“Gabu idau-idau ai tano baine laḡa.”—LUKA 21:11.

● Haiti ai, taunimanima haida ese hua 16 bebina ladana, Winnie, na tano lalona amo e veria lasi. Una tano laga e ripotilaia TV nius tauna ta ese Winnie ena tai reḡena na e kamonai. Tano e laga neganai, Winnie be e mauri to tamana sinana be e mase.

E VARA MOMOKANI ḠAUDIA ESE DAHAKA E HAHEDINARAIAMU? January 2010 lalonai, Haiti ai, tano e laga (magnitude 7.0) neganai, taunimanima 300,000 mai kahana e mase. Bona taunimanima 1.3 milion na asi edia noho gabudia. Dia Haiti ai mo, to gabu idauidau ai tano e laga danu. April 2009 ela April 2010 lalodiai, gabu idauidau ai, tano laga badadia iboudiai 18 heḡereḡerena e vara.

TAUNIMANIMA MOMO BE DAHAKA E GWAUMU? Ena be iseda gabu ai tano na se lagamu, to hari ina negai teknoloji ḡaudia daidiai ta dibamu, gabu momo ai tano e lagamu, dia guna heḡereḡerena.

EDIA HEREVA BE MAORO, A? Mani ina e vara momokani ḡauna aita herevalaia: Baibul ese dina gabedia ai, tano laga hida bae vara na se gwauraia. To, Baibul na e gwaumu, “gabu idau-idau ai tano baine laḡa,” una ese hahedinaraiamu ita na dina gabedia ai ta nohomu.​​—Mar. 13:8; Luka 21:11.

OI BE DAHAKA O LALOAMU? Baibul ena peroveta herevana heḡereḡerena, “gabu idau-idau ai tano bae laga,” be matadai ta ita momokanimu, a?

Dia tano e lagamu karana ese e hamomokaniamu ita na dina gabedia ai ta nohomu. To danu, una ese e hahedinaraiamu peroveta herevana kahana ginigunana na vada e ḡuḡuru. Mani iharuana aita herevalaia.

[Blurb on page 4]

“Ai, [geophysicist] ese unu na a gwauraidiamu tano laga badadia. To taunimanima iboudiai ese unu na e gwauraidiamu ḡau dika rohorohodia.”​—KEN HUDNUT, U.S. GEOLOGICAL SURVEY.

[Picture Credit Line on page 4]

© William Daniels/Panos Pictures