1-2. (a) Eunike be daika, bona natuna e hadibaiava neganai ededia hekwakwanai haida e davari? (b) Rau ginigunana laulauna ba herevalaia.

 ENA BE Baibul ese Timoteo e bapatiso neganai e vara ḡaudia na se gwaurai, to sinana Eunike ese una dina ai e abia moalena na laloda matana amo baita itaia diba. (Her. 23:25) Mani a laloa Timoteo na ranu lalonai e gini e itaia neganai, Eunike kudouna na moale ese e hahonua. Timoteo tubuna hahinena Loi na badinai e gini neganai, e moale. Timoteo na ranu lalonai e diho neganai Eunike na uduna e hahaḡaia bona natuna ranu amo ena dae mo e nariava. Timoteo na ranu amo mai moalena ida e dae neganai, Eunike na e moale dikadika dainai e tai. Eunike na natuna ese Iehova bona Natuna Iesu Keriso, baine lalokau henidia totona e hadibaiava lalonai e davari hekwakwanaidia iboudiai na e hahanaidia. Ededia hekwakwanai be Eunike ese e hahanaidia unu amo natuna na Iehova bona Iesu ilalokau henidia tauna ai ela?

² Timoteo e tubuva neganai edia ruma ai tomadiho na rua. Ia tamana be Grik tauna, to ia sinana bona tubuna hahinena be Iuda taudia. (Apos. 16:1) Reana Timoteo laḡanina na 13 ela 19 padanai neganai, tubuna bona sinana ese Kristen tomadihona e badinaia matama. To dounu una ruma bese lalonai tomadiho na rua. Timoteo be edena tomadiho be badinaiamu? Reana una  nega ai ia na da bada dainai sibona ena abi hidi baine karaia diba. Ia be tamana, Iehova se abidadama heniamu tauna be badinaiamu, a? Ia be maraḡinai e hadibaia Iuda tomadihona be badinaiamu, a? Eiava ia na Iesu Keriso ena hesiai tauna ta ai be laomu?

3. Hereva Lada-isidia 1:8, 9 ena hereva heḡereḡerena, Iehova ese, sina na natu e durudiamu ia bae tura henia karana, be ede e laloa tomamu?

³ Hari ina negai danu, Kristen sina ese edia ruma bese na e lalokau henidiamu. Bona e ura dikadikamu natudia bae durudia Iehova bae hetura henia. Bona eda Dirava ese edia hekwarahi na e laloa badamu. (Hereva Lada-isidia 1:8, 9 ba duahi.) Iehova ese sina momo e durudia dainai, idia ese natudia na e durudia hereva momokani e abia dae.

4. Hari ina nega ai sina be ededia hekwakwanai e davarimu?

⁴ Vaevae sina ena kara, be laloamu natuna be Timoteo heḡereḡerena, Iehova be hesiai heniamu eiava lasi. Badina, tama sina na mai dibadia Satana ena tanobada ai natu na hahetoho momo e davarimu. (1 Pet. 5:8) Danu, sina momo na sibodia natudia e naridiamu badina, tama na lasi eiava ia ese Iehova na se tomadiho heniamu. Heḡereḡere, taihu ta ladana Christine b na e gwa: “Lau adavagu na tau namona bona tama namona, to ia na se urava natugu na Iehova ena Witnes ai baela. Laḡani momo lalodiai na taiva, badina na lalova natugu ese Iehova be tomadiho heniamu eiava lasi.”

5. Ina atikol ai dahaka baita herevalaimu?

⁵ Bema oi na Kristen sina ta, Eunike heḡereḡerena, ba kwalimu diba. Ina atikol ai, emu hereva bona kara amo natumu o hadibaiamu lalonai Eunike ena haheitalai ba badina diba daladia baita herevalaimu. Bona Iehova ese be durumumu daladia danu baita herevalaimu.

6. Timoteo Iharuana 3:14, 15 ena hereva heḡereḡerena, Timoteo be edena dala ai Kristen tauna ai ela?

⁶ Timoteo do maraḡinai, sinana ese “revareva helaḡadia” na Iuda taudia ese e lalopararalaiva dalana ai e hadibalaia. Momokani, sinana ena diba na do dia bada badina Iesu Keriso na do se dibaia. To dounu, Timoteo ese Revareva Helaḡadia amo e abi dibana na heḡereḡere Kristen tomadihona baine abia dae totona. Ia be unu be kara tomamu, a? Ia na da tauhau dainai, mai ena maoro Kristen mauri dalana baine abia hidi diba. Timoteo ese Iesu sivaraina korikorina e ‘abia dae’ badina ta na sinana ena hekwarahi dainai. (2 Timoteo 3:14, 15 ba duahi.) Eunike na e moale dikadika badina natuna enai Iehova e hadibalaiava neganai e davari hekwakwanaidia na e hahanaidia! Eunike na momokani ladana heḡereḡerena e mauri, badina ia ladana anina na ina hereva “hadarerea” amo e abia.

7. Edena dala ai Eunike na natuna e bapatiso murinai e durua?

⁷ Ena be Timoteo na da e bapatiso, to Eunike na dounu ia dainai e lalohekwarahi. Natuna ena mauri be ede be ḡaukaralaia tomamu? Hebamo dikadia be bamodiamu, a? Ia be Atena ai be haskulimu bona kaivakuku e tomadiho henimu taudia edia hahediba koikoi be abi daemu, a? Taḡa be tahumu, bena ena nega, goada, bona tauhau negana be haorea kavamu, a? Eunike ese Timoteo ena abi hidi na basine karamu, to baine durua diba. Edena dalai? Dounu baine ḡaukara goada natuna enai Iehova ilalokau henina karana bona Natuna ilalo badana karana baine havaraia totona. Unu hekwakwanai na dia tomadiho rua e badinamu ruma besedia ediai mo e varamu. Ena be tama bona sina na hereva momokani lalonai, to dounu e hekwarahimu natudia kudoudia bae hamarere  unu amo Iehova ena abidadama hesiai taudia ai baela. Tama sina be Eunike ena haheitalai amo dahaka e dibamu?

8. Edena dalai sina ese adavana Kristen tauna baine durua diba natudia na lauma dalanai bae durudia?

⁸ Natumui ida Baibul ba stadilaia. Taihu e, bema adavamu na hereva momokani ai, Iehova na e uramu ba durudia natumui na lauma dalana ai ba hagoadadia totona. Dala ta na, hanaihanai Ruma Bese Tomadiho negadiai adavamu ba durua. Ruma bese tomadiho ena namo ba herevalaia, una tomadiho negana bae moalelaia daladia ba lalodia. Reana adavamu ba durua raruosi ese Baibul stadi ba karaia dalana ta eiava projek ta ba palanilaia. Bona bema natumui haida na da babada bona e uramu Mauri Ba Moalelaia Hanaihanai! bukana amo bae stadi, namona na adavamu ba durua una buka amo natumui ba stadi henidia.

9. Adavana dia hereva momokani ai hahinena be edeseniai heduru baine abi diba?

⁹ Sina haida na natudia ida Baibul e stadilaiamu, badina idia na sibodia e nohomu eiava adavadia na dia hereva momokani ai. Bema emu ruma bese na unu bamona, basio lalohekwarahi. Iehova ese be durumumu. Ia ese ena orea amo e halasimu hahediba tuludia ba ḡaukaralai diba natumu ba hadibadia. Reana de manada tama sina ma haida ba hereva henidia, unu amo emu ruma bese tomadiho negana ai, unu tulu ba ḡaukaralai daladia matamatadia ba diba, ani? c (Her. 11:14) Iehova ese danu baine durumu diba natumu ida ba herevahereva totona. Ba noia baine durumu unu amo natumu lalona ai bona kudouna ai e miamu ḡaudia ba diba. (Her. 20:5) Henanadai haraḡana ta, ‘Skuli ai o davariamu hekwakwanaina badana be dahaka?’ bo henimu neganai, dala bo kehoamu natumu ida bo herevaherevamu.

10. Ededia dala ma haida ai natumu ba durudia diba Iehova bae dibaia totona?

¹⁰ Dala ba kara natumu ediai Iehova ba herevalaia. Iehova bona ia ese oi daimu ai e kara ḡau namodia na natumu ba hadibalaidia. (Deu. 6:6, 7; Isa. 63:7) Una na mai anina bada bema ruma ai natumu ida na so stadi momomu. Christine, tame herevalaia guna taihuna, na e gwa: “Lauma ḡaudia baia herevalai negadia na dia momo dainai, dala a davariva negadiai iboudiai Iehova a herevalaiava. A harakarakava eiava vanaḡi amo a kalo daeva negadiai Iehova ese e kara hoa ḡaudia bona lauma ḡaudia momo a herevalaiva. Natugu e bada neganai, na hagoadadia sibodia Baibul bae stadilaia.” Danu, Iehova ena orea bona tadikaka taihu edia namo ba herevalai. Elda na basio gwau henidia. Elda bo herevalaidiamu dalana ese natumu be durudiamu hekwakwanai negadiai idia edia amo heduru bae tahu diba.

11. Iakobo 3:18 ena hereva heḡereḡerena, dahaka dainai ruma ai maino baine vara na namo?

¹¹ Ruma ai maino ba havaraia. Hanaihanai adavamu bona natumu ediai ba hahedinaraia idia na o lalokau henidiamu. Adavamu na mai emu gado namo bona hemataurai ida ba herevalaia, bona natumu danu ba hadibadia unu bae kara toma. Unu bo kara tomamu neganai, maino na be varamu dainai ḡau ta ese natumu na Iehova idibana karanai basine kouamu. (Iakobo 3:18 ba duahia.) Mani Jozsef, Romania ai e spesel painiamu ena haheitalai a laloa. Ia e tubu daeva neganai, tamana ese ia, sinana, bona varabouna iboudiai e koudiava Iehova na basie hesiai henia. Jozsef na e gwa: “Sinagu na e hekwarahiva ruma ai maino baine mia. Tamagu ena badu karana e habadaiava neganai, sinagu danu ena kara namodia na e  habadava. Bema e itaiava ai ese tamamai na asia matauraiava eiava asia kamonai heniava, ia ese Efeso 6:1-3 na aiemai ai e herevalaiava. Bena Tamagu ena kara namodia na e herevalaiva bona e durumaiva ia baia laloa bada badina baia lalopararalaia. Unu amo badu eiava lalohisihisi na e oreva.”

12. Timoteo Iharuana 1:5 ena hereva heḡereḡerena, Eunike ena haheitalai namona ese Timoteo be ede e durua toma?

¹² Timoteo Iharuana 1:5 ba duahia. Eunike na haheitalai namona Timoteo enai. Ia ese Timoteo na e hadibaia bema e uramu abidadama korikorina baine abia namona na ena kara amo baine hahedinaraia. (Iak. 2:26) Momokani, Timoteo ese e itaia sinana ena kara iboudiai na ena lalokau goadana Iehova enai ese e biagua. Bona Timoteo ese danu e itaia Iehova e hesiai heniava neganai sinana na e moaleva. Eunike ena haheitalai ese Timoteo be ede e durua toma? Aposetolo Paulo na e gwa, Timoteo ena abidadama na sinana ena abidadama goadana heḡereḡerena. Una na se vara kava. Timoteo ese sinana ena haheitalai e itaia bona lalona e hadaia baine tohotohoa. Una heḡereḡerena hari ina negai danu, sina momo na dia edia hereva to ‘edia kara daidiai’ edia ruma bese taudia haida e durudia hereva momokanina e abia dae. (1 Pet. 3:1, 2) Oi danu unu ba kara toma diba. Edena dalai?

13. Dahaka dainai sina ese ena hetura karana Iehova ida baine laloa bada na ḡau badana?

¹³ Emu hetura karana Iehova ida na ba laloa bada. (Deu. 6:5, 6) Sina momo heḡereḡeredia, oi ese emu ura ḡaudia haida na o dadaraimu. Emu nega, moni, mahuta, bona ḡau ma haida na o dadarai natumu tauanina dalanai ba reḡudia totona. Dia namo tauanina dalanai natumu ireḡudia karana dainai emu hetura karana Iehova ida na baine dika. Namona na hanaihanai nega bavato Iehova ba ḡuriḡuri henia, sibomu emu Baibul stadi ba karaia, bona kongrigeisin heboudia baola. Unu bo kara tomamu neganai, lauma dalana ai bo goadamu bona emu ruma bese bona ma haida ediai haheitalai namona ai bo laomu.

14-15. Leanne, Maria, bona João edia haheitalai amo dahaka o dibamu?

¹⁴ Mani sina edia haheitalai dainai, Iehova e lalokau henia bona e abidadama henia matamata taudia haida edia haheitalai aita lalodia. Christine natuna Leanne na e gwa: “Tamamai vairanai na asi a stadiva. To Sinagu na hanaihanai e hahebouva. Ena be emai diba Baibul ai na dia bada, to ena haheitalai bona ena abidadama ese e durumai Iehova baia abidadama henia totona. Hebou do asi a laova neganai, ai na da diba ina na hereva momokani.”

¹⁵ Maria, e hahebouva dainai nega haida tamana ese edia ruma bese e panisiava, na e gwa: “Sinagu na lau ese na dibaia boga auka taihuna ta. Maraḡigu ai, haida ese bae gwau henigu garina ḡau haida na asina karava. To sinagu ena boga auka karana bona nega iboudiai ena mauri lalonai Iehova na e atoa guna karana na itaia neganai, taunimanima igari henidia karana na na hanaia.” João, tamana ese edia ruma na e taravatudia ruma ai lauma ḡaudia na basie herevalai, na e gwa: “Lau kudougu e hamarerea ḡauna na ena be ḡau iboudiai lalodiai sinagu ese tamagu na e hamoaleava, to ena lalokau Iehova enai baine hadika ḡaudia hari se karava.”

16. Sina ena haheitalai ese haida be ede be durudia tomamu?

¹⁶ Sina e, ba helalotao emu haheitalai ese haida baine durudia. Edena dalai? Mani Eunike ena haheitalai ese aposetolo Paulo e durua dalana aita laloa. Paulo na e diba Timoteo ena abidadama na ‘sinana Eunike lalona ai e mia’  guna. (2 Tim. 1:5) Edena nega ai Paulo ese Eunike ena abidadama e itaia? Una na reana Paulo ena misinari laolaona ginigunana ai, ia ese Lustera ai Loi bona Eunike e hedavari henidia, bena e durudia Kristen taudia ai ela neganai. (Apos. 14:4-18) Mani a laloa, Paulo ese Timoteo e tore henia neganai​—reana laḡani 15 de ore​—Paulo ese Eunike ena abidadama karadia na dounu e lalotao bona e gwa ena haheitalai baita badinaia na namo! Una ese e hahedinaraiamu, Paulo bona Kristen taudia ginigunadia momo ese Eunike ena haheitalai na e laloatao. Bema oi na sibomu eiava adavamu na dia hereva momokani ai dainai sibomu ese natumu o naridiamu, namona na ba helalotao emu abidadama karana ese emu ruma taudia baine durudia bona baine hagoadadia diba.

17. Dahaka ba kara diba bema natumu o hadibaiamu to hereva momokani na basine abia dae haraḡa?

¹⁷ Ena be o hekwarahimu natumu ba hadibaia, to hereva momokani basine abia dae haraḡa, be ede bamona? Ba helalotao natu ihadibana karana na nega daudau lalonai e varamu karana. Laulau ese e hahedinaraiamu heḡereḡerena, uhe ta bo hadoamu neganai, reana bo lalomu be tubumu neganai be be huahuamu eiava lasi. Ena be gabeai baine vara ḡauna na basio biagua dibamu, to una uhe na dounu bo dairiamu baine tubu totona. (Mar. 4:26-29) Una heḡereḡerena, oi na sina dainai, reana nega haida bo lalomu natumu o hadibalaiamu ḡaudia ese kudouna e hamarereamu eiava lasi. Gabeai baine vara ḡauna na basio biagua dibamu. To bema ihadibadia totona ba  kara diba ḡaudia iboudiai bo karamu, lauma dalanai baine tubu diba dalana bo kehoa dibamu.​—Her. 22:6.

18. Edena dalai Iehova ese natumu na baine durudia diba lauma dalanai bae tubu totona?

¹⁸ Baibul negadia amo ema bona hari, Iehova ese matamata taudia momo e durudia ia turana ai ela. (Sal. 22:9, 10) Ia ese natumu danu baine durudia diba lauma dalanai bae tubu totona, bema una na edia ura ḡauna. (1 Kor. 3:6, 7) Ena be natumui ese Iehova na basie hesiai henia mai kudoudia idoidiai ida, to Iehova ese idia na dounu be lalokau henidiamu. (Sal. 11:4) Bema be hahedinaraiamu idia na “e abidia hidi mauri hanaihanai bae abia taudia,” Iehova ese na be durudiamu. (Apos. 13:48; 2 Sis. 16:9) Reana be durumumu nega maorona ai ḡau maorona ba gwauraia​—natumu baine durua ḡauna ba gwauraia. (Her. 15:23) Eiava ia ese kongrigeisin ai tadikaka eiava taihu namona ta be ḡaukaralaiamu natumu baine durua totona. Eiava reana natumu na da e bada, Iehova ese baine durudia diba guna o hadibadia ḡauna ta bae laloatao totona. (Ioa. 14:26) Emu hereva bona kara amo natumu bo hadibaiamu neganai, Iehova na ḡau ta bo heniamu baine hanamoa.

19. Dahaka dainai bavabia dae Iehova ese oi na be lalonamo henimumu?

¹⁹ Iehova ena lalokau oiemu ai na dia natumu ese bae kara abi hididia daidiai e varamu. Ia ese oi e lalokau henimumu badina na oi ese ia o lalokau heniamu dainai. Bema oi na sibomu natumu o naridiamu, Iehova na e gwauhamata oi natumu Tamadia bona Igimadia Tauna ai bainela. (Sal. 68:5) Oi ese natumu na basio biagudia dibamu abi hidi maorona eiava kererena bae karaia totona. To bema hanaihanai Iehova ena heduru ai bo tabekaumu bona natumu ihadibadia karana ai ba kara diba ḡaudia iboudiai bo karamu, Iehova ese oi na be lalonamo henimumu.