Aposetolo Edia Kara 13:1-52
13 Ekalesia oreana Antioka lalonai be mai edia peroveta bona hahediba taudia haida. Ladadia bini: Banaba; Simeon Nigera; Lukio, tau Kurene; Manaen (ia na Herod Ḡaubada ida e ubua hebou tauna); bona Saulo.
2 Idia ese Lohiabada e toma henia dihova bona e anivagava negana ai, Lauma Helaḡa ese e haduadia, eto, Banaba Saulo ida a hahelaḡadia lauegu, badina be ḡaukara ta ikarana vada na abidia hidi.
3 Taunabunai, idia na e anivaga bona e ḡuriḡuri, bena imadia na raruosi latadiai e ato kau, bena e kahudia nege.
4 Lauma Helaḡa ese unu e siaidia toma dainai raruosi ela bona kone amo e lasi, Seleukia ai, unu amo Kupro e heau lao.
5 Salami ai eha heau kau, unuseni ai Dirava ena hereva Iuda taudia edia dubu lalodiai vada e harorolaia matama. Ioane danu idia raruosi e durudia.
Banaba bona Saulo Kupro ai
6 Idia ese una motumotu e rakaia hanai ela bona Pafo. Unuseni ai babalau bona peroveta koikoi tauna ta e davaria, Iuda tauna, ladana na Bariesu;
7 ia na gavana tauna, Seregio Paulo, dekenai e nohova. Una gavana be lalo-parara tauna: ia ese Banaba bona Saulo e boiridia, e ura henidia, Dirava ena hereva bae hamaorolaia.
8 A hari babalau tauna, Eluma (ia ladana ihaheḡereḡerena bunai), ese raruosi e gwaudia tubu; ena ura be gavana ese edia hereva basine abi dae.
9 A Saulo (ia ladana ta danu Paulo) na Lauma Helaḡa ese e rohea, bena ia ese Eluma e raraia tao, eto,
10 Oi na koikoi bona dika idoinai ese e hahonumumu, diabolo natuna, kara maoromaoro iboudiai o inai henimumu; Lohiabada ena dala maoromaorodia ihagagevadia basio hadokoa a?
11 A kamonai: Lohiabada ese imana na oi latamu ai be atoamu ina harihari; bena matamu bae kepulu, dina basio itaia ela bona nega ta. Una negana ai ḡahu bona dibura ese e hakepulua; bena e loa eva-eva, taunimanima e noidia, ia imana ai bae abi, bae hakaua.
12 E vara ḡauna na gavana ese e itaia, bena Lohiabada ena hahediba herevadia e abi dae bona e hoalai.
Paulo mai bamona ida Asia ai
13 Paulo mai bamona ida ese Pafo e heautania, Perega ai e diho: una na Pamfulia tanona ai. Unuseni ai Ioane ese e rakatanidia, Ierusalem e lou henia.
14 A raruosi na Perega amo e vareai, gunika kahana ela bona Antioka ai e kau. Una Antioka na Pisidia tanona ai. Dina Helaḡa ai idia na dubu ai e raka vareai, e helai diho.
15 Taravatu bona peroveta bukadia e duahi murinai, dubu biagudia ese gwaukau na raruosi dekedia e siaia lao, eto, Varavaramai e, bema mai emui hahealo herevadia taunimanima edia, mani a gwaurai.
16 Bena Paulo na e tore isi, imana ai e taodia ahu, eto,
Israel taumui bona Dirava garina o garimu taumui e, a kamonai.
17 Ina bese Israel ena Dirava ese seneda e abidia hidi, bona eda bese taudia na Aigupto tanona ai e nohova negana ai vada e hahutumadia, bona ia imana ese e hakaudia lasi.
18 Laḡani hari-ahui sisivana tano ḡaḡaena ai e haheauka henidia.
19 Kanaan tanona besena hitu e habuadia tari; bena tano na Israel taudia e henidia, edia tano korikori ai e halaoa. Unuseni ai laḡani sinahu-hani imahui sisivana e nohova.
20 Unu ḡau muridiai hahemaoro taudia e henidiava, ema bona Samuel peroveta tauna negana.
21 Gabeamo idia na e noinoi, pavapava ta bae abia eto; bena Dirava ese Saulo Kisa, Beniamina ena iduhu tauna, e henidia, laḡani hari-ahui ia ese e pavapavadia.
22 Saulo e abia oho murinai, Dirava ese David ma e haginia, edia pavapava ai e halaoa; e herevalaia hedinarai, eto, David Iese vada name davaria, egu lalokau tauna, egu ura karadia iboudiai do baine kara.
23 Ia garana amo Dirava ese Israel edia Hahemauri Tauna Iesu e havaraia, ena gwauhamata heḡereḡerena.
24 Ia na do sema negana ai Ioane ese helalo bapatisona Israel taudia iboudiai vairadiai vada e harorolaia.
25 A Ioane ena ḡaukara dokona ai eto “Umui na dahaka o tomamu, lau be daika? Lau na dia ia: tau ta murigu ai be maimu; lau na dia namo ena tamaka varona baina ruhaia”.
26 Varavaragu e, Abraham garana loḡora e, bona Dirava garina o garimu taumui e, ina hahemauri herevana na ita dekeda vada e siaia mai.
27 Badina be Ierusalem taudia bona lohiadia na asi dibadia ia; bona peroveta taudia edia hereva Dina Helaḡa iboudiai e duahi to lalodia asie parara; una dainai e revaia mase, bona unu amo peroveta taudia edia hereva e hamomokani.
28 Ena be ihamasena badina ta asie davaria, to idia ese Pilato e noia, baine alaia mase.
29 Ia herevana iboudiai, vada e tore guna herevadia, na idia ese e hamomokani; bena au dorina amo e abia dobi, gara lalonai e atoa.
30 A Dirava ese mase amo ma e hatorea isi.
31 Ia ida Galilea amo Ierusalem ela taudia ese dina diaḡau lalodiai e itaia loulou; bena harihari idia ese taunimanima vairadiai e gwauraia hedinaraimu.
32 Taunabunai, seneda e henidia gwauhamatana sivaraina namona binai ai ese a harorolai henimuimu:
33 gwauhamatana bunai Dirava ese Iesu ihatore-isina ai vada e hamomokania, natuda ediai. Salamo iharuana lalonai e torea na heto; eto,
Oi na lau Natugu,Hari dina ai vada na abimu.
34 Mase amo vada e hatorea isi bona basine pata lou herevana na ini e gwauraia toma: David na henia gwauhamatadia helaḡadia bona momokanidia do baina henimui.
35 Bona salamo ta lalonai ma eto: Emu Helaḡa Tauna basio kahua nege, basine pata.
36 Badina be David ese ena uru ai Dirava isiaina e lao heniva, Dirava ena ura heḡereḡerena ai, bena vada e mase, senena loḡora ida vada eha hebou; tau-anina be e pata.
37 A Dirava ese e hatorea isi tauna na pata asi dibana.
38 Taunabunai, varavaragu e, ia bagunai dika igwau-taodia a harorolai henimuimu.
39 Ia bagunai danu kamonai taudia iboudiai edia dika loḡora amo eme heruha; ena be Mose ena taravatu ai basio heruha diba, to ia bagunai do ba heruha.
40 Taunabunai, nahuamui ba toho, peroveta taudia ese e gwaurai ḡaudia na umui emui ai bae momokani na garina; eto,
41 Heihi-ihirai taumui e, a itaia, ba hoa, ba mase ore;Badina be kara ta emui mauri dinadia ai na karaia,Kara na, ena be ta ese bema hamaoromui, to basioma abia dae.
42 Paulo bona Banaba e raka lasi ai taunimanima ese e noidia, eto, Dina Helaḡa vairai unu hereva ma bae gwaurai lou idia vairadiai.
43 Hebou e karoho, bena Iuda taudia hutuma, bona Dirava garina e gariva taudia Iuda taudia ai vada e halaodia haida danu, ese Paulo bona Banaba e bamodia. Raruosi ese e hereva henidia bona e halodia, eto Dirava ena harihari-bada bae badinaia tarika-tarika.
44 Dina Helaḡa iharuana ai, hanua taudia hutuma bada Dirava ena hereva ikamonaina totona vada e hebou.
45 A Iuda taudia ese aru taudia e itadia, bena raruosi e vaḡeḡe henidia, Paulo ena hereva e gwau tubu mai ere dikadia ida.
46 Bena Paulo bona Banaba e hereva goadagoada, eto, Dirava ena hereva a harorolai henimui guna na mai badina; to o dadaraiamu, bona sibomui o hahemaoromu, mauri hanaihanai basio abia o tomu. Benaini, idau bese taudia baia haḡeredia;
47 badina be Lohiabada ese vada e haduada, eto,
Lau ese vada na atomui, idau bese taudia edia diari ai baola;Bona hahemauri ai baola, ela bona tanobada dokodia idoidiai.
48 Idau bese taudia ese una hereva e kamonai mai moaledia ida, bona Dirava ena hereva e imodaia. Bena e abidia hidi mauri hanaihanai bae abia taudia iboudiai ese e abiabiraia.
49 Lohiabada ena hereva na una tano idoinai vada eha piua rohoroho.
50 A Iuda taudia ese lohia hahinedia haida, Dirava garina e gariva hahinedia, bona hanua tau-badadia, lalodia e ani, Paulo bona Banaba bae daḡedaḡe henidia eto. Bena edia tano amo e luludia lasi.
51 Bena raruosi ese aedia palapaladia ḡahudia e davedave oho, idia ihabadelaidia karana; bena Ikonio ela.
52 Iesu ibadinana taudia na e moale badava, bona Lauma Helaḡa ese e rohediava.
