1. Dahaka ese eda kara e biaguamu?

 ENA be vanegai mo ta bapatiso eiava laḡani momo gunadiai ta bapatiso, to ita iboudai na ta uramu Iehova ese e ura heniamu mauri dalana baita badinaia. Unu baita kara toma totona, namona na eda lalohadai dalana baita biagua. Dahaka dainai? Badina eda lalohadai ese eda kara e biaguamu. Bema hanaihanai tauani ena ura dikadia mo baita lalomu, eda hereva bona kara ai be hedinaraimu. (Efe. 4:17-19) To, bema ḡau namodia mo baita lalomu, eda hereva bona kara amo Tamada Iehova baita hamoaleamu.​—Gal. 5:16.

2. Ina atikol ai ededia henanadai baita herevalaimu?

² Atikol gunanai ta herevalaia heḡereḡerena, ita na dia heḡereḡere darada amo lalohadai dikadia iboudiai baita kokidia. To, unu lalohadai dikadia na baita dadaraidia diba. Do asita bapatiso neganai, namona na Iehova ese e inai henimu herevadia basita gwaurai bona karadia na basita kara. Una na mauri gunana baita kokia oho dalana ginigunana bona mai anina bada. Iehova baita hamoalea totona, namona na ina haheḡani baita badinaia: “Tau matamatana vada [ba] hahedokilaia.” (Kol. 3:10) Ina atikol ai, ini henanadai baita haerelaimu: “Tau matamatana” anina be dahaka? Edena dalai hanaihanai baita badinaia?

3. “Tau matamatana” o mauri matamata e badinaiamu tauna ena kara be ede bamona? (Galatia 5:22, 23)

³ “Tau matamatana” o mauri matamata e badinaiamu tauna na ena lalohadai dalana bona kara amo Iehova be tohotohoamu. Ia ese ena lalohadai, hemami bona kara amo Dirava ena lauma huahuadia be hahedinaraimu. (Galatia 5:22, 23  ba duahi.) Heḡereḡere, Iehova bona Iena taunimanima be lalokau henidiamu. (Mat. 22:36-39) Hahetoho negadiai dounu be moalemu. (Iak. 1:2-4) Ia na herohemaino tauna. (Mat. 5:9) Haida be kara henidiamu neganai, be haheaukamu bona kara namo be hahedinaraimu. (Kol. 3:13) Ia ese kara namo be ura henimu bona be karamu. (Luka 6:35) Ena kara amo be hamomokaniamu Tamana guba ai na e abidadama henia momokanimu. (Iak. 2:18) Haida ese be habaduamu neganai be manaumu bona hedibaḡani negadiai be boga aukamu.​—1 Kor. 9:25, 27; Tito 3:2.

4. Mauri matamata baita badinaia totona, dahaka dainai Galatia 5:22, 23 bona siri ma haida ai e gwaurai karadia baita hahedinaraidia hebou na namo? Ba herevalaia.

⁴ Mauri matamata baita badinaia totona, Galatia 5:22, 23 bona Baibul siridia ma haida ai e gwaurai karadia iboudiai baita hahedinarai na namo. * Unu kara iboudiai na nega tamonai baita hahedinaraidia hebou, ta basita reaia. Dahaka dainai? Badina unu kara namodia na kara ma haida ida baita hahedinaraidia hebou dibamu. Heḡereḡere, bema dekemu tauna na o lalokau henia momokanimu, oi na bo haheaukamu bona bo kara namo heniamu. Bona kara namodia ba hahedinarai totona, namona na ba manau bona ba boga auka.

5. Keriso “darana” baita abia anina be dahaka, bona dahaka dainai Iesu ena mauri baita stadilaia na namo? (1 Korinto 2:16)

⁵ Korinto Ginigunana 2:16 ba duahia. Mauri matamata baita badinaia totona, Keriso “darana” baita abia na namo. Anina na Iesu ena lalohadai dalana baita dibaia bena baita tohotohoa. Iesu ese Dirava ena lauma huahuadia na e hahedinarai ḡoevaḡoeva. Hevarivari ḡoevana heḡereḡerena, ia ese Iehova ena kara namodia iboudiai e hahedinarai ḡoevaḡoeva. (Heb. 1:3) Iesu ena lalohadai baita abiamu neganai, ena kara na baita tohotohoa namonamomu.​—Fili. 2:5.

6. Mauri matamata baita badinaia totona, dahaka baita laloatao na namo?

⁶ Iesu ena haheitalai baita tohotohoa diba, a? Reana baita lalomu: ‘Iesu na ḡoevadae. Lau ese ia na basina tohotohoa ḡoevaḡoeva dibamu!’ Bema oi na unu o hemami tomamu, ini hereva momokanidia ba lalodiatao. Ginigunana na, oi na Iehova bona Iesu heida-idadia e karamu. Una dainai, idia bo  tohotohodiamu, bona edia kara namodia na bo hahedinarai dibamu. (Gen. 1:26) Iharuana na, iunives ibounai lalonai Dirava ena lauma helaḡa ena siahu na bada herea. Bona ena heduru amo basio kara diba ḡaudia na bo haḡuḡuru dibamu. Ihatoina na, Iehova na mai dibana lauma huahuadia na basio hahedinarai ḡoevaḡoeva dibamu. Tamada lalokauna ese laḡani 1,000 lalonai tanobada helarona bae abia taudia be durudiamu ḡoevadae taudia ai baela totona. (Apok. 20:1-3) To hari ina negai Iehova na e uramu baita ḡaukara goada bona heduru iabina totona ienai baita tabekau.

7. Hari be dahaka baita herevalaimu?

⁷ Iesu be ede baita tohotohoa toma diba? Ita ese Dirava ena lauma huahuadia hani baita herevalaimu. Danu Iesu ese unu kara e hahedinarai daladia amo baita dibamu ḡaudia baita herevalaimu. Unu baita herevalaimu neganai, henanadai haida baita lalodiamu, unu ese be durudamu mauri matamata baita badinaia karana baita hanamoamu.

8. Iesu ese lalokau be ede e hahedinaraia toma?

⁸ Iesu ese Iehova na e lalokau henia bada dainai, Iena ura e badinaia bona ita daidai ena mauri e bouboulaia. (Ioa. 14:31; 15:13) Iesu na tanobada ai ena mauri dalana amo e hamomokania ia ese taunimanima na e lalokau henidia bada. Dina ta ta ai, lalokau bona hebogahisi e hahedinaraia, ena be haida ese e daḡedaḡe heniava. Taunimanima ediai lalokau e hahedinaraia dalana badana na, Dirava ena Basileia e hadibadia. (Luka 4:43, 44) Danu Iesu na mai ena ura ida sibona e heni, kara dika taudia ese bae hahisia bona bae hamasea, unu amo e hamomokania Dirava bona taunimanima na e lalokau henidia bada. Unu amo dala e kehoa ita iboudai ese mauri hanaihanai baita abia.

9. Edena dalai Iesu heḡereḡerena lalokau baita hahedinaraia?

⁹ Ita ese Tamada gubai na ta lalokau heniamu dainai, eda mauri na Ienai ta gwauhamatalaia bona ta bapatiso. Una dainai Iesu heḡereḡerena, taunimanima ta kara henidiamu dalana amo baita hahedinaraiamu Iehova na ta lalokau heniamu. Aposetolo Ioane na e gwa: “Tadikakana, e itaiamu tauna, na basinema ura henia, se itaiamu Diravana ede bema ura henia toma?” (1 Ioa. 4:20) Siboda baita henanadai diba: ‘Lau ese taunimanima na lalokau henidia badamu, a? Haida ese asie kara namo henigumu neganai, lau be hebogahisi na hahedinaraiamu, a? Lalokau dainai egu nega bona kohu na ḡaukaralaimu haida na durudiamu Iehova bae dibaia totona, a? Lau be mai egu ura ida unu na kara tomamu, ena be momo ese egu hekwarahi na asie laloamu eiava e daḡedaḡe henigumu, a? Hahediba ihalaodia ḡaukarana baina habadaia diba, a?’​—Efe. 5:15, 16.

10. Edena dalai Iesu na maino ikarana tauna?

¹⁰ Iesu na maino ikarana tauna. Taunimanima ese e kara auka heniava neganai, edia kara davana na se halouva. To dia una mo ia na ḡau ma haida danu e kara. Ia ese maino e karaia bona haida e hagoadadia edia heiri-heiri karadia bae hamaoromaoro. Heḡereḡere, e hadibadia tadikakadia ida bae herohemaino na namo, bema e uramu Iehova ese edia tomadiho karana baine abia dae. (Mat. 5:9, 23, 24) Bona aposetolo sibodia padadiai e hepapahuahuva daika baine herea neganai, Iesu ese e durudia loulouva una hepapahuahu bae hamaoromaoroa.​—Luka 9:46-48; 22:24-27.

11. Edena dalai herohemaino tauna ai baitala diba?

¹¹ Herohemaino tauna ai baitala totona, dia heiri-heiri e havaramu karadia mo baita dadarai.  To, namona na dala baita tahu haida ida baita maino bona eda tadikaka taihu baita haḡoadadia edia heiri-heiri karadia bae hamaoromaoro. (Fili. 4:2, 3; Iak. 3:17, 18) Siboda baita henanadai: ‘Lau be mai egu ura ida ḡau haida na dadaraimu haida ida baina herohemaino totona, a? Tadikaka eiava taihu ta ese lalogu e hahisiamu neganai, lau be dounu na badumu, eiava? Ta ese kerere e havaraiamu neganai, lau be baina nari ela bona ia ese maino baine karaia guna, eiava lau ese maino baina karaia guna na namo, a? Haida padadiai heiri-heiri e varamu neganai, lau be nega maorona ai na hagoadadiamu bae herohemaino, a?’

12. Iesu ese hebogahisi karana be ede e hahedinaraia toma?

¹² Iesu na kara namo e hahedinaraia. (Mat. 11:28-30) Metau negadia ai, e manau bona taunimanima edia namo e lalo bada karana amo hebogahisi e hahedinaraia. Heḡereḡere, Foenikia hahinena ese e noia natuna ena gorere baine hanamoa neganai, matamanai ena noinoi na se abia dae, to una hahine ese abidadama goadana e hahedinaraia neganai, Iesu na mai ena hebogahisi ida natuna ena gorere e hanamoa. (Mat. 15:22-28) Ena be Iesu na mai ena hebogahisi, to sisiba e heniva danu. Nega haida hebogahisi e hahedinaraiava dalana na, e lalokau henidiava taudia e sisiba auka henidiava. Heḡereḡere, Iesu na Iehova ena ura ikarana totona Petro ese lalona ihamanokana herevana e gwauraia neganai, Iesu ese hahediba ma haida vairadiai Petro e gwau henia. (Mar. 8:32, 33) Ia na unu e kara toma na dia Petro baine hahemaraia, to baine durua bona hahediba ma haida baine hadibadia basie hekokoroku. Momokani, Petro na e hemarai to una sisiba amo namo e davari.

13. Edena dalai kara namo baita hahedinarai diba?

¹³ O lalokau henidiamu taudia ediai hebogahisi ba hahedinaraia totona, nega haida ba sisiba henidia na namo. Unu o kara tomamu neganai, Baibul ena hahekau herevadia heḡereḡeredia ai sisiba ba heni unu amo Iesu ba tohotohoa. Ba manau na namo. Bavabia dae idia na e uramu kara maorona bae karaia, bona Iehova e lalokau heniamu bona oi e lalokau henimumu taudia ese emu sisiba namodia na be abi daemu. Sibomu ba henanadai: ‘Na lalokau heniamu tauna ta na itaiamu kerere e karaiamu neganai, mai egu lalogoada ida na hereva heniamu, a? Sisiba baina heni na namo neganai, lau be mai manaugu ida na herevamu eiava na hereva aukamu? Lau be dahaka badi dainai sisiba na henimu? Sisiba na henimu badina be e habadugu tauna na badu heniamu dainai, eiava na uramu ia baina durua, a?’

14. Iesu ese kara namo be ede e hahedinarai toma?

¹⁴ Iesu na dia kara namodia mo mai dibana, to unu kara na e hahedinaraiva danu. Iesu ese Tamana na e lalokau heniava dainai, hanaihanai badi maorodia daidiai kara maorodia e karava. Taunimanima namona na nega iboudiai dala be tahumu ma haida be durudiamu bona idia daidiai ḡau namodia be karamu. Kara maorona ikarana baita dibaia mo na dia heḡereḡere; namona na badi maorona dainai kara maorona baita karaia. Reana ta na be henanadaimu, ‘Kara maorona be badi kererena ta dainai baina karaia diba, a?’ Oibe. Heḡereḡere, Iesu ese ogoḡami taudia ediai harihari ḡaudia e heniva taudia e herevalaidia, idia na e urava e karava ḡaudia na haida ese bae ita bena bae hanamodia. Ena be unu na kara namodia, to Iehova na idia ediai se moale.​—Mat. 6:1-4.

15. Edena dalai kara namo baita hahedinaraia diba?

¹⁵ Ita ese kara namo na baita hahedinaraia dibamu bema siboda eda namo basita  lalomu to badi maorona dainai haida baita durudiamu. Reana sibomu bo henanadaimu: ‘Lau be kara maorona ikarana be mai dibagu bona karana na karaiamu, a? Dahaka badi dainai kara namodia na karamu?’

16. Dina ta ta ai dahaka baita kara be namo, bona dahaka dainai?

¹⁶ Basitato ta bapatiso neganai, mauri matamata na vada ta badinaia ḡuḡuru, una dainai kara ma haida baita kara na asi anina. Mauri matamata na “dabua matamatana” mai hairaina na heto baita naria namonamo. Una baita karaia dalana ta na, dina ta ta ai Dirava ena lauma huahuadia baita hahedinarai na namo. Dahaka dainai? Badina Iehova na ḡau iboudiai e karamu Diravana, bona iena lauma helaḡa na ḡaukara siahuna. (Gen. 1:2, NWT) Una dainai lauma helaḡa ena huahua ese be duruda dibamu kara ta baita karaiamu. Heḡereḡere, hahediba tauna Iakobo na e gwa: “Abidadama asi ena kara be vada e mase.” (Iak. 2:26, NWT) Dirava ena lauma huahuadia ma haida danu unu bamona. Dina ta ta ai ta hahedinaraimu neganai, ta hamomokaniamu Dirava ena lauma ese ita na e durudamu.

17. Dahaka baita kara na namo bema lauma huahuana baita hahedinaraia na auka?

¹⁷ Laḡani momo hereva momokani ai e noho Kristen taudia ediai nega haida na auka lauma huahuadia bae hahedinarai. To ḡau badana na basita hesiku. Mani ina haheitalai aita laloa. Bema o ura heniamu dabuana ta na o hahedarea, oi be maoromaoro bo negeamu, a? Lasi. Reana hedare gabuna mo bo turiamu. Bona bo henahua tohomu gabeai basine hedare lou totona. Una heḡereḡerena, bema nega haida emu ai na auka ta enai hebogahisi, haheauka, eiava lalokau ba hahedinaraia, basio lalomanoka. Mai kudoumu idoinai ida sori herevana bo gwauraiamu neganai, hekwakwanaina na bo hamaoromaoroa dibamu, bona emui hetura karana na be namomu. Bona lalomu ba hadaia emu kara na ba hanamoa.

18. Ita be dahaka ta diba momokanimu?

¹⁸ Ta moalemu badina Iesu ese haheitalai namona e hahedinaraia! Iena lalohadai dalana baita tohotohoamu neganai, edai na basine aukamu ena kara baita tohotohoa. Unu baita kara tomamu neganai, mauri matamatana na baita badinaia namonamomu. Ina atikol ai, Dirava ena lauma huahuadia hani mo tame herevalai. Nega bavato diba lauma huahuadia ma haida ba stadilai bona ba hahedinarai daladia ba lalodia. Una topik e herevalaia atikol ma haida ba davari totona, Research Guide for Jehovah’s Witnesses ai, hereva kwarana “Christian Life” henunai, “Fruitage of the Spirit” ba itaia. Namona na ba diba, bema bo hekwarahimu mauri matamata bo badinaiamu, Iehova ese be durumu dibamu.