pathian mithmuhin a hlu êm êm a ni,” tiin.—1 Pet. 3:1-4.

Petera chuan pasal chu a nupui mize ṭhatea hnehin a awm thei tih a ziak a. Chu Bible fuihna chu rilrua vawng rengin, unaunu Christa-i chuan kum 1972-a baptisma a chan aṭangin a mize ṭhate lantîrna hmanga a pasal thinlung hneh chu a tum tlat a. A pasal chu Thuhretute nên Bible zir mah se, thutakah a la awm lo va. Mahse, Kristian inkhâwm ṭhenkhatahte tel ṭhînin, kohhrana unaute nên an innêl hle a. Chûng unaute chuan zalên taka duh thlan theihna a neih chu an zahsak a ni. Engtin nge Christa-i chuan a pasal thinlung thlen theih tûra a beih?

Ani chuan, “Jehova’n ti tûra min duhte chu tih ka tum tlat a. Chutih rualin, ka pasal thinlung chu “thu lovin,” ka mize ṭhate hmanga hneh kan tum tlat a ni. Bible thu bulte nêna inkalh lo thilah chuan theih tâwp chhuahin a duh zâwngte chu ka tihsak ṭhîn a. Chu bâkah, zalên taka duh thlan theihna a neih chu ka zahsak a, a dang zawng chu Jehova kutah ka nghat a ni,” tiin a sawi.

Christa-i thiltih chuan a ṭûl anga insiamrem a hlutzia a târ lang a ni. Inkhâwm leh thu hrilh rawngbâwlnaa tel ziahna pawh tiamin, thlarau lam hun duan ṭha tak chu a vawng reng a. A pasal chungah hmangaihna leh ngaihsakna a lantîr a, a tâna hunte pêk a ngai tih a hriatthiamzia a lantîr bawk. Insiamremna leh hriatthiamna lantîrna kawngah ring lotu chhûngte neite tân entawn tûr ṭha a va ni êm! Bible chuan: “Engkim tân hian hun ruat a awm,” tiin a sawi a. Chutah chuan kan rinna min ṭâwmpui lotu kan chênpui kan chhûngte, a bîk takin kan kawppuite tâna hun pêk pawh a tel a ni. Hun hman dunna chuan inbiak pawhna a awmtîr a. Thiltawnin a târ lan dânin, inbiak pawhna ṭha chuan mal nia inhriatna te, thlahthlam nia inhriatna te, leh thîkna rilru put hmangte chu zâwi zâwiin a tibo thei a ni.—Thur. 3:1.

Holger-a chuan: “Kan chhûngte chunga hmangaihna lantîr leh ka pa tâna ṭawngṭai ziah chu thil pawimawh tak a ni,” tiin a sawi a, a pa chuan a nupui fanaute’n baptisma an chan aṭanga kum 20 a liam hnuah baptisma a chang a ni. Kan târ lan tâk Christa-i pawhin, ‘Ka pasal hian Jehova ringin, thutak a la pawm ngei ang tih ka beiseina hi engtikah mah ka hloh ngai lo vang,’ tiin a sawi belh a ni. Kan rinna min ṭâwmpui lotu kan chhûngte chungah rilru put hmang dik leh beiseina kan nei reng tûr a ni.

Kan thiltum chu kan chhûngte nêna inlaichînna ṭha neih reng te, thutak hriat theihna hun remchâng pêk te, leh Bible thuchah hmanga an thinlung thlente hi a ni a. Chûngte chu “thuhnuairawlh tak leh ṭih dêk chungin” kan ti tûr a ni.—1 Pet. 3:15.