¿AJU AXIXTOK, alqibʼaj? Tibʼaj junjun xjel nim kyoklen nxi kximin xjal. Axlo ikx teya ole ximiye kyibʼaj xjel lu:

• ¿Atpetzulo tkʼuʼj Dios qiʼj?

• ¿Kpolpetzulo jun qʼij jatumel melay tentl nimaq qʼoj ex kʼixkʼoj?

• ¿Tiʼ ntzaj qiʼj aj qkyim?

• ¿Okpetzulo chi jawitz anqʼin juntl maj kyimni?

• ¿Alkye tumel tuʼn qnaʼn Dios, tuʼntzun qtzaj tbʼiʼn Dios?

• ¿Tzaʼn (seʼn) jaku kanet tzalajbʼil quʼn?

¿Jatumel jaku tzaj tjyoʼn teya tzaqʼwebʼil kye xjel lu? At nim uʼj o chi bʼaj tzʼibʼan, ntzaj kqʼmaʼn qa atz kyoj tkuʼxa tzaqʼwebʼil kye xjel lu. Junjuntl junxichaq tten tzaqʼwebʼil ntzaj kqʼoʼn. Aʼyetzun txqantl ntzaj kqʼoʼn tzaqʼwebʼil oʼkx at tajbʼen toj jun ambʼil, atzun tuj juntl ambʼil mitiʼtl kyajbʼen ex nchi kubʼ tzʼaqsaʼn moqa nchi etz bʼinchaʼn txqantl te kxel (kchʼixel).

At jun uʼj tkuʼx axixtok tzaqʼwebʼil toj, tuʼntzunjo, jaku tzʼok qʼuqe qkʼuʼj tiʼj. Tqʼma Jesús tuj naʼj Dios kyjaʼ: «Aju tyola axix tok» (Juan 17:17). Jaʼlin aju yol lu tok tbʼi te Xjan Uʼj. Aju tzul jun chikʼbʼabʼil axixtok tkuʼx toj Tuʼjil Tyol Dios kye xjel ma chi bʼaj qʼamet jawni.

¿TIQUʼN NXI QXJELIN JLU? Tuʼnjo nqo anqʼin twitz jun txʼotxʼ jatumel nim bʼiybʼel nok ex jaʼ nbʼinchanjtze nya jiqin. Nim okslabʼil nkubʼ kxnaqʼtzaʼn qa aju nim mya bʼaʼn ntzaj qiʼj atzun tajbʼil Diosju.

AJU NTZAJ T-XNAQʼTZAʼN TUʼJIL TYOL DIOS. Mitiʼ te Dios nkubʼ tbʼinchen mya bʼaʼn. Tuj Job 34:10 ntqʼmaʼn: «Ate Dios aju at tipumal tuʼn tbʼant tkyaqil tuʼn mintiʼ in tbʼinchaʼn jun mya bʼaʼn ex qa aju mya tzʼaqlxix». Tuʼnjo tkʼujlabʼil Dios, at jun tbʼanilxix t-xim kye kkyaqil xjal, tuʼntzunju, kyaj t-xnaqʼtzaʼn Jesús tuʼn t-xi qqanin jlu toj qnaʼj Dios: «A qMan ata tuj kyaʼj [...]. E ttzaj ju tkawbʼila. Bʼant-xwit ju tajbʼila twitz txʼotxʼ ik tzaʼn in bʼant tuj kyaʼj» (Mateo 6:9, 10). At nimxix tkʼuʼj Dios qiʼj, tuʼntzunjo, tzaj tqʼoʼn tnejil tkʼwaʼl tuʼntzun tjapun bʼaj t-xim (Juan 3:16).

Ax ikx bʼaʼn tuʼn tkux tjyoʼna Génesis 1:26-28; Santiago 1:13, ex 1 Pedro 5:6, 7.

¿TIQUʼN NXI QXJELIN JLU? Tuʼnjo nimkuxix xjal kukx nchi kyim kyoj nimaq qʼoj. Ex qkyaqilx ntzaj alkyexku yajbʼil tuj qanqʼibʼil.

AJU NTZAJ T-XNAQʼTZAʼN XJAN UʼJ. A qMan Dios o tzaj tziyen te qa tzul tiʼn mujbʼabʼil (nakʼbʼil) twitz tkyaqil Txʼotxʼ. Tjaqʼ tKawbʼil Dios tuj kyaʼj, aʼyeju xjal «mlay kykʼam juntl maj xnaqʼtzbʼil tuʼn tbʼant kyqʼojin», okpe «kbʼajel kybʼinchaʼn kyspad tuʼn kyok te punt» (Isaías 2:4). Nya oʼkxju, ax ikx kbʼel tnajsaʼn nya jiqin ex kʼixkʼej. Ntzaj ttziyan Tyol Dios jlu kye kkyaqil xjal: «Ex kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj; porque aqeju at tnejel [ax ikx qeju nya jiqon ex aju kʼixkʼoj] ma che naj» (Apocalipsis 21:3, 4).

Ax ikx bʼaʼn tuʼn tkux tjyoʼne Salmo 37:10, 11; 46:9, ex Miqueas 4:1-4.

¿TIQUʼN NXI QXJELIN JLU? Nim okslabʼil nkubʼ kxnaqʼtzaʼn qa at jun piẍ tokx toj t-xmilal xjal kukx itzʼ aj tkyim. At junjuntl nqʼmante qa aʼyeju kyimni jaku tzʼok kbʼinchan mya bʼaʼn kyiʼj qeju xjal itzʼqeʼ, ax ikx nkubʼ kxnaqʼtzaʼn qa nchi kux tqʼoʼn Dios xjal mya bʼaʼn kbʼinchbʼen tuj qʼaqʼ te kʼixkʼojil te jun majx.

AJU NTZAJ T-XNAQʼTZAʼN TUʼJIL TYOL DIOS. Aj qkyim bʼiʼx nqo naj. Ik tzaʼn ntzaj tqʼamaʼn Eclesiastés 9:5 «atzun qeʼ xjal kyimni qeʼ, mintiʼ bʼaʼn kyuʼn». Mitiʼtl kyojtzqibʼil, mitiʼtl nknaʼn, mitiʼtl jun tiʼ jaku bʼant kyuʼn, axtzun ikx mlay tzʼok kbʼinchen mya bʼaʼn kyiʼj xjal itzʼqeʼ, ex melayx chi onit quʼn (Salmo 146:3, 4).

Ax ikx bʼaʼn tuʼn tkux tjyoʼne Génesis 3:19 ex Eclesiastés 9:6, 10.

¿TIQUʼN NXI QXJELIN JLU? Qkyaqilx qajbʼil tuʼn qanqʼin tuj tzalajbʼil junx kyukʼe xjal kʼuʼjlanqeʼ quʼn. Tuʼntzunju, qajbʼilxix tuʼn qten juntl maj junx kyukʼe toj qja aʼyeju o chi kyim.

AJU NTZAJ T-XNAQʼTZAʼN XJAN UʼJ. Chʼixme kkyaqil xjal o chi kyim ok chi jawil itzʼje juntl maj, ik tzeʼnj tzaj ttziyen Jesús «kykyaqil xjal maquʼn tuj camposant ok kybʼiʼ tqʼajqʼajel nwiʼye ex che jawitz anqʼin tuj muqbʼil» (Juan 5:28, 29). Aʼyeju xjal chi jawil anqʼin tzalu twitz Txʼotxʼ kxel qʼoʼn ambʼil kye tuʼn kyanqʼin twitz ex kʼokil kkaʼyin (kkiʼn) aj tok te jun tbʼanel najbʼil te tzalajbʼil, ik tzaʼnj kubʼ t-ximan qMan Dios tnejelku (Mateo 5:5). Tuj tbʼanelxix ambʼil tzul, aʼyeju xjal tzʼaqleqeʼ tukʼil Dios melay chi yabʼtetl ex ktel kchwinqlal te jumajx. A Tuʼjil Tyol qMan Dios nqʼmante: «Qeʼ xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:29).

Ax ikx bʼaʼn tuʼn tkux tjyoʼne Job 14:14, 15; Lucas 7:11-17, ex Hechos 24:15.

¿TIQUʼN NXI QXJELIN JLU? Kyoj kkyaqil okslabʼil, nim xjal nchi naʼn Dios. Naqtzun aju, nim xjal nxi ximinte qa mitiʼ ntzaj tbʼiʼn Dios knaʼj Dios.

AJU NTZAJ T-XNAQʼTZAʼN TUʼJIL TYOL DIOS. A Jesús kyaj qʼmante tuʼn miʼ t-xi qqʼmaʼn aʼyex yolju tuj qnaʼj Dios. Tqʼma kyjalu: «Ok knaʼne Dios miʼn txi kymaʼne elaʼ maj axju yol» (Mateo 6:7). Qa qaj tuʼn qtzaj tbʼiʼn Dios, iltiʼj tuʼn qnaʼn Dios ik tzaʼnj ntzaj tqʼmaʼn. Tuʼntzunjo, iltiʼj tuʼn tel qnikʼ tiʼj alkye tajbʼil tuʼntzun qnaʼn Dios ik tzeʼnj te tajbʼil. Ntzaj tqʼuqbʼaʼn 1 Juan 5:14 qkʼuʼj: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn».

Ax ikx bʼaʼn tuʼn tkux tjyoʼna Salmo 65:2; Juan 14:6, 14, ex 1 Juan 3:22.

¿TIQUʼN NXI QXJELIN JLU? Nim xjal nxi ximinte qa aju pwaq, aju nim toklen xjal moqa aju tbʼanel tilbʼilal xjal ok tzul tiʼn tzalajbʼil kye, tuʼntzunjo, nim xjal nchex lipe tiʼj tkyaqil jlu. Nya ikjo, quʼn mitiʼx nchi ten xjal tuj tzalajbʼil tuʼn tkyaqil jlu.

AJU NTZAJ T-XNAQʼTZAʼN XJAN UʼJ. A Jesús kyaj yekʼinte alkye tumel tuʼn tkanet tzalajbʼil quʼn tej tqʼma: «At tzalajbʼil kye qeju nneʼl kynikʼ tiʼj qa at tajbʼen Dios kye» (Mateo 5:3). Oʼkx qo tzalajelxix qa ma tzʼok tilil quʼn, tuʼn tel qnikʼ tiʼj axixtok tiʼj qMan Dios ex tiʼj tbʼanel t-xim at qe. Aju axixtok lu atz tkuʼxa tuj Xjan Uʼj, qa ma tzʼel qnikʼ tiʼj atzunju kʼonil tuʼn t-xi qximin alkye at toklen ex alkye mitiʼ toklen. Qa ma txi qqʼoʼn ambʼil te Tyol Dios tuʼn qtzaj tonin alkye qxim ex alkye qbʼinchbʼen kbʼantel, oktzun ktel tbʼanel qchwinqlal (Lucas 11:28).

Ax ikx bʼaʼn tuʼn tkux tjyoʼne Proverbios 3:5, 6, 13-18 ex 1 Timoteo 6:9, 10.

 Atzun jaʼle ma tzʼel chʼin qnikʼ tiʼj tzaqʼwebʼil ntzaj tqʼoʼn Xjan Uʼj kye qejo waqaq xjel lu. ¿Tajbʼil teya tuʼn tel chʼintl tnikʼa? Qa ik teya tzeʼn qeju xjal «nnel knikʼ tiʼj qa at tajbʼen Dios kye», tajbʼil lo teye tuʼn tel chʼintl tnikʼe kyiʼj tzaqʼwebʼil. Nkubʼ lo t-ximen teya tiquʼn ntzaj tqʼoʼn Dios ambʼil te nim mya bʼaʼn ex kʼixkʼoj qa at-xix tkʼuʼj qiʼj. Moqa tajlo teya tuʼn tel tnikʼa tzaʼn jaku tenaye toj tbʼanel kyukʼe tuj tjaya. Tbʼanelxix tzaqʼwebʼl ntzaj tqʼoʼn Tyol qMan Dios kye xjel lu ex kye txqantl.

Aqetzun txqantl xjal nya kyajbʼil tuʼn tkux kyjyoʼn tzaqʼwebʼil tuj Xjan Uʼj. Tunjo nimxix tqan nela toj kwitz ex nxi kximin qa melayxix tzʼel knikʼ tiʼj. ¿Tajpetzulo teya onbʼil tuʼn tel tnikʼe kyiʼj tzaqʼwebʼil ateʼkuʼx tuj Xjan Uʼj? Tuʼntzunjo, at kabʼe onbʼil nxi kyqʼoʼn testigos de Jehová teya.

Aju tnejel onbʼil jun uʼj a tbʼi jlu ¿Tiʼ in tzaj t–xnaqʼtzaʼnxix Tyol Dios?, a jalu o bʼaj bʼinchet tuʼn kyonit kkyaqil xjal —ex tuʼn kyonit aʼyeju mitiʼxix nten ambʼil kyiʼj tuʼn tlaj kyaqʼun— tuʼntzun kkux jyet tzaqʼwebʼil ntzaj tqʼoʼn Xjan Uʼj kye xjel nimxix kyoklen. Aju tkabʼ onbʼil jun xnaqʼtzbʼil mitiʼ chjoʼn twiʼ. Jun testigo de Jehová jaku pon qʼol xnaqʼtzbʼil teye atz tjaye mo jaxkutumel, tuʼntzun t-xnaqʼtzane jun rat toj junjun seman tiʼj Tuʼjil Tyol Dios. Nimxix xjal o tzaj kkʼamoʼn nimku tbʼanel tuʼnjo xnaqʼtzbʼil lu, ex txqantl xjal o tzaj kyqʼmaʼn tukʼe nim tzalajbʼil qa ma kanet axixtok kyuʼn.

Ax ikx teya jaku tzʼel tnikʼa tiʼj qa aju axixtok tkuʼx toj Xjan Uʼj, atzun nimxix toklenju twitz alkyexku juntl. Nya oʼkx nqo tzaqpaj kyiʼj xnaqʼtzbʼil ntzaj tchiylal qiʼj ex kyiʼj xnaqʼtzbʼil nya axtok, ax ikx nten qʼuqbʼil qkʼuʼj, nkanet ttxolil qanqʼibʼil ex nqo ten toj tzalajbʼil tuʼn. Ik tzeʼnj tqʼma Jesús: «Kʼelel kynikʼe tiʼj ju yol axix tok, ex che tzoqpetele tuʼnju yol axix tok» (Juan 8:32).