Laḡani 1940 lalodiai, tamagu bona sinagu na Iehova ena Witnes ida Baibul e stadilaiava. Gabeai edia stadi na e hadokoa, to sinagu na dounu Watchtower bona Awake! magasin e abiva. Laḡani 1950 ai, New York City ai intanesinol hebouhebouna ta e heabi, bona egu ruma bese na una hebou ela.

Se daudau, Tadikaka Lawrence Jeffries na ai e vadivadi henimai matama. Ia na e ura lau baine durugu hereva momokani baina dibaia. Matamanai, na lalova namona na Iehova ena Witnes taudia na politikol karadia ai bae vareai bona bae tuari. Na gwa bema America ai e nohomu taudia iboudiai na tuari ai basie vareaimu, inaida ese eda tano be abiamu bona be biagudamu. Tadikaka Jeffries na e gwa: “O laloamu Iehova Dirava be dahaka baine kara, bema America ai taunimanima iboudiai na Ia isiaina bae lao heni bona inaidia ese bae tuari henidia?” E herevalai ḡaudia ese e durugu bona na laloparara egu lalohadai na kerere. Una dainai, na ura Baibul ena hereva momokani baina diba.

Hora momo lalodiai lau ese The Watchtower bona Awake! magasin gunadia, sinagu ese ruma henunai e habou ḡaudia, na duahiva. Gabeai na laloparara lau na hereva momokani na dibaiava, una dainai Tadikaka Jeffries ida Baibul na stadilaia, bona hanaihanai hebou na laova. Na dibava ḡaudia na moalelaiva dainai, sivarai namona iharorolaina tauna ai nala. Egu plen na e idau, badina na laloparara “Iehova ena dina badana vada [e] kahikahi.” (Sef. 1:14) Asina ura iunivesiti bainala, to na ura ma haida baina durudia Baibul ena hereva momokani bae dibaia.

 June 13, 1956 ai, haiskul amo na gradueit, bona dina toi muridiai, lau na seket hebouhebou ta ai na bapatiso. Asina diba lau na hahenamo momo baina abi badina egu mauri na ḡaukaralaiava Iehova na dibaiava bona ma haida ediai ia na herevalaiava.

Na bapatiso bena hua siks muridiai, regula painia ḡaukara na hamatamaia. December 1956 Kingdom Ministry ai atikol ladana “Can You Serve Where the Need Is Great?” ese lau na hagoadagu. Una dainai, na ura sivarai namona e harorolaiava taudia dia momo gabuna ai baina heduru.​—Mat. 24:14.

Lau na Edgefield nala, South Carolina ai. Unuseniai kongrigeisin ai pablisa na foa hona. Lau nala neganai taumai na da faiv. Emai hebou na tadikaka ta ena ruma ai a abiava. Hua ta ta ai, lau na haroro ḡaukara ai hora 100 na ḡaukaralaiva. Na bisiva badina haroro ḡaukara na gunalaiava bona kongrigeisin ai tok idauidau na heniva. To, kongrigeisin ai ḡaukara momo na karava neganai, egu diba Iehova enai na e bada e laova.

Taoni ta ladana Johnston ai, hahine ta ida Baibul na stadilaiava, ia na funeral home ta biaguna. Una hahine ese pat-taim ḡaukara haida e henigu bona ena bildin maraḡina ta e henimai baia ḡaukaralaia emai hebou baia abi totona.

Tadikaka Jolly Jeffries​—guna e stadi heniguva tadikakana natuna​—na Brooklyn, New York amo ema, bona raruosi a painia hebouva. Ai na tadikaka ta ese e henimai trailer maraḡina ta ai a nohova.

South kahanai ḡaukara taudia davadia na dia bada. Dina tamona a ḡaukarava davana na 2 dollar eiava 3 dollar e henimaiva. Nega ta, dekegu ai moni oredia na ḡaukaralai stoa ta ai aniani na hoi. Stoa amo na lasi neganai, tau ta na ema bena lau e vasi nanadaigu: “Oi be o uramu ba ḡaukara? Hora ta ba ḡaukara neganai 1 dollar ai baina peimu.” Bena dina toi na ḡaukarava konstraksen gabuna ta na haḡoevaiava. Na laloparara Iehova ese e duruguva Edgefield ai baina noho totona. Herevana egu moni na dia heḡereḡere, to laḡani 1958 New York City ena intanesinol hebouhebouna nala.

Hebouhebou dinana iharuana ai, ḡau namona ta e vara. Lau ese Ruby Wadlington na hedavari henia, ia na Gallatin, Tennessee ai regula painia ḡaukara e karaiava. Ai raruosi emai ura na misinari ḡaukara baia karaia dainai, una hebouhebou ai Gilead hebouna ala. Gabeai, ai na revareva amo a hetore heheniva. Nega ta lau na e boirigu Gallatin ai pablik tok baina heni. Una negai Ruby na nanadaia baine adavagu. Una murinai, na hanai Ruby ena kongrigeisin ai, bona laḡani 1959 ai a headava.

Laḡanigu e 23 neganai, lau na Gallatin ai congregation servant (hari e gwauraiamu elda  oreana ena kodineita) ai nala. Charles Thompson ese seket ḡaukara e karaia neganai, e vadivadia kongrigeisin ginigunana na aiemai kongrigeisin. Iena ekspiriens na bada; to e ura egu lalohadai baina gwauraia dainai e nanadaigu tadikaka be dahaka heduru bae abi be namo bona seket taudia haida ese kongrigeisin be ede e naridia tomava. Iena amo na diba henanadai ihenina karana na mai anina bada bona ḡau iboudiai na baita tahu namonamo guna, gabeai disisin baita kara be namo.

May 1964 ai, e boirigu hua tamona lalonai Kingdom Ministry School baina abia South Lansing, New York ai. Una skuli e hakauava tadikakadia ese e durugu dainai, na ura egu diba baina habadaia bona lauma dalanai baina goada.

January 1965 ai, lau bona Ruby na brens ese e noimai seket ḡaukara baia karaia. Emai seket ḡaukara ginigunana ai na ala Knoxville, Tennessee, amo ela Richmond, Virginia. Danu North Carolina, Kentucky, bona West Virginia edia kongrigeisin a vadivadidia. Lau na kopi korema taudia edia kongrigeisin mo na vadivadidiava badina una negai United States ena saut kahanai, kopi koremadia bona kurokurodia bae hebou tamona na taravatu. Tadikaka na ogoḡami ai e nohova, bona a urava baia durudia. Laḡani daudau seket ḡaukara e karaia tadikakana ta ese mai anina bada ḡauna ta e hadibagu, eto: “Kongrigeisin ta o vadivadiamu neganai, bosi ta heḡereḡerena basio kara. Idia na bo durudia dibamu bema tadikakadia ai bo laomu.”

Kongrigeisin maraḡina ta a vadivadia neganai, Ruby ese eregabe hahinena ta e stadi henia matama, una hahine natuna kekenina laḡanina na tamona. Kongrigeisin ai ta na dia heḡereḡere una hahine ena stadi baine karaia dainai, Ruby ese revareva amo e stadi heniava. Emai vadivadi iharuana ai, una hahine na hebou iboudiai e maiva. Gabeai, spesol painia taihu rarua na ema neganai, idia ese una hahine ena stadi e karaiava, bona se daudau ia na e bapatiso. Laḡani 30 muridiai, una na laḡani 1995 ai, Patterson Betele ai, eregabe taihu ta na Ruby e hereva heniava. Ia na guna Ruby ese e stadi heniava hahinena natuna. Una taihu bona adavana na Gilead Skuli ena klas namba 100 ela.

Emai seket ḡaukara iharuana na, central Florida ai. Bona ai na a ura motuka ta baia abia, una dainai dava maraḡi motukana ta a hoia. To, wiki ginigunana ai, motuka ena engine ḡauna ta e dika, bona emai moni na dia heḡereḡere baia hanamoa totona. Tadikaka ta na hadibaia baine durumai. Bena ia ese ena ḡaukara tauna ta e noia emai motuka e karaia bona se ura motuka e karaia davana baia heni. Tadikaka na ai e hamaoromai, “Namo, basio laloa.” Danu moni haida e henimai ena harihari ḡauna! Una na Iehova ese ena hesiai taudia e naridiamu dalana namona ta. Una ese e hadibamai haida ediai hariharibada karana baia hahedinaraia na namo.

Kongrigeisin ta a vadivadiava neganai, tadikaka edia ruma ai a nohova. Unu dainai turamai namodia momo a davaridia. Dina ta ai, lau na kongrigeisin ena ripoti na taipia to asina haḡuḡurua, bona typewriter ai na rakatania. Adorahina ai na lou neganai, na itaia a nohova ruma besena ai laḡanina toi merona ese typewriter e gadaralaia dainai, na torea ripotina na e hadikaia, una dainai ripoti ibounai ma na torea lou. Una kara na laḡani momo lalodiai lau ese ia enai na hevasehalaiava.

Laḡani 1971 ai, revareva ta na abia, una revareva ai e hadibagu New York City ai distrik ḡaukarana baina karaia. Ai na a hoa! Unu ala negana ai, lau laḡanigu na 34. Tadikaka ese lau, kopi korema district overseer ginigunana, na e welkam henigu.

Lau na district overseer dainai, seket hebouhebou ena wiken ta ta ai Iehova iherevalaina karana na moalelaiava. Seket taudia momo edia ekspiriens na bada. Idia ta na egu bapatiso tok e heni. Tadikaka ma ta be, Theodore Jaracz, gabeai ia na Gavanin Bodi ena memba ta ai ela. Danu mai edia ekspiriens tadikakadia momo na Brooklyn Bethel ai e ḡaukarava. Na moale badina seket taudia bona Betele taudia ese e durugu basina gari totona. Na itaia idia na mamoe ireḡudia taudia namodia, badina Dirava ena Hereva ai e tabekauva bona orea e durua namonamova. Edia manau karana  ese e hagoadagu distrik ḡaukarana baina karaia namonamo totona.

Laḡani 1974 ai, Gavanin Bodi ese seket taudia ma haida e abidia hidi distrik ḡaukarana bae karaia, bona lau ese seket ḡaukara ma na karaia lou South Carolina ai. Una negai tadikaka na e moale badina, kongrigeisin bona seket ai bese idauidau na vada e hebou tamonava.

Laḡani 1976 dokonai, e siaigu Georgia ai seket ḡaukara baina karaia, una na Atlanta bona Columbus padadiai. Na laloataomu, lau ese kopi korema maraḡidia 5 edia finerol tok ta na heni​—unu maraḡidia na haida ese edia ruma e gabua ai bena e mase. Idia sinadia be e bero dainai hospele ai e nohova. Tadikaka taihu koremadia bona kurokurodia na hospele e laova bae hagoadadia totona. Na itaia tadikaka edia lalokau na bada herea. Hebogahisi unu bamona ese Dirava ena hesiai taudia baine durudia diba hekwakwanai bae haheaukalai.

Laḡani 1977 ai, e noimai Brooklyn Betele ai baia noho bona hua haida lalodiai projek ta baia durua. Una projek e ore e laova neganai, Gavanin Bodi ena memba rarua ese e noigu bema lau bona Ruby na a uramu Betele ai baia noho. Una noinoi na a abia dae.

Lau na laḡani 24 Service Department ai vada na ḡaukara, unuseniai ai ese tadikaka edia henanadai badadia o aukadia a hamaoromaoromu. Laḡani momo lalodiai, Gavanin Bodi na Baibul ena hahekau herevadia heḡereḡeredia ai hahediba herevadia e henimu. Una ese Service Department taudia e durudia, tadikaka edia henanadai bae haerelai, bona seket taudia, elda taudia, bona painia taudia na treinin bae henidia. Unu treinin ese momo vada e durudia lo Kristen taudia ai ela. Bona una ese Iehova ena orea na e hagoadaiamu.

Laḡani 1995 ela 2018 ai, lau na headquarter representative (guna e gwauraiava zone overseer) dainai, brens idauidau na vadivadidia. Bona Brens Komiti, Betele taudia, bona misinari taudia ida na hebouva, unu amo na hagoadadiava bona na durudiava. Danu, tadikaka bona taihu ese edia ekspiriens e herevalai neganai, lau bona Ruby na e hagoadamai. Heḡereḡere, laḡani 2000 ai Rwanda ai a vadivadi. Unuseniai, tadikaka taihu bona Betele taudia ese laḡani 1994 ai e vara ala-ala karadia e haheaukalai sivaraidia a kamonai neganai, e hagoadamai bada. Idia momo na e lalokau henidia taudia e haboiodia. Herevana unu e vara, to unu tadikaka na abidadama bona helaro e hagoadaia, bona e moaleva.

Hari ai laḡanimai na 80 mai kahana. Laḡani 20 lalodiai, lau na United States ena Brens Komiti ḡaukarana na karaia. Ena be iunivesiti ta asinala; to Iehova bona ena orea amo edukeisin hereadaena na abia. Una ese e durugu Baibul ena hereva momokanidia na haida na hadibalaidia, bona unu hereva momokani ese idia na baine durudia hanaihanai diba. (2 Kor. 3:5; 2 Tim. 2:2) Baibul ena hereva ese taunimanima e durudia edia mauri e hanamo bona edia hetura karana Ihavaradia Tauna ida e hagoadaia daladia na lau ese na ita. (Iak. 4:8) Dala e hekehomu negadiai, lau bona Ruby ese haida a hagoadadiamu, Iehova idibana karana bae laloa bada, bona Baibul ena hereva momokanidia na haida bae hadibalaidia​—una na Iehova ena hesiai tauna ese e moalelaiamu hahenamo badana!