«Tkyaqil aju tzʼibʼan tuj Tuʼjil, a Dios o qʼmante.» (2 Timoteo 3:16, Aju Xjan Tuʼjil Tyol Dios.)

Ok che tzajel tzaqʼweʼn qxjel (qpregunta) nimxix kyoklen in qo ximen kyiʼj (Proverbios 2:1-5).

Ok ktzajel yekʼun qbʼe toj tkyaqil ambʼil (Salmo 119:105).

Ok ktzajel qʼuqbʼaʼn qkʼuʼj qa tzul jun tbʼanel ambʼil (Romanos 15:4).

Jaku, qo yolil tiʼj oxe tiquʼn:

• At mojbʼabʼil kyxol ximbʼetz ateʼkux toj. Aju Tuʼjil Tyol Dios kubʼ kytzʼibʼen junlo 40 xjal ex xi tiʼn junle mil tukʼe waqaq syent abʼqʼi tuʼn tbʼaj tzʼibʼet. Chʼixme kykyaqil qeju e kubʼ tzʼibʼente mitiʼ ok kyojtzqiʼn kywitz, naqtzen tuʼnj, at mojbʼabʼil kyxol xim ateʼkux toj Tuʼjil Tyol Dios ex at jun xnaqʼtzbʼil nim toklen tkuʼx kyoj kykyaqil uʼj atqeʼkux toj.

• Kux kyqʼoʼn qeju tzʼibʼilte ikxix tzeʼnj ikʼ. Aʼye xjal tzʼibʼil junjun tiʼchaq ikʼ ojtxe, chʼixmi tkyaqil maj mitiʼ kux kytzʼibʼen aju tej tkubʼ tiʼj kytnam kyuʼn txqantl tnam. Atzun kye tzʼibʼel Tuʼjil Tyol Dios mitiʼ kubʼ kyewin kyil ex te kytnam (2 Crónicas 36:15, 16; Salmo 51:1-4).

• In japun kywiʼ yol e kyaj qʼamaʼn toj. Kyaj tqʼamaʼn Tyol Dios qa oktaq kbʼel xiten ojtxe tnam Babilonia tej atxtaq kabʼele syent abʼqʼi tuʼn tikʼ jlu (Isaías 13:17-22). Nya oʼkx kyaj tqʼamaʼn alkyetaq tten kbʼel tiʼj tnam, quʼn ax ikx kyaj tqʼamaʼn tiʼ tbʼi xjal kbʼeltaq tiʼj tnam tuʼn (Isaías 45:1-3).

  Ateʼ txqantl yol e kyaj qʼamaʼn toj Tyol Dios ax ikx japen bʼaj kywiʼ ikxix tzeʼnj kyaj qʼamaʼn. A jlu in tzaj tyekʼun qa aju tkuʼx toj Xjan Uʼj ax tok (bʼaʼn ax) Tyol Dios (2 Pedro 1:21).