1. David ese Iehova be ede e laloa toma, bona dahaka dainai unu e kara toma?

KING DAVID eto: “Iehova na bada, ia iheatolaina danu baine bada.” (Sal. 145:3) Ia na Iehova e lalokau heniava dainai, “hebou bogaraḡinai” Dirava e imodaiava. (Sal. 22:22; 40:5) Momokani, Iehova o lalokau heniamu dainai David ena hereva na o abia daemu, ia na eto: “Iehova e, senemai Israel ena Dirava, oi bae hanamomu hanaihanai.”​—1 Sis. 29:10-13.

2. (a) Edena dala ai Iehova baita imodaia diba? (b) Dahaka dainai haida ediai haere ihenina na auka, bona dahaka baita herevalaimu?

² Hari ina negai, Iehova baita imodaia dalana ta na, Kristen heboudia ai baita haere. To, tadikaka bona taihu momo ediai una na auka. Idia na e uramu hebou ai bae haere, to e garimu. Una gari mamina be ede bae hanaia toma? Bona dahaka baita kara haere namodia baita heni totona? Unu henanadai do asita haerelai lalonai, hebou ai baita haere badidia hani mani aita herevalai guna.

3-5. (a) Heberu 13:15 ena hereva heḡereḡerena, dahaka dainai hebou ai ta haeremu? (b) Ita iboudai eda haere bae heḡereḡere eiava? Ba herevalaia.

³ Iehova ese e henida hahenamona na ia baita imodaia. (Sal. 119:108) Hebou ai baita haere karana na “eda boubou ḡauna” ta, bona ta ese ita daidai una boubou ḡauna basine heni diba. (Heberu 13:15 ba duahia.) Iehova be ita ta ta e doridamu ia baita henia boubou ḡaudia o haeredia na bae heḡereḡere, a? Lasi.

⁴ Iehova na mai dibana eda diba bona noho daladia na idauidau, bona ia baita henia diba boubou ḡaudia na e lalodia badamu. Mani Israel taudia edia amo e abi dae boubou ḡaudia a lalodia. Israel taudia haida na mamoe ta eiava  nani ta e heniva. To ogoḡami Israel tauna ta ese “kerea rua eiava pune natuna rua” e heniva. Bona bema Israel tauna ta na dia heḡereḡere manu rua baine heni, “ia ese flaoa namo-hereana efa ta baine karoaia, karoa gwauta, bena karoa ta” baine heni Iehova ena. (Lev. 5:7, 11) Flaoa davana na dia bada, to Iehova ese una boubou ḡauna na dounu e laloa badava, ḡau badana na una na “flaoa namo-hereana.”

⁵ Hebogahisi Diravana na se idaumu. Haere ta henimu neganai, ia ese ita na se doridamu hereva namo hereadia baita gwaurai Apolo heḡereḡerena eiava taunimanima lalodia baita veri herevadia baita gwaurai Paulo heḡereḡerena. (Aposetolo 18:24; 26:28) Iehova na e uramu mai kudouda idoinai ida haere baita heni​—eda laloparara heḡereḡerenai. Moni maraḡi-maraḡidia rua e heni vabuna ba laloa. Mai kudouna idoinai ida e heni ḡauna na Iehova ese e laloa bada.​—Luka 21:1-4.

6. (a) Heberu 10:24, 25 ena hereva heḡereḡerena, haida edia haere ta kamonaimu neganai eda hemami be ede bamona? (b) Haida edia haere namodia dainai edena dala ai baita hanamodia?

⁶ Eda haere amo baita hahealo heheni. (Heberu 10:24, 25 ba duahi.) Eda hebou ai haere idauidau ta kamonaimu neganai ta moalemu. Natu ta ena haere kwadoḡina danu ta moalelaiamu. Ta na ena haere ai e dibaia hereva momokanina na mai moalena ida e herevalaiamu neganai, una ese ita na e hagoadadamu. Bona ena be ta na hemarai tauna eiava harihari eda gado e dibaiamu, to ‘asi garina’ ida e haeremu neganai ta moalemu. (1 Tes. 2:2) Edia haere namodia dainai, edena dala ai baita hanamodia? Hebou murinai baita tenkiu henidia. Dala ma ta be, ita siboda danu haere ta baita heni. Unu amo dia ita mo hahegoada herevadia baita abi to haida danu baita hagoadadia.​—Roma 1:11, 12.

7. Haere ta henimu neganai edena dala ai ita siboda danu heduru ta abimu?

⁷ Ta haeremu neganai ita siboda danu heduru ta abimu. (Isa. 48:17) Edena dala ai? Ḡau ginigunana na, bema ta uramu haere ta baita heni, baita heḡaeḡae namonamo. Baita heḡaeḡae namonamomu neganai, Dirava ena Hereva baita lalopararalaia namonamomu. Unu amo ta  dibamu ḡaudia na baita badinamu. Ḡau iharuana na, hebou ai ta haeremu dainai hebou na baita moalelaiamu. Ḡau ihatoina na, ta hekwarahi haere ta heni dainai, eda haere na dounu baita lalotaomu.

8-9. (a) Malaki 3:16 ese e hahedinaraia heḡereḡerena, Iehova ese eda haere be ede e lalodia tomamu? (b) Dahaka dainai haida na dounu e garimu?

⁸ Eda abidadama ta herevalaiamu neganai Iehova ta hamoaleamu. Ta diba momokanimu Iehova na hebou ai eda haere e hakala heniamu bona eda hekwarahi na e laloa badamu. (Malaki 3:16 ba duahia.) Ia ihamoalena totona ta hekwarahimu neganai e hanamodamu, una ese e hahedinaraiamu ita na e laloda badamu.​—Mal. 3:10.

⁹ Momokani, hebou ai baita haere badidia namodia na momo. To, haida na dounu e garimu imadia bae abi isi. Bema emu hemami na unuheto, basio lalomanoka. Namona na Baibul ena hahekau herevadia haida, haheitalai haida, bona baita kara diba ḡaudia haida baita herevalai, unu ese be durudamu hebou ai haere haida baita heni.

10. (a) Dahaka dainai momo na e garimu haere bae heni? (b) Gari unuhetomana ese dahaka e hahedinaraiamu?

¹⁰ Haere ihenina totona imamu o uramu bavabia isi neganai o garimu, a? Bema oibe, dia oi mo unu o hemami tomamu. Hereva momokanina na, ita iboudai haere ta henimu neganai ta garimu. Una gari mamina ba hahanaia totona, namona na o garimu badina ba laloa. Oi be o garimu badina hari be ba gwauraia ḡauna bo laloaboiomu eiava hereva kererena ta bo gwauraiamu, a? O lalohekwarahimu badina emu haere na dia haida edia haere namodia heḡereḡeredia, a? Gari unuhetomana ese e hahedinaraiamu oi na o manaumu bona o laloamu haida ese oi na e hereamu. Iehova ese manau karana na e ura heniamu. (Sal. 138:6; Fili. 2:3) To  danu, Iehova na e uramu ia ba imodaia bona hebou ai tadikaka bona taihu ba hagoadadia. (1 Tes. 5:11) Ia ese e lalokau henimumu dainai lalogoada be henimumu.

11. Ededia hahekau herevadia Baibul ai ese bae duruda diba?

¹¹ Mani Baibul ena hahekau herevadia haida aita lalo. Baibul na e gwaumu ita iboudai na eda hereva eiava hereva ta gwauraimu daladia ai ta kereremu. (Iak. 3:2) Iehova na dibana ita na dia ḡoevadae, bona eda tadikaka taihu danu mai dibadia ita na dia ḡoevadae. (Sal. 103:12-14) Idia na lauma dalanai eda ruma bese taudia bona e lalokau henidamu. (Mar. 10:29, 30; Ioa. 13:35) E lalopararamu nega haida eda haere ai baita gwaurai ḡaudia na asita gwauraimu.

12-13. Nehemia bona Iona edia sivarai amo dahaka ta dibamu?

¹² Baibul sivaraidia haida mani a lalo, unu ese bae durumu diba emu gari ba hahanaia totona. Nehemia ba laloa. Ia na king ta ena ruma ai e ḡaukarava. Nehemia toana na e lalohisihisiva badina e kamonai Ierusalem maḡudia bona ikoukoudia na didika. (Neh. 1:1-4) King ese e nanadaia se moalemu badina baine gwauraia neganai, ena gari mamina mani a laloa. Nehemia na maoromaoro e ḡuriḡuri bena king e haere henia. Una dainai, king ese Dirava ena taunimanima e durudia. (Neh. 2:1-8) Danu Iona ba laloa. Iehova ese e noia Nineve taudia baine haroro henidia, to Iona na e gari dainai hanua idauna ta ela. (Iona 1:1-3) To Iehova ese e durua dainai, Iona na ena ḡaukara e haḡuḡurua. Bona e gwaurai herevadia ese Nineve taudia na e durudia. (Iona 3:5-10) Nehemia sivaraina ese e hadibadamu, do asita haere neganai baita ḡuriḡuri na mai anina bada. Bona Iona sivaraina ese e hadibadamu Iehova ese baine duruda diba ia baita hesiai henia totona herevana gari ese baine butuda tao. Momokani, bema Nineve taudia edia sivarai baita haeroamu, kongrigeisin ai haere ihenina karana na dia auka.

¹³ Dahaka baita kara hebou ai haere namodia baita heni totona? Mani dala haida aita herevalai.

14. Dahaka dainai eda hebou totodia baita heḡaeḡae namonamo, bona edena negai baita heḡaeḡae diba?

¹⁴ Hebou ta ta totodia ba heḡaeḡae. Bo palani gunamu bona bo heḡaeḡae namonamomu neganai, basio garimu haere ba heni. (Her. 21:5) Momokani, ita iboudai eda sediual na idauidau. Eloise​—ia na vabu bona laḡanina na 80 heḡereḡerena​—na wiki matamana kahanai ena Gima Kohorona e heḡaeḡaelaiamu. Ia na e gwaumu: “Bema nega badanai na heḡaeḡaemu, hebou na na moalelaiamu.” Joy, fultaim moni ḡaukara e karamu taihuna, na nega e atomu Saturday ai ena  Gima Kohorona baine stadilaia. E gwaumu: “Na uramu na stadilaimu ḡaudia na baina lalodia tao.” Ike, elda bona e painiamu tadikakana, na e gwaumu: “Wiki ibounai lalonai egu stadi negadia na na hakwadoḡimu, egu ai una na mai ena namo, asina uramu ḡau iboudiai na nega tamona ai baina stadilai.”

15. Edena dala ai ba heḡaeḡae namonamo diba?

¹⁵ Baita heḡaeḡae namonamo totona dahaka baita kara? Stadi do so hamatamaia negadia ta ta ai Iehova ba noia ena lauma helaḡa baine henimu. (Luka 11:13; 1 Ioa. 5:14) Bena bo stadilaiamu Gima Kohorona na nega sisina lalonai ba itaia namonamo, heḡereḡere hereva kwarana, sinado maraḡidia, laulau, bona maua. Bena paragraf ta ta o stadilaimu neganai, e hetore Baibul siridia danu ba duahi. Atikol ese e herevalai ḡaudia ba lalodia dobu, bona o uramu ba haerelaia kahadia ba haerodia namonamo. Bo heḡaeḡae namonamomu neganai haere ihenina ai basio garimu.​—2 Kor. 9:6.

16. Ededia tulu ba ḡaukaralai diba, bona edena dala ai ba ḡaukaralai?

¹⁶ Bema heḡereḡere, Intanet ai e atomu tuludia, emu gado ḡaudia ba ḡaukaralai. Iehova na ena orea amo tulu namodia e henidamu unu amo e durudamu hebou totodia baita heḡaeḡae. JW Library^® app amo stadi pablikeisen na eda mobael ai baita daonloud diba. Bena nega bona gabu idauidau ai baita stadilaia, baita duahia eiava baita kamonaia diba. Haida na ḡaukara gabunai eiava sikuli ai edia laḡa-ani horana eiava edia loaloa negadiai JW Library app amo e stadimu. Watchtower Library bona Watchtower ONLINE LIBRARY^™ ai ta uramu baita stadilaia herevana ai point ma haida baita hetahulai diba.

¹⁷ Bema heḡereḡere, haere rua eiava toi ba heḡaeḡaelai. Dahaka dainai? Badina imamu bo abia isimu neganai reana basie abimu hidimu. Haida danu imadia e abi isimu, bona Gima Kohorona ihakauna tauna ese idia ta be abia hidimu. Hebou na nega korikori ai baine ore totona Gima Kohorona ihakauna tauna ese haere ihenina taudia haida mo be abidia hidimu. Una dainai basio lalohisihisi eiava lalomanoka bema stadi matamanai se abimu hidi. Bema haere rua o toi bo heḡaeḡaelaimu, mai emu dala haere ta ba heni totona. Reana emu haere ta na Baibul siri ta ba duahia. To bema heḡereḡere, sibomu emu hereva amo haere ta ba heni diba. *

18. Dahaka dainai haere kwadoḡidia baita heni?

 ¹⁸ Haere kwadoḡidia ba heni. Nega momo haere namodia na haere kwadoḡidia bona taunimanima bae laloparara diba. Una dainai ba hekwarahi emu haere na bae kwadoḡi. Reana 30 seken lalonai ba heni. (Her. 10:19; 15:23) Reana oi na laḡani momo lalodiai haere momo vada o heni, una na haheitalai namona, to danu emu haere ba hakwadoḡidia na namo. Bema ḡau momo bo herevalaiamu, haida na be laloamu idia na dia heḡereḡere oi o haeremu heḡereḡerena bae haere. Danu, haere kwadoḡidia bo henimu neganai haida danu mai edia nega bae haere totona. Bema oi e abimu hidi gunamu, haere kwadoḡina eiava henanadai haerena mo ba heni. Dia namo paragraf ibounai ba herevalaia. Bema paragraf ena point badana na ta ese e haerelaia, oi ese point ma haida ba herevalai diba.​—Maua ladana “Edena Haere Baina Heni?” ba itaia.

19. Stadi ihakauna tauna ese baine abimu hidi totona, dahaka ba kara diba?

¹⁹ Stadi ihakauna tauna ba hadibaia oi be edena paragraf ai o uramu ba haere. Bema o uramu unu ba kara toma, namona na hebou do se hematama ai stadi ihakauna tauna ba hadibaia. Una paragraf ai o kaumu neganai, imamu bavabia isi badabada unu amo stadi ihakauna tauna ese baine itamu diba.

20. Edena dala ai kongrigeisin hebouna na turamu ida o aniani heboumu heḡereḡerena?

²⁰ Kongrigeisin heboudia na turamu namodia ida o aniani heboumu heḡereḡerena ba laloa. Mani a laloa, kongrigeisin taudia haida na e palani moalemoale ta bae karaia, bona e noimu aniani taina bavabia kau. Oi be dahaka bo karamu? Reana bo lalohekwarahimu dahaka bavabi kau, to mai emu ura ida iboudiai ese bae moalelaia anianina ta bo laohaiamu. Iehova, ita e boirida Tauna, na hebou ai ḡau namodia momo vada e heḡaeḡaelai. (Sal. 23:5; Mat. 24:45) Bona mai eda ura ida harihari ḡauna ta, ta laohaiamu neganai, Ia na e moalemu. Una dainai ba heḡaeḡae namonamo bona ba haere. Unu amo Iehova ena pata ai mo basio anianimu to oi danu kongrigeisin ida ba moalelaia harihari ḡauna ta bo henimu.