NIUSPEPA o duahimu, TV o itamu, eiava redio o kamonaimu neganai, raskol karadia, tuari, bona terorist karadia sivaraidia na momo herea! Emu hekwakwanai mani a lalodia. Reana gorere eiava emu lalokau tauna ta e mase dainai o lalohisihisimu. Emu hemami na reana Iobu ena heḡereḡerena, ia na e gwa, “asina noho namonamomu, asina noho mainomu, asina laḡa animu.”​—Iobu 3:26.

Sibomu ba henanadai:

• Dirava be e uramu taunimanima be ini bae noho toma?

• Egu hekwakwanai baina haheaukalai totona, edeseniai heduru baina abi diba?

• Nega ta tanobadai maino be varamu, eiava?

Unu henanadai na Baibul ese e haerelaidia.

“Ia ese iruru-matadia iboudiai matadia amo baine dahu oho. Mase bona dara-doko bona taitai bona hisihisi bae ore.”​—Apokalupo 21:4

“Ae-hedairike tauna baine roho isi roho isi, dia na heto.”​—Isaia 35:​6

“Mata-kepulu taudia matadia na bae papa.”​—Isaia 35:5

 “Gara ai e nohomu taudia iboudiai . . . bae raka lasi.”​—Ioane 5:​28, 29

“Hanua tauna ta basineto ‘E goreregumu.’”​—Isaia 33:24

“Aniani reidia na tano ai bae vara momomomo.”​—Salamo 72:16

Basioto rau ginigunadiai e hetore herevadia bona laulaudia na nihi eiava gori. Dirava na e gwauhamata unu na baine haḡuḡurudia, bona baine karaia dalana na Baibul ese e herevalaia.

To Baibul ese ḡau ma haida danu e herevalai. Hari ina negai, mauri baita moalelaia dalana danu e hadibalaidamu. Emu lalohekwarahi bona hekwakwanai mani a lalodia. Reana moni hekwakwanaidia, ruma bese ena hekwakwanai, gorere, eiava o lalokau heniamu tauna ta e mase. Baibul ese baine durumu diba hari e varamu hekwakwanaidia ba haheaukalai, bona ini henanadai haeredia ba diba:

• Dahaka dainai ta hisihisimu?

• Lalohekwarahi ḡaudia be ede baita haheaukalai toma?

• Eda ruma bese be ede baita hamoalea toma?

• Baita masemu neganai, edai be dahaka be varamu?

• Eda lalokau mase taudia baita itadia loumu, eiava?

• Ede ta diba tomamu vaira neganai Dirava ese ena gwauhamata na baine haḡuḡurudia?

 Ina buka o duahiamu karana ese e hahedinaraiamu oi na o uramu Baibul ena hahediba herevadia ba diba. Ina buka ese baine durumu. Paragraf ta ta na mai henanadaidia. Taunimanima milioni momo na Iehova ena Witnes ida Baibul e herevalaiamu neganai, henanadai bona haere karana na e moalelaiamu. A uramu oi danu una ba moalelaia. Baibul ena hahediba maorodia o dibadiamu lalonai, Dirava ese be hanamomumu.