Tuʼnju tzʼaqli te Jesús, mintiʼ ok weʼ twitz junjun nya bʼaʼn in tzaj kyiʼj xjal. Noqtzun tuʼnj, ximen kyiʼj xjal ex ok tilil tuʼn tuʼn tonin kyiʼj. Nya oʼkx xi tqʼoʼn aju at tajbʼen kye, sino bʼant nim tiʼchaq tuʼn kyiʼj. Tuʼntzunju, in nel qnikʼ tiʼj qa kubʼ tyekʼin Jesús qʼaqʼbʼil tkʼuʼj kyiʼj txqantl ex onin kyiʼj. Jaku kanet junjun techel quʼn tiʼj jlu kyoj capítulo 32, 37, 57 ex 99.

Kykyaqilx xjal e pon laqʼeʼ tiʼj Jesús, qa kuʼxun qe moqa otoq laqʼeʼ kyabʼqʼi. Bʼant jlu kyuʼn xjal, tuʼnju mintiʼ el tpan tibʼ kyiʼj txqantl ex mintiʼ kubʼ t-ximen qa mas nim te toklen kywitz. Ex tuʼnju ximen Jesús tiʼj teyele junjun kye, kubʼ kynaʼn bʼaʼn. Qqʼonk qwitz tiʼj alkye tten bʼant jlu tuʼn kyoj capítulo 25, 27 ex 95.

Naʼn Jesús Dios tuʼn tkyaqil tkʼuʼj tej attoq tjunalx ex tej tten kyukʼil txqantl. Naʼn Dios toj tkyaqil ambʼil ex nya oʼkx aj t-xiʼ waʼl. Toj tnaʼj Dios, xi tqʼoʼn chjonte te Jehová ex jaw tnimsaʼn tbʼi, ax ikx xi tqanin onbʼil naʼmxtoq tbʼant jun tiʼ tuʼn. Qo xnaqʼtzaʼn kyiʼj junjun ambʼil ik tzeʼn jlu kyoj capítulo 24, 34, 91, 122 ex 123.

Toj junjun maj tajtoq Jesús tuʼn tojlan, noqtzun tuʼn, mintiʼ bʼant jlu tuʼn noq tuʼn tonin kyiʼj txqantl. Mintiʼ ximen Jesús oʼkx tiʼjx. Ax ikx tiʼj jlu kyaj tqʼoʼn jun techel qe tuʼn qok lepeʼxix tiʼj. Qqʼonk qwitz tiʼj alkye tten kubʼ tyekʼin tmod lu kyoj capítulo 19, 41 ex 52.

Nya oʼkx kyaj tqʼamaʼn Jesús qa il tiʼj tuʼn tkubʼ qnajsaʼn kyil txqantl, sino ax ikx kubʼ tqʼoʼn techel tej tkubʼ tnajsaʼn kyil t-xnaqʼtzbʼen ex kyil junjuntl. Qqʼonk qwiʼ tiʼj alkye tten bʼant jlu tuʼn kyoj capítulo 26, 40, 64, 85 ex 131.

In tzaj kyyekʼin profecía qa chʼixme kykyaqil aj Judiy kʼeleltoq kyikʼen Mesías ex qa oktoq kbʼel bʼyoʼn kyuʼn aj qʼoj tiʼj. Tuʼntzunju, jakutoq kubʼ t-ximen Jesús tuʼn miʼn tok tilil tuʼn. Noqtzun tuʼnj, bʼant tkyaqil tuʼn tuʼn t-xi t-xnaqʼtzaʼn axix tok kʼulbʼil. Iktzun tten kyaj tqʼoʼn jun techel kywitz kykyaqil qeju in che ok lepeʼ tiʼj, tuʼntzun tel kykanoʼn aj kyok weʼ twitz ikʼbʼil. Qo ximen tiʼjju in tzaj chikʼbʼan kyoj capítulo 16, 72 ex 103.

Mastoq nim toklen Jesús kywitz kykyaqil xjal aj il toj nimku tten. Kabʼe techel tiʼj jlu, mastoq nim tojtzqibʼil ex tnabʼil. Tuʼnju tzʼaqlitoq, ni jun xjal jakutoq ten mas tojtzqibʼil ex tipumal twitz. Pero kubʼ tin tibʼ ex ajbʼen kye txqantl. Jaku tzʼel qnikʼ tiʼj qa mintiʼ jaw tnimsan tibʼ kyoj capítulo 10, 62, 66, 94 ex 116.

Kukx ten tpasens Jesús kyiʼj apóstol ex kyiʼj junjun xjal tuʼnju mintiʼ el kykanoʼn techel tiʼj moqa tuʼnju mintiʼ kubʼ kybʼinchaʼn aju xi tqʼamaʼn kye. Nim maj xi tqʼamaʼn xnaqʼtzbʼil kye xjal ex tukʼil pasens tuʼntzun tel kynikʼ tiʼj alkye tten jaku che ok laqʼeʼ mas ttxlaj Jehová. Qqʼonk qwitz tiʼj junjun yekʼbʼil tiʼj tpasens Jesús kyoj capítulo 74, 98, 118 ex 135.