LALOMETAU na vaitani ḡau metauna ta kudouda ai. (Her. 12:25) Emu mauri ai lalometau dainai do lalohekwarahi, a? Nega ta o lalohekwarahi dainai lalomu na e hisihisi bada herea, a? Bema oibe, oi na dia sibomu. Ita momo na gorere taudia ta naridia, eda lalokau tauna ta e mase, edai dikadika ta e vara, eiava ma ḡau ta dainai goada e ore, ta lalohekwarahi bada bona eda hemami na e dika. To dahaka ese baine duruda diba lalometau baita hakeaukalaia namonamo diba? a

King David ena haheitalai baita haeroa karana ese baine duruda diba, lalometau baita haheaukalaia daladia baita dibamu. Ena mauri lalonai hekwakwanai momo e davari, bona nega haida kahirakahira e mase. (1 Sam. 17:34, 35; 18:10, 11) David be edena dala ai lalometau karana e haheaukalaia namonamo? Edena dala ai ita ese ena haheitalai baita tohotohoa diba?

David na nega tamona hahetoho momo e davari. Heḡereḡere, mani ina nega a laloa, ala-ala tauna King Saulo ena amo e heau mauri neganai, hekwakwanai ta e vara. David bona ena tatau na tuari totona palani e hakara bena e lou neganai, e hoa badina inaidia ese edia kohu e henao, edia ruma e gabu, bona edia ruma bese na e abidia mauri. David be dahaka e kara? “Bena David mai bamona ida e tai lolololo, ela bona edia goada vada e ore, asi goadadia ma bae tai.” David ena lalometau ihabadana totona, ia ese e abidadama henidiava tataudia ese “nadi amo ihodona e herevalaia.” (1 Sam. 30:1-6) Una neganai David na hekwakwanai toi nega tamona e davari: Ena ruma bese na dika bada lalonai, e gari badina ena tatau na e urava ia bae alaia, bona King Saulo ese dounu e hahavaiava. Mani David ena lalometau a laloa!

Bena ia be dahaka e kara? Ia na kara haraḡa “Iehova ena Dirava enai goada e abia.” Edena dala ai unu e kara toma? David ese e karaia ḡauna na, Iehova ena heduru totona hanaihanai e ḡuriḡuri bona Dirava ese guna e durua daladia e lalodia lou. (1 Sam. 17:37; Sal. 18:2, 6) David na mai dibana Iehova ena lalohadai baine tahua na namo, una dainai Iehova e noia ia be dahaka baine kara. Iehova ena lalohadai e diba murinai, maoromaoro e badinaia. Una dainai, Iehova ese ia bona ena tatau e hanamodia bona edia ruma bese bona edia kohu na e abidia lou. (1 Sam. 30:7-9, 18, 19) David ese e kara ḡaudia toi ome itadia? Heduru totona Iehova e ḡuriḡuri henia, Iehova ese guna e durua karadia e lalodia lou, bona Iehova ena lalohadai heḡereḡerena e kara. Edena dala ai David baita tohotohoa diba? Mani daladia toi aita herevalai.

1. Baita ḡuriḡuri. Bema ta lalometaumu, heduru bona aonega totona Iehova baita ḡuriḡuri henia diba. Ta lalometaulaimu ḡaudia bona kudouda ai e miamu ḡaudia na ḡuriḡuri amo ia baita hamaorolaia diba. Eiava hekwakwanai ta ta abiamu neganai, maoromaoro ḡuriḡuri kwadoḡina o laloda amo baita ḡuriḡuri diba. Hekwakwanai e varamu negadia iboudiai lalodiai Iehova enai heduru baita noiamu neganai, ita na David ena hereva heḡereḡerena ta gwaumu: “Iehova na egu nadi-gini, egu maḡu, egu hahemauri tauna; egu Dirava, egu nadi-gini, na abidadama heniamu tauna.” (Sal. 18:2) Ḡuriḡuri ese baine duruda diba, a? Painia taihuna ta ladana Kahlia na e  gwa: “Na ḡuriḡurimu murinai, na lalomainomu. Ḡuriḡuri karana ese e durugumu egu lalohadai na Iehova ena lalohadai ida na haheḡereḡereamu, bona ia iabidadama henina karana e hagoadaiamu.” Momokani, ḡuriḡuri na Iehova ena harihari ḡauna bona ia na mai siahuna, una ese be durudamu lalometau baita haheaukalaia.

2. Baita lalo lou. Emu mauri o laloamu neganai, Iehova ena heduru amo hekwakwanai o hanaidia negadia o lalomu, a? Iehova ese ena guna ena hesiai taudia e durudia bona hari ina negai ita e durudamu daladia ta lalo loumu neganai, laloda e hagoadamu bona eda abidadama ienai e hagoadaiamu. (Sal. 18:17-19) Elda ta ladana Joshua na e gwa: “Dekegu ai na Iehova ese e haerelai ḡuriḡuridia listina ta. Una ese e durugu, Iehova enai na noia ḡauna korikorina e henigu negana baina laloatao.” Oibe, guna Iehova ese ita totoda e kara ḡaudia baita lalohadailaidia neganai, goada baita abimu lalometau baita haheaukalaimu.

3. Kara amo baita hahedinaraia. Ḡau ta do asita karaia neganai, Dirava ena Hereva amo heduru namodia baita tahu. (Sal. 19:7, 11) Momo na e itaia bema siri ta anina e hetahulaiamu, edia mauri ai una siri bae badinaia dalana na e lalopararalaia namonamomu. Elda ta ladana Jarrod ese una kara e herevalaia neganai, e gwa: “Hetahu karana ese e durugumu siri ta na dala idauidau ai baina lalopararalaia, unu amo Iehova ena hereva lauegu ai baina diba namonamo. Una ese e durugumu na duahiamu ḡauna baina abia dae momokani bona ena hahekau herevana heḡereḡerena baina kara.” Bema Baibul amo Iehova ena hahekau dalana baita tahua bona una hahekau hereva heḡereḡerena baita kara, baita heḡereḡeremu lalometau karana baita haheaukalaiamu.

David na e laloparara lalometau baine haheaukalaia totona, Iehova ena heduru baine abia na namo. Iehova ena heduru ienai e laloa bada dainai, ini e gwa toma: “Egu Dirava bagunai maḡu ta baina rohoa hanai diba. Ia na goada e hariolaigu Diravana.” (Sal. 18:29, 32) Reana baita mamiamu eda hekwakwanai na basita hahanaia diba maḡuna ta heḡereḡerena. To Iehova ena heduru amo, maḡu heḡereḡerena hekwakwanaidia baita haheaukalai diba! Oibe, heduru totona Iehova baita ḡuriḡuri henia, ita daidai e kara ḡaudia iboudiai baita lalodia lou, bona ena hahekau daladia baita badina neganai, ta diba momokanimu Ia ese goada bona aonega baine henida diba eda lalometau ḡaudia baita haheaukalai!