Nichxin kjoatse, je chjota jngo la̱jao̱natsí kisichjén xi tsakʼaoyani trigo kʼianga kisinda nioxtila. Nyaon nyaon nga kui xá kisʼin yánchjín kʼoa tsa je xi choʼnda sʼin tsakatio. Kʼianga kui bʼaxki̱ nga tíʼyoya tsojmi kui tsoyanile jme xi sʼín chjota nga nyaon nyaon (Éxodo 11:5; Jeremías 25:10).

Kjimasjai dibujo kao estatua ya Egipto, xi bakó josʼin kisixákao chjota je la̱jao̱natsí. La̱jao̱ jebi tjenjenya kisʼe jñani kinikatíoya je tsojmi xi ʼyoya kʼoa jngo la̱jao̱ xi ngisa ʼndí kji xi ntsjanatsí koan. Kʼianga tjín xi tsakʼaoya chjota tsakinyaxkónyʼin kʼoa kao nga jao ntsja kitsoani je ntsjanatsí nga tsakʼao. Jngo libro xi kʼoatso nga jao kʼoa tsa ño kilo ai je ntsjanatsí. Tsakui tsakasénle xínkjín chjota saʼnda koan kisikʼien xínkjín (Jueces 9:50-54).

Je la̱jao̱natsí nʼio koanchjénle je chjota. Kuinga i̱ tsosíni je Biblia: “Aliʼya xi koa̱n la̱jao̱natsí kʼoa tsa ntsjanatsí skoé nga kui sikʼéjnanʼio tsa jme xi kasíkinya, nga̱ tsa kʼoasʼin kui tíkjoé xi tjíokonni xínkjín” (Deuteronomio 24:6).

Je Biblia kʼoatso nga ya “tíjnatʼa[le] Nʼainá” je Jesucristo (Juan 1:18). Jebi kui xi tsonile nga nʼio nda tjíokao xínkjín je Jesús kao Nʼaile. Én jebi yaa kinroani josʼin tsakatiotʼa yámixa̱ je chjota judío kʼianga tsakjen.

Kʼianga nichxinle Jesús, je chjota judío yaa tsakjayomitʼa yá xi nyandai yámixa̱ kʼianga tsakjen. Kʼoa yámixa̱ xi kisichjén alikui ngʼa kjoan. Jngo mangijko tsakinyáne xkóntsja ngʼaskón kʼoa je ntsja ngakixi totsakáyondaí kʼoa totsakjénjinsén je ndso̱ko̱. Jngo libro xi i̱ tso: “Nga kʼoasʼin tsakatio, je jko̱ yaa chrian kisatiole ʼme̱le chjota xi tjíotʼa ngʼaskónle”. Kuinga kui kisichjénsíni én xi tso nga jngo chjota ya “tíjnatʼale” chjota xi ijngo.

Nʼio tse kjoanda tsakʼaile jngo chjota xi ya bʼejnatʼale je xi jko̱ tíjnale yaniʼya kʼoa tsa je xi sʼuí kabʼéjna. Kuinga je Juan, je chjotale Jesús xi “kjaínga tjaoke” ya tsakʼejnatʼasínile kʼianga tsakjen. Kʼoa kʼianga tjín xi kiskonangile, je Juan “tsakʼejnatʼale Jesús”, xi tsonile, yaa tsakjéntʼa jko̱ ya ʼme̱le Jesús (Juan 13:23-25; 21:20).