1. Dahaka dainai Kain na abi hidi kererena e karaia, bona dahaka e vara?

KAIN na abi hidi ta baine karaia: Ena kara dika hemamina baine biagua eiava una hemami ese ena kara baine biagua. Herevana edena baine abia hidi, to ena abi hidi ese ena mauri baine hanamoa eiava baine hadikaia diba. To Kain na abi hidi kererena e karaia. Ena abi hidi dainai tadina Abel e alaia, bona ena hetura karana Dirava ida e hadikaia.​—Gen. 4:3-16.

2. Dahaka dainai abi hidi maorodia baita kara na ḡau badana?

² Ita danu eda mauri ai abi hidi baita kara. Eda abi hidi haida na abi hidi badadia, a haida be lasi. To, ta karamu abi hididia ese eda mauri bae hanamoa eiava bae hadikaia diba. Una dainai, abi hidi maorodia baita karamu neganai, maino ai baita nohomu, to abi hidi kereredia baita karamu neganai, lalohekwarahi, heai, bona lalohisihisi ai baita nohomu.​—Her. 14:8.

3. (a) Abi hidi maorodia baita kara totona, daika baita abidadama henia? (b) Ededia henanadai baita herevalaimu?

³ Dahaka ese baine duruda abi hidi maorodia baita kara? Namona na Dirava  baita abidadama henia, bona baita abia dae Ia na mai ena ura ida ita baine duruda diba abi hidi maorodia baita kara. Danu, Iehova ena Hereva bona ḡau e karamu daladia baita abidadama henidia, bona ena sisiba baita badina. (Iakobo 1:5-8 ba duahi.) Ia baita raka henia kahimu bona ena Hereva baita ura henia badamu neganai, iena hahemaoro daladia baita abidadama henimu. Bena Dirava ena Hereva baita tahua gunamu, gabeai abi hidi baita karamu. To abi hidi maorodia ikaradia daladia be ede baita diba toma? Bona ta karaia abi hidina be baita haidaua diba, eiava?

4. Adam be dahaka abi hidi e karaia, bona dahaka e vara?

⁴ Taunimanima na Dirava ese e karadia negana amo ema bona hari, idia na mai anina bada abi hididia e karamu. Adam na abi hidi baine karaia, Dirava baine kamonai henia eiava Heva baine kamonai henia. Ia na mai ena ura ida abi hidi ta e karaia, to ia e karaia abi hidina be ede o laloa tomamu? Ia na adavana ese e hakaua kerere dainai abi hidi kererena e karaia, una dainai Dirava ese Paradaiso amo e luludia bona gabeai e mase. Adam ena abi hidi kererena dainai, hari inai negai ita na dounu ta hisihisimu.

5. Eda abi hidi be ede baita lalodia toma na namo?

⁵ Haida na e laloamu bema abi hidi basita karamu mauri na be namomu. Oi be unu o lalo tomamu? Ba helalotao, Iehova ese taunimanima e karadia na dia robot heḡereḡeredia, asie lalohadaimu eiava abi hidi asie karamu. Baibul ese abi hidi maorodia baita kara daladia na e hadibada. Iehova na e uramu abi hidi maorodia baita kara, unu abi hidi ese ita na be durudamu. Mani una ihamomokanina sivaraidia haida aita lalodia.

6, 7. Israel taudia be dahaka abi hidi bae kara? Bona dahaka dainai abi hidi maorona bae karaia na auka? (Rau 13 ai laulau ba itaia.)

⁶ Idaunega Israel taudia na Gwauhamata Tanona ai e nohova neganai, idia na abi hidi ta bae karaia: Iehova bae tomadiho henia eiava idau diravadia bae tomadiho henidia. (Iosua 24:15 ba duahia.) Toana na una abi hidi bae karaia na dia auka. To, una abi hidi dainai bae mauri eiava bae mase diba. Hahemaoro Taudia edia negai, Israel taudia na abi hidi kereredia e kara loulouva. Idia ese Iehova e dadaraia bona dirava koikoidia e tomadiho henidia. (Hahe. 2:3, 11-23) Gabeai, Elia ena negai Dirava ena taunimanima ese e karaia abi hidina ta mani a laloa. Peroveta tauna Elia ese bae karaia abi hidina e hahedinaraia: Iehova isiaina bae lao heni eiava dirava koikoina Baal isiaina bae lao heni. (1 Han. 18:21) Taunimanima na e lalo ruava dainai Elia ese gwau henidia. Reana bo laloamu una abi hidi bae karaia na dia auka badina Iehova ihesiai henina karana na aonega dalana bona mai ena hahenamo. Momokani, lalo maoromaoro tauna na basine uramu Baal isiaina baine lao heni. To, unu Israel taudia na ‘lalo rua ai e raka ege raka egeva.’ Elia ese e haḡanidia tomadiho dalana hereadaena bae abia hidi, una na Iehova itomadiho henina karana.

⁷ Dahaka dainai Israel taudia ese abi hidi maorona bae karaia na auka? Ḡau ginigunana na, idia ese Iehova asie abidadama henia bona asie kamonai henia. Idia ese diba maoromaorona eiava Dirava ena aonega na asie tahua, bona Iehova enai asie tabekau. Bema e abia diba maoromaorona bema badinadia, una ese bema durudia abi hidi maorodia bema kara. (Sal. 25:12) Ḡau iharuana na, haida ese lalodia e veri bona edia abi hidi danu e kara. Una tano ai Iehova asie tomadiho henia taudia ese Israel taudia edia lalohadai e haidau, unu amo idia ese tomadiho koikoi taudia hutuma e  badinadia. Iehova ese idaunegai idia na e hadibadia, unu bae kara toma neganai dika bae davaria.​—Eso. 23:2.

8. Israel taudia edia sivarai amo dahaka mai anina bada ḡauna ta dibaiamu?

⁸ Israel taudia edia haheitalai ese ḡau ta e hadibadamu. Abi hidi na ita ta ta siboda ese baita karaia ḡauna, bona Baibul ese baine duruda abi hidi maorodia baita kara. Galatia 6:5 na e gwaumu: “Ta ta ena maduna ena maduna bae hua.” Haida ese eda abi hidi bae kara na dia maoro. To, namona na ita siboda baita diba Dirava matana ai dahaka be maoro bona una heḡereḡerena abi hidi baita kara.

9. Dahaka dainai haida ese eda abi hidi bae kara na mai ena dika?

⁹ Haida ese eda abi hidi be karamu neganai, edena dala ai dika baita davarimu? Bamo edia laloani ese be doridamu abi hidi kererena ta baita karaiamu. (Her. 1:10, 15) Herevana haida ese bae dorida, to Baibul amo ta hadibaia laloda mamina baita badinaia na namo. Bema haida ese eda abi hidi be karamu, anina na idia ta badinadiamu. Abi hidi unu bamona ese dika baine havaraia diba.

10. Paulo ese Galatia taudia be dahaka sisiba e henidia?

¹⁰ Aposetolo Paulo ese Galatia taudia ediai haida ese edia abi hidi bae kara ena dika e herevalaia. (Galatia 4:17 ba duahia.) Kongrigeisen lalonai haida na e urava ma haida edia abi hidi bae kara bena aposetolo edia amo bae hakaudia oho. Dahaka dainai? Badina e urava ladadia bae bada. Idia na asie manau, bona edia Kristen tadikaka edia abi hidi ena maoro na asie matauraia.

11. Haida ese edia abi hidi e karamu neganai edena dalai baita durudia diba?

¹¹ Paulo na haheitalai namona, ia ese tadikakana edia abi hidi ena maoro na e matauraia. (2 Korinto 1:24 ba duahia.) Hari ina negai, elda taudia ese tadikaka edia abi hidi karadia ai sisiba e henimu neganai, Paulo ena haheitalai bae tohotohoa na namo. Idia na mai moaledia ida Baibul ena hereva na ma haida ediai e  herevalaimu. To, elda taudia na e henahua tohomu, idia ese tadikaka bona taihu na asie koudiamu sibodia edia abi hidi bae kara totona. Una na maoro badina ta ta ena abi hidi dainai bae vara ḡaudia na ia sibona ena maduna. Mai anina bada ḡauna binai: Haida edia namo baita lalodia bada bona Baibul ena hahekau herevadia o sisiba amo baita durudia. To, ta ta na mai ena maoro sibona ena abi hidi baine kara. Bema aonega dalanai una baine karaia, namo baine davari diba. Momokani, basitato ita na mai eda maoro tadikaka bona taihu haida edia abi hidi baita kara.

12, 13. Dahaka dainai badu o lalomanoka negadiai abi hidi na basita kara?

¹² Momo na e gwaumu: ‘Kudoumu ena ura ba badinaia.’ To una kara ese dika baine havaraia diba. Bona unu baita kara tomamu na dia Baibul ena hereva heḡereḡerena. Baibul ese e hadibadamu abi hidi ta karamu neganai laloda o kudouda ena ura na basita badinaia. (Her. 28:26) Bona Baibul sivaraidia ese kudoudia ena ura e badina taudia e davari hekwakwanaidia e hahedinarai. Unu amo ta dibamu dia ḡoevadae taudia “lalodia [“kudoudia,” NWT] na koikoi herea bona dika rohoroho.” (Ier. 3:17; 13:10; 17:9; 1 Han. 11:9) To, bema kudouda baita badinaiamu dahaka be vara dibamu?

¹³ Kristen tauna kudouna na mai anina bada, badina Baibul ese e haḡanidamu, Iehova baita lalokau henia mai laloda o kudouda idoinai, bona dekeda taudia baita lalokau henidia siboda ta helalokaumu heḡereḡerena. (Mat. 22:37-39) To paragraf 12 ai e herevalai siridia ese e hahedinaraimu, eda hemami ese eda lalohadai bona kara basine biagu na namo. Heḡereḡere, bema badu ai abi hidi ta baita karaiamu, dahaka be vara dibamu? Abi hidi kereredia baita karamu bona dika be varamu. (Her. 14:17; 29:22) Eiava lalomanoka negadiai, abi hidi maorodia baita kara dibamu, a? (Num. 32:6-12; Her. 24:10) Baita helalotao, Baibul ese e hahedinaraiamu, “Dirava ena taravatu e badinaiamu” tauna na e aonegamu. (Roma 7:25) Oibe, bema abi hidi badadia ikaradia ai eda hemami basita biaguamu, una ese baine hakauda kerere diba.

14. Ede ta diba tomamu abi hidi haida baita haidau na maoro?

¹⁴ Abi hidi maorodia baita kara na namo. To, basitato ta karaia guna abi hidina na basita haidaua diba. Nega haida na ta karaia guna abi hidina baita laloa lou, bona reana baita haidaua diba. Iona ena negai, Iehova ese Nineve taudia e kara henidia dalana mani a laloa. “Dirava ese edia kara e itaia, edia dala dikana amo ede e raka oho toma; bena Dirava ese baine hadikalaidia eto karana amo e helalo kerehai; bena se karaia.” (Iona 3:10) Iehova na e itaia Nineve taudia na e helalo-kerehai dainai, ena abia hidi na e haidaua. Unu amo Ia ese lalo maoromaoro karana, manau bona hebogahisi e hahedinarai. Danu, Dirava na dia taunimanima heḡereḡeredia; idia na e badumu neganai asie lalo maoromaoromu bena abi hidi e karamu.

15. Dahaka dainai eda abi hidi baita haidau diba?

¹⁵ Nega haida reana ta karaia abi hidina ta baita laloa lou na namo. Reana mauri daladia be idaumu negadia ai una abi hidi baita haidauamu. Iehova na nega haida  ena abi hidi e haidauva bema taunimanima edia mauri daladia e idauva. (1 Han. 21:20, 21, 27-29; 2 Han. 20:1-5) Eiava reana hahediba hereva matamatana ta baita abiamu neganai eda abi hidi baita haidauamu. King David na nega ta haida ese ia vairanai Saulo tubuna Mefiboset e hahebadelaia koikoi. To gabeai, David na sivarai korikorina e kamonai neganai, ena abi hidi e haidaua. (2 Sam. 16:3, 4; 19:24-29) Nega haida, unu baita kara toma na aonega karana.

16. (a) Abi hidi maorodia baita kara totona heduru daladia haida be dahaka? (b) Dahaka dainai bona edena dalai guna ta kara abi hididia baita lalodia lou?

¹⁶ Baibul ese e hadibadamu, mai anina bada abi hidina ta baita karaia neganai, basita haraḡa na namo. (Her. 21:5) Bema nega baita atomu eda abi hidi baita haeroa namonamomu, abi hidi maorona baita karaia dibamu. (1 Tes. 5:21) Ruma bese kwarana na abi hidi ta do se karaia neganai, namona na nega baine ato Baibul bona eda pablikeisen idauidau ai baine hetahu o research baine kara, bona ena ruma bese edia lalohadai baine lalo guna. Ba helalotao, Dirava ese Abraham e hamaoroa adavana ena hereva baine kamonai. (Gen. 21:9-12) Elda taudia danu nega bae ato bae hetahu o research bae kara totona. Bona bema idia na bae lalo maoromaoro bona bae manau, ḡau matamatana ta e dibamu neganai guna e karaia abi hidina na bae laloa lou bema bae haidaua eiava, bona haida ese basie matauraidia garina na basie gari. Namona na bae heḡaeḡae edia lalohadai bona abi hidi bae haidaudia bema una na maoro. Bona ita ese edia haheitalai baita tohotohoa na namo. Una ese kongrigeisen ai maino bona lalotamona baine havaraia diba.​—Kara 6:1-4.

17. Edena dalai abi hidi maorodia baita kara diba?

¹⁷ Abi hidi haida na abi hidi badadia. Unu abi hidi baita kara neganai, namona na nega baita ato baita lalodia namonamo guna bona baita ḡuriḡurilaidia. Kristen taudia haida na abi hidi e karamu, bae headava eiava lasi, bona daika bae adavaia. Abi hidi badana ma ta na, edena dalai bona edena negai ful-taim hesiai ḡaukara bae karaia. Abi hidi unu bamodia ta karamu neganai, ḡau badana na baita abidadama Iehova ese hahekau hereva namodia amo baine duruda diba. (Her. 1:5) Una dainai, mai anina bada ḡauna na Baibul ena sisiba baita tahua, bona Iehova baita noia baine hakauda. Bona baita helalotao, Iehova ese ita na be duruda dibamu unu amo ena ura heḡereḡerena abi hidi baita karamu. Abi hidi badadia ta uramu baita kara neganai, namona na baita henanadai: ‘Ina abi hidi ese egu lalokau Iehova enai e hahedinaraiamu, eiava? Egu ruma bese ediai moale bona maino be havaraiamu, eiava? Bona be hahedinaraiamu lau be na haheaukamu bona na hebogahisimu, eiava?’

18. Dahaka dainai Iehova na e uramu siboda ese eda abi hidi baita kara?

¹⁸ Iehova ese ita na se doridamu ia baita lalokau henia bona isiaina baita lao heni. Una na ita siboda ese baita karaia abi hidina. Ia ese ura kwalimu e henida dainai, eda maduna bona ia ihesiai henina karana ai ita siboda ese ta karaiamu abi hidina na e matauraiamu. (Ios. 24:15; Koh. 5:4) To, ia na e uramu ena hahekau herevadia heḡereḡerena ai ta kara abi hididia na baita badinadia. Iehova ena dala bona hahekau herevadia baita abidadama henidia neganai, abi hidi maorodia baita kara dibamu bona eda kara amo baita hahedinaraiamu ita na Dirava ta badinaiamu.​—Iak. 1:5-8; 4:8.