1. Dala maoronai Dirava baita tomadiho heniamu ena namo be dahaka?

IEHOVA DIRAVA ese ita na e laloda badamu bona e uramu iena hahekau dalana amo namo baita davaria. Bema dala maoronai ia baita tomadiho henia, baita moalemu bona hekwakwanai momo baita hanaidiamu. Danu, Iena hahenamo bona heduru baita abimu. (Isaia 48:17) Tomadiho momo na e laloamu Dirava sivaraina momokanina e hahedibalaimu. To, Dirava bona iena ura e hahedibalaimu daladia na idauidau.

2. Iehova itomadiho henina dalana maorona be ede baita diba tomamu, bona edena haheitalai ese baine duruda una baita lalopararalaia?

² Iehova baita tomadiho henia dalana maorona be ede ba diba toma? Dia tomadiho iboudiai edia hahediba herevadia ba stadilai bona ba haheḡereḡeredia karana amo una ba diba. To Baibul ese tomadiho momokanina e hahedibalaiamu dalana maorona ba dibaia na namo. Ini baita haheitalaia toma: Tano momo ai, moni koikoidia e ḡaukaralaimu karana na bada. Bema emu ḡaukara na moni koikoidia ba hididia, oi be ede bo kara tomamu? Moni koikoidia iboudiai toadia bo lalotaomu, eiava? Lasi. Dala namona na nega bavato moni momokanidia ba stadilai namonamo. Moni momokanina toana bo dibaiamu neganai, moni koikoidia toadia danu bo dibamu. Una heḡereḡerena, tomadiho momokanina baita  dibaiamu neganai, tomadiho koikoidia baita dibadiamu danu.

3. Iesu ena hereva heḡereḡerena, bema ta uramu Dirava ese baine lalonamo henida, dahaka baita kara na namo?

³ Ḡau badana na Iehova ese e moalelaiamu dalanai ia baita tomadiho henia. Momo na e laloamu Dirava ese tomadiho iboudiai e abidia daemu, to Baibul ese una na se hahedibalaia. Ena be ta na baine gwa ia na Kristen tauna, to una mo na dia heḡereḡere. Iesu na e gwa: “Dia bae hereva henigu, baeto ‘Lohiabada e, Lohiabada e,’ taudia iboudiai na guba basileiana lalonai basie raka vareai; a Tamagu guba ai e nohomu ena ura e karamu tauna mo.” Una dainai, Dirava ese baine lalonamo henida totona, namona na iena ura baita diba bona baita badinaia. Iesu ese Dirava ena ura asie karaiamu taudia na e gwauraidia ‘kara havara taudia.’ (Mataio 7:21-23) Moni koikoina heḡereḡerena, tomadiho koikoi na asi anina. Bona ta baine hadikaia diba.

4. Iesu ese e herevalai daladia rua be dahaka, bona dahaka e lao henimu?

⁴ Iehova ese mauri hanaihanai ena hahenamo na taunimanima iboudiai e henidia. To, mauri hanaihanai baita abia totona, namona na dala maoronai Dirava baita tomadiho henia bona ena ura baita badinaia. Madi, momo na asie uramu unu bae kara toma. Una dainai Iesu na e gwa: “Ikoukou hekahi-hekahina amo ba raka vareai. Badina be mase gabuna e laomu dalana na ikoukou ḡamoḡa bada bona dala na lababana bada; bona hutuma na unu amo e raka vareaimu. A mauri gabuna e laomu dalana na ikoukou hekahi-hekahina bona dala na rotona; e davariamu taudia na gagadoi.” (Mataio 7:13, 14) Tomadiho momokani na mauri hanaihanai e lao heniamu. Tomadiho koikoi be mase e lao heniamu. Iehova na se uramu ta baine mase, una dainai dala e kehoa taunimanima ese ia bae dibaia totona. (2 Petro 3:9) Una dainai, Dirava baita tomadiho henia dalana amo baita mauri eiava baita mase.

5. Tomadiho momokani e badinaiamu taudia be ede baita dibadia toma?

⁵ “Mauri gabuna e laomu dalana” be ede baita davaria toma? Iesu na e gwa tomadiho momokani na, e badinaiamu taudia edia kara amo baine hedinarai. Ia na e gwa: “Huahuadia amo ba dibadia. . . . Au namodia iboudiai huahuadia be nanamo.” (Mataio 7:16, 17) Tomadiho momokanina e badinaiamu taudia na e abi daemu herevadia bona edia kara amo ba dibadia. Ena be idia na dia ḡoḡoevadae bona e kereremu, to e ḡaukara heboumu Dirava ena ura bae karaia totona. Mani tomadiho momokani e badinaiamu taudia edia kara badadia siks aita herevalai.

6, 7. Dirava ena hesiai taudia ese Baibul be ede e laloa tomamu, bona Iesu ese una be ede e haheitalaia toma?

⁶ Dirava ena hesiai taudia edia hahediba herevadia na Baibul amo. Baibul na e gwa: “Revareva helaḡadia iboudiai na Dirava ena heuda-roha dainai e tore; idia na mai siahudia taunimanima ihadibadia, bona ihahelalo-kerehaidia, bona isisiba-henidia, bona kara maoromaoro ai ihakaulaidia. Unu amo Dirava ena tau [eiava hahine] baine ḡoeva dae, bona kara namo iboudiai ikaradia ai baine kwalimu.” (2 Timoteo 3:16, 17) Paulo ese Kristen taudia e tore henidia neganai, e gwa: “Emai ai o kamonai herevana na o abia dae, dia taunimanima mo emai hereva, a Dirava ena hereva.” (1 Tesalonika 2:13) Una dainai tomadiho momokanina ese e abi daemu bona e badinamu herevadia na dia taunimanima edia lalohadai eiava sene karadia. To Dirava ena Hereva, Baibul amo.

⁷ Iesu Keriso na haheitalai namona badina ena hahediba herevadia na Dirava ena Hereva amo e abiva. Ia ese Tamana gubai e ḡuriḡuri henia neganai, e gwa: “Emu hereva na hereva momokani.” (Ioane 17:17) Iesu ese Dirava ena Hereva na e abia daeva, bona ena hahediba herevadia iboudiai na Baibul ida e heḡereḡere. Nega momo Iesu na e gwauva: “Vada e torea.” (Mataio 4:4, 7, 10) Bena Baibul ena hereva ta e gwauraiava. Una heḡereḡerena, hari Dirava ena hesiai taudia ese  sibodia edia lalohadai na asie hahedibalaimu. Idia ese e abia daemu Baibul na Dirava ena Hereva, bona edia hahediba herevadia na unu amo e abimu.

8. Iehova baita tomadiho henia totona, dahaka baita kara?

⁸ Tomadiho momokanina e badinaiamu taudia ese Iehova mo e tomadiho heniamu bona ladana e gwauraia hedinaraimu. Iesu na e gwa: “Lohiabada emu Dirava na ba toma henia diho, ia mo sibona isiaina ba lao heni.” (Mataio 4:10) Una dainai, Dirava ena hesiai taudia na Iehova mo e tomadiho heniamu. Bona idia ese Dirava momokanina ladana bona ena kara na taunimanima e hadibalaidiamu. Salamo 83:18 na e gwaumu: “Oi ladamu na Iehova; oi mo sibomu Herea Mikamika, tanobada idoinai daenai.” Iesu ese haida e durudia Dirava bae dibaia totona, una dainai ena ḡuriḡuri ai ia na e gwa: “Tanobada ai o henigu taudia na oi ladamu vada na hadibalaidia.” (Ioane 17:6) Una heḡereḡerena, hari tomadiho momokani taudia ese Dirava ladana, ena ura, bona ena kara na ma haida e hadibalaidiamu.

9, 10. Ededia dala ai Kristen taudia korikoridia na e helalokau hehenimu?

⁹ Dirava ena hesiai taudia na e helalokau hehenimu. Iesu na e gwa: “Unu amo taunimanima iboudiai bae diba umui na lauegu hahediba: ba helalokau heheni dainai.” (Ioane 13:35) Kristen taudia ginigunadia na e helalokau heheniva. Dirava ena lalokau ese bese, taunimanima, bona tano edia inai heheni karana na e hadokoamu, bona taunimanima na tadikaka oreana ta bamona e haboudiamu. (Kolose 3:14 ba duahia.) Tomadiho koikoi lalonai unu bamona tadikaka oreana ta na lasi. Ede ta diba tomamu? E heala-ala hehenimu badina edia tano o bese na idau. Kristen taudia korikoridia ese tadikakadia eiava idau tauna ta na basie alaia. Baibul na e gwaumu: “Unu amo Dirava natuna bona diabolo natuna bae hedinarai. Kara maoromaoro se karamu tauna bona tadikakana se lalokau heniamu tauna na dia Dirava ena. . . . Baita heura heheni. Kain ida basio heḡereḡere; ia be dika tauna natuna, bena ia ese tadina e alaia mase.”​—1 Ioane 3:10-12; 4:20, 21.

 ¹⁰ Oibe, lalokau korikorina anina na haida basita aladia, to dia una mo. Kristen taudia korikoridia na mai edia ura ida edia nega, goada, bona kohu e ḡaukaralaimu bae heduru heheni bona bae hahegoada heheni totona. (Heberu 10:24, 25) Hekwakwanai negadiai e heduru hehenimu, bona mai momokanidia ida ma haida e kara henidiamu. Idia ese edia mauri ai ina Baibul sisibana e badinaiamu, “taunimanima iboudiai baita kara namo henidia.”​—Galatia 6:10.

11. Dahaka dainai baita abia dae Dirava ese Iesu Keriso ena amo ita e hamaurida?

¹¹ Kristen taudia korikoridia na e abia daemu, Dirava ese Iesu Keriso ena amo ita e hamaurida. Baibul na e gwaumu: “Hahemauri be idau tauna ta lalonai dia mia; badina be ihamaurida ladana idauna ta guba henunai se henida, lasi vaitani.” (Kara 4:12) Karoa 5 ai ta itaia heḡereḡerena, Iesu ese ena mauri e heni kamonai taudia baine hamauridia helaoreana. (Mataio 20:28) Danu, ia na Dirava ese e abia hidi Iena guba Basileia amo tanobada idoinai baine lohiaia. Bona Dirava na e uramu Iesu baita kamonai henia bona ena hahediba herevadia baita badina, bema ta uramu baita mauri hanaihanai. Una dainai Baibul na e gwaumu: “Natuna e abidadama heniamu tauna ese mauri hanaihanai baine abia; Natuna e gwau edeede heniamu tauna ese mauri basine itaia.”​—Ioane 3:36.

12. Dia tanobada ena anina be dahaka?

¹² Tomadiho momokani taudia na dia tanobada ena. Roma pavapavana Pilato ese Iesu e kota henia neganai, Iesu na e gwa: “Egu basileia na dia ina tanobada ḡauna.” (Ioane 18:36) Herevana Iesu murinai e rakamu taudia korikoridia na edena tano ai e nohomu, to idia na iena guba Basileiana henunai bae noho taudia bona politikol karadia amo e gini sirimu. Politikol heiriheiridiai asie vareaimu. To, bema haida na e uramu politikol pati ta bae badinaia, eiava kendideit ai baela, eiava bae vouti, Iehova e tomadiho heniamu taudia ese na asie koudiamu. Bona ena be Dirava e tomadiho heniamu  taudia momokanidia na politikol karadia asie karamu, to idia ese gavamani edia taravatu na e badinamu. Dahaka dainai? Badina Dirava ena Hereva ese e haḡanidia, “lohia bae matauraidia.” (Roma 13:1) Bema politikol oreadia edia taravatu bona Dirava ena taravatu na asie heḡereḡeremu, namona na tomadiho momokani taudia ese aposetolo bae tohotohodia, idia na e gwa: “Dirava ikamonai-henina be namo; taunimanima ikamonai-henidia be dika.”​—Kara 5:29; Mareko 12:17.

13. Iesu murinai e rakamu taudia korikoridia ese Dirava ena Basileia be ede e laloa tomamu, bona dahaka e karamu?

 ¹³ Iesu murinai e rakamu taudia korikoridia ese Dirava ena Basileia e harorolaiamu. Iesu na e peroveta: “Basileia sivaraina namona na tanobada idoinai bae harorolaia, bese iboudiai ihadibalaidia; bena dokona vada baine kau.” (Mataio 24:14) Iesu murinai e rakamu taudia korikoridia ese taunimanima na se hagoadadiamu tanobada lohiadia edia heduru bae tahu, to Dirava ena guba Basileiana e harorolaiamu, una Basileia sibona ese taunimanima na helaro baine henidia. (Salamo 146:3) Iesu ese una gavamani namona baita ḡuriḡurilaia dalana na ini e hahedibalaia toma: “Emu basileia bainema, emu ura tanobada ai baia kara, guba ai e karamu na heto.” (Mataio 6:10) Baibul na e peroveta guba Basileiana ese “unu basileia [hari e lohiamu] iboudiai na baine hamakohidia sisisisi bona baine hadokodia, bena baine gini hanaihanai.”​—Daniel 2:44; Apokalupo 16:14; 19:19-21.

14. Edena tomadiho oreana ese tomadiho momokani bae kara karadia e karamu?

¹⁴ Tame herevalai ḡaudia dainai, sibomu ba henanadai: ‘Edena tomadiho be Baibul ena hereva e hahedibalaiamu bona Iehova ladana e harorolaiamu? Edena orea ese Dirava ena lalokau e hahedinaraiamu, Iesu e abidadama heniamu, tanobada amo e gini sirimu, bona Dirava ena Basileia e harorolaiamu? Tanobada tomadihodia iboudiai amo, edena be ini kara iboudiai e badinamu?’ E vara momokanimu ḡaudia ese e hahedinaraiamu una orea na Iehova ena Witnes taudia.​—Isaia 43:10-12 ba duahi.

15. Dirava na e uramu baita abia dae ia na e nohomu, to ma dahaka danu baita kara?

¹⁵ Dirava ihamoalena totona, Ia baita abia dae mo na dia heḡereḡere. Badina Baibul na e gwaumu demoni ese danu e abia daemu Dirava na e nohomu. (Iakobo 2:19) To, Dirava ena ura na asie karaiamu bona Ia ese na se lalonamo  henidiamu. Dirava ese baine lalonamo henida totona, namona na baita abia dae ia na e nohomu bona iena ura baita karaia. Danu namona na tomadiho koikoi amo baita raka siri bona tomadiho momokani baita badinaia.

16. Dahaka dainai tomadiho koikoi ai basita vareai?

¹⁶ Aposetolo Paulo ese e hahedinaraia, namona na tomadiho koikoi ai basita vareai. Ia na e gwa: “Edia amo ba raka oho, dauhai ba noho; miro ḡauna enai basio dau kau, bena baina abimui dae.” (2 Korinto 6:17; Isaia 52:11) Una dainai Kristen taudia korikoridia ese tomadiho koikoi karadia iboudia e dadaraimu.

17, 18. “Babulono Badana” be dahaka, bona dahaka dainai ‘iena amo baita raka lasi’ haraḡa?

¹⁷ Baibul ese e hahedinaraiamu tomadiho koikoi karadia na “Babulono badana” amo ema. * (Apokalupo 17:5) Una lada dainai idaunegai Babulono hanuana, Noa ena negai e vara utu-utuna murinai tomadiho koikoi e hematama hanuana, ta laloamu. Hari tomadiho koikoi ena hahediba herevadia bona karadia na una idaunegai Babulono amo ema. Heḡereḡere, Babulono taudia ese toi tamona diravadia e tomadiho henidiava. Hari ina negai, tomadiho momo edia hahediba hereva badana na Toi Tamona. To, Baibul na e gwaumu Dirava korikori na tamona, Iehova, bona Iesu Keriso na ia Natuna. (Ioane 17:3) Danu, Babulono taudia na e abia daeva taunimanima e maseva neganai, laumadia na e mauriva eiava hisihisi hanaihanai gabuna e laova. Hari ina negai, tomadiho momo ese basine mase diba laumana eiava hel lahina ai hisihisi karana e hahedibalaiamu.

¹⁸ Idaunegai Babulono tomadihona na tanobada heḡeḡemadai e vareai dainai, hari ina negai Babulono Badana ese tomadiho koikoi iboudiai e laulaulaidia na maoro. Bona Dirava na e peroveta una tomadiho koikoi oreana na kahirakahira baine ore. Una dainai Babulono Badana ena amo baita  raka oho na mai anina bada, ani? Iehova Dirava na e uramu nega do mianai Babulono badana ‘amo baita raka lasi’ haraḡa.​—Apokalupo 18:4, 8 ba duahi.

19. Iehova bo hesiai heniamu neganai, dahaka hahenamo bo abimu?

¹⁹ Tomadiho koikoi karadia bo rakatanimu neganai, reana haida na basie uramu oi bae bamomu. To, Iehova ena taunimanima ida Ia bo hesiai heniamu neganai, hahenamo momo bo abimu. Iesu ena hahediba ginigunadia na ia ibadinana totona ḡau haida e dadarai, to hahenamo momo e abi heḡereḡerena, oi danu Dirava e lalokau heniamu taudia momo ese be bamomumu. Tanobada heḡeḡemadai Kristen momokani taudia edia ruma bese ai bolaomu, bona be lalokau henimumu. Bona oi ese “bainema negana ai” mauri hanaihanai bo abiamu. (Mareko 10:28-30 ba duahi.) Reana nega ta, oi e dadaraimumu taudia ese Baibul ena hahediba herevadia be tahumu bona Iehova itomadiho henina taudia ai be laomu.

20. Tomadiho momokani e badinaiamu taudia edia helaro be dahaka?

²⁰ Baibul na e gwaumu kahirakahira Dirava ese ina nega oromana dikana baine haorea bona iena Basileia ena lohia henunai nega matamatana baine havaraia. (2 Petro 3:9, 13) Una na helaro namona! Bona una nega oromana matamatana ai, tomadiho momokani tamona mo be miamu. Hari ina negai tomadiho momokani taudia ba bamodia na aonega karana, ani?