1. Mataio 24:9 heḡereḡerena, dahaka dainai basita hoa bema tanobada ese baine inai henida?

IEHOVA ese e karada dalana na ita ese ma haida baita lalokau henidia, bona idia ese danu ita bae lalokau henida. Una dainai ta ese e inai henidamu neganai, ta lalohisihisimu bona ta garimu. Heḡereḡere, Europe ai e nohomu taihuna ladana Georgina na e gwa: “Laḡanigu 14 ai, Iehova na hesiai heniava dainai sinagu ese e inai heniguva. Na mamiava ta ese se ura heniguva bona na laloava lau na dia taunimanima namona.” * Tadikaka ta ladana Danylo na e gwa: “Tuari taudia ese e dadabaguva, e gwau heniguva, bona e hagariguva badina lau na Iehova ena Witnes neganai, na gariva bona idia ese e hahemaraiguva.” Inai karadia unu hetomadia na mai hisihisidia, to asita hoamu. Badina Iesu na e peroveta taunimanima ese ita na be inai henidamu.​—Mataio 24:9 ba duahia.

2-3. Dahaka dainai Iesu murinai e rakamu taudia na e inai henidiamu?

² Tanobada ese Iesu murinai e rakamu taudia na e inai henidiamu. Dahaka dainai? Badina Iesu heḡereḡerena ita na “dia tanobada ena.” (Ioa. 15:17-19) Una dainai, ena be taunimanima edia gavamani na ta matauraidiamu, to idia bona edia hanua flaigadia na asita tomadiho henidiamu. Ita ese Iehova sibona mo ta toma henia dihomu. Ita na Iehova ena lohia siahuna ena maoro ta abia isimu​—una maoro na Satana bona “garana” ese e uramu bae abia. (Gen. 3:1-5, 15) Dirava ena Basileia ta harorolaiamu, badina una na taunimanima edia helaro tamona bona una Basileia ese kahirakahira e inai heniamu taudia iboudiai baine haoredia. (Dan. 2:44; Apok. 19:19-21) Una na sivarai namona manau taudia ediai,  a sivarai dikana kara dika taudia ediai.​—Sal. 37:10, 11.

³ Danu ita na e inai henidamu badina Dirava ena taravatu maoromaorodia ta badinadiamu. Ini taravatu na i‘idau tanobada taudia ese e badinamu karadia amo. Heḡereḡere, taunimanima momo herea ese matabodaḡa karadia na e abi daemu, Dirava ese Sodom bona Gomora na kara unu bamodia daidiai e hadikadia! (Iuda 7) Baibul ena taravatu kara unu bamodia ai ta badinamu dainai, taunimanima momo ese e hevasehalaidamu bona e gwaumu ita na siboda eda namo ta lalomu.​—1 Pet. 4:3, 4.

4. Taunimanima ese bae inai henida neganai, ededia kara ese be hagoadadamu?

⁴ Taunimanima ese bae inai henida bona bae gwau henida neganai, dahaka ese baine duruda baita haheauka totona? Namona na baita abia dae momokani Iehova ese be durudamu. Kesi ta heḡereḡerena, eda abidadama ese ‘tau dikana ena diba lahidia baine habodo diba.’ (Efe. 6:16) To, dia abidadama mo, namona na lalokau danu baita hahedinaraia. Dahaka dainai? Badina lalokau na “se badu haraḡamu.” Hisihisi idauidau e haheaukalaimu. (1 Kor. 13:4-7, 13) Hari mani baita itaia edena dalai Iehova, tadikaka taihu, bona inaida ilalokau henidia karana ese baine duruda inai karana baita haheaukalaia.

5. Iesu ese Tamana e lalokau henia dainai edena dalai una ese e hagoadaia?

⁵ E inai heniava taudia ese do se hamasea hanuaboina ai, Iesu ese murinai e rakava taudia e hamaorodia: “Lau ese Tamagu na lalokau heniamu, [una dainai] Tamagu ese e haduagu heḡereḡerena na ḡaukaramu.” (Ioa. 14:31) Iesu ese Tamana na e lalokau heniava dainai, una ese e durua vairai e vara hahetohodia e haheaukalai. Eda lalokau Iehova enai ese unu baine duruda toma diba.

6. Roma 5:3-5 heḡereḡerena, Iehova e hesiai heniamu taudia ese tanobada ena inai karadia be ede e laloa tomamu?

⁶ Iehova ilalokau henina karana ese hanaihanai ena hesiai taudia na e hagoadadia inai karana bae haheaukalaia. Heḡereḡere, aposetolo taudia na Iuda edia kota badana ese e haḡanidia haroro ḡaukara bae hadokoa neganai, Dirava ilalokau henina karana ese e hagoadadia ‘Dirava e kamonai henia,’ to ‘taunimanima na asie kamonai henidia.’ (Apos. 5:29; 1 Ioa. 5:3) Lalokau unu bamona ese hari danu tadikakada na e hagoadadiamu, idia momo na gavamani goadadia bona dikadia edia daḡedaḡe karadia e haheaukalaimu. Tanobada ese e inai henidamu neganai, asita lalomanokamu to ta moalemu.​—Apos. 5:41; Roma 5:3-5 ba duahi.

7. Dahaka baita kara bema ruma bese taudia ese bae inai henida?

⁷ Reana eda hahetoho badana ta na, eda ruma bese taudia ese be inai henidamu. Hereva momokani baita abia dae matamamu neganai, reana eda ruma bese taudia haida na be laloamu ita na e koidamu. Haida na reana be laloamu ita na e kavadamu. (Mareko 3:21 ida ba haheḡereḡerea.) Reana be daḡedaḡe henidamu. Una daḡedaḡe karana dainai basita hoa. Iesu na e gwa: “Ruma taudia ese ruma biaguna bae inai henia.” (Mat. 10:36) Oibe, ena be varavarada ese ede bae kara henida toma, to basita laloa idia na ita inaida. To eda lalokau Iehova enai be badamu neganai, eda lalokau taunimanima ediai danu be badamu. (Mat. 22:37-39) To dia namo, taunimanima ta ihamoalena dainai Baibul ena taravatu bona hahekau herevadia baita dadarai.

8-9. Dahaka ese taihu ta e durua daḡedaḡe karana e haheaukalaia?

⁸ Georgina, matamanai tame herevalaia  taihuna, na e haheauka ena be sinana ese e daḡedaḡe henia bada. Georgina na e gwa: “Lau bona sinagu na Witnes taudia ida a stadiva. To hua 6 muridiai na urava baina hebou neganai, sinagu ena kara na e idau herea. Gabeai na diba ia na aposteit taudia ida e herevaherevava, bona lau e hereva heniguva neganai ia ese edia hereva e gwauraiva. Ia ese e ere dika heniguva, huigu e veriava, aiogu e gigiava, bona egu buka bona magasin e negeva. Laḡanigu e 15 murinai na bapatiso. Sinagu na se urava Iehova baina hesiai henia dainai, laḡanidia 13 ela 20 taudia e nohova rumana ta ai e atogu, idia haida na drag e aniva bona kerere badadia e karava. Una ihaheaukalaina na auka, bema oi baine lalokau henimu bona baine narimu tauna ese e daḡedaḡe henimumu.”

⁹ Georgina ese una be ede e haheaukalaia toma? Ia na e gwa: “Sinagu ese e daḡedaḡe henigu matama dinanai, lau ese Baibul ibounai na vada duahia ore. Hari na abia dae momokanimu, lau ese hereva momokani na davaria, bona na mamia lau na Iehova dekedekenai. Nega momo na ḡuriḡuri heniava bona ia ese e kamonai heniguva. Matamata taudia edia rumai na nohova neganai, taihu ta ese e boirigu ena rumai baina noho, bona Baibul a stadilaia hebou. Unu iboudiai lalodiai, tadikaka bona taihu ese Kingdom Hall ai e hagoadaguva. Lau na edia ruma bese bamona ai e halaogu. Lau ese momokani na itaia, Iehova ese inaida na e hereadia momokani, herevana idia be daidia.”

10. Ta abia dae momokanimu, Iehova, eda Dirava be dahaka baine kara diba?

¹⁰ Aposetolo Paulo na e gwa, ḡau ta asi siahuna ‘Dirava ena uraheni, Keriso Iesu eda Lohiabada ese e hahedinaraia ḡauna amo baine bibida oho diba.’ (Roma 8:38, 39) Ena be baita hisihisi, to Iehova na nega idoidiai ita dekedai, tauda baine halo bona baine hagoadada. Bona Georgina enai e vara ḡauna ese e hahedinaraiamu, kongrigeisin ai tadikaka bona taihu ese bae duruda diba.

11. Ioane 15:12, 13 ai e gwauraia lalokauna ese Iesu ena hahediba be ede e durudia toma? Haheitalai ta ba gwauraia.

¹¹ Iesu do se mase hanuaboinai, ia ese ena hahediba na e hadibadia bae helalokau heheni. (Ioane 15:12, 13 ba duahi.) Mai dibana, sibona ena namo se tahumu lalokauna ese, baine durudia lalotamona ai bae noho bona tanobada ena inai karana bae haheaukalaia diba. Mani Tesalonika kongrigeisin ai e vara ḡauna a laloa. E hematama negana amo, tadikaka na e daḡedaḡe  henidiava. To, unuseni ai e nohova tadikaka bona taihu ese Dirava ibadinana karana bona lalokau ai haheitalai namona e hahedinaraia. (1 Tes. 1:3, 6, 7) Paulo ese e hagoadadia lalokau na dounu bae hahedinaraia, bona ‘bae habadaia.’ (1 Tes. 4:9, 10) Idia ese Paulo ena hahediba herevana na e badinaia, badina laḡani ta murinai ena revareva iharuanai, Paulo na e gwa: “Emui heura heheni danu bada.” (2 Tes. 1:3-5) Edia lalokau ese e durudia nega aukadia bona daḡedaḡe karana bae haheaukalaia.

12. Tuari ta e varava neganai, hanua ta ai tadikaka bona taihu ese lalokau be ede e hahedinaraia toma?

¹² Mani matamanai ta herevalaia tauna, Danylo bona adavana ediai e vara ḡauna aita laloa. E nohova taonina ai tuari e vara neganai, idia na dounu e hebouva, dala e tahuva bae haroro, bona adia aniani na tadikaka bona taihu ida e ani herahiava. Bena dina ta, Danylo na tuari oreana ta ese e lao henia. Danylo na e gwa: “E haḡaniguva egu abidadama baina rakatania. Asina ura neganai, e dadabagu bona bae hagarigu totona, kwaragu daenai ipidi e hapouava. Do asiela neganai, e gwa, bae lou neganai, adavagu bae hadikaia. To kara haraḡa tadikaka ese trein ai e udamai ma taoni ta ala. Tadikaka edia lalokau karana na basina laloaboio. Bona taoni matamatana ai a ginidae neganai, unuseni ai e nohomu tadikakadia ese aniani e henimai, e durugu moni ḡaukara bona noho gabuna baina davaria totona! Una dainai, ai ese tuari dainai edia noho gabuna e rakatania Witnes taudia ma haida a durudia.” Una haheitalai ese e hahedinaraiamu, Kristen lalokauna ese baine duruda diba inai karana baita haheaukalaia.

13. Ena be Iehova ta hesiai heniamu dainai e inai henidamu, to lauma helaḡa ese ede e duruda tomamu?

¹³ Iesu ese murinai e rakava taudia na e hamaorodia inaidia bae lalokau henidia. (Mat. 5:44, 45) Una haraḡa, a? Lasi! To Dirava ena lauma helaḡa amo baita karaia diba. Dirava ena lauma huahuadia na lalokau, bona danu haheauka, hebogahisi, manau bona boga-auka. (Gal. 5:22, 23) Unu kara ese bae duruda, inai karana baita haheaukalaia diba. Inai taudia momo ese edia kara na e haidau, badina adavadia, natudia o dekedia taudia ese unu kara namodia na e hahedinarai. Idia momo na ita tadikakada bona taihuda namodia ai ela. Una dainai, bema emu ai na e  aukamu Iehova o hesiai heniamu dainai e inai henimumu taudia ba lalokau henidia, namona na lauma helaḡa totona ba ḡuriḡuri. (Luka 11:13) Bona namona na bavabia dae Dirava ena dala na hanaihanai namo herea.​—Her. 3:5-7.

14-15. Edena dalai Roma 12:17-21 ese Yasmeen e durua, ena be adavana ese e daḡedaḡe henia badava, to e lalokau heniava?

¹⁴ Mani Yasmeen, Middle East ai e nohomu hahinena, ena haheitalai a laloa. Iehova ena Witnes ta ai ela neganai, adavana na e laloava ia na e koia, una dainai e koua Dirava basine hesiai henia. Ia ese e ere dika heniava, varavara, pasta ta, bona babalau tauna ta e noidia bae hagaria bona bae hamaoroa, ia ese ena ruma bese na e hapararaiamu. Adavana ese kongrigeisin hebouna ta lalonai tadikaka e hereva dika henidia! Yasmeen na hanaihanai e taiva badina asie kara namo heniava.

¹⁵ Kingdom Hall ai, Yasmeen na tadikaka bona taihu ese e hagoadaiava. Elda ese e hagoadaia Roma 12:17-21 (Ba duahi.) ena hereva baine badinaia. Yasmeen na e gwa: “Una na auka. To Iehova na noia baine durugu, bona na ḡaukara goada Baibul ena hereva baina badinaia. Una dainai, adavagu na mai baduna ida kisini ai tano e taho vareaiva neganai, na haḡoevava. E ere dika heniguva, to mai manaugu ida na haereva. Bona e gorereva neganai, na nariava.”

16-17. Yasmeen enai e vara ḡauna amo dahaka o dibamu?

¹⁶ Yasmeen ese adavana enai lalokau e hahedinaraia dainai hahenamo e davari. Ia na e gwa: “Adavagu ese e abidadama heniguva badina mai dibana hanaihanai hereva momokani ba gwauraimu. Tomadiho a herevalaiava neganai, mai hematauraina ida e kamonai heniguva, bona a lalotamona baia maino. Hari e hagoadagumu kongrigeisin heboudia bainala. Emai ruma bese maurina na e namo herea, bona maino ai a nohomu. Na uramu adavagu ese hereva momokani baine abia dae bona baine bamogu Iehova baia hesiai henia hebou.”

¹⁷ Yasmeen enai e vara ḡauna ese e hahedinaraiamu, ‘lalokau na e haheaukamu’ ḡau “iboudia e laromu, dika iboudiai e haheauka henimu.” (1 Kor. 13:4, 7) Ena be inai karana ese hisihisi baine havaraia, to lalokau ena goada ese e hereaia. Haida ediai lalokau baita hahedinaraiamu neganai, edia kara na be idaumu. Bona una ese Iehova kudouna be hamoaleamu. To ena be inaida ese na dounu bae inai henida, to dounu baita moale diba. Edena dalai?

18. Dahaka dainai bae inai henida neganai baita moale?

¹⁸ Iesu na e gwa: “Taunimanima ese bae inai henimui . . . negadiai na ba moale.” (Luka 6:22, NWT) Ita na asita uramu taunimanima ese bae inai henida, bona eda abidadama dainai e daḡedaḡe henidamu karana na asita moalelaiamu. To dahaka dainai bae inai henida neganai baita moale? Mani badi toi aita herevalai: Ginigunana, ta haheaukamu neganai, Dirava ena lalo namo ta abiamu. (1 Pet. 4:13, 14) Iharuana, eda abidadama e hanamoamu bona e hagoadaiamu. (1 Pet. 1:7) Bona ihatoina, dava bada ahuna​—mauri hanaihanai​—baita abiamu.​—Roma 2:6, 7.

19. Dahaka dainai aposetolo taudia na e dadabadia murinai e moale?

¹⁹ Iesu e toreisi lou murinai, aposetolo taudia na ia ese e gwauraia moalena e mamia. E dadabadia bona e haginidia basie haroro murinai, idia na e moale. Dahaka dainai? “Badina be Iesu ladana bagunai hisi e ani.” (Apos. 5:40-42) Idia ese Biagudia e lalokau henia badava dainai, inaidia garidia na asie gariva. Bona edia lalokau na e hahedinaraia, sivarai namona iharorolaina karana na “asie hadokoa.” Hari tadikakada momo na dounu mai edia abidadama ida Iehova e hesiai heniamu ena be daḡedaḡe e davarimu. Mai dibadia Iehova ese edia ḡaukara bona edia lalokau ia ladana dainai na basine laloboiomu.​—Heb. 6:10.

20. Stadi gabena ai dahaka baita herevalaiamu?

²⁰ Tanobada ese be inai henidamu ela bona ina tanobada oromana be oremu. (Ioa. 15:19) To basita gari. Stadi gabena ai baita itaiamu, Iehova ese ‘baine haginida tutuka-tutuka, dika amo baine hamaurida.’ (2 Tes. 3:3) Una dainai, namona na Iehova, eda tadikaka taihu, bona inaida baita lalokau henidia. Bema una sisiba baita badinaiamu, maino ai baita nohomu bona lauma dalanai baita goadamu, Iehova baita hanamoamu, bona baita hamomokaniamu lalokau ese inai karana na e hereaia momokani.