Kahirakahira taunimanima iboudiai na mai dibadia dahaka kara be mamaoro bona ededia kara be kekerere. Heḡereḡere, ala-ala, rape, natu ihadikadia karadia na didika. A ini kara heḡereḡere kara maoro, kara namo bona hebogahisi na ta moalelaimu karadia. To mauri lalonai, kara haida heḡereḡere matabodaḡa karadia, kara momokani, eiava natu inaridia daladia ai, taunimanima momo na e gwaumu, maoro eiava kerere na lasi. Herevana edena abi hidi e karaia, una na dounu maoro. Momo na edia hemami bona dekedia taudia edia hemami heḡereḡerena ai abi hidi e karamu. Una be lalohadai maorona, a?

Nega haida eda hemami eiava laloda mamina ese be hadibadamu dahaka be maoro bona dahaka be kerere. (Roma 2:​14, 15) Natu danu maraḡidia amo, una ena idau na e lalopararalaiamu bona e karamu kereredia ese idia na e hagaridiamu badina e dibamu una na dia maoro. Ta bada ta laomu lalonai, eda famili, turada, teacher, ta noho heboumu taudia, tomadiho bona kastom amo ta dibamu ḡaudia ese eda hemami eiava laloda mamina, dahaka be maoro bona dahaka be kerere, e haidauamu. Abi hidi ta karamu negadiai, laloda mamina ese e hadibadamu ta karamu abi hididia be mamaoro eiava lasi.

Maoro bona kerere edia idau mai dibada dainai, una ese ita na e durudamu haida ediai hebogahisi, tanikiu karana, kara maorona, bona haida ta lalodia badamu karana baita hahedinarai. Una ese danu e durudamu ta lalodia badamu taudia na basita hahisidia bona ta karamu karadia daidiai basita hemarai bona basita lalohisihisi.

Hanaihanai siboda eda hemami heḡereḡerena ai abi hidi baita kara be lalohadai maorona, a? Garik na e gwaumu, ia merona neganai  ia na “ena ura karadia e karava.” To gabeai e laloparara ia sibona ena ura heḡereḡerena ai e karava abi hididia ese dika e havaraiava. Ia ese e badinaiava mauri dalana dainai ia na se moaleva, badina “kara mirodia e karava, drag e aniva, e kekerova bona e daḡedaḡeva.”

Nega momo dia eda hemami mo to ma haida edia lalohadai danu baita haero gabeai abi hidi baita kara. Badina edia ekspiriens bona aonega amo heduru baita abi diba. Eda famili, turada bona community taudia edia lalohadai baita abia daemu neganai idia ese be matauraidamu.

To hanaihanai taunimanima edia lalohadai baita abi dae be maoro, eiava? Priscila na e gwaumu, ia kekeninai, ia na turana e tohotohodiava bona sihari kava karadia e karava. E laloparara ma haida edia lalohadai e badinava dainai ia na se moaleva. Ia na e gwa: “Lau na na urava haida baina hamoaledia dainai edia lalohadai na abi daeva. To dokonai asi na moale badina na karava karadia na kavakava bona kekerere.”

Maoro bona kerere abi hididia ta karamu neganai iseda hemami bona haida edia hemami baita lalo na mai anina bada. To una ese hanaihanai namo na basine havaraiamu. Nega haida asita lalo namonamomu dainai, ita bona ma haida ediai baine vara dika na asita itaiamu. (Hereva Lada-isidia 14:12) Bona basita gwa ita eiava ma haida ese e lalomu namo ḡaudia na hanaihanai nanamo bona basie idaumu. Badina guna taunimanima ese e gwauraiva kara kereredia na hari e gwauraidiamu mamaoro, bona guna e gwauraidiava kara maorodia na hari e gwauraidiamu kekerere.

Edeseni ai heduru maorona baita abia bema ta uramu maoro bona kerere abi hidina baita karaia? Gabeai basita lalohisihisi totona heduru maorodia be edeseniai baita abi?

Ita na ta moalemu, badina hahekau dalana namona na mia bona taunimanima iboudiai e durudiamu. Atikol gabena ese ita iduruda ḡauna namona ta be hahedinaraiamu, unu amo maoro bona kerere edia idau baita lalopararalaia.