1 Milandu 29:1-30
29 Lyene Umwene Devedi wanenyile antu yonsi ati: “Solomoni umwanane, wino Leza wasoolola u mwance nupya atamanya imilimo, nupya umulimo uukalamba pano asi wa kukuula itempele lya muntu lelo itempele lyakwe Yeova Leza.
2 Nupya imbombesya ukupekanya ivya kuomvya uku ng’anda yakwe Leza wane, kuli kuti goldi, siuva, koopa, ivyela, imbao, mawe yakwe onikisi, mawe aiyele, tumawe utunono utwa kuyemvezya, mawe ya mutengo apusanepusane na mawe yakwe alabasita aingi sana.
3 Nupya pa mulandu wakuti natemwa ing’anda yakwe Leza wane, kuli na goldi na siuva iviiyele vino nimapeela uku ng’anda yakwe Leza wane, kulunda pali vino napekanya ivya kuomvya uku ng’anda ya muzilo,
4 kwikako na matalanti* 3,000 yakwe goldi uwafumile uku Ofili na matalanti 7,000 yakwe siuva umwengululwe ningo uwa kupaka uku viumba vya mang’anda,
5 goldi uwa kupangila ivintu vyakwe goldi na siuva uwa kupangila vyakwe siuva ni vintu vyonsi vino aamanya ivya kupangapanga yalaomvya. Uzye ilelo a weni aamaitemelwa ukwiza umu kupeela ica upe kuli Yeova?”
6 Fwandi ya cilolo ya ndupwa, ya cilolo ya mitundu ya Ina Izlaeli, akalamba ya pa yantu masauzandi na pa yantu 100, ni ntunguluzi izyangalilanga uculuzi wa mwene yaitemilwe ukupeela ivya upe.
7 Nupya vii avino yapeezile uku mulimo wa pa ng’anda yakwe Leza wa cumi: matalanti 5,000 yakwe goldi, impiya zyakwe goldi zya ku Pezia 10,000, matalanti yakwe siuva 10,000, matalanti yakwe koopa 18,000, na matalanti ya vyela 100,000.
8 Yonsi aakweti mawe ya mutengo yayatwazile umu cipao ca mu ng’anda yakwe Yeova cino Yehiyeli Umwina Gesyoni wasakamalanga.
9 Antu yasansamwike pa kupeela ivya upe vii pano yavipeezile kuli Yeova ni myenzo yao yonsi, nupya umwene Devedi nawe kwene wasansamwike sana.
10 Lyene Devedi walumbanyizye Yeova pa nkoleelo ya yantu yonsi. Watiile: “We Yeova Leza wakwe Izlaeli tata witu, ulumbanyiziwe amanda pe.
11 We Yeova, wewe mukalamba, uwa maka, umuyembe nupya umucindame, pano ivya mu mayulu vyonsi ni vya pano nsi i vyako. Uwene u wako we Yeova. Wewe mukalamba pali yonsi.
12 Ivyuma nu ucindami vikafuma kuli wewe, wewe ukateeka ivintu vyonsi, wakwatisya amaka, nupya ukalenga antu ukuya na maka.
13 We Leza witu tukukutaizya nu kulumbanya izina lyako ilisuma.
14 “Nemo na antu yane sweswe ya sile sile, uzye lyene tungakupeela uli ivya upe wakwe vii? Pano vyonsi vyafuma kuli wewe, nupya twakupeela ivyafuma kuli wewe kwene.
15 Kuli wewe twaya wa yantu aafuma uku mpanga yuze nupya aenyi, wakwe vino ivikolwe vitu vyonsi vyali. Pano manda itu aakwikala pano nsi yaya wa cinzingwa icakuti tutakwata upaalilo wa kuya nu umi.
16 We Yeova Leza witu, ivintu vii vyonsi vino itupekanya ku kukuulila ing’anda yako apa kucindikila izina lyako vifumile kuli wewe nupya vyonsi i vyako.
17 Namanya ningo ukuti we Leza wane, ukalola umu mwenzo nupya watemwa antu aakaele. Inkupeela ivintu vii vyonsi nu mwenzo onsi, nupya intemwa sana ukulola antu yako yakupeela ivya upe kuli wewe.
18 We Yeova, Leza wakwe Abulahamu, Leza wakwe Isaki nupya Leza wakwe Izlaeli ivikolwe vitu, leka antu yaa yatwalilile nu kuya nu mwenzo wa kuitemelwa nu kulakuombela ni myenzo yonsi.
19 Azwa umwanane Solomoni kuti alondesya uku kuombela nu mwenzo onsi pakuti auvwila masunde, umwazwe ukulacita vii vyonsi nu kukuula itempele ukuomvya ivintu vino napekanya.”
20 Lyene Devedi wanenyile antu yonsi ati: “Lumbanyini Yeova Leza winu.” Nupya antu yonsi yalumbanyizye Yeova Leza wa vikolwe vyao nu kufupama pa nkoleelo yakwe Yeova na pa nkoleelo ya mwene.
21 Uwanda uwalondelilepo yatwalilile ukupeela ivya upe kuli Yeova na malambo ya koca kuli Yeova, kuli kuti ya cipambasi 1,000, ya suuku 1,000, imfwele izinono 1,000 ni vya upe vyakumwa, yapeezile malambo aingi aa Ina Izlaeli yonsi.
22 Pa wanda uuwa yatwalilile ukulya nu kumwa pa nkoleelo yakwe Yeova ala yali sana ni nsansa, nupya isile Solomoni mwana Devedi pa wene muku wakwe ciili, nu kumwitulwila mafuta pa nkoleelo yakwe Yeova kuti aye intunguluzi, yasonsile na Zadoki ukuya simapepo.
23 Solomoni wikazile pa cilimba cakwe Yeova ica wene ukupyana Devedi isi, nupya ivintu vyamuzipilanga na Ina Izlaeli yonsi yamuvwilanga.
24 Ya cilolo yonsi, asilika ya maka, na ana ya Mwene Devedi yonsi yuvwilanga Umwene Solomoni.
25 Yeova walenzile Aina Izlaeli yonsi ukucindika Solomoni nupya wamulenzile ukucindama sana ukucila ya mwene ya mu Izlaeli yonsi aamukoleelile.
26 Fwandi Devedi mwana Yese wateesile Aina Izlaeli yonsi,
27 nupya imyaka yonsi ino wateesile Aina Izlaeli yaali 40. Mu Hebuloni wateesile imyaka 7, mu Yelusalemu namo imyaka 33.
28 Wafwile ala ali ni myaka iingi nupya ala watakota, wakweti ivyuma ivingi nupya walumbwike; Solomoni umwanakwe wamupyanyile pa wene.
29 Ilyasi lya mpiti ilikalanda pa mwene Devedi, kufuma pa kutandika ukufika uku mpela lyalembwa mu vyalembwa vyakwe Samweli kalola wa vilolwa, vyakwe Natani kasesema, na vyakwe Gadi kalola wa vilolwa,
30 ivyalembwa vivyo vikalanda pa miteekele yakwe yonsi, pa maka yakwe, na pa vintu ivyacitikanga mu manda yakwe na Ina Izlaeli alino na pa mawene yonsi aamuzingulwike.
Mafutunoti
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
