HARI ina negai tomadiho bona tanobada taudia ese e moalelaimu dina badadia na dia Baibul ena hereva heḡereḡerena. Unu dina badadia imoalelaidia karana be ede e hematama  toma? Laibri bukadia momo ai hetahu karana bo karaiamu neganai, unu buka ese dina badadia imoalelaidia karana e herevalai dalana na bo hoalaiamu. Mani haida aita herevalai.

Ista. Buka ta (The Encyclopædia Britannica) na ini e gwa toma: “Taravatu Matamatana lalonai Ista ariana imoalelaina karana na se herevalaia.” Ista be ede e hematama toma? Ia na dirava koikoi e tomadiho heniamu taudia ese e matamaia. Idia na e laloamu una na Iesu ena toreisi lou ilalotaona dinana, to Ista dinanai e karamu karadia na dia Kristen karadia. Heḡereḡere, buka ta (The Catholic Encyclopedia) ese “Ista rabit” e herevalaia neganai, ini e gwa toma: “Rabit na dirava koikoi e tomadiho henidiamu taudia edia toa ta bona idaunega amo ema bona hari ia na natu ihavarana siahuna e laulaulaia.”

Laḡani Matamata Imoalelaina Karana. Tano momo ai Laḡani Matamata imoalelaina karadia bona dinadia na idauidau. Buka ta (The World Book Encyclopedia) ese una dina e matama dalana na ini e herevalaia toma: “Laḡani 46 B.C. ai, Roma lohiana Julius Caesar ese January 1 na Laḡani Matamata Dinana ai e halaoa. Roma taudia ese una dina na Janus diravana dainai e hahelaḡaiava​—ia na geidi, iduara bona ḡau iboudiai matamadia diravana. January na Janus, vaira rua diravana, amo e abia​—vairana ta be vaira kahana e itaiamu bona ta be muri kahana e itaiamu.” Una dainai Laḡani Matamata Imoalelaina karana na dirava koikoi e tomadiho henidiamu taudia edia kara.

Dina Badadia Ma Haida. Tanobada idoinai lalonai taunimanima ese e moalelaimu dina badadia iboudiai na basita herevalai dibamu. To, taunimanima eiava edia orea ladadia e abi isimu dina badadia na Iehova ese se abi daemu. (Ieremia 17:5-7; Kara 10:25, 26) Danu, tomadiho idauidau ese e moalelaimu dinadia e hematama badidia amo baita dibamu Dirava ese e abi daemu eiava lasi. (Isaia 52:11; Apokalupo 18:4) Ina buka ena Karoa 16 ai Baibul ena hahekau herevadia ese be durumumu, Dirava ese dina badadia imoalelaidia karana e laloamu dalana bo dibaiamu.