Uzye tungasininkizya nu mwenzo onsi ukuti amalayo yakwe Leza yalafikiliziwa? Yesu wene wasininkizye vivyo, nupya vino wasambilizyanga vyavwanga amukutikanga. Lolini cilangililo cino walanzile umwi lyasi lya pa Mwamba, icalembwa pali Mateo 5:18, pakati: “Cumi namunena vino kufika lino iyulu ni nsi vilasila, pasi kalikalata kamwi nanti akalitoni kanono aka mu Masunde kano kalafumiziwapo, kufika lino vintu vyonsi vilafikiliziwa.”

Kalembo kacepesye mu vilembo vya Ciyebulai kakaloleka vii י (yod), nupya kalembo kwene kaa, aali kakutandikilako mu vilembo vya Ciyebulai ivyapanga izina lya muzilo lyakwe Leza, ilyakuti Yeova. * Asi sile izina lyakwe Leza ilyalenga ukuti kalembo kaako kacindame, lelo ya kasambilizya na Afaliseo kwene yacindike sana kalilembo kaa.

Yesu walandanga ukuti iyulu ni nsi vyene vingapita, lelo vintu vinono vino Isunde lyalanda vikafikiliziwa. Acino Malembelo yalanda ukuti mayulu yacumi ni insi vilatwalilila kuyako amanda pe. (Masamu 78:69) Fwandi ivyeo kwene vino Baibo yalanda, vikalanga ukuti ni vintu vinono sile vino Isunde lyalanda vikafikiliziwa.

Uzye Yeova wasumbako amano nu ku vyeo vinono sile? Ee. Tale elenganyini pali cii: Aina Izlaeli yayanenyile ukuti yataalinzile kuvuna ifupa lya nyama nanti ayonga pa wanda wa Ucilo. (Kufuma 12:46) Limwi ivyeo vyali vinono sile. Uzye lyene yamanyile umulandu uno yataalinzile kuvunila amafupa ya nyama? Limwi yatamanyile. Nomba Yeova Leza wamanyile ukuti ivyeo vivyo vyalanzilwepo mu usowelo ukuti Mesiya ataali nu kuvunwa ifupa nanti alyonga lino wali nu kufwa pa cimuti.—Masamu 34:20; Yoane 19:31-33, 36.

Uzye mungasambililako vyani ku mazwi yano Yesu wasambilizyanga? Naswe kwene tungasininkizya ukuti malayo yonsi yano Yeova walaya yalafikiliziwa kumwi na anono kwene. Cumi kwene akalembo ka mu Ciyebulai akacepesye kacindama cuze!