Kufuma 16:1-36
16 Pa cisila Aina Izlaeli yonsi yafumile umu Elimu, nupya yasusile iyafika umu lwanga lwa Sini, ulwayela pakasi kakwe Elimu na Sinai, pa wanda uwalenga 15 umu mwezi wakwe ciili ukufuma pano yafumiile umu mpanga iya Ijipti.
2 Lyene Aina Izlaeli yonsi yatandike ukuilizyanya kuli Mose na Aloni umu lwanga.
3 Aina Izlaeli yatwalilile ukunena Mose na Aloni iyati: “Yeova nga watukomiile sile umu Ijipti muno twalyanga inyama, nupya muno twalyanga imikate nu kwikuta. Nomba lyene imutuleta umu lwanga luu, pakuti swensi tufwe uku cipowe.”
4 Lyene Yeova wanenyile Mose ati: “Nimamuponyezyanga imikate ukufuma ukwi yulu, nupya cila muntu wakulakolonganika ukulingana na ino angalya cila wanda, pakuti njezye indole ndi cakuti yalauvwila isunde lyane nanti foo.
5 Lelo pa wanda uwalenga 6 yace yaatola imikate ukulingana na ino yangatola pa manda yaili, nu kupekanyizizya limwi.”
6 Lyene Mose na Aloni yanenyile Aina Izlaeli yonsi iyati: “Amanguzi mumamanya ukuti Yeova u wamufumizye umu mpanga ya Ijipti.
7 Katondo mulalola ululumbi lwakwe Yeova, pano Yeova watauvwa vino mukuilizyanya pali aliwe. Uzye sweswe yaweni akuti mwailizyanyako?”
8 Mose watwalilile ukulanda ati: “Lino Yeova amamupeela inyama manguzi nu kumupeela umukate katondo pakuti mulye nu kwikuta, alino mumamanya ukuti Yeova watauvwa ukuilizyanya kuno mukuilizyanya kuli aliwe. Uzye sweswe yaweni akuti mwailizyanyako? Musikuilizyanya kuli sweswe, lelo mukuilizyanya kuli Yeova.”
9 Lyene Mose wanenyile Aloni ati: “Nena Aina Izlaeli ukuti iize pa nkoleelo yakwe Yeova, pano watauvwa ukuilizyanya kwao.”
10 Lino sile Aloni wanenyile Aina Izlaeli yonsi, yapiliwike nu kulozya manso ku lwanga, nupya ululumbi lwakwe Yeova lwalolike umwi kumbi.
11 Nupya kwene Yeova wanenyile Mose ati:
12 “Inuvwa ukuilizyanya ukwa Ina Izlaeli. Yanene ukuti, ‘Mumalya inyama manguzi lino kutali kufiite sana, nupya katondo mulalya umukate, lyene alino mumamanya ukuti nene indi Yeova Leza winu.’”
13 Uwanda kwene uwa manguzi inkwale zizile pa ncende yonsi ino yapangiilepo inkambi, nupya katondo kwali ulumi pa ncende iiya yonsi.
14 Lino ulumi lwasizile, kwalolike tumwi umu lwanga ututiswe, utwalolekanga kwati a kungwi ali pansi.
15 Lino Aina Izlaeli yaweni utuntu tuto yatandike ukuzyanya iyati: “I vyani vii?” pano yataavimanyile. Mose wayanenyile ati: “U mukate uno Yeova watamupeela kuti mulye.
16 Yeova watalanda ukuti, ‘Cila muntu alinzile ukukolonganika ukulingana na vino angakwanisya ukulya. Cila muntu ace akolonganika icipimo cakwe oma* conga ukulingana ni mpendwa ya yantu yano akaikala nayo umwi tenti.’”
17 Aina Izlaeli yatandike ukukolonganika ivintu vivyo; yamwi yakolonganikanga ivingi yauze nayo ivinono.
18 Nanti icakuti yakolonganika ivingi nanti ivinono, cila muntu wakwatanga ivikumanile nga yavipima muli oma. Fwandi cila muntu wakolonganikanga vino angakwanisya ukulya.
19 Lyene Mose wayanenyile ati: “Kusi aalinzile kusyako ivyakulya vimwi pali vivyo ukufika katondo.”
20 Lelo yatuvwile kuli vino Mose wayanenyile. Lino antu yamwi yasiileko ivyakulya vimwi ukufika katondo, vyaozile nu kutandika ukununka nupya Mose wayasokiile.
21 Cila katondo yatolanga ivyakulya vivyo, nupya cila muntu watolanga ukulingana na vino angakwanisya ukulya. Ndi cakuti kasanya kawala, vyasungulukanga.
22 Pa wanda uwalenga 6, yaakolonganike imikate ino yangaomvya pa manda yaili, cila muntu wakolonganike ivipimo viili vyakwe oma. Fwandi intunguluzi zyonsi izya Ina Izlaeli zyaile izinena Mose pali vivyo.
23 Mose nawe wanenyile intunguluzi ati: “Avino Yeova watalanda ukuti, ‘Mutondo ulaya uwanda uwa kupuuza, kuli kuti isabata lya muzilo kuli Yeova. Fwandi mupange imikate ino mungakwanisya ukulya nu kweleka vino mungakwanisya ukulya; lyene ivyasyalapo muvisunge ukufika katondo.’”
24 Nayo yavisunzile ukufika katondo wakwe vino Mose wayanenyile, nupya vitanunsile nanti ukukwata ingonyo.
25 Lyene Mose walanzile ati: “Muvilye ilelo, pano ilelo isabata kuli Yeova. Nupya musikuvizana pansi.
26 Mwakulakolonganika pa manda 6, lelo pa wanda uwalenga 7, kuli kuti pa wanda wi Sabata, kutakulaya icili consi.”
27 Lelo yamwi yaile umu kukolonganika na pa wanda uwalenga 7, nomba yataazanyile icili consi.
28 Fwandi Yeova uzizye Mose ati: “Uzye mulatwalilila ukukanauvwila masunde yane ukufika lilaci?
29 Manyini ukuti ne Yeova namupeela Isabata. Ali mulandu uno pa wanda uwalenga 6 nkumupeelela imikate iya kuomvya pa manda yaili. Wensi alinzile ukwikala apakwe; kusi aalinzile ukufuma pakwe pa wanda uwalenga 7.”
30 Fwandi antu yapuuzile pa wanda wi Sabata, kuli kuti pa wanda uwalenga 7.
31 Aina Izlaeli yaamanga umukate uwo yakuti “mana.”* Wali umutiswe nupya walolekanga wa tumbezu utunono,* nupya wali umulyompe kwati a keke wino iikako uci.
32 Lyene Mose walanzile ati: “Yeova walanda wati, ‘Muzuuzye mana muli oma wenga nu kusungila inkulo zinu zyonsi, pakuti yace yalole ivyakulya vino namupeezile umu lwanga lino namufumizye umu mpanga ya Ijipti.’”
33 Fwandi Mose wanenyile Aloni ati: “Tola insembo nu kwikamo oma wenga wakwe mana nupya umwike pa nkoleelo yakwe Yeova pakuti asungwe umu nkulo zinu zyonsi.”
34 Aloni wacisile wakwe vino Yeova wanenyile Mose, wisile mana pa nkoleelo ya Kambokosi ka Ciusizyo pakuti asungwe.
35 Aina Izlaeli yaliile mana pa myaka 40, ukufikila lino yafisile umu mpanga umwikalanga antu. Yalyanga mana suka na lino yafisile umupiipi ni mpanga ya Kenani.
36 Oma ikaingila imiku 10 muli efa wenga.*
Mafutunoti
^ Mupiipi na malita 2.2. Lolini Ivyeo na Vyuze pa B14.
^ Cifwile izwi lii lyafumile ukwi zwi lya Ciebele ilyakuti “I vyani vii?”
^ Mu Ciebele: “Wa mbezu zyakwe koliyanda.”
^ Efa akaingizya malita 22. Lolini Ivyeo na Vyuze pa B14.
