•  Parol Introdiksion 2

•  Bann Trezor dan Parol Bondie 3-5

  •  Diskour 3

  •  Bann Perl Spiritiel 4

  •  Lektir Labib 5

•  Amelior To Bann Kapasite pou Ansegne 6-14

  •  Koumans enn Konversasion 7

  •  Vizit 8

  •  Fer Bann Disip 9

  •  Explik To Krwayans 10

  •  Diskour 11

  •  Konteni Bann Devwar 12

  •  Kad 13

  •  Itilizasion Bann Video ek Piblikasion 14

•  Nou Lavi Kretien 15-16

  •  Letid Biblik Lasanble 16

•  Parol Konklizion 17

•  Felisitasion ek Konsey 18

•  Letan 19

•  Vizit Responsab Sirkonskripsion 20

•  Semenn Lasanble Sirkonskripsion Ouswa Rezional 21

•  Semenn Komemorasion Lamor Zezi 22

•  Responsab Renion Lavi Kretien ek Predikasion 23

•  Prezidan Renion Lavi Kretien ek Predikasion 24

•  Konseye Adzwin 25

•  Bann Lasal Segonder 26

•  Video 27

1. Bann instriksion ki ena dan sa dokiman-la pou ed tou seki ena enn partisipasion dan renion Nou Lavi Kretien ek Nou Predikasion. Avan ki zot prepar zot size, bann ki ena enn partisipasion, zot ankouraze pou examinn bann instriksion ki konsern zot devwar dan Kaye Renion Lavi Kretien ek Predikasion ek dan sa dokiman-la. Nou ankouraz tou bann proklamater pou port zot volonter pou prezant bann devwar. Bann dimounn ki abitie asiste nou bann renion kapav fer devwar, si zot aksepte bann lansegnman ki ena dan Labib ek zot viv an-akor avek bann prinsip Labib. Si enn dimounn ki pa ankor vinn enn proklamater anvi fer devwar dan lekol, responsab renion Lavi Kretien ek Predikasion pou get avek li si li ranpli bann kondision pou inskrir li kouma zelev ek pou fer li kone si li kalifie. Proklamater ki fer letid sa dimounn-la, ouswa so papa ou so mama ki Temwin, pou bizin prezan kan responsab renion Lavi Kretien ek Predikasion pe koz ar li. Bann kondision pou fer devwar zot parey kouma bann kondision pou vinn enn proklamater ki pa batize.—od-F sap. 8 par. 8.

2. Enn minit. Sak semenn, apre kantik ek lapriyer koumansman, prezidan Renion Lavi Kretien ek Predikasion pou donn enn avangou program ki pou swiv. Prezidan bizin konsantre lor bann pwin ki pou plis ed lasanble.

  3. Diskour: Dis minit. Dan Kaye Renion Lavi Kretien ek Predikasion ena enn tem ek enn plan avek de ouswa trwa pwin prinsipal pou sa parti-la. Se enn ansien ouswa enn serviter lasanble ki kalifie ki pou fer sa diskour-la. Kan koumans enn nouvo liv Labib, dapre program lektir Labib pou lasemenn, pou zwe video introdiksion pou sa liv-la. Frer-la kapav fer enn lien ant video-la ek tem-la. Selman, li bizin fer sir ki li kouver tou bann pwin ki ena dan nou kaye renion. Ek, dapre letan ki reste, li bizin fer enn bon litilizasion bann zimaz ki ena enn lien ar size-la. Li kapav servi bann lezot referans ki pou ed li devlop bann pwin inportan.

 4. Bann Perl Spiritiel: Dis minit. Sa parti-la pou fer par kestion-repons. Fode pa fer enn lintrodiksion ni enn konklizion. Se enn ansien ouswa enn serviter lasanble ki kalifie ki pou fer sa parti-la. Frer ki pou fer sa parti-la bizin poz toule-de kestion. Li pou osi deside si bizin lir bann verse ki’nn site dan referans ouswa non. Lasistans bizin fer bann komanter 30 segonn maximum.

 5. Lektir Labib: Kat minit. Sa devwar-la pou fer par enn garson ouswa enn misie. Zelev-la pou lir porsion Labib ki’nn donn li. Fode pa li fer enn lintrodiksion ni enn konklizion. Prezidan renion pou sirtou ed bann zelev pou lir dan enn fason exakt, natirel ek kler, konpran bien seki li pe lir, met laksan lor bann mo inportan, varye so lavwa ek fer bann poz kot bizin. Ena bann lektir Labib ki kourt ek lezot ki pli long, alor responsab Renion Lavi Kretien ek Predikasion bizin pran an konsiderasion kapasite ki bann zelev ena kan li pe donn bann devwar.

6. Kinz minit. Sa parti-la inn fer pou donn zot tou lokazion pou antrenn zot pou zot predikasion ek amelior zot kapasite pou koz ar bann dimounn, pou prese ek ansegne. Si li neseser, bann ansien kapav fer bann devwar zelev. Sak zelev pou travay lor enn pwin ki ena dan brosir Lansegnman ouswa Lamour Motiv Nou ki site dan Kaye Renion Lavi Kretien ek Predikasion. Parfwa, enn size avek partisipasion lasistans pou programe pou sa parti-la. Sa size-la pou fer par enn ansien ouswa enn serviter lasanble ki kalifie.—Pou kone kouma diriz size avek partisipasion lasistans get  paragraf 15.

 7. Koumans enn Konversasion: Sa devwar-la pou fer par enn zelev maskilin ou feminin. Interlokiter-la bizin mem sex ouswa enn manb so fami. Zelev-la ek interlokiter-la kapav asize ouswa deboute kan zot pe fer devwar. —Pou gagn plis ransegnman lor konteni ek kad sa devwar-la, get  paragraf 12 ek  13.

 8. Vizit: Sa devwar-la pou fer par enn zelev maskilin ou feminin. Interlokiter-la bizin mem sex. (km-F 5/97 p. 2) Zelev-la ek interlokiter-la kapav asize ouswa deboute kan zot pe fer devwar. Dan sa parti-la, zelev-la bizin montre ki pou dir kan pe fer enn vizit.—Pou gagn plis ransegnman lor konteni ek kad sa devwar-la, get  paragraf 12 ek  13.

 9. Fer Bann Disip: Sa devwar-la pou fer par zelev maskilin ou feminin. Interlokiter-la bizin mem sex. (km-F 5/97 p. 2) Zelev-la ek interlokiter-la kapav asize ouswa deboute kan zot pe fer devwar. Sa devwar-la bizin montre enn letid Labib ki’nn fini koumanse. Fode pa ki zelev-la fer enn introdiksion ouswa enn konklizion amwin ki li bizin travay lor sa bann pwin-la. Mem si kapav fer li, li pa neseser lir bann paragraf ki’nn done kouma referans.

 10. Explik To Krwayans: Kan indike ki bizin devlop sa size-la kouma enn diskour, enn zelev maskilin pou fer li. Kan indike ki bizin devlop sa size-la kouma enn demonstrasion, enn zelev maskilin ou feminin kapav fer sa devwar-la. Interlokiter-la bizin mem sex ouswa enn manb so fami. Zelev-la pou itiliz bann lide ki ena dan enn piblikasion ki’nn done kouma referans pou reponn enn kestion tem dan enn fason kler ek avek takt. Zelev-la pou deside si li pou mansionn piblikasion ki’nn done kouma referans la kan li pe fer so devwar ouswa non.

 11. Diskour: Sa devwar-la pou fer par enn zelev maskilin. Li pou fer li kouma enn diskour dan lasanble. Kan diskour-la baze lor enn lide ki trouv dan Seksion A brosir Lamour Motiv Nou, zelev-la pou montre kouma itiliz sa verse Labib ki’nn done kouma referans la dan predikasion. Par exanp, li kapav explike seki sa verse-la vedir, kan pou itiliz li ek kouma rezonn avek enn dimounn lor sa verse-la. Kan diskour-la baze lor enn lide dan enn leson brosir Lamour Motiv Nou, zelev-la bizin montre kouma pou aplik sa lide-la dan predikasion. Li kapav met laksan lor lexanp ki’nn site dan pwin 1 sa leson-la ouswa, si li neseser, li kapav met laksan lor bann verse siplemanter ki ena dan sa leson-la.

   12. Konteni Bann Devwar: Bann instriksion ki ena dan sa paragraf-la ek paragraf apre konsern bann devwar pou “Koumans enn Konversasion” ek “Vizit”. Amwin ki ena lezot instriksion, zelev-la pou bizin montre enn verite ki ena dan Labib ki pou interes interlokiter-la ek prepar terin pou bann konversasion ki li pou fer plitar. Zelev-la pou swazir enn size ki interes bann dimounn dan teritwar ek ki finn permet gagn bon rezilta. Li kapav swazir pou prezant ouswa pou pa prezant enn piblikasion ou enn video ki ena dan Nou Kes Zouti pou Ansegne. Olie ki zot resit enn size ki zot inn aprann par-ker, bann zelev pou esey amelior zot bann kapasite pou koz ar bann dimounn ek antrenn zot pou devlop bann kalite kouma montre lintere sinser ek koz dan enn fason natirel.

   13. Kad: Zelev-la pou bizin adapte kad ki’nn indike ar kontex lokal. Par exanp:

1.  (1) Lakaz-Lakaz: Dan sa kad-la pou fer predikasion lakaz-lakaz—ki li an personn, par telefonn ouswa par let—ek kapav kontign enn konversasion ki nou ti gagne dan predikasion lakaz-lakaz.

2.  (2) Prese dan enn Fason Informel: Lobzektif sa kad-la se pou montrer kouma pou sezi bann lokazion pou sanz enn konversasion ki banal ek fer li vinn enn temwaniaz. Kapav fer sa kan zot partaz enn verse Labib ar enn dimounn ki zot zwenn dan travay, lekol, landrwa kot zot reste, dan transpor piblik, ouswa kan zot pe al fer bann laktivite ki zot abitie toulezour.

3.  (3) Prese dan Bann Plas Piblik: Dan sa kad-la kapav fer prezantwar, rann temwaniaz dan lari, dan bann plas kot bann dimounn travay, ouswa dan bann park, dan bann parking ou ninport kotsa kapav trouv bann dimounn.

 14. Itilizasion Bann Video ek Bann Piblikasion: Dapre sitiasion, enn zelev kapav deside pou montrer enn video ouswa pou prezant enn piblikasion. Si zelev-la swazir pou montrer enn video ouswa enn piblikasion ou si sa fer parti dan so devwar, li pou bizin montrer li ek diskit lor la san ki li zwe video-la.

15. Apre kantik, 15 minit ki pou swiv pou ena enn ouswa de size pou ed lasistans met an pratik Parol Bondie. Amwin ki ena lezot instriksion, se enn ansien ouswa enn serviter lasanble ki kalifie ki pou fer sa bann parti-la. Kan ena bezwin pou lasanble lokal se enn ansien ki pou fer sa parti-la. Kan ena enn size avek partisipasion lasistans, frer ki pe dirize la kapav poz bann kestion anplis ki seki ena dan lartik-la, pandan ki li pe fer so size. Li bizin fer enn kourt introdiksion pouki ena ase letan pou devlop bann pwin prinsipal ek pou ki lasistans kapav partisipe. Si finn prevwar pou fer enn interview, si posib, li preferab ki sa dimounn ki pe interviewe la mont lor lestrad pou exprim li plito ki li res asize dan so plas.

  16. Letid Biblik Lasanble: Trant minit. Se enn ansien ki kalifie ki pou fer sa parti-la. (Dan bann lasanble kot pena boukou ansien, si bizin, se enn serviter lasanble ki kalifie ki kapav fer sa parti-la.) Se komite bann ansien ki pou deside kisannla ki kalifie pou diriz Letid Biblik Lasanble. Bann frer ki’nn swazir pou fer sa, bizin diriz sa letid-la dan enn fason efikas pou terminn dan ler, met laksan lor bann verse inportan, ek ed sakenn dan lasistans pou trouv valer pratik bann diferan pwin ki’nn examine. Sa bann frer-la pou trouv sa itil pou reget bann instriksion ki’nn pibliye lor fason ki diriz enn parti renion kot ena partisipasion lasistans. (w23.04 p. 24, lankadre) Si li’nn fini bien examinn tou bann lide ki ena dan letid pou sa semenn-la dans mwins letan ki’nn prevwar, li pa neseser fer letid-la dire pli lontan. Si li posib, sak semenn, pou dezign diferan frer pou diriz sa parti-la ek pou fer lektir. Si prezidan Renion Lavi Kretien ek Predikasion demann pou diminie letan ki konsakre pou sa parti-la, lerla frer ki pe diriz letid Biblik la pou deside kouma li pou fer pou pran mwins letan. Li kapav deside pou pa lir sertin paragraf.

17. Trwa minit. Prezidan Renion Lavi Kretien ek Predikasion pou fer enn revizion bann pwin inportan sa renion-la. Li bizin osi donn enn avangou seki pou ena dan renion semenn prosenn. Si letan permet, li kapav anons nom bann zelev ki pou fer devwar semenn prosenn. Amwin ki ena lezot instriksion, si bizin pou fer bann lanons ek lir bann let, prezidan-la pou fer li pandan so bann parol konklizion. Fode pa fer bann lanons kouma randevou predikasion ek netwayaz lasal, me pou met sa bann linformasion-la lor tablo. Si prezidan renion pena ase letan pandan bann parol konklizion pou fer tou bann lanons ouswa lir tou bann let, li pou demann bann frer ki ena bann size dan parti Nou Lavi Kretien pou diminie zot letan dapre kantite ki bizin. (Get  paragraf 16 ek  19.) Renion pou fini avek kantik ek lapriyer.

18. Apre devwar sak zelev, prezidan Renion Lavi Kretien ek Predikasion ena anviron enn minit pou felisit ek konsey bann zelev dapre pwin ki li’nn gagne pou travay. Kan prezidan pe anons devwar ki enn zelev pou fer, li pa pou dir ki pwin zelev-la bizin travay. Me selman, kan zelev-la fini fer so devwar ek apre bann felisitasion ki apropriye, prezidan kapav dir ki pwin zelev-la ti bizin travay. Lerla, li pou explike kifer zelev-la finn bien travay so pwin ouswa avek takt explike kifer ek kouma zelev-la bizin kontign travay lor sa pwin-la. Prezidan kapav osi koz lor lezot parti demonstrasion-la, si li panse ki sa pou itil pou zelev-la ou lasistans. Li kapav donn lezot konsey ankourazan an prive ki baze lor brosir Lamour Motiv Nou, brosir Lansegnman ouswa liv École du ministère, apre renion ouswa dan enn lot moman. Bann konsey-la kapav baze lor pwin ki zelev-la ti ena pou travay ouswa enn lot pwin.​—Pou plis linformasion lor rol prezidan Renion Lavi Kretien ek Predikasion ek rol konseye adzwin, get  paragraf 19,  24 ek  25.

19. Fode pa ki okenn parti depas letan, mem pa bann komanter ki prezidan Renion Lavi Kretien ek Predikasion pou fer. Mem si dan Kaye Renion Lavi Kretien ek Predikasion inn presize letan ki enn size bizin dire, si finn pran mwins letan pou devlop tou bann lide ki ti bizin, li pa neseser ki zelev-la azout bann lezot lide zis pou kouver letan ki ti prevwar. Si bann lezot parti renion depas letan, prezidan Renion Lavi Kretien ek Predikasion ouswa konseye adzwin pou bizin donn bann konsey an prive. (Get  paragraf 24 ek  25.) Renion an-antie, ansam avek bann kantik ek bann lapriyer, bizin dir enn-er tan 45 minit.

20. Kan responsab sirkonskripsion vizit enn lasanble, renion pou deroule parey kouma ena dan Kaye Renion Lavi Kretien ek Predikasion me avek sertin sanzman: Dan plas Letid Biblik Lasanble ki trouv dan parti Nou Lavi Kretien, responsab sirkonskripsion pou fer enn diskour servis ki pou dir 30 minit. Avan diskour servis, prezidan Renion Lavi Kretien ek Predikasion pou fer enn revizion renion ki fek gagne, donn enn avangou pou renion semenn prosenn, si bizin li pou fer bann lanons, lir bann let, ek apre sa li pou prezant responsab sirkonskripsion. Apre diskour servis, responsab sirkonskripsion pou fini renion avek kantik ki li’nn swazir. Li kapav demann enn lot frer pou fer lapriyer konklizion. Pandan vizit responsab sirkonskripsion pa pou ena devwar dan okenn lasal segonder, dan lang sa lasanble-la. Si ena enn group ki asosie ar sa lasanble-la, zot kapav fer zot renion. Me selman, group lang-la pou rezwenn ansam avek zot lasanble pou diskour servis responsab sirkonskripsion.

21. Pandan semenn lasanble sirkonskripsion ouswa rezional, pa pou ena okenn renion. Bizin rapel lasanble ki zot kapav examinn bann size ki ena pou renion sa semenn-la personelman ouswa an fami.

22. Si Komemorasion Lamor Zezi tom enn zour lasemenn, pa pou ena Renion Lavi Kretien ek Predikasion.

23. Se komite bann ansien ki pou swazir enn ansien pou servi kouma responsab Renion Lavi Kretien ek Predikasion. Li bizin veye ki renion-la bien organize ek fer dapre sa bann instriksion-la. Li pou fer zefor pou ena enn bon kominikasion avek konseye adzwin. Kouma Kaye Renion Lavi Kretien ek Predikasion disponib, responsab Renion Lavi Kretien ek Predikasion pou swazir kisannla pou fer sak parti ki ena dan sa kaye renion-la lor enn peryod de mwa. Sa inplik bann devwar zelev, bann size ki pa fer parti bann devwar zelev, ek swazir prezidan pou sak semenn parmi bann frer ki’nn aprouve par komite bann ansien. (Get  paragraf 3 ziska 16 ek  24.) Kan li pou swazir kisannla li pou donn bann devwar zelev, li bizin pran an konsiderasion laz zelev-la, so lexperyans, ek so kapasite pou koz lor size ki pe atribie li la. Li pou ena mem reflexion kan li pou atribie bann lezot parti sa renion-la. Bizin inform tou bann partisipan omwin trwa semenn avan dat zot partisipasion. Pou bizin itiliz form Devwar pou Renion Nou Lavi Kretien ek Nou Predikasion (S-89) pou bann devwar zelev. Responsab Renion Lavi Kretien ek Predikasion pou fer sir ki met enn kopi konple program renion lor tablo. Komite bann ansien kapav swazir enn lot ansien ouswa enn serviter lasanble pou ed li. Me selman, zis bann ansien ki kapav swazir bann frer ki pou fer bann size, ki pa bann devwar zelev.

24. Sak semenn, enn ansien pou fer prezidan pou Renion Lavi Kretien ek Predikasion. (Dan bann lasanble kot pena boukou ansien, si bizin, se enn serviter lasanble ki kalifie ki kapav fer li.) Li bizin prepar bann parol introdiksion ek konklizion pou sa renion-la. Li pou osi anons bann lezot parti ki ena dan renion. Dapre kantite frer ki ena dan komite bann ansien, kitfwa li pou bizin prezant bann lezot parti dan renion, kouma par exanp bann size kot bizin zis zwe enn video ek kot pena partisipasion lasistans. Bann parol ki li dir ant sak parti bizin kourt. Se komite bann ansien ki pou deside kisannla ki kalifie pou fer prezidan. Sak semenn, diferan ansien ki kalifie pou asim sa responsabilite-la. Dapre sirkonstans enn lasanble, kitfwa kapav servi responsab Renion Lavi Kretien ek Predikasion kouma prezidan pli souvan ki lezot ansien ki kalifie. Si enn ansien kalifie pou diriz Letid Biblik Lasanble, alor li kalifie pou fer prezidan pou renion. Me selman, ansien ki fer prezidan bizin rapel ki li bizin felisit bien bann zelev, ek si bizin, avek lamour donn zot bann konsey ki itil. Prezidan bizin fer sir ki renion fini dan ler. (Get  paragraf 17 ek  19.) Si ena ase lespas lor lestrad ek si prezidan anvi, kapav met enn deziem mikro akote pou li kapav prezant frer ki pou fer prosin parti. Lerla frer ki ena so size kapav pran plas touzour. Si prezidan anvi, li kapav osi demann pou met enn latab ek enn sez lor lestrad pou li asize pandan lektir Labib ek parti Amelior To Bann Kapasite Pou Ansegne. Se enn fason pou pa perdi letan.

25. Kan li posib, li bon ki swazir enn ansien ki enn orater ki ena lexperyans pou fer konseye adzwin. Responsabilite konseye adzwin, se pou konsey an prive bann ansien ek bann serviter lasanble, si bizin. Li kapav konsey zot konsernan bann size ki zot ti ena dan Renion Lavi Kretien ek Predikasion, diskour piblik, fason diriz Letid Latour Degard ek Letid Biblik Lasanble, ou lektir bann paragraf. (Get  paragraf 19) Si dan enn lasanble ena plizir ansien ki bann bon orater ek ansegnan, lerla sak lane kapav servi diferan ansien ki kalifie kouma konseye adzwin. Li pa neseser ki konseye adzwin donn bann konsey apre sak size.

26. Dapre kantite zelev ki ena, bann lasanble kapav deside si pou ena enn lasal segonder pou bann devwar zelev. Sak lasal segonder bizin ena enn konseye kalifie, li pli bon si li enn ansien. Si bizin, enn serviter lasanble ki kalifie kapav asim sa responsabilite-la. Se komite bann ansien ki pou deside kisannla kalifie pou asim sa responsabilite-la ek si diferan frer pou fer sa. Konseye-la bizin swiv bann instriksion ki ena dan  paragraf 18. Si ena enn lasal segonder, demann bann zelev ki ena devwar pou al dan lasal segonder zis apre parti Bann Perl Spiritiel ki trouv dan seksion Bann Trezor dan Parol Bondie. Zot bizin rezwenn ansam avek zot lasanble apre ki dernie zelev inn fer so devwar pou renion.

27. Pandan sa renion-la, pou servi bann video presi. Bann video-la pou disponib lor aplikasion JW Library® ek kapav servi diferan laparey elektronik pou zwe zot.

© 2023 Watch Tower Bible and Tract Society of Pennsylvania

S-38-CE 11/23