Iehova ese Israel taudia na e haḡanidia bae helaḡa. Unu bae kara toma totona, e hamaorodia: “Sivarai koikoi basio piupiulai, emu orea taudia bogaraḡidiai. Dekemu tauna ena mauri basio abia oho, hahebade koikoi dainai. Lau binai Iehova.”​—Lev. 19:2, 16.

Ina hereva “abia oho” ese Heberu herevana anina na e hahedinaraia ḡoevaḡoeva, to anina be dahaka? Iuda edia buka ta ai Levitiko bukana e herevalaia neganai, e gwa: “Una siri kahana dokona ilalopararalaina na auka, badina [una siri ai] e ḡaukaralaia hereva kahana (idiom) anina Heberu gado ai na asie hahedinaraia namonamo, una hereva anina korikori na ‘basio moia tao,’ to unuseniai ‘badinai basio gini’ e ḡaukaralaia.”

Diba bada taudia haida na e laloamu una siri ai e ḡaukaralaia hereva kahana (idiom) baita lalopararalaia totona, siri 15 danu baita haeroa, e gwa: “Basio hahemaoro koikoi: ogoḡami tauna basio bogaia hisi, bona taḡa tauna basio matauraia; kara maoromaoro ai dekemu taudia ba hahemaoro henidia.” (Lev. 19:15) Bema unu bamona, siri 16 ai e gwa ta “basio abia oho” anina na, Dirava ena taunimanima ese ta na kota ai, bisnes ai, eiava ruma bese ai basie kara henia koikoi bona sibodia edia namo dainai hereva koikoidia basie gwaurai. Momokani unu kara na basita karamu, to siri 16 baita lalopararalaia namonamo dalana ta na mia.

Mani siri 16 matamana herevadia aita lalo. Dirava ese ena taunimanima na e haḡanidia ta ladana ihadikana sivaraidia basie haripiulai. Baita helalotao una kara na dia ta ladana be hadikaiamu mo, to hekwakwanai momo herea baine havara diba danu. (Her. 10:19; Koh. 10:12-14; 1 Tim. 5:11-15; Iak. 3:6) Ta ladana ihadikana karana na nega momo hereva koikoidia igwauraidia karana amo e varamu. Bona una kara e karaiamu tauna ese reana hereva koikoidia be gwauraimu ma ta na kerere ai baine vareai totona, ena be una kara dainai e hahebadelaia tauna ena mauri na baine haboioa diba. Ba helalotao hahebade koikoi taudia edia hereva dainai, Naboto na asi anina ai nadi amo e hodoa mase. (1 Han. 21:8-13) Una dainai, lada e hadikamu tauna ese Levitiko 19:16 kahana iharuana heḡereḡerena, tadikakana ena mauri baine abia oho diba.

Danu, ta na mai ena ura ida ma ta ladana e hadikaiamu karana ese, iena inai karana ena bada e hahedinaraiamu. Ioane Ginigunana 3:15 na ini e gwau tomamu: “Tadikakana e badu heniamu tauna na ala-ala tauna; dibamui mauri hanaihanai na ala-ala tauna lalonai se miamu.” Ina baita laloa na mai anina bada, Dirava ese siri 16 ai e herevalai herevadia e gwaurai murinai, ini e gwau toma: “Tadikakamu basio inai henia lalomu ai.”​—Lev. 19:17.

Una dainai, Levitiko 19:16 ai e gwauraia haheḡanina na ita Kristen tauda iboudai ese baita badinaia na ḡau badana. Namona na lalohadai dikadia bona ta ladana ihadikana karana baita dadaraidia. Ta dibamu ḡauna na ina, ta baita “abia oho” diba, bema ladana baita hadikaia badina asita ura heniamu o ena ḡau ta dainai ta badu heniamu, una ese e hahedinaraiamu ita na ta mamamu. Namona na Kristen taudia ese una kara bae dadaraia na ḡau badana.​—Mat. 12:36, 37.