ʼNdíndsʼe kao ʼndítichja:

Jela kjoan 2,600 nó tjínle, nga jngo sén kisakole je profeta Ezequiel. Jngo karreta tsabe xi nʼioje kji xi je Niná tíbándiaale. Je xi tokʼoamaná kui josʼín nga fi karreta jebi. Sasa fini kʼoa alikui síxa̱nle ninga kjaʼaísʼin koai kʼoa ninga kʼoetin (Ezeq. 1:4, 9, 12, 14, 16-27).

Jmé xi tsoyaná sén jebi. Kuinga je jtínle Jeobá xi tíjna ngʼajmi nikʼiajin jyó bʼejna. Kʼoa je jtínle xi tíjna i̱ Sonʼnde kʼoati tsín jyó tíbʼejna. Jme xi kisʼin naxinandále Niná je nó xi jaʼato kui xi bakóná nga nʼio tísíxá.

Ya Estados Unidos, nkjín ndsʼee xi ya síxá Betel xi nʼio tse xá tjíosʼele nga ya tjíofikatio ya Warwick (Nueva York), kao ya jña tjío ndʼia xi ngikʼa. Kʼoa tjínkʼa xi tsín tiya Betel tjíosíxáni. Kʼoa ya jña xin naxinandá, tjínkʼa ndsʼee xi Betel tjío, xi ya tjíosíxá jña tjíosʼenda sucursal, jña kjimachjotseya kʼoa ya jñani kjimajngokao xi kjaʼaí sucursal. Kʼoa tjín xi xin naxinandá tjíofikatio. Ningalani likui xin ʼnde tiʼmi, kʼoajin tinʼio tinixálai Niná.

Nʼio tsjoa manajin nga nʼio tjíosíxá je ndsʼee xi tjío jngo tjíjtsa Sonʼnde, nga tsín jyó tjíobatio. ʼYaníjin nga nʼio nkjín ndsʼee xi ya tjíofitsjoánganʼio jñani ngisa machjén xi tsoyason. Tjínkʼa xi kjaʼaí én tjíokotʼaya kʼoa tsa maije̱ kjaʼaísa sʼin tjíotsoyason. Nkjín koya jme xi tjíosʼín nga ngisa tse tjíosíxále Niná. Kʼoa ninga je ndsʼee xi jejchínga kao xi chʼin tjínle tojo nʼio tjíosíxále Jeobá kʼoa ñaki kʼoatjío kon nga koako nga ndiso je Na̱i (1 Cor. 9:24).

Ñaki kʼoatʼao tokon nga kuenta tísʼín je Jeobá jmeni xi tinʼiao nga tinixálao (Heb. 6:10). Kʼoatinʼiao jokisʼin Abrahán kao Sara. Kʼianga jetsʼato 70 nóle kʼoatsakʼé kon nga kisikʼéjna naxinandá Ur kʼoa nga ya kikʼejna Canaán. Jngo siento nó nga to ndʼianajño tsakʼejnaʼya, josaʼnda nga kʼien. Alikui to yaole kini je Abrahán kao chjoónle (Gén. 11:31; Hech. 7:2, 3).

Ndatjín nga si̱kjaʼaitsjeen tsa kʼoatinʼia jokisʼin je. ʼYani xi kixi kjima nichxin fetʼa xi tiyoaa ndʼaibi, kʼoatjíosʼín jmeni xi kitso Jesús nga sʼiaan. Je Jesús kitso: “Kuinga tangínsíño, kʼoa chjotana tikao je chjota xi tjín ngakjijnda naxinandá, cha̱nisʼenngindáo kao jaʼaínle Nʼai kʼoa kao tsʼe ʼNdí kʼoa kao tsʼe nganʼiotsje” (Mat. 28:19, TNM).

Kʼianga “tangión” kitso Jesús, kui xi kitsonile nga tsín jyó kuiyoaa. Kʼoa nʼio tsjoa sʼe tokoán nga ʼyaa ngayeje jmeni xi kisʼin je chjotale Cristo je nó xi jaʼato. Tiʼyañá nga je Jeobá tíbasenkaoná kʼoa tísíchikontʼain je xá xi tinʼia nga tiʼmiyasoán je énnda chjotse ngakjijnda Sonʼnde (Mar. 13:10).

 Nʼio nkjín chjota xi tjíonrʼoé je Énle Niná. Je nó xi jaʼato 8,340,847 koan je xi kitsoyason kʼoa 10,115,264 koan je xi tsakʼaile estudio nga xki̱ sá. Je jtínle Jeobá alikui jyó tíbʼejna kʼoa jon kʼoati tsín jyó tibiyo. Tosi tonda kʼoasʼin tixáo jokji nichxin tíjnasa tiʼani nga kje batéchjoajinle Jeobá je xá xi tinʼia, xi bʼasjentjai je chjota.

Nʼio basenkaoná jmeni xi tso je testo xi tsʼe nó 2017. Testo jebi itso: “Tinʼiotʼai je Jeobá kʼoa kui kʼoatʼiain xi ndatjín” (Sal. 37:3). Kʼianga nitjosoán jme xi tso én jebi kʼoa kui xi ndatjín kʼoanʼia nga nixálee Jeobá, bakoñá nga je Jeobá ninʼiotʼaa yaoná. Si̱kjaʼaitsjeen nga tsín toñá tiyoaa. Je Jesús i kitso: “Koeni an tijnakaono nga jon ngantsjai nichxin, saʼnda nga kjoetʼa sonʼndebi” (Mat. 28:20). Je Jesús sitjoson jme xi kitso.

Alikui si̱chajiaan nga tosi tonda sichikontʼain Jeobá je xá xi tinʼia. Ni tse kʼoa ni choa, je xi kuenta sʼín je Jeobá kuinga kʼoatinʼia jokji bichó nganʼioná kʼoa nga ñaki kao ni̱ma̱ná kʼoatinʼiañá. Kʼianga kʼoanʼia fayatsjoañá ni̱ma̱le Jeobá (2 Cor. 9:6, 7). Kuinga tosi tonda kʼoétsʼoasínilee, chótʼayá je Énle kʼoa kao kjoatsjoa kʼuínyasoán. Tsa kʼoasʼiaan, ngisasa koa̱nmiyoaa.

Je Na̱i be nga tochoasa nichxin tíjnale kʼoa tíbásjaile jotísʼín nga tsín tikixi koanngíntʼanilee Jeobá (Apoc. 12:12). Jokji tsesa nichxin tíjnale tosi tonda kʼoasʼin nga̱ kui xi mele nga tsín tikixi koanngíntʼanilee Jeobá. Tonga tsa chrian kuiyolee je Jeobá, nikʼiajin kʼoakoa̱nle nga jme xi sikaoná je Na̱i (Sal. 16:8). Li nichajinjion nga nʼio tsjoachalaijin kʼoa bʼailaijin kjoanda jme xi tinʼiao nga tibinyakaonáijin nga tíbitjosonná je xá xi tinʼia tʼatsʼe Jeobá nichxin fetʼa xi tiyoaa ndʼai.

Ndsʼao,

Cuerpo Gobernante xi tsʼe testigole Jeobá