Nmaxuˈunkˈäjtyëts Acul, mä tuˈugë käjpnë nidëkëbë jap Guatemala. Ja nfamilyëts yëˈë kyäjpxtëbë ixil ets jamë tyëëm yˈääts tsyoondë mä jäˈäyëty mëdiˈibë kyäjpxtëbë maya. Njäjtëtsë amxan, per njäjtëts nanduˈunë ixil. Jats nˈyeˈky nbejty ko nety ja tsip tyunyëty mëdiˈibë jajk 36 jëmëjt. Mä taabë tsip, nimayë jäˈäy yˈoˈktë mëdiˈibë kyäjpxtëbë ixil.

Tëgok, ja nˈäjtsyëts yëˈë nety jam tyukˈëyiˈiky tyukuyajtypy tuˈugë bombë ko ojts kyëˈëmëbëjëty. Ëjts, tats ojts nwëˈëmy wiints, per ja nˈäjtsyëts oˈk. Taxkëtsë netyë njëmëjt etsëts ja nˈäjtsy wëxtujk. Ko duˈun jyajty, tats ojts nyajkajxnë Guatemala mä ja siudad, mä tuˈugë albergë mä yˈittë jäˈäy mëdiˈibë wiints, japëts nyajtukniˈˈijxë wiˈixëts ngäjpxëdë braille. Kyajts njaygyujkë tiko ja jäˈäy mëdiˈibëtsë nety jap xykyuentëˈäjttëp kyaj tnasˈijxëdë parëts nmaytyäˈägët mëdë ënäˈkuˈunk, nipënëts xykyatuunyë kuentë. Xëmëts naytyuˈuk nyajpaty, pääty njantsy nˈëwxijnëbëts ijty jyäˈtët ja tiempë kots nëjkxy mätsë ndëjk majtsk poˈo etsëts ja ndääk xykyuentëˈaty. Yëˈë mëkëts ijty xytsyoky. Per kotsë netyë njëmëjt mäjk, ta yˈoˈky. Jantsy mon tukëts nayjyäˈäwë, pes yëˈëyëtsë nety naytyuˈuk xytsyojkp.

Mäjktuˈugëtsë netyë njëmëjt kots ojts njëmbijnë mätsë ngäjpn, ets jamëts ojts nëjkxy tsënaabyë mätsë nguˈäjtsy mëdë fyamilyë. Xymyooytyëts tijatyëtsë nety nyajtëgoyˈajtypy, per kyajts pën xyˈagujkmooy xyjyotkujkmooy. Näˈäty, ndukmëgajpxypyëts ijtyë Dios etsëts nˈanëëmë: “¿Tikots ja ndääk të yˈooky? ¿Tikots wiints të nwëˈëmy?”. Ja jäˈäyëty duˈunëts ijty xyˈanëëmëdë ko yëˈë Diosë pyoky extëmëts njaty ngëbety, päätyëts nwinmääy ko Dios jantsy axëkjäˈäy ets ko kyaj xytsyojkëm. Ojtsxyëbëts nnayaˈoogyëty koxyëbëts nbääty tits mëët nnayaˈoogëdët.

Mon tukëts nnayjyäˈäwë kots ojts nwëˈëmy wiints, mët ko kyajtsë nety mbäät nnaygyuwäˈänyëty. Kots nmutskˈäjty, kanäkˈokëtsë jäˈäy xyˈaguanëˈäjty ets nipënëts ngatukˈawäˈänë, pes duˈunëts nwinmääy ko kyaj pën tmëbëkäˈäny. Tuˈuk majtsk ijtyë jäˈäy mëdiˈibëts jeˈeyë xymyëgäjpxp. Mon tukëts njantsy nyayjyäˈäwë ets kyajts pën mëët nyajpäädany mët ko kyajts pën ndukjotkujkˈaty.

Kotsë netyë njëmëjt mäjktëgëëk, ta tuˈugë kasäädë jäˈäy mëdiˈibë Testiigë xymyëtmaytyaktëts mätsë nety të nbëtsëmy eskuelë. Pes yëˈëtsë nety ja nmaˈestrë të yˈanëˈëmxëdë parëts xymyëtmaytyäˈäktët mët kots xypyaˈˈayoy. Xytyukmëtmaytyaktëts ko Biiblyë wyandakypy ko pënaty kyaj yˈixtë ijxpëkandëp ets ko ja oˈkpë jyukypyëkäˈändë (Isaías 35:⁠5; Fwank 5:​28, 29). Njantsy yˈoymyëdoowëts tijaty myaytyaktë, per kyajts nˈatsooy mët ko kyajts nëgoo nmaytyaˈaky. Per oyëtsë nety kyaj nëgoo nˈaˈëw nˈagäjpxëty, xymyëmaˈkxtujkëts ets xëmëts xynyimiindë parëts xytyukniˈˈijxëdë tsuj yajxon ja tëyˈäjtën mëdiˈibë mä Biiblyë. Ja ijty tyuˈuyeˈeytyë mäjk kilometrë tunoty kopkoty parë jyäˈttë mätsë ngäjpn.

Kots ja nˈäjtsy tnimaytyakyë yäˈädë Testiigëty, ta jyënany ko ayoowdëp, per ko oy nyaywyit nyayxyoxëdë ets yajnigëxëˈktëp ko xytsyojktëbëts, pes xynyamooytyëbëts tijaty. Ijtëts seguurë ko jantsy Diosmëduundëp, pääty dyajnimëjääwdaktë etsëts xynyimiindë.

Yëˈë yajtuundë ja ëxpëjkpajn mëdiˈibë miimp braille parëts ojts xytyukniˈˈijxëdë Biiblyë. Njaygyujkëts tijatyëts yajtukniˈˈijxë, per tam mëdiˈibë ojts tsyiptaˈaky ngupëkëdëts. Extëm nˈokpëjktakëm, pën xyjyantsy myëmääy xyjyantsy myëdäjpëtsë Dios ets pënë jäˈäy xyˈijxpëts extëmtsë Dios xyˈixy. Njaygyujkëts tiko tnasˈixë axëkˈäjtën etsë ayoˈon, per ojtsëts xytsyiptakxë nˈixët extëm tuˈugë uˈunkteety mëdiˈibë tsojkp. a

Kots nnijäˈäwë tijatyë Biiblyë tukniˈˈijxëp, tats ja nwinmäˈäny tyëgäjtsy. Extëm nˈokpëjktakëm, nnijäˈäwëts ko Dios mëk tjawë ko tˈixy nˈayoˈowëm. Ko tëgok tˈijxy wiˈixë nety ja nyax kyäjpn axëëk yajtuny, ta jyënany: “Ëjts wäˈätsëts të nˈixy të nduny, wiˈixëts yëˈë nnax ngäjpn jap yˈëyoy jyotëgoyën […] tëëjëts wäˈäts nijawë, wiˈix jap jyattën kyëbattën” (Éxodo 3:7, MNM). Kots nnijäˈäwë nuˈunënë Jyobaa xytsyojkëm, tats ndukwandaky kots nmëdunäˈäny. Jats nnëbejty mä jëmëjt 1998.

Ko nyajxy tuk jëmëjt mätsë nety të nnëbety, tats ojts nëjkx mä tuˈugë kursë parë jäˈäy mëdiˈibë wiints jap Escuintla. Ko ja nmëguˈukˈäjtëm mëdiˈibë tuump mëjjäˈäy tnijäˈäwë ko xytsyiptakxëbëts nëjkxët reunyonk jap Acul, mët ko kajaajëts ja tun kopk nduknaxy extëm ttuundë ja testiigëty mëdiˈibëts xyaˈëxpëjktë, ta tˈëxtääy tuˈugë familyë mëdiˈibëts mbäät xyajjäjtaˈaky etsëts xypyudëkëdët parëts nëjkxët reunyonk. Axtë tyambäät duˈunëts xykyuentëˈattë extëmë jyëëky myëguˈugën.

Kyaj yam ndukmëtmaytyaktäˈäytyë wiˈixën ja nmëguˈukˈäjtëm të yˈoyjyaˈaytyäˈäktë mët ëjts. Ijtpëts seguurë ko Jyobaa tyestiigëty yëˈëjën jyantsy pyanëjkxëdë Jesusë yˈijxpajtën ets yëˈëts mëët nyajpäättë (Fwank 13:​34, 35).

Tyam kyajts nekynyayjyawëty ko kyajts ti ntsoowëty, pes nˈëwxijtypyëts ja jotkujkˈäjtën, ets kyajts nanëgoobë nekyjyukyˈaty. En lugäärëts nmëmay nmëdäjët kots kyaj nˈixy, prekursoorëts nduny etsëtsë jäˈäy nbudëkë parë tnijawëdët ja tëyˈäjtën. Ndunyëts mëjjäˈäy ets nyajnäjxypyëtsë diskursë mäjatyë nmëguˈukˈäjtëm tyuˈukmuktë naa wingon. Nguˈëˈëw ngukäjpxëbëts nanduˈun kots ndiskursaraty mä asamblee mä milˈamë jäˈäy tyuˈukmuktë.

Mä jëmëjt 2010 yajwoowëts Mä tˈëxpëktë Biiblyë Yetyëjk mëdiˈibë Naytyuˈukˈäjttëp, jap El Salvador, tyam ja yajtijy Eskuelë parë pënaty kyäjpxwäˈkxtëbë Diosë Kyutujkën. Mä yäˈädë eskuelë japëts njäjty wiˈixëts niˈigyë nbudëkët ja nmëguˈukˈäjtëm, ets tëts xytyukˈixy ko Jyobaa mëjwiin kajaajëts xytsyoky ets ko xyajtsobatpëts. Yëˈë mbäät oytyim pënëty ttuktuny ja tyuunk.

Jesukristë jyënany: “Niˈigyë njotkujkˈäjtëm ko wiink jäˈäy nbudëjkëm es kyaj ko wiink jäˈäy xypyudëjkëm” (Apostʉlʉty o Hechos 20:35). Tyam mbäädëts njënäˈäny ko agujk jotkujkëts nnayjyawëty, ets oyëts ninäˈä ngawinmääy ko mbäädëtsë jäˈäy nbudëkë, per tëts nbëkyë kuentë ko mbäädëtsë duˈun nduny.