BIBLE CHHANNA CHU: “A hun a thleng dâwn ta, chutih hunah chuan thlâna awm zawng zawngin [Isua] aw an hria ang a, an chhuak vek ang.”—Johana 5:28, 29.

Isua’n nakina a Lalram rorêlna hnuaiah, Thlân chu tihruah vek a nih tûr thu chu heti hian a sawi lâwk a. Thuziak hmasaa târ lan tâk Fernando-a chuan: “Johana 5:28, 29 ka chhiar hmasak ber ṭum chuan mak ka ti hle a. Chu chuan beiseina min pe tak zet a, hma lam hun chungchâng chu beiseina nên ka ngaihtuah ṭan ta a ni,” tiin a sawi.

Hmân laia mi rinawm Joba chuan a thih hnuah Pathianin a tinung leh ang tih chu a beisei tlat a. Joba chuan: “Mi a thih chuan a nung leh ang em ni?” tiin a zâwt a. Ani chuan ring nghet takin heti hian a chhâng a ni: “Ka hun ruat chhûng [Thlâna awm chhûng] hi chuan ka nghâk ang, ka chhuahna a thlen thlengin. Mi ko vang a, keiin ka chhâng ang che,” tiin.—Joba 14:14, 15.

Lazara farnu Marthi tân thawhlehna chu thil thar a ni lo. Lazara thih hnuah, Isua’n a hnênah: “I nuṭa a tho leh ang,” a ti a. Marthi chuan a hnênah: “Ni kin nia thawhlehnaah chuan a tho leh ang tih ka hria e,” a ti a. Chutah Isua’n a hnênah: “Kei hi thawhlehna leh nunna chu ka ni; tupawh mi ring chu thi mah sela a nung reng ang,” a ti a. (Johana 11:23-25) A hnu lawkah, Isua chuan Lazara chu a kaitho ta nghâl a! Chu thiltheng phûrawm tak chuan nakin huna thil ropui zâwk lo thleng tûr chu min hmuh lâwktîr a ni. Chutiang thawhlehna khawvêl pum huapa a thlen dân tûr chu han mitthla teh!

BIBLE CHHANNA CHU: Pathian Thu chuan Isua thawhlehna chu Bible-a chhinchhiah mi dang pariatte thawhlehna nên a inang lo tih a târ lang a. Chûng mi pariatte chu leia kaihthawh leh an ni a. Mahse, Isua thawhlehna chungchângah heti hian kan chhiar a ni: “Isua Krista chu vânah kalin Pathian ding lamah a awm a.” (1 Petera 3:21, 22) Isua chauh hi vân nunna changa kaihthawh a ni ang em? A hmain Isua chuan a tirhkohte hnênah: “In tân hmun ka han siam chuan ka lo kîr leh ang a, ka hnênah ka la ang che u, ka awmnaah nangni pawh in awm theih nân,” tiin a hrilh a ni.—Johana 14:3.

Krista chu vânah kalin a zirtîr ṭhenkhatte tân awmna tûr a siamsak a. A tâwpah chuan chûng vâna kal tûra tholehte chu 1,44,000 an tling ang.  (Thu Puan 14:1, 3) Mahse, chûng Isua hnungzuitute chuan vânah eng nge an tih ang?

Anni chu an buai hle ang! Bible chuan: “Thawhlehna hmasa bera telte chu an engthâwlin an thianghlim a ni; chûngho chungah chuan thih hnihna chuan thu rêng a nei lo va, Pathian leh Krista puithiamte an ni ang a, amah nên kum sângkhat rorêlin an awm zâwk ang,” tiin min hrilh a ni. (Thu Puan 20:6) Vân nunna changa kaihthawhte chuan lal leh puithiam niin Krista nên leiah ro an rêl ang.

BIBLE CHHANNA CHU: Pathian thâwk khum Bible-ah chuan tirhkoh Paula thusawi he thu hi chhinchhiah a ni: “Mi felte leh fel lote thawhlehna a awm ang tih Pathian lamah ka beisei a, hênghote pawh hian chûng chu an âwih ve bawk si a.”—Tirhkohte 24:15.

Paula sawi “mi felte” zîngah chuan tute nge tel ang? Entîrna pakhat hi han ngaihtuah teh. Mi rinawm Daniela chu a thih dâwn lamah: “I hahchâwl ang a, tâwpna a lo thlen hunah i awmna tûr hmun ruatah chuan i awm dâwn nia,” tiha hrilh a ni a. (Daniela 12:13, C.L. Re-edited) Daniela awmna tûr hmun ruat chu khawi hmun nge ni ang? “Mi felte chuan ram hi an luah ang a, a chhûngah hian kumkhuain an awm ang.” (Sâm 37:29) Isua pawhin: “Thuhnuairawlhte chu an eng a thâwl e; lei hi an la rochung dawn si a,” tiin a sawi lâwk bawk. (Matthaia 5:5) Daniela leh mi rinawm dangte chu leia chatuana nung leh tûrin an rawn tholeh dâwn a ni.

Paula sawi “mi fel lote” zîngah chuan tute nge tel ang? Anni chu Bible thutak hriatna leh nunpui theihna hun remchâng nei hman lova thi, mi tlûklehdingâwn tam takte an ni a. An thawhleh hnuah chuan, Jehova * leh Isua hriatna leh ngaihhlutna an nei thei ang. (Johana 17:3) Jehova rawngbâwl thlangtute chuan amah ang bawka chatuana nun chu an beisei thei ang.

BIBLE CHHANNA CHU: Pathian chuan “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.” (Thu Puan 21:4) “Tin, inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang.”—Isaia 65:21.

Chutiang dinhmuna i hmangaih tak lo tholehte nêna chênho chu a va nuam dâwn êm! Mahse, zawhna la awm cheu chu, Engtin nge thawhlehna chu a awm ngei ang tih i hriat theih? tih hi a ni. (wp15-E 08/01)