Îꞌ konekaꞌpî pemonkonyamîꞌ pena patapai, toꞌ nîmenukaꞌpî kaaretakonya, toꞌ yeserukon moropai toꞌ yemannekon, mîrîrîkon eraꞌma uurînîkonya eꞌpainon sîrîrî weiyu yai museu (Museum) pataꞌseꞌ ta. Esenumenkakî museu pataꞌseꞌ ta awanî, moropai mararî pra yemannekon man poiꞌpî pe. Yenponenya mîrîrîkon yenpo aapia. Tîîse amenan yemanne eporîya mîrîrî koreꞌta. Mîrîrî eraꞌmaya yeꞌnen amîrî eseurîma: “Amenan mîrîrî”. Tîîse yenponenya taa: “Kaane! Poiꞌpî mîrîrî ipîra.” Amîrîya taa: “Tîîse, îꞌ wani awanî yeꞌnen amenan pe wanî? Morî pe ikonekasaꞌ yeꞌnen?” Yenponenya yuuku: “Kaane, seeni yemanne mîrîrî konoꞌ yapisîꞌpîiya, wei yapisîꞌpîia moropai tiaronkonya yaretîꞌka yuꞌse toꞌ wanîꞌpî”, taa mîîkîrîya. Amîrî esenumenka: “Tîîse, oꞌnon yeꞌka pe tîponarî seeni yemanne wanî?”

Paapa Maimu wanî mîrîrî panpe. Mararî pra kaaretakon man poiꞌpî pe. Paapa Maimu mîrîrî penaron nîrî, tîîse tamîꞌnawîrî mîrîrî yentai wanî. Mararî pra konoꞌ koꞌmansaꞌ yeꞌnen kaaretakon eena imakuiꞌpî pe, mîrîrîkon eꞌtîꞌka. Penaronkon epuꞌnenan warayoꞌkonya kaaretakon imenukasaꞌ wanîꞌpî, tîîse yairî pra mîrîrîkon wanîꞌpî. Kaaretakon imenukasaꞌya priꞌya pra eꞌnîtoꞌ ekaremekîꞌpî toꞌya, tîîse mîrîrî panamatoꞌ wanîꞌpî yairî pra. Tiaronkon kaaretakon wanîꞌpî imenukasaꞌpe, tîîse itonpa ton pra wanîꞌpî, yarekon ekarekaꞌpîsaꞌ wanîꞌpî mararî pra.

Paapa Maimu mîrîrî tîponaron tiaron kaaretakon yentainon. Pena mîrîrî imenukatoꞌ esippiaꞌtîꞌpî, tîîse sîrîrîpe morî pe aꞌkomamî. Tiaronkon pemonkoyamîꞌ wanîꞌpî mîrîrî tîꞌka yuꞌse toꞌ wanîꞌpî apoꞌtîꞌpî toꞌya, imenukasaꞌ yuꞌse pra tiaronkon wanîꞌpî, yakiꞌtapapîtîꞌpî toꞌya. Tîîse sîrîrîpe morî pe man. Penaron, tîîse mîrîrîya panamatoꞌkon koꞌmamî morî pe. – Seeni eraꞌmatî “Desatualizada ou à frente do seu tempo?” karaiwape.

Amîrî esenumenka: ‘Anna koꞌmantoꞌ yai, Paapa Maimuya panamaꞌtoꞌkon wanî morî pe?’ Mararî pra ipîra eꞌtarîmaꞌtîntoꞌkon man mîrîrîkon yuꞌtoꞌ eporî ya. Amîrî esenumenka: ‘Îꞌ pî aranneꞌ pe awanî ipîra?’ Amîrî enpanata mararî pra sîrîrîpe ewîîntoꞌ man, tuna man nuraꞌ pe mîrîrî yeꞌnen moroꞌyamî saꞌmanta, mararî pra amaꞌyeꞌ pe warayoꞌkon man. Esenumenka Paapa Maimuya panamatoꞌkon man moropai yenupatoꞌkon man. Paapa Maimu yawîrî pemonkonyamîꞌ wanî ya, îꞌ taa amîrîya, morî pe uurînîkon pataꞌse etinyakaꞌma eꞌpainon?

MORÎ PE EꞌNÎTOꞌ SAꞌNAMA

“Morî pe puꞌkuru mannankan pemonkonyamîꞌ ekoreꞌmaꞌsan manaꞌpokanenan wanî. Maasa pra inkamoro manaꞌpokanenan esatî toꞌya Paapa munkî pe.” (Mateus 5:9) “Epuꞌtîyaꞌnîkon pîkîrî morî kupîyaꞌnîkon yuwatî, morî pe aakoꞌmamîkonpa tiaronkon pokonpe.” — Romanos 12:18.

SAꞌNAMATOꞌ WANÎ MOROPAI TÎWANMÎRA EꞌNÎTOꞌ

“Morî pe puꞌkuru mannankan pemonkonyamîꞌ saꞌnamanenan wanî, maasa pra toꞌ saꞌnama Paapaya.” (Mateus 5:7) “Îꞌ rî tiaronkon nîkupî awinîkîiꞌnîkon yapîtanîꞌtî, moropai îꞌ taꞌpî toꞌya kuꞌtî aawanmîraꞌnîkon. Tîwanmîra Uyepotorîkonya [Jeová *] ankupîꞌpîkon imakuiꞌpî kupîꞌpî [panpe] ikuꞌtî.” — Colossenses 3:13.

TAMÎꞌNAWÎRONKON PEMONKONYAMÎꞌ SAꞌNAMAKÎ MORÎ PE

Paapaya eꞌmaiꞌnon warayoꞌ konekaꞌpî mîîkîrî koꞌmantoꞌpe sîrîrî pata po. Mîîkîrî wenai tamîꞌnawîronkon pemonkonyamîꞌ koꞌmantoꞌpe. (Atos 17:26) ‘Paapa wanî tamîꞌnawîronkon pîikaꞌtînen pe. Tamîꞌnawîronkon wakîmanen pe seꞌ kaisarî, eꞌsentai pra... Tamîꞌnawîronkon innape tîkuꞌnenan, yairî tîîkoꞌmansenon wakîma Paapaya pata kaisaronkon.’ — Atos 10:34, 35.

MORÎ PE UURÎNÎKON PATAꞌSEꞌ WANÎ

“Paapa Jeováya warayoꞌ tîrîꞌpî morî tîwanmîn pataꞌseꞌya itese Edén, mîîkîrî esenyakamatoꞌpe moropai eraꞌmatoꞌpîiya.” (Gênesis 2:15) Paapaya “manniꞌkan non ponkon maꞌtanîpîtîponkon tarumaꞌtî toꞌya weiyu erepansaꞌ sîrîrî.” — Apocalipse 11:18.

MANNANKAN TUꞌKE TOꞌ YEMANNE MOROPAI NURA KUꞌNENAN PANPE EꞌPAI PRA EꞌKÎ

“Tîwarî eꞌtî, îꞌ ituꞌse aweꞌtoꞌkon pîꞌ. Kureꞌne îꞌ ituꞌse aweꞌtoꞌkon yuꞌse kîsenumenkatî. Maasa pra kureꞌne temanne ke tîweꞌsen pe tîwanî wenai, morî pe aakoꞌmamî pepîn.” (Lucas 12:15) “Paapa pemonkono pe awanîkon yeꞌnen, imakuiꞌpî pe seꞌ tapairî wîriꞌsanyamîꞌ yarakkîrî keꞌtî, moropai wîriꞌsanyamîꞌ, seꞌ tapairî warayoꞌkon yarakkîrî keꞌtî. Moropai nura tîkuꞌse pra eꞌtî, moropai kureꞌne îꞌ yuꞌse kîsekaꞌnunkatî. Mîrîrî [panpe] Paapa pemonkonoyamîꞌ koꞌmamî eꞌpai pra man.” — Efésios 5:3.

YAIRÎ EꞌKÎ MOROPAI MORÎ PE ESENYAKAꞌMAKÎ

“Tîwîrî rî yairon ankuꞌpai anna wanî.” (Hebreus 13:18) “Anîꞌ eꞌsaꞌ ya amaꞌyeꞌ pe, inîꞌrî mîîkîrîya yamaꞌrunpa eꞌpai pra man. Tîîse eesenyakaꞌma neken eꞌpai awanî, morî pe tîîkoꞌmamîpa.” — Efésios 4:28.

TIARONKON PÎIKAꞌTÎKÎ

“Eranneꞌ pe tîweꞌsanon meruntîtannîpîyaꞌnîkon yuꞌse anna wanî, eranneꞌ pe toꞌ wanî namai. Moropai aꞌtuꞌmîra tîweꞌsanon pîikaꞌtîyaꞌnîkon yuꞌse anna wanî, imakuiꞌpî kupî toꞌya namai. Moropai tamîꞌnawîronkon pokonpe morî pe awanîkon yuꞌse anna wanî teekoreꞌmai pra toꞌ pokonpe. Tîîse morî pe eeseurîmakon toꞌ pokonpe.” (1 Tessalonicenses 5:14) “Anîꞌya yun pînon moropai isan pînon pîikaꞌtî ya, moropai inyo saꞌmantaꞌsan pîikaꞌtî ya toꞌ eꞌtarumaꞌtî tanne.” — Tiago 1:27.

Paapa Maimuya mararî pra panamatoꞌkon man, mîrîrîkon wanî tausinpantoꞌ yentai panpîꞌ. Paapa Maimu pî esenupan mîrîrî yawîrî uurînîkon wanî, mîrîrî koneka morî pe. Pemonkonyamîꞌya inna taa ya Paapa Maimu pî, îꞌ taa amîrîya, morî pe pata wanî eꞌpainon sîrîrîpe? Paapa Maimuya pena patapai panamatoꞌkon man, tîîse mîrîrî panamatoꞌ wanî sîrîrî pîkîrî morî pe. Sîrîrîpe, Paapa Maimuya apîikaꞌtî eꞌpainon?

Jesusya taꞌpî: “Paapa winîpainon epuꞌnen yapisî ya, mîîkîrî yeseru wanî morî pe.” (Mateus 11:19, imenukasaꞌ eraꞌmakî itoꞌko) Oꞌnon yeꞌka pe morî pe panamatoꞌ wanî epuꞌtî? Mîrîrî yawîrî uurînîkon wanîya. Paapa Maimu wanîꞌya morî pe, mîrîrîya uurî yausinpa. Uurî eꞌtarumatînpî man, tîîse Paapa Maimuya uurî pîikaꞌtî eꞌpainon sîrîrîpe? Eraꞌmapaiꞌnîkon oꞌnon yeꞌka pe mîrîrî wanî.

Tamîꞌnawîrî morî pe Claudia * koꞌmantoꞌ wanîꞌpî. Tîîse kaꞌneꞌ pe mîîkîrî koꞌmantoꞌ etinyakaꞌmaꞌpî morî pe pra. Eꞌmaiꞌpe inre saꞌmantaꞌpî moropai inyoya mîîkîrî rumakaꞌpî, mîrîrî tîpoꞌ pîrata tonpra mîîkîrî wanî epuꞌtîꞌpîiya. Mîîkîrîya taꞌpî: “Morî pe pra uurî wanî esepuꞌtîꞌpî. Unre tonpra, inyo tonpra, yewî tonpra. Anîꞌ pe uurî wanî epuꞌtîuya pra enaꞌsa wanîꞌpî, mîrîrî yeꞌnen saꞌmantaꞌ yuꞌse uurî wanîꞌpî.”

Claudiaya yairî Paapa Maimu wanî epuꞌtîꞌpî, Salmo 90:10 ya (TNM): “Uurînîkon koꞌmantoꞌ wanî 70 konoꞌ kaisarî, meruntî ke panpîꞌ wanî, 80 kaisarî. Tîîse inkamoro wanî eꞌtarumatîntoꞌ yarakkîrî. Kaꞌneꞌ pe mîrîrî suwaꞌkatoꞌ, aakoꞌmamî pepîn.”

Claudiaya pîikaꞌtîntoꞌ yuwaꞌpî Paapa Maimuya. Îꞌ yenupaꞌpî Paapa Maimuya manni, mîrîrîya mîîkîrî pîikaꞌtîꞌpî. Tiaron pemonkoyamîꞌ esenupaꞌpî Paapa Maimu pî, mîrîrîya morîkon panamatoꞌ yenpoꞌpî toꞌ pia. Tiaron esenupantoꞌya yenpo inîꞌ panpîꞌ mîrîrî pî. Paapa Maimu mîrîrî tîponaron tiaron kaareta yentainon, penaron, tîîse morî pe wanî tiaron kaaretakon yentai, tiaronkon ena poiꞌpî pe. Tîîse, îꞌ wanî Paapa Maimuya, tiaron kaaretaya wanî pra tîîse. Seeni kaareta naka iipîꞌpî Paapa piapai? — 1 Tessalonicenses 2:13.

Amîrîya taiꞌse eraꞌmaꞌpî anna koꞌmantoꞌya mararî pra eꞌtarumaꞌtîntoꞌ wanî. Îꞌ pensa saꞌme eꞌtarumaꞌtîntoꞌ wanîꞌya mararî pra, oꞌnon pata pîikaꞌtîntoꞌ moropai panamatoꞌ eporîya eꞌpainon?

Paapa Maimuya apîikaꞌtîkon eꞌpainon, eseurîwîne kaisarî, mîrîrî eraꞌmapaiꞌnîkon. Paapa Maimuya amîrî pîikaꞌtî

1. mîrîrî wenai aweꞌtarumaꞌtî pepîn.

2. îꞌ pensa eꞌtarumaꞌtîntoꞌ iipîya morî pe ikonekakî.

3. yai pra eꞌtarumaꞌtîntoꞌ wanî manni moꞌtanîꞌpî pepîn eꞌpainon, mîrîrî yeꞌnen tîwanmîra eꞌkî.

Tiaron eseurîmantoꞌkon man mîrîrî pî.