Mintiʼ. In tzaj tqʼamaʼn Xjan Uʼj qa kubʼ tbʼinchaʼn Dios «tiyjil» xjal ex kyyajil junjuntl tiʼchaq at kyanqʼibʼil ik tzeʼn qe txkup ex qe tzeʼ (Génesis 1:12, 21, 25, 27; Apocalipsis 4:11). Ax ikx in tzaj tchikʼbʼaʼn qa atz tzajni kykyaqil xjal tiʼj Adán ex Eva (Génesis 3:20; 4:1). Mintiʼ in nonin tiʼjju in kubʼ kyximen xjal qa ajbʼen evolución tuʼn Dios tuʼn kybʼant junxichaq tiʼchaq at kyanqʼibʼil. Pero mintiʼ in tzaj tqʼamaʼn Tyol Dios qa nya ax tok aju o tzʼel kynikʼ xjal tiʼj qa in che chʼexpaj chʼin junjun kyyajil txkup moqa tzeʼ.

•  ¿Tiʼ nimen kyuʼn junjun xjal?

•  ¿In tmojbʼanpe tibʼ aju in tzaj tqʼamaʼn evolución tukʼilju in tzaj tqʼamaʼn Tyol Dios?

•  ¿Tuʼnpe evolución in chʼexpaj chʼin kyyajil txkup ex tzeʼ?

 Aʼyeju xjal in kubʼ kyximen qa ajbʼen evolución tuʼn Dios tuʼn kybʼant tiʼchaq, at junxichaq kyximbʼetz tiʼj tzeʼn bʼant tuʼn.

 In kubʼ kyximen jlu:

•   Kykyaqil tiʼchaq at kyanqʼibʼil jaʼlo atz tzajniqe tiʼj jun tiʼ ten ojtxe.

•   Jaku tzʼok jun tiʼ te juntl tiʼ. Jun techel, in tzaj kyqʼamaʼn xjal qa jaku tzʼok jun mono te jun xjal.

•   A Dios in nonin tuʼn kybʼant qe tiʼchaq lu.

 Noqwit ax tok jlu, jakulo kubʼ qximen qa nya ax tok aju in tzaj tqʼamaʼn uʼj te Génesis tiʼj tzeʼn e bʼant qe tiʼchaq. Pero tej tyolin Jesús tiʼj jlu, tqʼama qa nya noq jun txʼolbʼabʼil, sino ax tok jlu (Génesis 1:26, 27; 2:18-24; Mateo 19:4-6). In tzaj tqʼamaʼn Xjan Uʼj qa anqʼin Jesús tukʼil Dios toj kyaʼj tej naʼmxtoq tul tzalu twitz Txʼotxʼ ex onin tiʼj tuʼn kybʼant kykyaqil tiʼchaq (Juan 1:3). Tuʼntzunju, mintiʼ in tmojbʼan tibʼ aju in tzaj tqʼamaʼn Xjan Uʼj tukʼilju in tzaj kyqʼamaʼn xjal qa ajbʼen evolución tuʼn Dios tuʼn kybʼant qe tiʼchaq tuʼn.

 Mintiʼ in tzaj tqʼamaʼn Tyol Dios jniʼ jaku chʼexpaj tyajil jun tiʼ nix tiʼ jaku bʼaj tiʼj. Ax ikx mintiʼ in tzaj tqʼamaʼn qa jaku che chʼexpaj txkup ex tzeʼ aj kychʼiy moqa aj kyten toj juntl lugar. Ateʼ junjun xjal in kubʼ kyximen qa in nok jlu te evolución aj kychʼexpaj chʼin. Pero aj tbʼaj jlu, mintiʼ in che bʼant akʼaj tiʼchaq kyiʼj.