LARTIK LETID 21
KANTIK 107 Lexanp Bondie lor Lamour
Kouma To Kapav Swazir enn Bon Konzwin?
“Kisann-la kapav trouv enn bon madam? Bon madam-la ena boukou plis valer ki bann koray.”—PROV. 31:10.
PWIN PRINSIPAL
Dan sa lartik-la, nou pou get bann prinsip Labib ki kapav ed bann selibater pou trouv enn bon konzwin. Nou pou gete osi kouma bann frer ek ser dan lasanble kapav ankouraz ek ed bann selibater ki anvi marye.
1-2. (a) Avan ki enn kikenn koumans frekante, lor ki kitsoz li bizin reflesi? (b) Ki savedir frekante? (Get “Expresion Ki’nn Explike.”)
ESKI to anvi marye? Mem si enn kikenn pa oblize marye pou ki li ere, boukou Kretien ki selibater, ki zot zenn ouswa vie, anvi marye. Selman, avan ki enn kikenn desid pou frekante, li bizin ena enn bon lamitie ar Zeova, li bizin konn limem bien, ek li bizin sir ki li pou kapav donn so konzwin seki li bizin. a (1 Kor. 7:36) Si to ranpli sa bann kondision-la, to pou kapav ena enn lavi maryaz ki ere.
2 Selman, li pa touletan fasil pou trouv enn bon konzwin. (Prov. 31:10) Ek mem si to’nn trouv enn kikenn, li pa touletan fasil pou frekante. b Dan sa lartik-la, nou pou trouve seki kapav ed bann Kretien selibater pou trouv enn bon konzwin ek pou koumans frekante. Nou pou trouve osi kouma bann frer ek ser dan lasanble kapav ankouraz ek ed bann ki anvi marye.
TROUV ENN BON KONZWIN
3. Avan ki enn Kretien rod enn kikenn pou marye, lor ki kitsoz li bizin reflesi?
3 Si to anvi marye, avan ki to koumans frekante, to bizin kone ki bann kalite to anvi to fitir konzwin ena. Kifer? Parski si tomem to pa konn sa, to kapav rat lokazion pou frekant enn kikenn ki ti pou al bien ar twa, ouswa to kapav koumans frekant enn kikenn ki pa adapte ar twa. Biensir, kan to swazir enn kikenn, li bizin enn Kretien ki batize. (1 Kor. 7:39) Selman, pa tou Kretien ki batize ki pou fer enn bon konzwin pou twa. Akoz sa, to bizin demann tomem: ‘Ki kitsoz mo anvi? Ki bann lobzektif mo ena? Ki bann kalite mo fitir konzwin bizin ena? Eski seki mo pe rode, li rezonab ouswa li exazere?’
4. Ki kitsoz sertin inn demande dan zot lapriyer?
4 Si to anvi trouv enn kikenn pou marye, nou sir ki to’nn priye Zeova lor la. (Fil. 4:6) Biensir, Zeova pa’nn promet bann selibater ki Li pou trouv enn kikenn pou zot. Selman, to kapav sir ki Li konn to santiman, Li pou donn twa seki to bizin, ek Li pou ed twa kan to pe rod enn kikenn pou marye. Alor, kontign dir Zeova seki to resanti. (Ps. 62:8) Demann Li pasians ek sazes. (Zak 1:5) John, c enn frer selibater ki res Letazini, explike seki li demann Zeova dan so lapriyer. Li dir: “Mo ti dir Zeova bann kalite mo anvi mo fitir konzwin ena. Mo ti priye Li pou mo reisi zwenn enn kikenn ki serye. Mo ti osi demann Li pou ed mwa devlop bann kalite ki pou fer mwa vinn enn bon mari.” Tanya, enn ser ki res Sri Lanka, dir: “Pandan ki mo pe rod enn kikenn pou marye, mo demann Zeova pou ed mwa pou res fidel anver Li ek pou gard mo lazwa.” Me si to pa pe reisi trouv enn kikenn pou marye, ki kitsoz to kapav sir? To kapav sir ki Zeova pou donn twa seki to bizin lor plan fizik ek emosionel.—Ps. 55:22.
5. Kan eski bann selibater kapav zwenn bann lezot selibater ki kontan Zeova? (1 Korintien 15:58) (Get zimaz osi.)
5 Labib ankouraz nou pou ena “touzour boukou pou fer dan travay Lesegner.” (Lir 1 Korintien 15:58.) Si to res bien okipe dan to servis pou Zeova, to pou kapav pas letan ar boukou frer ek ser ki pou ankouraz twa. Anplis, to pou osi gagn lokazion pou zwenn bann lezot selibater ki parey kouma twa, pe fer zot maximum pou servi Zeova. To kapav sir ki to pou vremem ere si to kontign fer tou seki to kapav pou servi Zeova.
Si to res bien okipe dan to servis pou Zeova, to pou kapav zwenn boukou frer ek ser ek zwenn osi bann selibater ki anvi marye (Get paragraf 5)
6. Si to pe rod enn kikenn pou marye, ar ki kitsoz to bizin fer bien atansion?
6 Selman, si to pe rod enn kikenn pou marye, ena enn kitsoz ki to bizin fer bien atansion: Fode pa to les sa vinn kitsoz pli inportan dan to lavi. (Fil. 1:10) Se nou lamitie ar Zeova ki rann nou ere, pa si nou marye ouswa non. (Mat. 5:3) Pa bliye osi ki, kan to selibater, to kapav pas plis letan dan predikasion. (1 Kor. 7:32, 33) Alor, servi bien to letan. Jessica, enn ser ki res Letazini ek ki’nn marye kan li ti ena apepre 40 an, dir: “Mo ti res bien aktif dan predikasion, ek sa ti rann mwa ere mem si mo ti anvi marye.”
PRAN LETAN POU APRANN KONN DIMOUNN-LA
7. Avan ki to dir enn kikenn seki to resanti pou li, kifer li pli bon ki to aprann konn li? (Proverb 13:16)
7 Ki to bizin fer si to panse ki enn kikenn pou enn bon konzwin pou twa? Eski deswit to bizin dir li seki to resanti pou li? Labib dir ki enn kikenn ki ena sazes, li pa azir lor enn kout-tet; li reflesi bien avan li azir. (Lir Proverb 13:16.) Alor, li pli bon ki to aprann konn dimounn-la, avan ki to dir li seki to resanti. Selman, aprann konn dimounn-la pa vedir ki to bizin koz ar li ouswa pas letan ar li. To pou konn pli boukou kitsoz lor li si par exanp, to gete kouma li azir ek kouma li tret bann frer ek ser. Aschwin, ki res Oland, dir: “Bann santiman kapav devlop bien vit, ek zot kapav disparet bien vit osi. Akoz sa, pran letan pou aprann konn dimounn-la bien. Koumsa, to pa pou koumans frekante zis akoz bann santiman ki kapav disparet apre.” Anplis, si to pran letan pou aprann konn enn kikenn, kitfwa to pou rann twa kont ki sa dimounn-la pa pou enn bon konzwin pou twa.
8. Si to selibater, kouma to kapav aprann konn enn kikenn? (Get zimaz osi.)
8 Kouma to kapav aprann konn enn kikenn san ki li kone? Kan zot dan renion ouswa dan bann ti program, to kapav remarke ki kalite dimounn li ete. Eski li enn kikenn ki kontan Zeova? Eski li konport li bien ar lezot? Ki kalite kamarad li ena, ek lor ki kitsoz li koze? (Lik 6:45) Eski zot ena mem lobzektif? To kapav osi koz ar bann ansien so lasanble ouswa ar bann Kretien ki ena lexperyans ek ki konn li bien. (Prov. 20:18) To kapav demann zot si li ena bann zoli kalite ek enn bon repitasion. (Rit 2:11) Selman, kan to pe aprann konn sa dimounn-la, fer an-sort ki to pa met li malalez. Respekte osi so santiman ek so lavi prive.
Avan ki to dir enn kikenn ki to interese ar li, pran letan pou aprann konn dimounn-la (Get paragraf 7-8)
9. Avan ki to al get enn kikenn pou to dir li seki to resanti, ki kitsoz to bizin sir?
9 Pandan komie letan to bizin aprann konn enn kikenn avan ki to dir li seki to resanti pou li? Si to dir dimounn-la tro boner ki to interese ar li, li kapav panse ki to’nn azir san reflesi. (Prov. 29:20) Parkont, si dimounn-la inn remarke ki to interese ar li, me ki to pe pran tro boukou letan pou al koz ar li, li kapav panse ki to pa serye ek ki to pa kone seki to anvi. (Ekle. 11:4) Rapel sa osi: To pa bizin atann ki to sir ki to anvi marye ar enn kikenn, pou to al koz ar li. Selman, to bizin sir ki to’nn pare pou lavi maryaz ek ki sa dimounn-la pou enn bon konzwin pou twa.
10. Ki to bizin fer si to rann twa kont ki enn kikenn interese ar twa, me ki twa to pena santiman pou li?
10 Me ki to bizin fer si to rann twa kont ki enn kikenn interese ar twa? Si to pena santiman pou li, esey montre li par to bann aksion ki to pa interese ar li. Li pa pou korek ki to donn dimounn-la lespwar, alor ki to kone ki to pa interese ar li.—1 Kor. 10:24; Efe. 4:25.
11. Si demann twa pou fer agwa, ki kitsoz to bizin rapel?
11 Dan sertin pei, se bann paran ouswa bann lezot dimounn ki deside ar kisann-la enn selibater pou marye. Ek dan lezot pei, se bann fami ouswa bann kamarad ki rod enn kikenn pou enn selibater. Lerla, zot fer sa de dimounn-la zwenn pou zot gete si zot al bien ar zot kamarad. Si demann twa pou fer agwa, setadir pou rod enn kikenn pou enn selibater, to bizin pran kont seki toule-de selibater pe rode kot enn fitir konzwin. Si to panse ki enn kikenn pou fer enn bon konzwin pou enn kamarad ouswa enn fami, aprann konn sa dimounn-la bien, gete si li ena bann zoli kalite, me pli inportan gete si li ena enn bon lamitie ar Zeova. Enn bon lamitie ar Zeova, li boukou pli inportan ki kas, ledikasion, ouswa pozision sosial. Pa bliye osi ki se sa de selibater-la ki bizin deside si zot pou marye ouswa non.—Gal. 6:5.
KOUMANS FREKANTE
12. Si to anvi koumans frekante ar enn kikenn, ki to kapav fer?
12 Si to anvi koumans frekante ar enn kikenn, ki to kapav fer? d To kapav swa koz ar li lor telefonn, swa zwenn li dan enn landrwa piblik, pou fer li konpran ki to ena bann santiman pou li. (1 Kor. 14:9) Si dimounn-la bizin reflesi, donn li letan. (Prov. 15:28) Ek si li pa interese pou frekant ar twa, respekte so santiman.
13. Kouma to bizin reazir si enn kikenn dir twa ki li interese ar twa? (Kolosien 4:6)
13 Kouma to bizin reazir si enn kikenn dir twa ki li interese ar twa? Sa dimounn-la inn bizin ena boukou kouraz pou li vinn dir twa seki li resanti. Alor, to bizin zanti ek ena respe pou li. (Lir Kolosien 4:6.) Si to bizin letan pou reflesi, fer dimounn-la kone. Selman, pa tarde pou donn li enn repons. (Prov. 13:12) Si to pa interese ar li, fer li konpran sa ek fer sa ar zantiyes. Hans, enn frer ki res Lotris, explike kouma li ti reponn enn ser. Li dir: “Avek boukou respe, mo ti fer li konpran ki mo pa ti interese ar li. Mo ti fer sa deswit parski mo pa ti anvi donn li lespwar. Ek apre sa, mo ti fer bien atansion ki mo pa fer nanye ki kapav fer li krwar ki mo’nn sanz mo desizion.” Me ki to bizin fer si to anvi frekante ar sa dimounn-la? Dir li seki to resanti, ek koze ansam pou zot kone kouma zot frekantasion bizin pase. Selman, pa bliye osi ki akoz zot kiltir ouswa akoz bann lezot kitsoz, kitfwa zot pa pou pans parey lor frekantasion.
KOUMA NOU KAPAV ANKOURAZ EK ED BANN KI SELIBATER?
14. Kouma nou kapav ankouraz ek ed bann ki selibater?
14 Kouma nou kapav ankouraz ek ed bann Kretien selibater ki anvi marye? Enn fason nou fer sa, se kan nou fer bien atansion ar seki nou dir zot. (Efe. 4:29) To kapav demann tomem: ‘Eski mo abitie pran plezir ar bann selibater ki anvi marye? Kan mo trouv enn frer selibater pe koz ar enn ser selibater, eski deswit mo panse ki zot interese ar zot kamarad?’ (1 Tim. 5:13) Nou bizin osi pa fer bann selibater santi ki zot mank kitsoz dan zot lavi parski zot pa marye. Hans, ki nou ti mansione taler-la, dir: “Sertin frer ek ser dir, ‘Kifer to pankor marye? To pe koumans vinn vie!’ Kan zot dir bann kitsoz koumsa, sa kapav fer bann selibater santi ki zot pena zot plas, ek sa kapav osi met presion lor bann selibater pou zot marye.” Alor, olie ki nou dir bann kitsoz dekourazan koumsa, li pli bon ki nou rod bann lokazion pou felisit bann selibater.—1 Tes. 5:11.
15. (a) Dapre Romin 15:2, kouma nou bizin azir si nou trouve ki enn frer al bien ar enn ser? (Get zimaz osi.) (b) Ki bann leson inportan nou’nn aprann dan sa video-la?
15 Si to trouve ki enn frer selibater al bien ar enn ser selibater, kouma to bizin azir? Labib ankouraz nou pou pran kont santiman lezot. (Lir Romin 15:2.) Boukou selibater pa kontan ki nou fer agwa pou zot, ek nou bizin respekte zot santiman. (2 Tes. 3:11) Ena lezot ki kapav apresie ki nou ed zot. Selman, fode pa nou fer sa san zot permision. e (Prov. 3:27) Ena lezot osi ki prefere ki bann kitsoz deroul normal. Lydia, enn ser selibater ki res Lalmagn, dir: “To kapav invit enn frer selibater ek enn ser selibater dan enn program. Selman, se bann-la ki pou deside si zot anvi zwenn zot kamarad ek koz ar zot kamarad.”
Bann selibater ena plis sans pou zwenn enn kikenn dan enn program (Get paragraf 15)
16. Si to enn selibater, ki kitsoz to bizin rapel?
16 Nou tou, ki nou selibater ouswa nou marye, nou kapav ena enn zoli lavi! (Ps. 128:1) Alor, si to anvi marye me ki to pankor trouv enn bon konzwin pou twa, kontign res bien aktif dan to servis pou Zeova. Sin Yi, enn ser ki res Macao, dir: “Konpare ar letan ki to pou pase ar to konzwin dan Paradi, sa letan ki to selibater la, li nanye ditou. Alor, apresie sa letan-la ek servi li bien.” Me ki to bizin fer si to’nn trouv enn kikenn ek ki to’nn koumans frekante? Dan prosin lartik, nou pou gete kouma nou kapav donn Zeova loner ek pran bann bon desizion pandan ki nou pe frekante.
KANTIK 137 Bann Ser Fidel
a Pou to kone si to’nn pare pou lavi maryaz, lir lartik « Fréquenter (partie 1) : Suis-je prêt ? » lor jw.org.
b EXPRESION KI’NN EXPLIKE: Sa lartik-la ek prosin lartik koz lor “frekantasion.” Frekantasion se moman kot enn zom ek enn fam aprann konn zot kamarad bien, pou zot kone si zot pou al bien ansam ek si zot pou marye. Dan sertin pei, kan de dimounn pe frekante, bann dimounn dir ki zot pe sorti ansam. Enn zom ek enn fam koumans frekante apre ki sakenn inn dir so kamarad ki li interese avek li, ek zot aret frekante swa kan zot marye, swa kan zot kit zot kamarad.
c Finn sanz sertin nom dan sa lartik-la.
d Dan sertin kiltir, se enn zom ki demann enn fam si zot kapav koumans frekante. Selman, pena nanye demal ki enn fam demann enn zom si zot kapav koumans frekante. (Rit 3:1-13) Pou konn plis lor la, lir lartik « Les jeunes s’interrogent . . . Comment lui dire ce que je ressens pour lui ? » dan Leve! 22 Oktob 2004, an Franse.
e Lor jw.org, get video Bann Ki Fer Zefor pou Gard Zot Lafwa—Bann Kretien Ki Selibater.
