Xitsijme ja ma kjaa ma mi trʼege

O muxkꞹgo a Italia nu kjɇɇ 1943 ro trʼegøjmenu kʼo in trʼꞹꞹ ñe kʼo in kju̱ʼu̱. In tatagø mi pɇpji a juajma ñe mi yaxꞹ kʼo zaʼa. In jyogø ñe in ñꞹʼꞹ o jitsigøjme nu religión católica.

¿Pjenga bi nee ri mbɇzhi mbøkjimi?

Ma mi tsʼitrʼigø me mi nee ro pagø a mixa, na nge me mi nee ro ⱥrgø kʼe mbøkjimi. Me mi kentrjogø ja ma ñaa ñe ja ba chunꞹ nu mixa. Nujyo o tsjaa ke mi nee ro pjɇzhgø mbøkjimi. Ma mi e̱nkjo 13 kjɇɇ in nanagø mi zinzi kja na colegio nu ja mi xampaji kʼo tsʼitrʼi ke mi nee ro mbɇzhiji mbøkjimi.

¿Mi xørge ne Biblia ma mi pagenu?

Chikiletrjo. Ñe ma mi ɇdyigø 15 kjɇɇ, kʼꞹ mi xøpꞹgø o dyakø na skuama ke mi ju̱sʼꞹ yo Evangelio —ngeje yo skuama ke ju̱sʼꞹ kʼo o kjogꞹ e Jesús⁠— ma yepe ma xørgøyo. Ma mi ɇdyigø 18 kjɇɇ ro ma minkø a Roma ngekʼua ro magø kja trjangunxørꞹ nu ja mi manda nu papa. Nujnꞹ ro pa̱rgø latín, griego, historia, filosofía, psicología ñe teología. Zø mi xørgøjme kʼo versículo kja ne Biblia ñe mi ⱥrgøjmeyo ma mi unꞹji mixa yo nrromingo, pe dya mi pa̱rgøjme pje mi nee ro mama yo jñaa.

Kʼo paa ma mi kjꞹspꞹge a ñii kja nu seminario, ¿xo mi xøjnꞹgekʼua?

Kʼo otrʼꞹ mi kjagø nge ke mi nugø pje ma bʼɇpji ro tsjaji, pe ja̱a̱, mi xøjnꞹgø ja ma kjaa nu decreto kʼo mi manji nu Concilio Vaticano II.

¿Pjenga gui yembeñe kʼo mi jizhiji kja nitsjimi?

Jñii kʼo ro unꞹ nguenda: Mi jandagø ke nu religión mi potka pjøsʼꞹji kʼo político, xo dya mi junpʼꞹji nguenda kʼo mbøkjimi ma mi kjaji kʼo na sʼoo ñe kʼo ntee ke mi pojinu, xo ja nzi jñaa ke ma jizhiji dya ma ñetse na joo ja ma kjaa. Mi øntsjɇgø, ma e Palesito ajensʼe sʼiyazꞹji, ¿pjenga pa̱ntrʼa̱ a sibi kʼo ntee ma tu̱ji ngekʼua ra supjreji texe yo paa? ñe , ¿Kjo nee angeze ke ra pɇsʼiji rosario ma ra matrʼꞹji ngekʼua ra yepeji na punkjꞹ vez kʼo ra xipjiji? a

¿Pje bi tsjagema?

Me ro guɇgø ro øtʼꞹkjimi ro mbøxkꞹgø; nuñakʼua ro to̱ngø na Biblia de Jerusalén, ke kja ma mbedye a italiano, ñe ro pjꞹru ro xørꞹ. Na nrromingo ma xøxtrjo ma ro nguarꞹ ro unu mizha o zⱥtrʼⱥbi yebʼɇzo kja seminario ñe o xitsibi ke mi ngejebi testigo de Jehová, kjanu ro jñagøjme. O kjogꞹ na hora ke ro jñagøjme pje mama ne Biblia jaga kja nu religión ke na kjuana

¿Ja bi ñuge ja mi ñabi yo testigo de Jehová?

Me ro kentrjk’ø ke dya mi su̱ji ro jñabi, xo mi pa̱ra̱bi na joo ja ma jyodʼꞹji yo texto bíblico kja nu Biblia católica. Ma go kjogꞹ kʼo paa na testigo ke mi chju̱u̱ Mario go mbꞹrꞹ gua na zɇnguagø. Me go pɇspi pasiencia nangeje chjuma chjuma—zø ro e̱je̱ dyebʼe o zø ro jⱥⱥ ngꞹnrro⁠— mi na zɇngua ma mi zⱥnⱥ 9 ma xo̱rtjo.

¿Pje mi manji kʼo dyaja mbøkjimi ke yo testigo mi paa zɇnguatsʼꞹ?

Mi mbitagø ngekʼua ro xørꞹjme ne Biblia, pe dya kjo go kjakꞹgø nguenda. Pe nutsʼkʼø me mi nee ro xørgø, nange me ma joo kʼo mi pa̱rgø. Me ro to̱jia ma ro pa̱rgø pjenga e Tsʼitajensʼe jɇzi ra kjogꞹ kʼo na sʼoo ñe ra supjreji, nge kʼo me mi nee ro pa̱rgø.

¿O bʼꞹbʼꞹ dʼaja ke mi kjꞹsʼꞹ axojñi ke go xitsʼi ri jyɇzi ri xørꞹ ne Biblia?

Kja kʼe kjɇɇ 1975 ro magø a Roma na punkjꞹ bes ngekʼua ro ñagø kʼo kja mi pjechkø. Kʼo mi kjꞹsʼꞹji axojñi pje nrre mi xitsʼiji ngekʼua ro jɇzi kʼo mi xørgø, pe ni ri dʼaja o jitsi ko ne Biblia pjenga ro kjagøyo. Nudyama, nu paa 9 de enero nu kjɇɇ 1976, ro øpjꞹ na jebi, ro pempe a Roma ñe ro xikø ke dya kja ro ngetsʼkʼø católico. Nuʼma o kjogꞹ yee paa ro pedye a seminario ngekʼua ro pjꞹrꞹ ro magø a jmꞹrkjimi yo testigo de Jehová. Ro mago nu asamblea ma jmurꞹji na punkjꞹ congregación. Kʼo ro nugønu ¡dya mi chjenjui kʼo mi kjaji kʼua mi bʼꞹnkʼø!. Nzidazꞹjme mi pɇskøjme ne Biblia ñe mi jonkʼøjme yo textos ke mi manjinu.

¿Pje go manji in pjamilia kʼo bi tsjaa?

Me go mbɇkuɇji ma go mba̱ra̱ji. Kjanu ro pa̱rgø ke dʼaja in tʼꞹꞹ xo ma pjꞹrꞹ ma xørꞹ ne Biblia ko yo testigo de Jehová a Lombardía Italia. Nudyakʼua, ro magø gamanu ñe yo testigo de Jehová ke mi menzumꞹnu o jyongꞹji na bʼɇpji ñe ja ro oxꞹgø ngekʼua ro minkʼønu. Kʼe kjɇɇ o juinkʼigø kja ndeje, nudya a mi ngetsʼkʼø testigo de Jehová.

¿Ja gi søge kʼo bi tsjaa?

¡Me ri søgø na joo ñe me ri mⱥkjø! Nange a ro chɇzhi ko e Tsʼitajensʼe, xo a ri pa̱rgø kʼo ju̱sʼꞹ kja ne Biblia kjo ngeje angeze ñe pje nge kʼo nee ke ra kjaji, dya ngeje yo filosofía o yo tradiciones ke jizhiji yo católicos. Nudya søø ra jichi yo ntee kʼo a ri pjechi nange ri pa̱rgø ke na kjuana.