Atz in nul itzʼje Santo Domingo, toj ttxuylal tnam República Dominicana, kyaje qbʼete ex aʼyine mas chʼin. Xnaqʼtzaʼn maj qe nmane ex kyajtoq tuʼn ttzaj qʼoʼn xnaqʼtzbʼil qeʼye kyuʼn tbʼanel xjal. Tej atxtoq kyaje abʼqʼi tuʼn wul itzʼje, ok kyojtzqiʼn nmane junjun mormón in che ajbʼen te misionero. E jaw labʼin kyiʼj tuʼn tbʼanel kymod, tuʼnju nya tzʼil kyiʼj ex in bʼaj kybʼinchan kyten. Tej tikʼ chʼintl ambʼil, aqe toj njaye okslan tnejel toj tnam República Dominicana toj Iglesia de Jesucristo de los Santos de los Últimos Días, ax ikx ojtzqiʼn ik tzeʼn Iglesia Mormona.

In nonine kyiʼj junjun tiʼchaq bʼant tuʼn Iglesia, noqtzun tuʼnj, mas ngane aju t-ximbʼetz attoq kyiʼj ja xjal ex kyiʼj qe mod tuʼn tkubʼ qyekʼin. Nim in tzalaje tuʼnju mormón qine tuʼntzunju kubʼ nximane tuʼn woke te misionero.

Tej wele te 18 abʼqʼi, o xiʼye anqʼil atz Estados Unidos kyukʼil toj njaye tuʼntzun nxiʼye toj jun tbʼanel universidad. Tej tikʼ jun abʼqʼi, ul qe ntiyoye testigo de Jehová visitaril qeye atz Florida ex tzaj kyqʼoʼn txokbʼil qiʼje tuʼn qxiʼye kyukʼil toj jun nimaq chmabʼil. In jaw labʼine tuʼnju kykyaqilx in che jyon kyiʼj taqikʼ Tyol Dios ex in che tzʼibʼin tqanil twitz uʼj, tuʼntzunju, ax ikx xi nqanine jun wuʼje ex jun lapicero tuʼn tkyaj ntzʼibʼine tqanil.

Tej tbʼaj nimaq chmabʼil, tzaj kyqʼamaʼn ntiyoye weye qa kyajtoq tuʼn kyonin wiʼje tuʼn tel nnikʼe tiʼj Tyol Dios tuʼnju wajtoqe tuʼn woke te misionero. Tbʼanel el toj nwitze, tuʼnju mastoq ojtzqiʼn Libro de Mormón wuʼne twitz Tyol Dios.

Yajxitl, kukx o yoline tiʼj Tyol Dios toj teléfono. Ok tilil kyuʼn ntiyoye tuʼn kyonin wiʼje, ok kymojbʼan aju nimentoq wuʼne tukʼil aju in tzaj tqʼamaʼn Tyol Dios. Kyajtoq tuʼn tel nnikʼe tiʼj axix tok njunalxe.

Attoq nim xnaqʼtzbʼil toj wokslabʼile aju kubʼ nximane qa ax tok pero mintiʼtoq bʼiʼn wuʼne qa atzunju in tzaj t-xnaqʼtzaʼn Tyol Dios. Tzaj t-samaʼn ntiyaye uʼj ¡Despertad! te 8 te noviembre te 1995, aju bʼinchaʼn kyuʼn testigo de Jehová, aju in yolintoq tiʼj okslabʼil mormón. In jaw labʼine tej tel nnikʼe tiʼj qa mintiʼtoq ojtzqiʼn nimku xnaqʼtzbʼil wuʼne tiʼj wokslabʼile, tuʼntzunju xi njyoʼne tqanil toj qtembʼile te Internet tuʼntzun tel nnikʼe tiʼj qa axix tok aju in tzaj tqʼamaʼn uʼj ex el nnikʼe tiʼj qa ax tok. Axpe ikx, e kanet txqantl yekʼbʼil wuʼne tiʼj jlu tej nxiʼye kyoj nimku museo toj tnam Utah.

Otoq kubʼ nximane qa in kyonin kyibʼ Tyol Dios tukʼil Libro de Mormón. Noqtzun tuʼnj, tej wok tene uʼjil tiʼj Tyol Dios el nnikʼe tiʼj qa junxitl te Tyol Dios in tzaj t-xnaqʼtzaʼn. Jun techel, in tzaj tqʼamaʼn Ezequiel 18:4 qa aju alma moqa qanmi in kyim. Atzunte toj Libro de Mormón in tzaj tqʼamaʼn toj Alma 42:9 qa mintiʼ in kyim qanmi.

Nya oʼkx jlu mintiʼtoq in nel nnikʼe tiʼj, ax ikx mintiʼtoq in nel nnikʼe tiʼj kyxnaqʼtzbʼil mormón kyiʼj tnam. Jun kyxol jlu aju qa atz taʼ jardín de Edén jaʼlo toj tnam te Jackson (Misuri, Estados Unidos). Ax ikx in tzaj kyqʼamaʼn profeta te Iglesia qa kʼajbʼel tkawbʼil Estados Unidos tuʼn Dios tuʼn tkawin twitz tkyaqil Txʼotxʼ.

Kubʼ nximane tiʼ kbʼajel tiʼj ntname ex kyiʼj txqantl tnam aj tjapun jlu. Tzaj yolin jun xjal wiʼje aju in xnaqʼtzaʼn tuʼn tok te misionero ex in yoline tiʼj jlu tukʼil. Xi nqanine jlu te: «Qa ma qʼojin ttnama tukʼil juntl tman, ¿okpe kqʼojila tukʼil juntl mormón te juntl tnam?». In jaw labʼine tiʼj tej ttzaj ttzaqʼweʼn qa ok. Kukx in jyone tqanil kyiʼj t-xnaqʼtzbʼil wokslabʼile ex xi nqanine kye junjun nejenel toj Iglesia, aʼyeju nim kyoklen, ex tzaj kyqʼamaʼn weye qa kpol jun ambʼil tuʼn kytzaj tzaqʼweʼn qe nxjele.

Mintiʼtoq ayoʼn wuʼne tuʼn ttzaj kytzaqʼweʼn jlu. In nok tene ximel tiʼj tiquʼn wajtoqe tuʼn woke te misionero ex el nnikʼe tiʼj qa ik tten jlu ik tzeʼn tuʼn wonine kyiʼj xjal, ax ikx wajtoqe tuʼn ttzaj qʼoʼn woklene ik tzeʼn in tzaj qʼoʼn kye qeju in bʼant aqʼuntl lu kyuʼn. Noqtzun tuʼnj, mintiʼxix wojtzqibʼile at tiʼj Dios. Nim maj otoq che jaw wuʼjine junjun taqikʼ Tyol Dios, noqtzun tuʼnj, mintiʼ ok nqʼoʼne toklen. Ex mintiʼtoq ojtzqiʼn wuʼne qa at jun tiquʼn kubʼ tbʼinchaʼn Dios Txʼotxʼ ex qe xjal.

Tej wok tene xnaqʼtzal tiʼj Tyol Dios kyukʼil testigos de Jehová el nnikʼe tiʼj nimku tiʼchaq, ik tzeʼn alkye tbʼi Dios, tiʼ in bʼaj qiʼj otoqxi qo kyim, alkye toklen Jesús o txi qʼoʼn tuʼn tjapun twi t-xim Dios ex junjuntl. Xi tzyet tuʼn tok wojtzqiʼne aju Tyol Dios. ¡Tbʼanelxix in nela toj nwitze tuʼn nyoline kyukʼil txqantl tiʼjju in nel nnikʼe tiʼj toj Tyol Dios! Qʼuqlitoq nkʼuʼje qa at Dios, noqtzun tuʼnj, toj ambʼil jaʼlo jaku chin yoline tukʼil ik tzeʼn in chin yoline tukʼil jun tbʼanel wamiwe. Jaw aʼ nwiʼye toj 12 te julio te 2004 tuʼn woke te testigo de Jehová ex tej tikʼ qaq xjaw in noke te pakbʼal toj tkyaqil ambʼil.

Jweʼ abʼqʼi in najbʼene toj kytxuylal ninja qʼil twitz aqʼuntl kye testigo de Jehová atz Brooklyn (Nueva York). Tbʼanelxix in nela toj nwitze tuʼnju xi nqʼoʼne chʼin onbʼil tuʼn kyetz tuʼjil Tyol Dios ex junjuntl uʼj tuʼn kyonit xjal twitz tkyaqil Txʼotxʼ. ¡Nimxix tzalajbʼil o kubʼ nnaʼne toj tkyaqil ambʼil lu tuʼnju in chin onine kyiʼj xjal tuʼn tok kyojtzqiʼn Dios!