Lau na May 19, 1940 ai na vara, una na Lebanon ena taoni Amioûn ai. Laḡani haida muridiai, ai na una gabu a rakatania bena taoni ta ladana Tripoli ala. Egu famili na Iehova Dirava e dibaia bona e lalokau heniava taudia. Ai taumai na 5, kekeni tatoi bona memero rarua, lau be dokona. Tamagu sinagu ediai, moni iabina karana na dia ḡau badana ai e halaoava. To mai anidia bada ḡaudia na Baibul stadi, Kristen heboudia, bona haida baia durudia Dirava bae dibaia.

Emai kongrigeisin ai haida na horoa Kristen taudia. Idia ta be Michel Aboud, ia ese emai kongrigeisin buka stadi e nariava. Ia na New York ai hereva momokani e dibaia, bena laḡani 1921 Lebanon ai haroro ḡaukara e hamatamaia. Ia ese Anne bona Gwen Beavor, Gilead School amo e gradueit eregabe taihudia rarua, e durudia dalana na laloamu. Idia na ai turamai namodia ai ela. Laḡani momo muridiai, na moale badina United States ai Anne ida a hedavari. Gabeai Gwen na hedavari henia, ia na Wilfred Gooch e adavaia, bona idia raruosi London Betele England ai e ḡaukarava.

Lau maraḡigu ai Lebanon ai Witnes taudia na dia momo. To ai na mai emai ura ida Baibul amo a diba ḡaudia na haida ediai a herevalaiva. Ena be tomadiho igunalaina taudia haida ese e daḡedaḡe henimaiva, to dounu a harorova. Emai ai e vara ḡaudia haida na doini na lalodiataomu.

Dina ta, lau bona taihugu Sana na apartment building ta ai a harorova. Una gabu ai e nohova tauna ta a hereva heniava lalonai priest ta ema. Ta ese reana e rini henia. Una priest ese taihugu e gwau henia, bena vada amo e doria dobi, bona e haberoa. Ta ese pulisi e rini henidia bena idia e kau neganai, ta e hadibaia Sana bae durua. Idia ese una priest na police station e laohaia bona e davaria ia na mai ena ipidi. Pulisi biagudia ese e nanadaia eto: “Oi be taunimanima ediai Dirava o hahedibalaiamu eiava daḡedaḡe karadia o hahedibalaimu?”

Nega ma ta ai, na helalotaomu emai kongrigeisin na basi ta e hire daudau teritori ai sivarai namona baia harorolaia. A harorova lalonai, una gabu ai e nohomu priest ta na e kamonai, bena hutuma e haboudia ai bae daḡedaḡe henimai. E dadabamai, nadi amo e hodomai, bona tamagu na e bero. Na helalotaomu vairana na rara ese e hahonua. Ia na sinagu ida ela basi bona ai iboumai ai na mai lalohisihisimai ida idia muridia amo ala. To, sinagu ese tamagu berona e haḡoevaiava lalonai, e gwauraia herevana na asina laloaboio, ini e gwa tomu: “Iehova, mani emu kara edia dika na ba gwaudiatao. Idia na asi dibadia dahaka e karamu.”

Nega ma ta ai, ai na emai gabu ala varavaramai baia vadivadidia. Unuseniai bishop ta na tubugu tauna ena ruma ela. Una bishop na mai dibana lau tamagu sinagu na Iehova ena Witnes taudia. Una negai lau laḡanigu na siks, ia na lau e nanadaigu eto: “Oi be dahaka dainai do so bapatiso?” Na hamaoroa lau na maraḡi dainai do asina bapatiso bona Baibul baina dibaia namonamo bona egu abidadama baina hagoadaia guna. Egu haere na se moalelaia dainai, tubugu tauna e hamaoroa lau na asina hematauraimu.

To ḡau unu bamodia na dia nega momo e varava. Vaia Lebanon taudia na taunimanima namodia bona heabidae taudia. Una dainai momo ida Baibul a herevalaiava bona Baibul stadi momo a kara.

Lau na skuliva lalonai, eregabe tadikakana ta na Venezuela amo ela Lebanon. Ia na emai kongrigeisin heboudia e laova bona taihugu Wafa ida e heturava. Gabeai, idia raruosi e headava bena ela Venezuela ai e nohova. Wafa na ena revareva ai tamagu e hamaoroava ai na iboumai ai baiala Venezuela. Unu e gwau tomava badina e misimai  bada hereava. Gabeai, ai ese ena noinoi abia dae bena ala!

Laḡani 1953 ai Venezuela ai a kau bona Caracas ai a nohova. Ai a nohova gabuna na president ena palace badinai. Lau na do maraḡi dainai, president na ena driver ese motuka amo e hanailaiava negadiai, na ura dikadikava ia baina itaia. Tamagu sinagu ediai na e auka una tano matamatana ena gado, kastom, aniani, bona weda bae manadalaia. To e manada e laova lalonai, hekwakwanai badana ta e vara.

Tamagu na e gorere matama. Ai na a daradara badina ia na mai goadana bona dia gorere tauna. Bona nega ta asia itaia e gorerea. To dokta ese e hamaoroa ia na mai ena pancreatic cancer, una dainai oporeisen e abi. To madi, wiki ta murinai e mase.

Ai na a daradoko bada herea. Una negai lau laḡanigu na 13. Ai na asia laloa tamagu na baine mase, bona a mamiava basia moale loumu. Nega taina e daudau, sinagu enai na e auka baine abia dae tamagu na de mase. A laloparara emai hekwakwanai na basia haidaua dibamu, to Iehova ena heduru dainai a haheauka. Lau laḡanigu 16 neganai, Caracas ena high school amo na gradueit, bona na ura dikadikava egu famili baina durudia.

Gabeai, taihugu Sana ese Rubén Araujo e adavaia, ia na Gilead School amo e gradueit bona e lou lao Venezuela. Idia raruosi na New York ela. Egu famili edia ura na iunivesiti ai baina skuli, una dainai nala New York bona taihugu bona adavana ida na nohova. Idia ese lau na e duruguva lauma dalanai baina goada. Danu, Brooklyn Spanish kongrigeisin ai tadikaka goadadia na momo. Lau ese dibadia namonamo tadikakadia rarua na Milton Henschel bona Frederick Franz; idia na Brooklyn Betele ai e ḡaukarava.

New York ena iunivesiti ai egu laḡani ginigunana dokona e lao heniava neganai, na lalova egu mauri ai dahaka baina kara be namo. Watchtower magasin ai, Kristen taudia ese Iehova ihesiai henina ai tahua ḡaudia e ato sivaraidia momo na duahi bona na lalodia dobu. Na itaia emai kongrigeisin ai painia bona Betele taudia na e moaleva, bona na ura dikadikava lau danu unu nama moale toma. To, lau na do asina bapatiso. Na laloparara Iehova enai egu mauri baina gwauhamatalaia na mai anina bada. Una dainai, March 30, 1957 ai na bapatiso.

Na bapatiso murinai, painia ḡaukara na lalohadailaia matama. Na ura dikadikava baina painia to na itaia una na be aukamu badina na lalova, ‘Egu skuli iunivesiti ai bona painia ḡaukara be ede ba karadia hebou tomamu?’ Egu famili na tore henidia bona na hadibadia lau na iunivesiti baina rakatania bona baina lou Venezuela, unu amo painia ḡaukara baina karaia.

 June 1957 ai na lou Caracas. To, na itaia egu famili ena noho dalana na dia namo. Namona na ta na moni ḡaukara baine karaia idia baine naridia. Edena dalai baina durudia? Banka ta ai moni ḡaukara na davaria, to dounu na urava baina painia. Lalogu na hadaia banka ai baina ḡaukara bona baina painia. Laḡani haida lalodiai banka ai ful-taim moni ḡaukara na karaiava bona na painiava. Ena be na bisiva to na moaleva!

Egu moale e habadaia ḡauna ma ta na, German taihu ta ladana Sylvia na hedavari henia bona raruosi a headava, ia na Iehova e lalokau henia badava. Ia bona tamana sinana na ela Venezuela ai e nohova. Gabeai, natumai rarua a havaradia, merona be, Michel (Mike), bona kekenina be, Samira. Danu, sinagu baina naria totona ia na ema ai ida a nohova. Ena be egu ruma bese madunadia dainai painia ḡaukara na hadokoa, to haroro ḡaukara na dounu na goadalaiava. Egu holidei negadiai lau bona Sylvia na heduru painia ḡaukarana a karaiava.

Natugu do e skuliva negana ai, atikol matamanai name herevalaia ḡauna e vara. Baina gwau diba una negai egu mauri na namo, bona banka ai e ḡaukarava taudia ese lau na e matauraiguva. To dounu na urava taunimanima ese bae itagu lau na Iehova ena hesiai tauna ta. Una dainai adavagu ida emai moni baia ḡaukaralai daladia a herevalaiva. Bema egu moni ḡaukara amo ba dokomu, doko-monina taina badana ba abiamu. Ai na asi emai abitorehai dainai, a lalo bema emai mauri ai ḡau haida baia dadaraimu emai moni na heḡereḡere laḡani daudau lalonai sibomai baia henari totona.

Unu baia kara toma na mai hekwarahina, to adavagu lalokauna bona sinagu ese e durugu. Una ese dala e kehoa baina painia lou totona. Na moale dikadika! To, asia laloa ḡauna ta emai ai e vara.

Nega ta emai dokta ese e hamaoromai Sylvia na e rogorogo. Una na moale sivaraina! To, painia ḡaukara baina karaia abi hidina ma na laloa. Lau be painia ḡaukara dounu ba karaiamu eiava? To lalohadai maorona a abia bona mai moalemai ida natumai ihatoina a naria danu. To painia ḡaukara na dounu na lalohadailaiava.

Emai tahua ḡaudia a herevalai murinai lalomai a hadai lau na dounu baina painia.  April 1985 ai natumai merona Gabriel e vara. Gabeai banka amo na risain, bona June 1985 ai regula painia na hamatamaia lou. Se daudau lau na Branch Committee memba ta ai nala. To brens na dia Caracas ai dainai, lau na wiki ta lalonai motuka amo dina rua o toi na laova, ena daudau na 80 kilomita heḡereḡerena.

Brens ofes na La Victoria ai, una dainai egu famili ida a hereva hebou La Victoria baiala bona Betele badinai baia noho. Una na abi hidi badana ta emai ai. Egu famili na na lalodia badamu bona na tenkiu henidiamu badina edia kara ese lau na e durugu bada. Taihugu Baha na e ura sinamai baine naria. Mike na de headava, to Samira bona Gabriel na dounu ai ida a nohova. Bema La Victoria baia laomu anina na idia ese turadia Caracas ai be rakatanidiamu. Danu, Sylvia na una taoni maraḡinai noho dalana matamatana be manadalaiamu. Bona ai iboumai ai na ruma maraḡina ta ai baia hanohomu. Oibe, Caracas amo baiala La Victoria totona sensi momo baia kara.

Gabeai Gabriel na e headava, bona Samira na sibona e nohova. Laḡani 2007 ai lau bona Sylvia na e boirimai Betele baia ḡaukara, bona una nega amo ema bona hari ai na doini Betele ai a ḡaukaramu. Natumai roboana Mike na elda ta bona adavana Monica ida e painiamu. Gabriel danu elda ta bona adavana Ambra ida Italy ai e nohomu. Samira na e painiamu bona ena ruma amo Betele ḡaukara e duruamu.

Oibe, egu mauri lalonai abi hidi badadia momo na kara. Bona unu abi hidi daidiai na moalemu. Iehova ihesiai heninai na abi hahenamodia idauidau dainai ia na tenkiu heniamu. Laḡani momo lalodiai na laloparara Iehova ihetura henina karana baina hagoadaia na mai anina bada. Herevana abi hidi badadia o maraḡidia baita karamu, to Iehova ese “eda diba idoinai e hereaiamu mainona” baine henida diba. (Fili. 4:6, 7) Lau bona Sylvia ese Betele ḡaukara na a moalelaiamu bona a mamia Iehova ese emai abi hidi na e hanamodia badina emai mauri lalonai ia atoa guna.