In nul itzʼje ex in jaw chʼiye toj jun kojbʼil jatumel prow qe xjal toj tnam Roma. Kwest ok wanqʼibʼile. Mintiʼ ok wojtzqiʼne ntxuʼye ex mintiʼ ten jun tbʼanel wamiwbʼile tukʼil nmane. Atz in nok lepeʼye kyiʼj xjal toj kay.

Xi tzyet tuʼn welqʼane tej qʼiʼntoq lajaj abʼqʼi wuʼne ex in nex oqe tnejel maj tej qʼiʼntoq 12 abʼqʼi wuʼne. Nya oʼkx jun maj pon nmane qʼil weye toj comisaría. Tkyaqil ambʼil in chin iline kyukʼil xjal ex jun rattoq in tzaj nqʼoje. In nikʼ bʼete njaye tej qʼiʼntoq 14 abʼqʼi wuʼne ex kubʼ nximane tuʼn miʼn nmeltzʼaje. In chin anqʼintoqe toj cay ex in najbʼentoq droga wuʼne. Aj in nok qonikʼen, in nokxtoq njqoʼne jun kar tuʼntzun njtane toj ex atztoq in chin tzqixe. Tibʼajxi jlu, in xi njyoʼne jun lugar jatumel tuʼn tbʼaj nbʼinchaʼne chʼin ntene.

Ten nim wojtzqibʼile tzeʼn tuʼn welqʼane. In bʼanttoq nim tiʼchaq wuʼne. In neltoq welqʼane kybolsa xjal ex in chin okxe elqʼal kyoj edificio ex kyoj ja te qonikʼen. Ok ojtzqiʼn nwitze kyuʼn nim xjal ex tzaj qʼon txokbʼil wiʼje tuʼn ntene toj jun kʼloj mara ojtzqiʼn kywitz kyuʼn nim xjal. Mas ten wojtzqibʼile tuʼn welqʼane tuʼnju xi tzyet tuʼn welqʼane kyoj banco. Tuʼnju nimxix chin qʼojine, ok qʼoʼn woklene kyuʼn txqantl mara. Tej wexe bʼetel, tkyaqil maj qʼiʼntoq jun arma wuʼne, axpe ikx, okx nqʼoʼne tjaqʼ nwiʼye tej njtane. Otoq chin naqʼete tuʼn nbʼiyune, tuʼn tajbʼen drogra wuʼne, tuʼn welqʼane, tuʼn nyaẍine ex tuʼn nyasine. Tkyaqil ambʼil in che jyon polisiy wiʼje ex nim maj in tzyete kyuʼn. In tene nim abʼqʼi toj kay ex toj cárcel.

Jun maj, tej wetze toj cárcel, in xiʼye visitaril te ntiyaye, Mintiʼtoq ojtzqiʼn wuʼne, otoq tzʼok ntiyaye te testigo de Jehová kyukʼil kabʼe nprimoye. Tzaj kyqʼoʼn txokbʼil wiʼje tuʼn nxiʼye toj kychmabʼil ex kubʼ nximane tuʼn nxiʼye keʼyil. Tej qpone toj Ja te Chmabʼil, xi nqʼamaʼne tuʼn nkyaj qeʼye ttzi ja tuʼntzun tok nkeʼyine alkye in nokx ex alkye in netz. Qʼiʼntoq pistola wuʼne.

Chʼexpaj wanqʼibʼile tuʼn chmabʼil aju. Naʼnx wuʼne tej tkubʼ nximane qa junxitl weye wanqʼibʼile. Ok nkeʼyine qa kykyaqilx qe xjal in che tzeʼn ex attoq tbʼanel kymod. Toj ambʼil jaʼlo, kukx in tzaj nnaʼne aju tbʼanel kymod testigos de Jehová. Ok nkeʼyine qa junxitl weye in bʼant wuʼn ik tzeʼn kye.

Kubʼ nximane tuʼn nxnaqʼtzane tiʼj Tyol Dios kyukʼil testigo de Jehová. Akux in chʼiy wojtzqibʼile tiʼj Tyol Dios, el nnikʼe tiʼj qa iltoq tiʼj tuʼn tbʼaj nchʼexpuʼne wanqʼibʼile. Jun techel, ok nqʼoʼne toklen aju in tzaj tqʼamaʼn Proverbios 13:20 jatumel in tzaj tqʼamaʼn jlu: «Qa ma tzʼok tjunin tibʼa kyukʼil qe xjal at kynabʼl, ktel tnabʼla, qatzun ma tzʼok tjunin tibʼa kyukʼil qe xjal mintiʼ kynabʼl, knajela». El nnikʼe tiʼj qa iltoq tiʼj tuʼn tel npan wibʼe kyiʼj mara. Kwest ela jlu toj nwitze, pero bʼant tuʼn tonbʼil Jehová.

Ax ikx, kyaj ntzaqpiʼne sichʼ ex ya mintiʼ ajbʼen drogra wuʼne. El nmatzone tzmal nwiʼye tuʼnju nimx otoq chʼiy, etz wiʼne qe toj nẍkyine ex ya mintiʼ in yasune. Kubʼ nnaʼne tnejel maj toj wanqʼibʼile qa jaku bʼant tuʼn tok nxqʼuqine nmode.

Nyatoq ngane tuʼn wuʼjine nix tuʼn nxnaqʼtzane, tuʼntzunju, kwest el npaʼne ambʼil tuʼn nxnaqʼtzane tiʼj Tyol Dios ex tuʼn tok nqʼoʼne nwiʼye tiʼj. Pero chebʼe chebʼe chʼiy nkʼujlabʼile tiʼj Jehová. Tej tikʼ chʼin ambʼil, chʼexpaj jun tiʼ, kubʼ nnaʼne nya bʼaʼn. Kubʼ nximane qa mlayx kubʼ tnajsaʼn Jehová wile tuʼnju nim nya bʼaʼn otoq bʼant wuʼne. Toj ambʼil aju, jaw wuʼjine qe txʼolbʼabʼil in che yolin tiʼj aj kawil David ex tiʼj Jehová tej tkubʼ tnajsaʼn qe matij il otoq che bʼant tuʼn. Chewix nkʼuʼje tuʼn jlu (2 Samuel 11:1–12:13).

Juntl tiʼ kwest ela weye, aju tuʼn npakbʼane kye xjal (Mateo 28:19, 20). In tzaj xobʼe tuʼnju kubʼ nximane qa jaku tzʼetz jun xjal aju otoq tzʼok nbʼinchaʼne nya bʼaʼn tiʼj toj ambʼil ojtxe. Pero kubʼ tiʼj jlu wuʼne ex in tzalaje tej nyoline tiʼj tbʼanel tmod Jehová at kyiʼj xjal tuʼnju in kubʼ tnajsaʼn kyil.

Mintiʼ in kyime tuʼnju ok wojtzqiʼne Jehová. Chʼixme kykyaqil qeju xjal e ok te wamiwe ojtxe, ya o che kyim moqa ateʼ toj cárcel. Atzun weye, in chin tzalaje ex at jun tbʼanel qʼuqbʼil nkʼuʼje toj ambʼil tzul. O txi nxnaqʼtzan wibʼe tuʼn miʼn tjaw nnimsane wibʼe, tuʼn nnimane ex tuʼn miʼn ttzaj nqʼoje, ex tuʼn jlu ateʼqe tbʼanel wamiwe. O chin kubʼ mojeʼye tukʼil jun ermana Carmen tbʼi ex in chin tzalaje tukʼil. Qkabʼile in qo onine kyiʼj xjal tuʼn tok kyojtzqiʼn Tyol Dios.

Atzun jaʼlo, ya mintiʼ in chin elqʼane tuʼn kykanet qe tiʼchaq weye. Kukx in chinxe junjun qʼij kyoj banco, pero nya tuʼn welqʼane, sino tuʼn kybʼaj limpiarit.