Japëts nˈyeˈky nbejty Roma, mä tuˈugë lugäär mä tsyëënëdë ayoobë jäˈäy. Jantsy oˈktëyëts nmutskˈäjty. Kyajts nˈixyˈajtyë ndääk etsë ndeetyëts kyajts oy mëët nˈijty. Pääty duˈunyëts ijty ngäjpndukˈyeˈey.

Mäjkëtsë netyë njëmëjt kots tim jawyiin nmeˈtsy ets kotsë nety mäjmajtskë njëmëjt, tajëts ojts tëgok ngeˈeky mätsë ndëjk. Kanäkˈokëtsë ndeety xyjyuuybyëtsëëmy pujxndëgoty, jantsy awäˈänëts ijty njäˈäyˈaty ets jeˈeyëts mëdë jäˈäy ntsiptuny ntsipkajpxy. Kotsë njëmëjt 14, tajëts ojts ntsoˈonë mätsë ndëjk, duˈunyëts ijty mumaty njëdity ets nyajtunyëtsë droogë. Ets ko kyootsënë, tats ijty muumë karrë nyaˈˈawäˈätsy parëts jap nmäˈäy, jeˈeyëts muum nˈëxtäˈäyë lugäär mäts mbäät ntsiˈiy nxëtsy.

Maˈtspëts ojts njëmbijnë, ojtsëts ndukjaty wiˈixëtsë jäˈäy byolsë nbëjkët axtë wiˈixëts njëndëk ndëjktëkët koots. Nimayë jäˈäy ojts tnijawëdë ko maˈtspëts, päätyëts ojts xyˈanëëmëdë mëdiˈibë nanduˈun maˈtstëp etsëts mëët ndundët. Kots mëët nduundë, tajëts ojts ngumeenyjyaˈaytyaknë mët ko yëˈëtsë net ojts nmaˈtsnëdë bankë. Xyˈakwingutsëˈkëdëbëts ja jäˈäy mëdiˈibëts mëët nmaatstë mët ko jantsy awäˈänëts, xëmëts ijty nmëjëdityë nbistolë axtë yëˈëts ngoyˈajtypy. Duˈunëts ja njukyˈäjtënë ojts nyajnëjkxnë, nyajtunyëtsë droogë, nmeetsyëts, nmëdatyëts kanäägë toxytyëjk etsëts nˈaxëkˈëy nˈaxëkkajpxy. Xëmëts ijty ja polisiyë xypyajëdity ets kanäkˈokëts xymyäjtstë. Janääm jatsojkëts nyajtsuumy.

Kots ojts tëgok nbëtsëmy pujxndëgoty, tajëts ojts nguˈixë ja ntsëguu. Kyajtsë nety nnijawë pën Testiigëdëm mët nimajtskë myäänk. Tajëts ojts xywyowdë reunyonk ets tajëts ojts nbanëjkxy parëts jeˈeyë nˈokˈixäˈäny. Kots njäjttë mä ja salonk, ëxˈamëts naxweˈtsy parëts nˈixäˈäny pën tëjkëp ets pën pëtsëëm, tapëtsë nety ja nbistolë nmëjëdity.

Per tim tëgäjtsëtsë njukyˈäjtën kots ojts nëjkxy reunyonk. Duˈunëts nnayjyäˈäwë ko wiink it wiink lugäärëts jyawë nyajpääty ets ko jagamëts të nyajmënëjkxnë. Pes niˈamukë ja jäˈäy jyantsy kyäjpx jyantsy myaytyäˈäktë ets agujk jotkujk kyëxëˈëktë. Axtë tyambäädëts njamyetsy wiˈixëts ojts xyˈagëˈë xyˈaxäjëdë.

Tatsë nwinmäˈäny nbëjktaky kots nˈëxpëkäˈäny mëdë Jyobaa tyestiigëty. Kots duˈun nˈëxpëjky, tajëts nbëjkyë kuentë ko tsojkëbëtsë nety nyajtëgatsëdë njukyˈäjtën. Extëm nˈokpëjktakëm, nmëmëdoowëts ja ëwij käjpxwijën mëdiˈibë yajpatp mä Proverbios 13:​20 mä jyënaˈany: “Pën näjx tëjkëp mëdë jäˈäyë kuwijypyë nanduˈun jyëmbitäˈäny kuwijy, per mëdiˈibë näjx tëjkëp mëdë jäˈäy mëdiˈibë kyaj jyapëtyë jyot wyinmäˈäny axëëk jyatäˈäny”. Yäˈädë tekstë yëˈëts xypyudëjkë parëts nbuwäˈktuty ja jäˈäyëty mëdiˈibëts nety mëët nmaatstë. Ojtsëts xytsyiptakxë, perë Jyobaa yëˈëjëts xypyudëjkë parëts nmastutääytyë.

Ojtsëts nanduˈun nyajwäˈätsy ja niniˈkx ngëbäjkëts kots nmastutyë juˈuky etsë droogë. Yajkaˈpëts nanduˈun ja nwääy mëdiˈibë nety jantsy yeny, nyajjënäjkëts ja ndatsktëy ets kyajëts ojts nˈokˈaxëkˈëëw nˈokˈaxëkkäjpxnë. Ninäˈänëmtsë nety duˈun nganayˈaguwits nganayjyëjpkuwitsëty.

Ojtsëts xytsyiptakxëty nˈëxpëkëdë Biiblyë pes kadimylyetrëkäjpxäämbëts ets ni ngaˈëxpëkäˈänyëts. Per wanaty wanaty, tajëts niˈigyë ojts ntsojknë Jyobaa. Ets ko waanë yˈijty tajëts njamyajtstääy tijaty axëkˈäjtënëtsë nety të nduny ets jantsy axëëgëts nnayjyäˈäwë. Nwinmääyëts ko Jyobaa ninäˈäjëts xykyapokymyaˈkxët. Kots ijty duˈun nnayjyawëty, tajëts ngajpxy mä Biiblyë wiˈixë Jyobaa ojts tpokymyeˈkxy ja rey David oy mëjwiin kajaa pyokytyuuny ets yëˈë mëdiˈibëts ijty xyjyotkujkmoopy (2 Samuel 11:⁠1–12:13).

Ja tuk pëky mëdiˈibëts ojts xytsyiptakxëty, yëˈëjëts ngäjpxwäˈkxët winjëën windëjk (Matewʉ 28:​19, 20). Pes ntsëˈkëbëtsë nety kots nbäädëdë jäˈäy mëdiˈibëts të nmeetsy. Per ok, kyajts ojts nˈoktsëˈkënë, ets agujk jotkujkëts ojts njantsy nyayjyawëty kots ojts nnigajpxy nimaytyaˈaky pënën Jyobaa ets wiˈix mëjwiin kajaa xypyokymyaˈkxëm.

Kots të nˈixyˈatyë Jyobaa, tajëts kyaj wiˈix të njaty të ngëbety. Pes pënatyëts ijty mëët nnaymyayëty, nääk të yˈoˈknëdë ets wiinkpë tap yˈijnëdë pujxndëgoty. Per ëjts agujk jotkujkëts nyajpääty mët kots nˈëwxity njëjpˈixy ja oybyë jukyˈäjtënë mëdiˈibë miimp. Tyam yujy tudaˈagyëts njukyˈäjnë, mëdoobëts ets kyajëts nëgoo nˈokˈawäˈändaknë. Kots duˈun ja njukyˈäjtënë të nyaˈoyë, tajëts oy nˈity mët ja njëëkytyëjk nmëguˈuktëjkëts, ojtsëts nanduˈun nbääty tuˈugë oybyë ngudëjk mëdiˈibë xyëwˈäjtypy Carmen, mëdiˈibëts mëët nmëdunyë Jyobaa agujk jotkujk etsëts nbudëkëdë ja nmëjënbäˈä nmëdëjkpäˈä parëts nduknijawëdë ja Diosë yˈAyuk.

¿Ets mnijäˈäwëdëp? Tyam, kyajëts nˈokmaˈtsnë, tuumbëts parëts nbäätyë nmeeny nsentääbë. Nëjkxpëts näˈäganäˈäty mä bankë, per kyaj parëts jap nmaatsäˈäny, yëˈë parëts nyajwäˈätsäˈäny.