Ina laḡani Gima Kohorona ena atikol idauidau o duahidia, a? Mani ini henanadai ba haerelaidia:

Horoa Kristen taudia be ede baita kara henidia toma?

Edia abidadama dainai ta hanamodiamu; to, idia iheaḡilaidia karana baita dadaraia. (Iuda 16) Basita nanadaidia idia be ede e horodia toma.​—w20.01, rau 29.

Dahaka ese e hamomokaniamu Iehova ese oi na e lalomumu?

Baibul ese e hahedinaraiamu oi do so vara neganai, ia ese oi na e dibamu. Bona emu ḡuriḡuri na e kamonaimu. Ia na emu hemami bona lalohadai na mai dibana, bona emu kara ese ia baine hamoalea eiava baine hahisia diba. (1 Sis. 28:9; Her. 27:11) Ia ese oi e vavemu ia dekena baola.​—w20.02, rau 12.

Edena nega ai ba hereva, bona edena nega ai basio hereva haheitalaidia haida ba gwaurai?

Ita na mai moaleda ida Iehova ta herevalaiamu. Bema ta na dala kererena e badinaiamu, baita hereva henia na namo. Bema ta na heduru baine abi negadiai, elda taudia ese e sisiba heniamu. Eda ḡaukara e taravatua tanodia ai eda ḡaukara e haheaumu daladia na basita henanadailai bona basita herevalai. Asita uramu haida basie diba herevadia baita gwaurai.​—w20.03, rau 20-21.

Edena dala ai Ioel karoa 2 ese e herevalaia kwadi na Apokalupo karoa 9 ese e herevalaia kwadi amo idau?

Ioel 2:20-29 na e gwa Dirava ese kwadi baine abidia oho bona e gwauhamata kwadi ese e hadika ḡaudia davadia baine heni lou. Una murinai, Dirava ese ena lauma baine seia dobi. Babulono ese Israel e hadikaia bona gabeai e vara ḡaudia ese e hahedinaraia una gwauhamata herevana na e ḡuḡuru. Apokalupo 9:1-11 ese e hahedinaraiamu, horoa taudia na mai goadadia ida Dirava ese ina tanobada dikana baine hahemaoro henia herevana e harorolaiamu, una dainai ina tanobada taudia na e hisihisimu.​—w20.04, rau 3-6.

Hari Ina Negai Not Kahana Pavapavana be Daika?

Russia bona e duruamu tanodia. Dirava ena taunimanima edia haroro ḡaukarana e kouamu bona e hahedinaraiamu Witnes taudia na e inai henidiamu. Not kahana pavapavana bona saut kahana pavapavana na siahu iabina totona e hetuari hehenimu.​—⁠w20.05, rau 13.

Galatia 5:22, 23 ai e herevalai kara nain mo ‘lauma huahuadia,’ a?

Lasi. Lauma helaḡa ese e durudamu ma kara namodia haida heḡereḡere kara maoromaoro baita hahedinaraia danu. (Efe. 5:8, 9)​—w20.06, rau 17.

Intanet ai o atomu ḡaudia ena dika ta be dahaka?

Intanet ai o atomu ḡaudia ese reana be hahedinaraiamu oi na o heaḡimu, bona so manaumu.​—w20.07, rau 6-7.

Kristen taudia be haoda mai dibadia taudia amo dahaka e dibamu?

Gwarume momo e davarimu negana bona gabuna ai e haodamu. Tulu maorona iḡaukaralaina dalana mai dibadia. Nega namodia bona nega dikadia ai be ḡaukara goadagoadamu. Ta haroromu negadia ai unu baita kara toma diba.​—w20.09, rau 5.

Ededia dala haida ai Baibul stiuden baita durudia edia lalokau Iehova enai bae habadaia?

Namona na baita hagoadadia dina ta ta Baibul bae duahia bona e duahimu ḡaudia bae lalodia dobu. Bona ḡuriḡuri dalana baita hadibadia.​—w20.11, rau 4.

“Keriso bagunai iboudiai do bae mauri” taudia be daidia e herevalaidiamu?​—1 Kor. 15:22.

Aposetolo Paulo na se gwa taunimanima iboudiai bae toreisi lou bena guba baela. To ia na horoa Kristen taudia ‘Keriso Iesu lalonai vada e hahelaḡadia, helaḡa taudia vada e gwauraidia’ taudia e herevalaidia. (1 Kor. 1:2; 15:18)​—w20.12, pp. 5-6.

‘Mata-hekunumai tamona ai, kibi gabena bae hiriria negana ai’ horoa taudia be dahaka be karamu?​—1 Kor. 15:51-53.

Idia ese Iesu be badinaiamu bona auri itotohina amo tanobada besedia be reḡudiamu. (Apok. 2:26, 27)​—w20.12, pp. 12-13.