1. Dahaka dainai ruma bese momo lalodiai lalokau na lasi?

BAIBEL na e peroveta dina gabediai, taunimanima na “lalokau” basie hahedinaraiamu. (2 Tim. 3:1, 3) Hari ina negai una peroveta herevana na e gugurumu. Heḡereḡere, headava taudia momo na e divos dainai e hebadu hehenimu bona natudia na e hemamimu tamadia sinadia ese idia na se lalokau henidiamu. Ena be ruma bese haida na ruma tamona lalonai e nohomu, to asie hetura namonamomu. Family counselor ta na e gwa: “Sina, tama, bona natu na ta ta amo e daudaumu badina edia nega bada na kompiuta, tablet eiava fon, o vidio gadara ai e haoremu. Ena be idia na ruma tamona lalonai e nohomu, to idia na asie hediba heheni namonamomu.”

2-3. (a) Roma 12:10 heḡereḡerena, daidia baita lalokau henidia na namo? (b) Ina stadi ai dahaka baita herevalaimu?

² Ita na asita uramu tanobada taudia baita tohotohodia bona lalokau basita hahedinaraia. (Roma 12:2) To, namona na eda ruma bese bona kongrigeisin lalonai eda tadikaka taihu baita lalokau henidia. (Roma 12:10 ba duahia.) Namona na eda Kristen tadikaka bona taihu na eda ruma bese taudia ta lalokau henidiamu heḡereḡerena baita lalokau henidia. Unu baita kara tomamu neganai, eda tadikaka bona taihu ida baita lalotamonamu bona mai moale ida Iehova baita hesiai heniamu.​—Mika 2:12.

³ Una lalokau baita hahedinaraia totona, mani Baibul ese e gwaurai haheitalai haida aita herevalai.

4. Isaia 63:9 ese Iehova ena lalokau be ede e herevalaia toma?

⁴ Baibul ese Iehova ena kara namodia momo na e herevalai. Heḡereḡere e gwa, “Dirava na lalokau.” (1 Ioa. 4:8) Una  ta dibamu neganai, ta uramu ia turana ai baitala. Danu Baibul na e gwa, Iehova ese ena hesiai taudia na e “lalokau” henidiamu. (Isaia 63:9 ba duahia.) Oibe, ta dibamu Iehova ese ita ta ta na e laloda badamu!

5. Edena dalai Iehova ese hebogahisi e hahedinaraia, bona ia be ede baita tohotohoa toma?

⁵ Danu, Isaia 63:9 ese e hahedinaraiamu Iehova ena kara namona ma ta na hebogahisi. (Eso. 34:6) Iehova ese ena hebogahisi e hahedinaraiamu dalana ta na eda kara dika e gwautaomu. (Sal. 51:1) Baibul lalonai hebogahisi karana na dia dika igwautaona karana mo e herevalaiamu. To ia anina ma ta na, bema ta na taunimanima ta e itaiamu e hisihisimu, be bogaiahisimu dainai be uramu una tau o hahine baine durua. Iehova ese eda hisihisi na e mamiamu dainai e ura dikadikamu ita baine duruda; sina ese natuna ena hisihisi e mamiamu karana e hereaia. (Isa. 49:15) Hekwakwanai ta davarimu neganai, Iehova na ena hebogahisi dainai ita e durudamu. (Sal. 37:39; 1 Kor. 10:13) Hebogahisi baita hahedinarai dalana ta na eda tadikaka bona taihu ese e hahisidamu neganai, namona na edia dika baita gwautao bona basita badu henidia. (Efe. 4:32) To dala hereadaena ma ta na metau negadiai eda tadikaka taihu baita durudia. Lalokau dainai ma haida baita hebogahisi henidiamu neganai, ita na Iehova ta tohotohoamu.​—Efe. 5:1.

6. Edena dalai Ionatan bona David na lalokau e hahedinaraia?

⁶ Baibul ese e hahedinaraiamu ena be taunimanima haida na dia ḡoevadae to idia ese danu lalokau bona hebogahisi karana e hahedinaraia. Mani Ionatan bona David edia haheitalai aita herevalaia. Baibul na e gwa: “Ionatan bona David na lalo-tamona ai e hetura heheni; Ionatan ese David e lalokau henia, ia sibona e helalokau heniva heḡereḡerena.” (1 Sam. 18:1)  Iehova ese David na e abia hidi King Saulo gabuna baine abia. Una murinai, Saulo ese David na da e mama heniava bona e urava baine alaia. To Ionatan na se ura tamana Saulo baine durua David bae alaia totona. Ionatan bona David na e gwauhamata edia hetura karana na baine mia ela bona hanaihanai bona nega iboudiai bae heduru heheni.​—1 Sam. 20:42.

7. David bona Ionatan edia hetura karana be dahaka ese bema hadikaia diba?

⁷ Ionatan bona David edia lalokau na hoa ḡauna, badina ḡau momo ese edia hetura karana na bema hadikaia diba. Heḡereḡere, Ionatan laḡanina na bada, ia bona David padadiai na laḡani  30 heḡereḡeana. Una dainai reana Ionatan na basinema ura David baine hetura henia badina ia na meromero, bona ḡau momo na asi dibana. To Ionatan na unu se lalo toma, ia ese David na e matauraiava.

8. Dahaka dainai Ionatan na David turana namona?

⁸ Ionatan ese David na bema mama henia diba. Ia na King Saulo natuna dainai, reana baine gwau diba ia na mai ena maoro king dagina baine abia. (1 Sam. 20:31) To Ionatan na e manau bona Iehova e badinaia. Una dainai Iehova ese David e abia hidi king ai bainela neganai, e abia dae. Ena be Saulo ese una na se moalelaiava, to Ionatan ese David na dounu e badinaiava.​—1 Sam. 20:32-34.

9. Ede ta diba tomamu Ionatan ese David na se mama henia?

⁹ Ionatan na David e lalokau heniava dainai, ia ese David na se mama heniava. Ionatan na tuari tauna goadana bona peva iḡaukaralaina na mai dibana. Momo na e gwauva ia bona tamana Saulo ese “ugava edia haraḡa na e hereadia,” bona “leona edia goada na e hereadia.” (2 Sam. 1:22, 23) Una dainai reana Ionatan na e kara ḡaudia bema hekokorokulai diba. To, Ionatan na e manau bona David ese e kara ḡau namodia na se mamalai. Ionatan ese David ena boga-auka karana bona Iehova iabidadama henina karana e ura henia. David ese Goliata e alaia murinai, Ionatan bona David edia hetura karana na e hagoadaia. Edena dala ai Ionatan ese David enai e hahedinaraia lalokau na eda tadikaka taihu ediai baita hahedinaraia diba?

10. “Ba heura heheni mai lalomui idoidiai” anina be dahaka?

¹⁰ Baibul na eto: “Ba heura heheni mai lalomui idoidiai.” (1 Pet. 1:22) Iehova na eda haheitalai namona. Iena lalokau na bada herea dainai, bema ia baita badinaiamu, ḡau ta ese Dirava ena lalokau amo basine bibida oho diba. (Roma 8:38, 39) Ina hereva “ mai lalomui idoidiai,” anina na baita hekwarahi lalokau baita hahedinaraia. Nega haida reana be aukamu eda tadikaka taihu baita lalokau henidia. Haida ese e hahisidamu neganai, namona na ‘lalokau ai baita haheauka heheni. Lauma ena lalo-tamona baita kahua tao, maino ena iḡui ai.’ (Efe. 4:1-3) Bema baita ḡaukara goadamu eda tadikaka taihu ida “maino” ai baita nohomu, edia kerere na basita lalodiamu. Bona Iehova ese eda tadikaka taihu e lalodiamu heḡereḡerena baita lalodiamu.​—1 Sam. 16:7; Sal. 130:3.

11. Dahaka dainai nega haida lalokau baita hahedinaraia na auka?

¹¹ Eda tadikaka taihu edia kerere baita lalomu neganai, be aukamu idia ediai lalokau baita hahedinaraia. Kristen ginigunadia edia negai una hekwakwanai na haida ediai e vara. Heḡereḡere, Euodia  bona Sunutuke na ‘[Paulo] ida e ḡaukara hebouva, sivarai namo’ e harorolaiava. To, hekwakwanai ta dainai taihu raruosi na asie ḡaukara hebou namonamova. Una dainai Paulo ese e hagoadadia, “lalodia bae tamona Lohiabada lalonai.”​—Fili. 4:2, 3.

12. Edena dalai eda tadikaka taihu ilalokau henidia karana baita hagoadaia?

¹² Edena dalai hari inai negai eda tadikaka taihu ilalokau henidia karana baita hagoadaia diba? Baita dibadia namonamomu neganai, edia kara baita lalopararalaimu bona baita lalokau henidiamu. Namona na ta laḡanina eiava ena hanua ese ita na basine kouda ia turana ai baitala totona. Ba helalotao, Ionatan laḡanina na bada, ia bona David padadiai na laḡani  30 heḡereḡeana; to una ese ia na se koua David turana ai bainela. Emu kongrigeisin lalonai tadikaka eiava taihu matamatadia eiava burukadia na turamu namodia ai ba halaodia. Unu bo kara tomamu neganai, oi na o hahedinaraiamu tadikakamu iboudiai o ‘lalokau henidiamu.’​—1 Pet. 2:17.

13. Dahaka dainai ta na tadikaka taihu haida mo be bamodia momomu a haida be lasi?

¹³ Tadikaka taihu ta lalokau henidiamu anina be kongrigeisin taudia iboudiai be ita turada namodia, a? Reana tadikaka taihu haida be basita bamodia momomu, to ma haida be baita bamodia momomu badina idia bona ita ese ta ura henimu ḡaudia na heḡereḡere. Iesu danu ena be aposetolo iboudiai na e gwauraidiava “turagu,” to Iesu ese Ioane na turana namona ai e halaoa. (Ioa. 13:23; 15:15; 20:2) To, dia ta gwaumu Iesu ese Ioane mo e ura heniava a haida be lasi. Heḡereḡere, Ioane bona kakana Iakobo ese Iesu e noia Dirava ena Basileia lalonai dagi namodia bae henidia neganai, Iesu ese idia na e hamaorodia: “Idibagu ai laurigu ai bae helai taudia igwauraidia na dia lau, a unu gabu na e seudia taudia mo ediai.” (Mar. 10:35-40) Iesu heḡereḡerena, dia namo turada namodia mo baita kara namo henidia, to  namona na tadikaka taihu iboudiai baita kara namo henidia. (Iak. 2:3, 4) Bema unu baita kara tomamu, kongrigeisin lalonai maino be miamu.​—Iuda 17-19.

14. Filipi 2:3 heḡereḡerena, edena dalai eda kongrigeisin lalonai kara helulu lalohadaina baita dadaraia diba?

¹⁴ Bema kongrigeisin lalonai baita helalokau hehenimu, eda kongrigeisin lalonai kara helulu lalohadaina baita dadaraiamu. Ba helalotao, Ionatan ese David na se mama henia, bona se ura David ena king dagina baine abia. Ita iboudai ese Ionatan ena haheitalai baita tohotohoa diba. Namona na eda tadikaka eiava taihu ese e karamu ḡaukaradia dainai basita mama henidia, to baita manau bona ‘bamoda baita imodaidia.’ (Filipi 2:3 ba duahia.) Namona na ba laloatao kongrigeisin lalonai ita ta ta na mai eda ḡaukara. Bema baita manaumu, nega iboudiai ita na eda tadikaka taihu edia kara namodia baita lalomu, bona edia haheitalai namodia ese ita na be durudamu.​—1 Kor. 12:21-25.

15. Tanya bona ena famili edia ekspiriens amo dahaka o dibamu?

¹⁵ Hekwakwanai ta davarimu neganai, Iehova na eda tadikaka taihu edia lalokau bona heduru amo ita be hagoadadamu. United States ai ruma bese ta na laḡani 2019 “Lalokau Na Se Dokomu!” ena International Convention ela murinai, mani e vara ḡauna aita herevalaia. Sina ladana Tanya, natuna na tatoi, na ini e gwau toma: “Ai motuka amo emai hotel a lou heniava lalonai, motuka ta na emai motuka ai e tatakau. Namo be ta asia bero, to a gari dainai motuka amo a diho bona dala ai a gini. Dala kahanai tau ta na ai e boi  henimaiva ena motuka baiala. Ia na tadikaka ta, ia danu hebouhebou gabuna amo ema. To dia ia mo, Sweden amo hebouhebou ema tadikaka taihu 5 danu ai daimai ai e stopu. Taihu ese lau bona natugu kekenidia e rosimai bona una ese ai e hagoadamai! Na hamaorodia ai na nanamo bona na hadibadia baela diba, to idia na se urava ai bae rakatanimai. Unu tadikaka taihu na ai e narimai ela bona ambalans taudia ema. Una metau negana lalonai, Iehova ena lalokau a mamia momokani. Una ekspiriens ese tadikaka taihu ediai emai lalokau e hagoadaia, bona Iehova enai emai lalokau bona tenkiu karana e habadaia.” Reana oi danu nega ta heduru o urava neganai, tadikaka eiava taihu ta ese oi emu ai lalokau karana e hahedinaraia.

16. Dahaka dainai lalokau ta hahedinaraiamu?

¹⁶ Tadikaka bona taihu ediai lalokau ta hahedinaraiamu ena namo haida mani aita herevalai. Hekwakwanai e davarimu neganai ta durudiamu. Bona ta hagoadadiamu mai moaledia ida Iehova bae hesiai henia hebou totona. Danu ta hamomokania ita na Iesu ena hahediba taudia, bona una ese kudou-maoro taudia e veridiamu Iehova bae tomadiho henia. To hereadaena na ina, ita ese Iehova, “Tama hebogahisina, tauhalo Diravana,” ta hanamoamu. (2 Kor. 1:3) Una dainai namona na hanaihanai ita iboudai ese eda lalokau baita habadaia bona baita hahedinaraia!