1, 2. a) ¿Pje go tsjaji yo líder religioso ngekʼua ro tsʼasʼꞹji ro nⱥdʼⱥjikjimi yo apóstole, pe pje go tsjaji angezeji? b) ¿Pjenga yo apóstole dya bo jyɇziji ro nⱥdʼⱥjikjimi?

 Dya bʼe kjogꞹ na punkjꞹ paa ke go tsjaji nu mbaxua Pentecostés kja nu kjɇɇ 33 ma nu congregación a Jerusalén kja go mbꞹrꞹ ro bʼꞹbʼꞹ. E Satanás me mi ꞹdʼꞹ ko nu congregación, ngekʼua mi nee ro juatrʼꞹ. Angeze o tsjapꞹ ke yo líder religioso dya ro jyɇziji yo kjuarma ro nⱥdʼⱥjikjimi. Zø mi nge akjanu yo apóstole sigido o nⱥdʼⱥjikjimi ñe “na punkjꞹ o nteekʼo xo [go] ñenchʼeji o mꞹbʼꞹ e Jesucristo” (Hech. 4:​18,​33; 5:14).

² Nange go kjogꞹ akjanu yo líder religioso me go ꞹmbꞹji yo apóstole ñe o ngotrʼꞹji a pjørꞹ. Pe nu kʼe xomꞹ e Jehová o pejñe na anxe ke go xokʼꞹ kʼe pjørꞹ ngekʼua yo apóstole go mbedyeji, akjanu ma go jyasʼꞹ a mi nⱥdʼⱥjikjimi nrro na yeje. Yo xꞹndaro nrro go penchiji ñe go zidyiji kja yo autoridad ngekʼua ro jñꞹnpꞹji nguenda, nudyakʼua go xipjiji ke dya go dyⱥtⱥji ko a bi mandaji, ke dya kja ro nⱥdʼⱥjikjimi. Yo apóstole dya go su̱ji ñe bo nrrꞹrꞹji: “Xenda ni jyodʼꞹ ra ⱥtkøjme Mizhokjimi ke na ngetsʼkʼeji ra ⱥtkøjme”. Yo fariseo me mi ꞹmbꞹji yo apóstole jesta mi nee ro mbøtrʼꞹji, pe e Gamaliel ke xo mi ngeje fariseo o xipji kʼo mi dyojui: “Tsjijñiji na joo kʼꞹ ri tsjapꞹji yo bʼɇzo”. Angezeji o potpꞹji nguenda kʼo go mama e Gamaliel ñe o jyɇziji libre yo apóstole. Nudyakʼua, ¿pje go tsjaji yo apóstole ma go mbedyeji libre? Angezeji “sido [...] mi jichiji kʼo ntee, mi mamaji e Jesús nge kʼꞹ o ñʼeme Mizhokjimi ra manda” (Hech. 5:​17-21, 27-42; Prov. 21:​1,​30).

3, 4. a) ¿Pje go tsjaa e Satanás nrreze mi jingua ngekʼua ra tsʼasʼꞹ yo kjuarma ra nⱥdʼⱥjikjimi? b) ¿Pje ra nuji kja ne capítulo ñe kja yo yeje ke ba e̱je̱?

³ Yo nrumꞹ ke o kjogꞹ nu congregación a Jerusalén nu kjɇɇ 33, ngeje nu otrʼꞹ juicio ke o kjogꞹ kja nu congregación cristiana, pe xi mi bʼꞹbʼꞹ yo nrrumꞹ ke ro kjogꞹ (Hech. 4: 5-8; 16:20; 17: 6, 7). Yo paa ke ri ka̱ra̱jidya e Diablo tsjapꞹ ke yo gobierno xo ra ꞹmbꞹji yo ri testigøjme e Jehová ñe dya jyɇzgijme ra nⱥdʼⱥjmekjimi. Ngekʼua jyⱥspⱥji bʼɇchjine yo kjuarma. Kʼꞹ dʼaja bʼɇchjine, nge ke manji ke me ri jyombʼꞹjme chu̱ʼu̱ yo dyaja ntee. Nu yeje, nge ke manji ke dya ri ⱥtⱥjme yo gobierno, ñe nu jñii bʼɇchjine ke manji nge ke pje nrre ri pøgøjme ma ri kjiñijme yo ntee. Ngekʼua yo kjuarma kjijñiji ke na joo ra moji kja yo tribunal ñe ra maa xipjiji yo autoridad ke dya kjuana kʼo manji. ¿Pje kjogꞹdyama? ¿Ja ga mbøxkʼꞹgedya nu kʼo go kjogꞹ kja yo tribunal yo paa ke a go kjogꞹ? Ra nuji pje go tsjaji yo kjuarma ngekʼua yo autoridad ra jyɇzgijme ra jichijme “yo dʼadyo jñaa” (Filip. 1: ​7).

⁴ Kja ne capítulo ra nuji pje go tsjaji yo kjuarma ngekʼua me ro mⱥji ro nⱥdʼⱥjikjimi zø yo gobierno dya mi jyɇziji ro tsjajiyo. Kja yo yeje capítulo ke ba e̱je̱ ra nuji pje go tsjaji yo kjuarma ngekʼua yo gobierno ro jyɇziji ro minji ja nzi ga nee e Jehová ñe o Reino, xo dya ra kjaji kʼo na sʼoo ke kjaji yo ntee.

5. Ma o nguarꞹ nu década 1930, ¿pjenga mi ngotrʼꞹji a pjørꞹ yo mi nⱥdʼⱥjikjimi, ñe pje go tsjaji yo kjuarma ke mi otrʼꞹji axojñi kja nu organización e Jehová?

⁵ Nuʼma ni nguarꞹ nu década 1930 kja Estados Unidos texe yo autoridad municipal ñe estatal mi neji ke yo testigo e Jehová ro pɇsʼiji na licencia ngekʼua ro søø ro nⱥdʼⱥjikjimi. Pe yo kjuarma dya mi søø ro øtꞹji na licencia yo autoridad ngekʼua ro nⱥdʼⱥjikjimi, nangeje mi pa̱ra̱ji ke e Jesús nge kʼꞹ go manda ro nⱥdʼⱥjikjimi ñe yo apóstole mi ⱥtⱥji e Jesús, dya mi ⱥtⱥji yo gobierno (Mar. 13:10). Nudyakʼua yo gobierno go ngotrʼꞹji a pjørꞹ na punkjꞹ testigo e Jehová ke mi nⱥdʼⱥji o Reino e Mizhokjimi. Ngekʼua yo kjuarma ke mi otrʼꞹji axojñi kja nu organización o moji kja yo tribunal, go øtꞹji yo gobierno ke dya ro tsʼasʼꞹji yo testigo e Jehová ro nⱥdʼⱥjikjimi. Nudyakʼua kja nu kjɇɇ 1938 o tsjapꞹji na juicio yo kjuarma, ¿pje go kjogꞹnu?

6, 7. ¿Pje go kjogꞹ nu pjamilia Cantwell?

⁶ Texe nu pjamilia Cantwell mi ngeji precursores especiales, e kjuarma Newton Cantwell mi ɇdyi 60 kjɇɇ, nu suu e Esther, ñe yo o chʼii mi ngeji Henry, Russell ñe Jesse. Nu martexi 26 nu zana abril nu kjɇɇ 1938 o moji kja nu menzumꞹ New Haven (Connecticut) ngekʼua ro nⱥdʼⱥjikjimi texe nu paa. Yo paa ke a bi kjogꞹ a mi ngotrʼꞹji a pjørꞹ nu pjamilia, ngekʼua mi pa̱ra̱ji ke bʼꞹma nrrajmetrjo nrro ro kjogꞹyo. Zø mi nge akjanu, xi mi nee ro nⱥdʼⱥjikjimi ko nrrexe o mꞹbʼꞹji. O zⱥtrʼⱥji a New Haven ñe mi e̱dyiji yeje auto. E kjuarma Newton mi e̱dyi na auto ñe mi tunꞹ na punkjꞹ skuankjimi ñe gramófonos portátiles, ñe o trʼii, Henry ke mi ɇdyi 22 kjɇɇ mi e̱dyi na auto ke mi tunꞹ yo bocina. Ma kja mi zⱥtrʼⱥji dabaditrjo bo sⱥji yo policía ñe go xipjiji ke dya mi søø ro nⱥdʼⱥjikjimi.

⁷ Otrʼꞹ o zidyiji a pjørꞹ e Russell, ke mi ɇdyi 18 kjɇɇ, nukʼua o zidyiji e kjuarma Newton ñe nu suu e Esther. E Jesse ke mi ɇdyi 16 kjɇɇ go nuu ke go zidyiji a pjørꞹ o jyoo, nu nana ñe o kjuarma, ngekʼua o ngemetsʼɇ nangeje o kjuarma Henry mi nⱥdʼⱥkjimi kja nʼaño menzumꞹ. Zø mi bʼꞹntsʼɇ, dya go jyɇzi ro nⱥdʼⱥkjimi ko o gramófono. Yeje bʼɇzo ke mi ngejebi católico go nee ro dyⱥrⱥbi kja nu gramófono nu discurso ke go unꞹ e kjuarma Rutherford ñe mi chju̱u̱ “Enemigos”. Pe ma go dyⱥrⱥbi kʼo mi mama nu discurso bo ꞹdʼꞹbi na punkjꞹ ke mi nee ro yabʼꞹ e Jesse. Angeze dya go su̱u̱, ñe bo maa. Nu nrrajmekʼꞹ o chebi na agente ñe go zidyi a pjørꞹ. Nudyakʼua yo policía o jyɇziji ke e kju̱ʼu̱ Cantwell ro maa nange go manji ke dya go tsjaa kʼo na sʼoo, pe go manji ke nu xira ñe o trʼii ro ngemebi nange go tsjabi kʼo na sʼoo. Zø mi nge akjanu, yo kjuarma go ngo̱ntrʼꞹji merio yo autoridad ngekʼua ro jyɇziji ro mbedyeji kja pjørꞹ.

8. ¿Pjenga nu tribunal go mama ke e Jesse Cantwell mi jyombʼꞹ chu̱ʼu̱ yo ntee ñe go unꞹ na condena?

⁸ Ma o kjogꞹ yo zana, kja septiembre nu kjɇɇ 1938 nu pjamilia Cantwell o moji kja nu tribunal ke bʼꞹbʼꞹ a New Haven. Nu tribunal o mama ke e kjuarma Newton, e Russell ñe e Jesse mi ngeji o sʼokꞹji nangeje dya mi pɇsʼiji na licencia ma mi paa kjijñiji yo ntee. Zø go dyøtꞹji ke nrro ro unꞹji na veredicto kja nu Tribunal Supremo a Connecticut, nu tribunal bo unꞹ na condena e Jesse, nange bo manji ke mi jyombʼꞹ chu̱ʼu̱ yo ntee a jñiji. ¿Pjenga mi manji akjanu? Na ngeje kja nu tribunal yo yeje bʼɇzo ke mi ngejebi católico o mamabi ke nu discurso ke go dyⱥrⱥbi, mi jyⱥspⱥ o religión angezebi, ñe ke nujyo o tsjapꞹ ro ꞹdʼꞹbini. Nange dya go køtrʼpꞹji jñinu, yo kjuarma ke mi otrʼꞹji axojñi kja nu organización go manji ke ro moji kja nu Tribunal Supremo a Estados Unidos, nu autoridad jurídica ke mazi na nojo kja kʼe país.

9, 10. a) ¿Pje go manji yo juesi kja nu Tribunal Supremo a Estados Unidos kja nu juicio ke o tsjapꞹji nu pjamilia Cantwell? b) ¿Pjekja me na mubi kʼo bo mama nu Tribunal kja kʼe juicio?

⁹ Ndizi nu paa 29 nu zana marzo nu kjɇɇ 1940, nu presidente kja nu Tribunal Supremo, Charles Evans Hughes, ñe yo 8 magistrados ke mi pɇpjiji kja kʼe Tribunal, go dyⱥrⱥji na joo ko go mama e kjuarma Hayden Covington, ke mi ngeje abogado yo testigo e Jehová. a Nu fiscal ke mi ñeje kja nu estado a Connecticut go mama ke yo testigo e Jehová na kjuana mi jyombʼꞹji chu̱ʼu̱ yo ntee kja yo jñiji. Kʼꞹ dʼaja juesi bo mama: “Ma e Jesús go mimi kja ne xoñijomꞹ yo ntee dya mi nee ro dyⱥrⱥji kʼo mi jichi angeze, ¿eko ja̱a̱?”. Nu fiscal go nrrꞹrꞹ: “Ja̱a̱, na kjuana, xo ne Biblia mama ke me go ꞹmbꞹji e Jesús nange mi jichi yo ntee o Jñaa e Palesito ajensʼe”. ¡Na kjuanakʼo!, texeji me go kentrjoji ko yo jñayo. E fiscal dya go unꞹ nguenrra ke mi nee ro mama ke yo testigo e Jehová mi chjenjui e Jesús, ñe nu estado mi kjaa nzikja yo ntee ke mi ꞹmbꞹji e Jesús. Nu paa 20 nu zana mayo nu kjɇɇ 1940, nu Tribunal Supremo go mama ke yo testigo e Jehová dya go tsjaji kʼo na sʼoo ñe dya pje mi pɇsʼiji nu sʼokꞹ.

¹⁰ ¿Pjekja me na mubi kʼo bo tsjaa nu Tribunal? Akjanu yo autoridad federal, estatal ñe local kja kʼe país ro jyɇziji ke texe yo ntee ro pɇsʼiji nu religión ke neji ñe nu ley ro mbøsʼꞹji, akjanu dya kjo søø ro tsʼasʼꞹ ro tsjaji ko mi kreoji. Xo ñeje nu Tribunal bo unꞹ nguenrra ke e Jesse dya mi jyombʼꞹ chu̱ʼu̱ kja jñiji. Ma go nguarꞹji nu juicio, kʼe Tribunal go mama ke na kjuana ke “yo testigo e Jehová dya kjo mi jyombʼꞹji chu̱ʼu̱”. Me na joo kʼo go manjinu, me go mbøsʼꞹ yo kjuarmayo. ¿Kjo xe mbøxkꞹjidya kʼo bo kjogꞹ kʼe paa? Na abogado ke ngeje testigo e Jehová bo mama: “Yo padya dya ri su̱gøjme ke yo autoridad ra kʼaxkꞹjme ra pɇsʼijme in religión, xo kja in menzumꞹgøjme søø ra jichijme yo ntee nu esperanza ke mama ne Biblia”.

11. ¿Pje ma campaña go tsjaji yo kjuarma a Canadá, ñe pjenga?

¹¹ Kja nu década 1940 yo testigo e Jehová ke mi menzumꞹji a Canadá, me go supjreji nangeje nu gobierno me mi ꞹmbꞹji. Ñe yo kjuarma mi neji ke texe yo ntee ro mba̱ra̱ji ke nu gobierno dya mi jyɇzi ke nzi daja ntee ro juajnꞹji pje ma religión ro pɇsʼiji. Nudyakʼua kja nu kjɇɇ 1946 yo kjuarma ke mi menzumꞹji a Canadá, o tsjaji na campaña ke o mezhe dyecha ñanto paa. Ngekʼua o dyøpjꞹji na tratado ke mi chju̱u̱, Quebec’s Burning Hate for God and Christ and Freedom Is the Shame of All Canada (El odio ardiente de Quebec a Dios, Cristo y la libertad es la vergüenza de todo Canadá). Ñe bo unꞹji texe yo ntee nu skuama. Nu tratado mi pɇsʼi nziyo página ke mi ju̱nsʼꞹ kʼo ma sʼoo ke mi kjapꞹ nu religión ñe yo policía a yo testigo e Jehová ke mi ka̱ra̱ji a Quebec. Kʼe tratado mi mama: “Yo autoridad xi mi ngotrʼꞹji a pjørꞹ yo testigo e Jehová zø dya mi kjaji kʼo na sʼoo, xo mi bʼꞹbʼꞹ 800 testigo e Jehová ke xi mi bʼɇxtrjo ro tsjaji nu juicio kja nu menzumꞹ a Gran Montreal.”

12. a) ¿Pje go tsjabi nu ministro ñe nu cardenal católico a Quebec ma go xørꞹbi nu tratado? b) ¿Pje nge kʼo o jyⱥsʼⱥji yo kjuarma? (Jñanda nu nota.)

¹² Ma nu ministro a Quebec Maurice Duplessis ñe nu cardenal católico Villeneuve go xørꞹbi nu tratado, me go ꞹdʼꞹbi ko yo testigo e Jehová, go ñabi ke ro “chu̱bi ko angezeji”. Nudyakʼua, o zidyiji a juicio 1.600 testigo e Jehová. Na kju̱ʼu̱ ke mi ngeje precursora go mama: “Nrrajmetrjo mi ngotrʼꞹgøji a pjørꞹ jesta dya ri mbeñeji janzi ves o kjogꞹyo”. Ma yo policía mi nuji ke yo kjuarma mi unꞹji yo tratado yo ntee, mi ngotrʼꞹji a pjørꞹ nange mi manji ke mi xospꞹji bʼɇchjine nu gobierno. b

13. ¿Kjo ngeje yo testigo e Jehová kʼꞹ otrʼꞹ o zidyiji a juicio nange yo ntee mi manji ke mi xospʼꞹji bʼɇchjine nu gobierno, ñe pje go tsjaa nu tribunal?

¹³ Kja nu kjɇɇ 1947 e kjuarma Aimé Boucher ñe nu xuntrʼi Gisèle ke mi ɇdyi 18 kjɇɇ, xo nu xuntrʼi Lucille ke mi ɇdyi 11 kjɇɇ, o zidyiji a juicio nangeje mi manji ke mi jyⱥspⱥji bʼɇchjine nu gobierno. Na kjuana ke mi jichiji yo ntee kʼo mama ne Biblia, pe dya mi jyⱥspⱥji bʼɇchjine nu gobierno. E kjuarma Aimé me mi jonte ñe dya mi jyombʼꞹ chu̱ʼu̱ yo dyaja, xo mi pɇpji na joo kja o granja ke mi bʼꞹbʼꞹ a sur kja nu menzumꞹ a Quebec, pe xo ñeje nu pjamilia mi kjogꞹ yo nrrumꞹ ke mi ju̱nsʼꞹ kja kʼe tratado. Nu juesi ke mi menzumꞹnu, me mi ꞹmbꞹ yo testigo e Jehová, ngekʼua dya go kreo ke nu pjamilia Boucher dya go tsjaji kʼo na sʼoo. Angeze mi kjijñi nzakja nu fiscal ke me mi ꞹmbꞹ nu pjamilia Boucher ñe mi mama ke angezeji mi pɇsʼiji nu sʼokꞹ, ke o jyⱥspⱥji bʼɇchjine nu gobierno. Yo jñaa ke mi mama nu juesi mi nee ro mama ke: nu pjamilia Boucher dya søø ro mama kʼo na kjuana. Ngekʼua go manji ke e kjuarma Aimé ñe nu xuntrʼi mi pɇsʼiji nu sʼokꞹ ke mi jyⱥspⱥji bɇchjine nu gobierno, jesta nu tsʼixutrʼi Lucille o ngotrʼꞹji a pjørꞹ yeje paa. Nudyakʼua nu pjamilia Boucher, go moji kja nu Tribunal Supremo a Canadá, kʼꞹ ngeje nu máxima autoridad jurídica kja kʼe país, nujnꞹ o nee ro dyⱥrⱥji kʼe nrumꞹ.

14. ¿Pje go tsjaji yo kjuarma a Quebec zø mi kjogꞹji na punkjꞹ nrrumꞹ?

¹⁴ Yo kjuarma ke mi menzumꞹji a Quebec, zø mi kjogꞹji na punkjꞹ nrrumꞹ, zø mi oji a pjørꞹ, mi jichiji yo ntee kʼo mama ne Biblia ñe mi nⱥdʼⱥji o Reino e Mizhokjimi, nujyo me na joo nangeje kja nu kjɇɇ 1946 ngextrjo mi bʼꞹnji a Quebec 300 testigo e Jehová, pe kja nu kjɇɇ 1950 mi ngeji 1.000 yo testigo e Jehová. c

15, 16. a) ¿Pje go mama nu Tribunal Supremo a Canadá kja nu juicio nu pjamilia Boucher? b)­Nu victoria, ¿ja go mbøsʼꞹ yo kjuarma ke mi menzumꞹji a Canadá ñe yo dyaja ntee ke bʼextrjo mi menzumꞹji?

¹⁵ Nu zana junio nu kjɇɇ 1950 yo nzincho juesi ke mi pɇpjiji kja nu Tribunal Supremo a Canadá, bo nuji nu nrrumꞹ ke mi pɇsʼi e Aimé Boucher. Ñe nu paa 18 nu zana diciembre nu kjɇɇ 1950, yo juesi bo manji ke yo testigo e Jehová dya go tsjaji kʼo na sʼoo. ¿Pjenga go manjiyo? E kjuarma Glen How, ke mi ngeje na abogado ke mi pjøsʼꞹ yo testigo e Jehová, go mama ke kja nu juicio yo juesi go manji ke na kjuana kʼo mi mama nu abogado ke mi ñana yo kjuarma. Na ngeje nu jñaa sedición nee ra mama ke yo ntee xøspꞹji bʼɇchjine nu gobierno ñe sadʼꞹji ngekʼua yo dyaja dya kja ra dyⱥtⱥji nu gobierno. Pe nu tratado dya mi mamayo, ngekʼua ma yo kjuarma mi unꞹji nu tratado yo ntee, dya mi ngeje ilegal. Angezeji mi søø ro manji texe kʼo mi neji. Nu kjuarma xo go mama: “Ro unkʼø nguenrra ke mi ngeje e Jehová ke go mbøxkꞹji ro to̱ji nu juicio”. d

¹⁶ Nu kʼo go mama nu Tribunal Supremo ñetse ke dya kjo søø ra tsʼasʼꞹ o Reino e Mizhokjimi, ngekʼua dya kja go tsjaji yo 122 juicio ke mi jyⱥsⱥji yo testigo e Jehová a Quebec nange dya ma kjuana ke mi sadʼꞹji nu gobierno. Xo ñeje texe yo ntee ke mi menzumꞹji a Canadá ñe kja yo país kja nu Comunidad Británica de Naciones (Commonwealth) mi søø ro manji kʼo mi mbeñeji ñe ja ma nuji kʼo mi kjaa yo gobierno. Kʼo mazi me na mubi ke go kjogꞹ nge ke nu religión ke dya ga kjuana ñe nu gobierno a Quebec dya kja go jyombꞹji chu̱ʼu̱ yo testigo e Jehová. e

17. ¿Pje na kjaji yo gobierno ngekʼua ra tsʼasʼꞹji yo testigo e Jehová ra nⱥdʼⱥjikjimi?

¹⁷ Nzi go tsjaji yo kjuarma ke go minji mi jingua “dya ri pøgøjme o Jñaa Mizhokjimi” (Xørꞹ 2 Corintios 2:​17). Zø nge akjanu, bʼꞹbʼꞹ yo gobierno ke dya jyɇzgijme ra nⱥdʼⱥjmekjimi nangeje manji ke pje nrre ri pøgøjme ma ri kjiñijme yo ntee. Ra nuji kʼo o kjogꞹ kja yeje país nuja o zidyiji yo kjuarma kja yo tribunal nangeje mi manji ke yo testigo e Jehová pje nrre mi pøji ñe dya mi jizhiji o Jñaa e Tsʼitajensʼe.

18, 19. ¿Pje go tsjaa nu gobierno a Dinamarca ngekʼua ro tsʼasʼꞹji yo testigo e Jehová ro nⱥdʼⱥjikjimi?

¹⁸ Kja Dinamarca. Nu paa dʼaja nu zana octubre nu kjɇɇ 1932 nu gobierno o ju̱nsʼꞹ na ley ke mi mama ke yo ntee dya mi søø ro mbøji skuama ma dya mi pɇsʼiji na licencia. Yo kjuarma dya go dyøtꞹji na licencia nange dya pje mi pøji. Nu paa yeje nu zana octubre, tsʼicha kjuarma o maa nⱥdʼⱥjikjimi kja nu jñiñi Roskilde, kʼꞹ bʼꞹbʼꞹ a 30 kilometro (20 millas) kja nu oeste nu capital, Copenhague. Ma o nguarꞹji ro nⱥdʼⱥjikjimi dya go sⱥjⱥ e kjuarma August Lehmann nangeje o ngotrʼꞹji a pjørꞹ nange mi manji ke mi pøø yo skuankjimi ñe dya mi pɇsʼi na licencia.

¹⁹ Nu paa 19 nu zana diciembre nu kjɇɇ 1932, o zidyiji e kjuarma August Lehmann kja na tribunal. Angeze go mamanu ke go maa ngiñi yo ntee kja o ngumꞹji nange mi nee ro unꞹ yo skuankjimi, pe kʼꞹ dya mi pøyo. Nu tribunal kja o menzumꞹ go mama: “Ne bʼɇzo søø ra pɇpji ngekʼua ra pɇsʼi o merio, dya ni jyodʼꞹ ra mbøø yo skuankjimi, xo dya mi otꞹ merio yo ntee, angeze mi kjotrꞹtsje o merio ma mi paa kjiñi yo ntee”. Nu tribunal go mama ke yo testigo e Jehová dya pje nrre mi pøji ma mi paa kjiñiji yo ntee, ñe e kjuarma Lehmann “dya mi nrro̱jo̱ merio” ma mi nⱥdʼⱥkjimi. Pe kʼo ntee ke mi ꞹmbꞹji kʼo mi matrʼꞹji e Jehová me mi nee ro tsʼasʼꞹji yo kjuarma ngekʼua dya kja ro nⱥdʼⱥjikjimi kja kʼe país (Sal. 94:20). Ngekʼua nu fiscal general go dyøtꞹ ke nrro ro tsjaji nu juicio kja nu Tribunal Supremo kja kʼe país. ¿Pje ro tsjajidya yo kjuarma?

20. ¿Pje go mama nu Tribunal Supremo a Dinarmarca, ñe pje go tsjaji yo kjuarmanu?

²⁰ Ma yo kjuarma go pɇsʼiji nu audiencia kja nu Tribunal Supremo, texe yo Testigo e Jehová a Dinamarca go paa zopjꞹji yo ntee kʼo mama ne Biblia texe yo paa kʼe ngoʼo. Nu paa 3 nu zana octubre nu kjɇɇ 1933, nu Tribunal Supremo go mama pje ro kjogꞹ ko nu nrrumꞹ: xo mi mbeñe nzakja nu otrʼꞹ tribunal nu ja go zidyiji e August Lehmann, ñe mi mama ke angeze dya mi mbøø yo skuankjimi. Nudyama yo testigo e Jehová sido go nⱥdʼⱥjikjimi ñe dya kjo søø ro tsʼasʼꞹji ro tsjajiyo. Yo kjuarma me mi nee ro unꞹji pøjø e Jehová ke go mbøsʼꞹji ro nrro̱nji kʼe juicio ngekʼua xe o jñuspꞹji ma mi nⱥdʼⱥjikjimi. Ndizi kʼe paa ma go kjogꞹyo kja nu Tribunal a Dinamarca, nu gobierno dya kja tsʼasʼꞹji in kjuarmagøji ke menzumꞹjinu ra nⱥdʼⱥjikjimi.

21, 22. ¿Pje go mama nu Tribunal Supremo a Estados Unidos kja nu juicio ke o tsjapꞹji e kjuarma Murdock?

²¹ Kja Estados Unidos. Nu paa 25 nu zana febrero nu kjɇɇ 1940, nu kjuarma Robert Murdock ke mi ngeje precursor, ñe yencho kjuarma mi nⱥdʼⱥjikjimi a Jeannette, kʼꞹ bʼɇxtrjo bʼꞹntrjo a Pittsburgh kja nu estado de Pensilvania, ma yo policía o zⱥtrʼⱥji, o penchʼiji ñe o ngotrʼꞹji a pjørꞹ yo kjuarma. Nujnꞹ o xipjiji ke dya go ngontrʼꞹji na licencia ngekʼua ro søø ro pøji yo skuankjimi. Yo kjuarma go dyøtꞹji ke ro jokꞹji kʼe nrrumꞹ kja nu Tribunal Supremo a Estados Unidos, kʼe Tribunal go mama ke ja̱a̱.

²² Nu paa 3 nu zana mayo nu kjɇɇ 1943 nu Tribunal Supremo go mama ke yo testigo e Jehová dya go tsjaji kʼo na sʼoo. Kʼe Tribunal go mama ke yo kjuarma dya mi jyodꞹji “ro ngontrʼꞹji na licencia nangeje nu Constitución Federal mi mama ke texe yo ntee mi pɇsʼiji derecho ro unꞹji skuama yo ntee”. Xo go manda ke dya kja ro bʼꞹbʼꞹ nu ley municipal ke mi tsʼasʼꞹ yo ntee, nangeje kʼe ley “dya mi jɇziji ke yo ntee ro juajnꞹji o religión, xo dya mi jɇziji ke yo ntee ke unꞹji noticia ro manji kʼo mi kjogꞹ”. Nu juesi William Orville Douglas go mama kʼo go manji texe yo juesi kja kʼe Tribunal: “Me na mubi ma yo testigo e Jehová paa kjiñiji yo ntee ñe unꞹji skuankjimi, nangeje jichiji yo ntee yo mama ne Biblia”. Xo go mama: “Yo nʼaño religión pɇsʼiji derecho ra jichiji yo ntee kja o nitsjimi, xo akjanu yo testigo pɇsʼiji derecho ra jichiji yo ntee kʼo mama ne Biblia”.

23. ¿Pjenga me na mubi yo juicio ke o nrro̱nji yo kjuarma kja nu kjɇɇ 1943?

²³ Nu kʼo go mama nu Tribunal Supremo ñetse ke dya kjo søø ra tsʼasʼꞹ o jñiñi e Mizhokjimi. Akjanu texeji go mba̱ra̱ji ke ri ngezgøjme ntee ke ri matrʼꞹjmekjimi ñe dya pje nrre ri pøgøjme. Dya ri jyombeñeji nu paa 3 nu zana mayo nu kjɇɇ 1943 ma yo testigo e Jehová go nrro̱nji 12 juicio de yo 13 juicio ke mi pɇsʼiji, xo ñeje nu juicio nuja o jyⱥsʼⱥji e kjuarma Murdock. Yo juicio ke go nrro̱nji kʼo pakʼo me na mubi nangeje xe pjøxkꞹjidya ma yo ntee ke ꞹngꞹzꞹji sinzgøji kja yo tribunal nange manji ke dya ri pɇsʼiji derecho ra jichiji yo ntee kja o ngumꞹji o Reino e Mizhokjimi.

24. ¿Pje ri kjagøjme ma na gobierno dya jyɇzgijme ra nⱥdʼⱥjmekjimi?

²⁴ Yo ri testigojme e Jehová ri unꞹjme pøjø yo gobierno ke jyɇzgijme ra jichijme yo ntee o Reino e Diosi. Pe ma yo gobierno mandazꞹjme dya kja ra kjajmeyo, dya ri ⱥtⱥjme, ri jonkʼøjme ja rga jichijme yo ntee kʼo mama ne Biblia zø angezeji kʼaxkꞹjme. Ri kjajme nzi go tsjaji kʼo apóstole ma go manji: “xenda ni jyodʼꞹ ra ⱥtⱥjme Mizhokjimi kʼꞹ manda ke nangeje yo bʼɇzo” (Hechos 5:29; Mat. 28:​19,​20). Xo ñeje ri øtꞹjme yo juesi kja yo tribunal ke dya kjo ra kʼaxkꞹjme ra nⱥdʼⱥjmekjimi. Ra nuji kʼo go kjogꞹ kja yeje país.

25, 26. ¿Pjenga o zidyiji yo kjuarma a nu Corte Suprema de Justicia de la nación a Nicaragua, ñe pje go kjogꞹma?

²⁵ Kja Nicaragua. Nu paa 19 nu zana noviembre nu kjɇɇ 1952, e kjuarma Donovan Munsterman ke mi ngeje misionero ñe siervo de sucursal, o maa kja nu Departamento de Inmigración a nu capital, Managua. O xiji ke ro maa nuu nu capitán Arnoldo García, ke mi manda kja nu Departamento. Nu capitán o xipji e Donovan ke yo testigo e Jehová kja trjexe Nicaragua “dya kja mi søø ro nⱥdʼⱥjikjimi ñe dya kja mi søø ro jmurꞹji ngekʼua ro matrʼꞹji e Jehová”. Numꞹ o dyømbꞹ pjenga, e capitán o nrrꞹrꞹ ke yo testigo e Jehová dya mi pɇsʼiji na permiso de nu ministro kja nu Gobierno ñe yo Religión, xo go mama ke mi bʼꞹbʼꞹ ntee ke mi jyⱥsʼⱥji ñe mi xipjiji ke mi ngeji comunistas. ¿Kjo mi ngeje kʼo mi jyⱥsʼⱥji? Mi ngeje nu clero católico.

²⁶ E kjuarma Munsterman dabaditrjo o maa kja nu Ministerio de Gobierno ñe yo Religión, xo o ma nuu nu presidente Anastasio Somoza García, pe dya go nee ro mbøsʼꞹji. Ngekʼua yo kjuarma o potꞹji ja søø ro matrʼꞹjikjimi. O ngotrʼꞹji yo Salón del Reino, nudyama janzitrjo kjuarma mi jmurꞹji kja o ngumꞹji ñe dya kja mi nⱥdʼⱥjikjimi kja ñiji, pe dya o jyɇziji ro zøpjꞹji yo ntee o Reino e Mizhokjimi. Xo go moji kja nu Corte Suprema de Justicia a Nicaragua ngekʼua ro mbøsʼꞹji ke dya kjo ro tsʼasʼꞹji ro nⱥdʼⱥjikjimi. Texe yo periódico mi nⱥdʼⱥji kʼo mi kjogꞹ yo testigo e Jehová ñe nu kʼo mi neji, nukʼua nu Corte Suprema o mama ke ro nuu ja rgo mbøsʼꞹji. Nudyama ¿pje o kjogꞹ? Nu paa 19 nu zana junio nu kjɇɇ 1953 nu Corte Suprema o mama ke ro mbøsʼꞹ yo testigo e Jehová nangeje dya ma joo ke yo dyaja ntee mi ꞹmbꞹji ñe mi tsʼasʼꞹji ro matrʼꞹjikjimi, xo go mama ke texe yo ntee søø ra nⱥdʼⱥji kʼo kreoji. Ñe go mama ke ro jokꞹji yo nrrumꞹ ke mi pɇsʼiji nu gobierno ko yo testigo e Jehová.

27. ¿Pjenga yo ntee a Nicaragua me go kentrjoji ma o mba̱ra̱ji ke nu Corte Suprema o mbøsʼꞹ yo testigo e Jehová, ñe pje mi pa̱ra̱ji yo kjuarma?

²⁷ Yo ntee ke mi menzumꞹji a Nicaragua me go ngentrjoji ma go unꞹji nguenrra ke nu Corte Suprema go mbøsʼꞹ yo testigo e Jehová. Ma dya bʼe mi kjogꞹyo, nu Corte Suprema dya mi nee ro pɇsʼi nrrumꞹ ko nu clero. Yo ntee ke mi pɇpjiji ko nu gobierno mi kjaji kʼo mi neji ñe nu Corte dya pje mi xipjiji. Zø yo gobierno mi tsʼasʼꞹji yo kjuarma, angezeji dya go jyɇziji ro nⱥdʼⱥjikjimi, nangeje mi pa̱ra̱ji na joo ke mi ngeje e Jesús kʼꞹ mi pjøsʼꞹji ro nrro̱nji nu juicio ngekʼua dya kjo ro tsʼasʼꞹji ro matrʼꞹjikjimi (Hech. 1:⁠8).

28, 29. Nu kjɇɇ 1986, ¿pje ma nrrumꞹ go kjogꞹji yo testigo e Jehová a Zaire?

²⁸ Zaire. Kja nu década 1980 mi ka̱ra̱ji 35.000 testigo e Jehová a Zaire, ke nudya ni chju̱u̱ República Democrátia del Congo. Yo kjuarma mi pɇpjiji na punkjꞹ ma mi nⱥdʼⱥjikjimi, ngekʼua kja nu sucursal xi mi jyⱥbʼⱥji yo dadyo edificio. Kja nu zana diciembre nu kjɇɇ 1985 o tsjaji na trʼajmurkjimi internacional kja nu estadio a nu capital, Kinsasa, go jmurꞹji 32.000 yo ntee, na punkjꞹ kjuarma ke go moji mi menzumꞹji kja nrre nʼaño país kja texe ne xoñijomꞹ. Pe nudyakʼua yo kjuarma go pɇsʼiji na punkjꞹ nrrumꞹ. ¿Pje go kjogꞹ?

²⁹ Nu kjuarma Marcel Filteau, kʼꞹ mi menzꞹmꞹ a Quebec (Canadá), xo go kjogꞹ nrrumꞹnu nange mi nⱥdʼⱥkjimi ma mi mandanu nu régimen e Duplessis, ñe nudya mi pɇpji nzakja misionero a Zaire. Angeze go mama pje ma nrrumꞹ go kjogꞹji yo kjuarma: “Nu paa 12 nu zana marzo nu kjɇɇ 1986 nu gobierno go penpeji na jebi yo kjuarma ke mi kjꞹsʼꞹji axojñi kja nu organización e Jehová kja kʼe país, go xipjiji ke ndizi kʼe paa nu asociación religiosa de los testigos de Jehová a Zaire mi ngeje ilegal”. Kja kʼe jebi mi ju̱nsʼꞹ nu firma nu presidente kja kʼe país, Mobutu Sese Seko.

30. ¿Pje ni mbeje kʼꞹ ro ngiñiji na joo yo kjuarma kja nu Comité de Sucursal, ñe pje go tsjaji?

³⁰ Ma kja mi kjogꞹ dʼa paa, kja nu radio go manji: “Dya kja ra bʼꞹnji yo testigo e Jehová a [Zaire] ”. Dabaditrjo o zidyiji a pjørꞹ yo kjuarma. Go juatrʼꞹji yo Salón del Reino, xo go ponꞹji kʼo mi pɇsʼiji yo kjuarma, go mbⱥrⱥji ñe go ngotrʼꞹji a pjørꞹ, xo go ngotrʼꞹji a pjørꞹ yo tsʼitrʼi ke mi ngeji testigo e Jehová. Nu paa 12 nu zana octubre nu kjɇɇ 1988, nu gobierno o tsjapꞹ o tsjaja kʼo mi pɇsʼi nu organización e Jehová, nzakja nu sucursal, nudyakʼua go nga̱ra̱jinu nu Guardia Civil. Yo kjuarma ke mi otrʼꞹji axojñi go dyøtꞹji nu presidente Mobutu ke dya ro tsjapꞹjiyo, pe angeze dya go køtrʼpꞹ ñiʼi. Ma go nuji ke dya go kjapꞹji nguenrra, yo kjuarma kja nu Comité de Sucursal mi jyodꞹ ro ngiñiji na joo pje ro tsjaji: ro moji kja nu Tribunal Supremo maxke ro tebʼeji. Nu kjuarma Timothy Holmes, kʼꞹ mi ngeje misionero ñe coordinador kja nu Comité de Sucursal o mama: “Ro øtꞹjme e Jehová ro mbøxkꞹjme ro kjijñijme na joo pje ro kjajme”. Ma go dyøtꞹji e Jehová, yo kjuarma kja nu Comité go ngijñiji ke dya ro moji kja nu Tribunal Supremo ngek’ua ro jokꞹji kʼe nrrumꞹ, kʼo mazi na mubi ro tsjaji nge ke ro pjørꞹji na joo yo kjuarma ñe xi ro nⱥdʼⱥjikjimi.

31, 32. ¿Pje nge kʼo me na joo kʼꞹ bo mama nu Tribunal Supremo a Zaire, ñe ja go zøji yo kjuarma?

³¹ Ma go kjogꞹ yo kjɇɇ, nu gobierno dya kja mi tsʼasʼꞹji yo kjuarma ro matrʼꞹjikjimi, ñe texe yo ntee a mi tʼekjañomꞹji ke nzi da ntee søø ro pɇsʼiji o religión ke ro neji. Nudyakʼua yo kjuarma kja nu Comité de Sucursal o ngijñiji ke ro søø ro mojidya kja nu Tribunal Supremo de Justicia a Zaire. Me go ngentrjoji ma nu Tribunal bo nee ro dyⱥrⱥ kʼo mi øtꞹji. Ngekʼua nu paa 8 nu zana enero nu kjɇɇ 1993, ma ya bi kjogꞹ yencho kjɇɇ ndizi ma nu presidente o manda ke yo testigo e Jehová dya kja mi søø ro matrʼꞹjikjimi, nu Tribunal go mama ke dya ma joo kʼo go tsjaa nu presidente, ngekʼua dya kjo mi søø ro tsʼasʼꞹji yo testigo e Jehová ro matrꞹjikjimi. ¡Tsjijñige pjenga me ma sʼɇzhi kʼo go tsjaji yo juesi! Zø bʼꞹma ro mbøtrʼꞹji, angezeji go manji ke dya ma joo kʼo go tsjapꞹ nu presidente ko yo testigo e Jehová. E kjuarma Holmes go mama: “Ma ro kjogꞹjme kʼe nrrumꞹ kja nu Tribunal ro unꞹjme nguenda ke e Jehová søø ra pøtꞹ ja ga kjijñi na ntee” (Dan. 2:21). Yo kjuarma me go enchʼeji kja o mꞹbʼꞹji e Jehová ma go nuji ke angeze me go mbøsʼꞹji ro nrro̱nji kʼe juicio, go unꞹji nguenrra ke mi ngeje o Rey, e Jesús nu kʼꞹ go mbøsʼꞹji ro pa̱ra̱ji pje ro tsjaji.

³² Ma o sⱥjⱥ nu paa ma nu gobierno dya kja go tsʼasʼꞹ yo testigo e Jehová ro matrʼꞹjikjimi, ne sucursal o mbøsʼꞹ yo misionero nge ro maa nⱥdʼⱥjikjimi, xo o jyⱥbʼⱥji janzi instalación kʼua ro pɇpiji, akjanu ro søø ro penpeji yo skuankjimi kja dyaja país. f ¡Kja texe ne xoñijomꞹ yo matrʼꞹji e Jehová me mⱥji ma nuji ke e Tsʼitajensʼe me pjørꞹ o jñijñi ngekʼua søø ra matrʼꞹji na joo angeze! (Is. 52:10.)

33. Yo juicio ke a ro nuji kʼꞹ o nrro̱nji yo kjuarma kja yo tribunal¿Pje jitskʼøjiyo?

³³ Yo juicio kʼꞹ a ro nuji ke o nrro̱nji yo kjuarma, ñetse ke e Jesús me pjøxkꞹji, na kjuana kʼo o mama: “Nange nutskʼø ra dʼakꞹji o jñaa kʼꞹ ri mangeji, ñe o pjeñe. Ngekʼua kʼo nukʼꞹji na ꞹꞹ, dya ra søø pje ra xitsʼiji, dya xo ra søø ra xitsʼiji: ʻDya kjuana kʼo i mangeji”ʼ (​xørꞹ Lucas 21:​12-15). Nujyo ñetse ke e Jehová me pjørꞹgøji ma tsjapꞹ ke dʼa ntee ra tsjaa nzakja e Gamaliel ke o mimi mi jingua, xo tsjapꞹ ke yo juesi ñe yo abogado ra ñanaji o jñiñi angeze. Tsjapꞹ ke yo ntee kʼꞹ nukꞹzꞹji na ꞹꞹ dya ra kʼaxkꞹji ra matrʼꞹjikjimi (​xørꞹ Isaías 54:17). Ngekʼua dya kjo søø ra kʼaxkꞹji ra nⱥdʼⱥjikjimi texe yo paa.

34. ¿Pjenga kjakꞹji ra kentrjoji ma yo kjuarma nrro̱nji yo juicio, ñe pje ñetseyo? (Jñuu nu recuadro “ Yo tribunal supremo pjøxkꞹji ngekʼua ra nⱥdʼⱥji o Reino e Yosi”.)

³⁴ ¿Pjenga yo testigo e Jehová a nrro̱nji na punkjꞹ juicio? Tsjijñiyo: Yo ri testigojme e Jehová dya nda na mubizgøjme a jmii yo ntee. Dya ri unꞹjme in voto a da partido político ñe dya ri pojme ma jmurꞹji angezeji, xo dya ri øtꞹjme yo político ke ra mbøxkꞹjme. Xo ñe ma yo kjuarma poji kja yo tribunal xitsiji ke dya pje pjezhiji ñe dya pje pa̱ra̱ji nange dya bo moji kja yo trjangunxørꞹ (Hech. 4:13). Ngekʼua yo ntee søø ro manji ke me ma sʼɇzhi ke yo tribunal ro mbøxkꞹjme kja yo juicio ñe ke dya ro kjapꞹ nguenrra yo religión ñe yo político ke mi xoskꞹjme bʼɇchjine. Zø nge akjanu na punkjꞹ tribunal pjøxkꞹjme ngekʼua dya kjo ra kʼaxkꞹjme ra matrʼꞹjmekjimi, nujyo ñetse ke “ngeje e Mizhokjimi kʼꞹ penkezgøjme ra jizhijme kʼo na kjuana, xo angeze ñe e Cristo pjøxkꞹjme ma ri kjajmeyo” (2 Cor. 2:17). Ngekʼua xo ri mangøjme nzi go mama e apóstol Pablo: “E Jehová nge nu na pjøxkꞹ, dya ra su̱gø” (Heb. 13: 6).