Ezaya 59:1-21
59 Lolini! Ikasa lyakwe Yeova litipimpala ilyakuti lifilwe ukupususya,Ni kutwi lyakwe litapalila ilyakuti lifilwe ukuvwa.
2 Ukuluvyanya kwinu u kwamupaatula kuli Leza winu.
Ni membu zinu i zyalenga afise icinso cakwe kuli mwemwe,Nupya akakana ukumuvwa.
3 Vizanza vinu vyakowela nu waziNi minwe inu yakowela ni membu.
Milomo inu ikabepa, ni ndimi zinu zikainong’onya ivisi vilungame.
4 Kusi aakalonda umulinganya,Nupya kusi aakaya uku cilye ni cisinka.
Yataila ivya sile sile nupya yakalanda ivya uwelewele.
Yakakwata inda umuli intazi nu kuvyala iviipe.
5 Yakatootola mayai ya nzoka ya usungu,Nu kupikula icakuzwala ukuomvya ututambo twakwe tandabube.
Wensi uwalya mayai yao akafwa,Nu mwi yai ilyatamika mukafuma inzoka iya usungu.
6 Ivyakuzwala vino yakapikula nu tutambo twakwe tandabube vitalaomba,Yatalavizwala,
Yakacita viipe,Yaya nu unkalwe.
7 Ingazo zyao zikasimwilila uku kucita iviipe,Nupya yakacincila ukuzwisya uwazi wa kaele.
Yakaelenganya iviipe;Lyonsi yakaleta uwononesi pa yantu nu kuyalenga ukucula.
8 Yatamanya ivya kwikala na auze umu mutende,Nupya yataaya nu mulinganya.
Yanyonganya inzila zyao;Wensi aakapitamo atalaya nu mutende.
9 Ali mulandu uno umulinganya utayela pali sweswe,Kumwi nu ulungami kwene.
Tukalonda uluswepo, lelo kwaya imfinzi itupu;Tukalonda uluswepo, lelo tukapita sile umu kanda.
10 Tukapampanta ala tukulonda apali ciumba kwati impafu;Tukatwalilila ukupampanta wa yantu aatakwata manso.
Tukapumika musanya pakasi kwati usiku;Mu yantu ya maka twaya kwati afwe.
11 Swensi kwene tukang’anza kwati aabeeleNu kulila wa nkunda.
Tukalonda mulinganya, lelo tusiuzana;Tukalonda ukupusuka, lelo kutaaya uwa kutupususya.
12 Pano twakupondokela imiku ingi;Imembu zitu zikatusinila ukuti sweswe ya mulandu.
Twamanya ukuti tukakupondokela;Nupya twamanya vino tukaluvyanya.
13 Twaluvyanya nu kukana Yeova;Twafutatila Leza witu.
Tukalanda pa kucuzya antu na pa kupondokela Leza;Tukaelenganya pa ufi uno tumabepa, itucita na vivyo kwene.
14 Antu yataaya nu mulinganya,Nupya yataaya nu ulungami;Nupya umu ncende umukazanwa antu aingi mutaaya uwaya ni cisinka,Nu muntu umulungami asiyamo.
15 Kusi uwaya ni cisinka,Na wensi uwata ukucita iviipe ala yamamupokolola na vino wakwata.
Yeova walolanga ivyacitikanga nupya wasosilePano kutaali umulinganya.
16 Waweni ukuti kusi nanti aumwi uwa kwazwa umuze,Nupya wazungwike pano kutaali uwa kucitapo icili consi,Fwandi umwineco kwene u wamupuswisyeNu ulungami wakwe u wamupeezile maka.
17 Wazwala ulungami wa ca kucinga icisao,Wazwala ni cisote ci pusukilo uku mutwe wakwe.
Wazwala icilanduzi wa cakuzwala cakweNu kucincila wi koti.
18 Alayafulula pali vino yacita,
Alaleta ukali ni cilanduzi uku yalwani yakwe
Na antu aikala pa vilila yalafululwa pa vicitwa vyao.
19 Nupya aikala kuno ilanzi likawila yalatandika ukutiina izina lyakwe Yeova,Na aikala kuno likatunkila yalamucindika,Pano aliza wa manzi aali nu mukuku,Yano umupasi wakwe Yeova ukasunka.
20 Yeova walanda wati: “Kapususya alafuma umu ZioniNupya alafumya iviipe umu yana yakwe Yakobo.”
21 Yeova walanda nu kuti: “Lelo nemo upangano uno napangana nayo uwakuti umupasi uwaya pali wewe utalafumapo na mazwi yane aaya mu kanwa kako yatalafumamo nanti ukufuma umu yana yako nu mu izikulu yako kufuma likwene na manda pe,” avino Yeova walanda.
