Ivyacitikile ya Kasimikila Ailyasi Lisuma

Vintu Vizile Ivimuzipila Umu Umi

YESU walanzile ukuti wamanya imfwele zyakwe. (Yoani 10:14) Ndi cakuti umuntu wakwata umwenzo usuma nupya watemwa umutende nu ulungami, angaya umulondezi wakwe Yesu. Nupya umuntu wiyo ivintu vilamuzipila umu umi, wakwe vino cali uku mwanaci umwi uwa ku Belgium. Lolini ivyamucitikiile:

“Lino ya Nte Yakwe Yeova izile pa ng’anda ala nkuvwa sana uyi nkulonda nu kuikoma. Natemilwe pali vino ya Nte yalanzile ukuti i vilalenga intazi izyaya umu nsi yii iipe zifumiziwepo, lelo ntuvwile ningo lino yatiile kwaya vino Leza alacita pakuti ivintu vivyo vicitike. Pa nsita iya ala ipapita imyaka 8 ukufuma pano nalekiile ukuya uku ceici, pa mulandu nu usomvi uwali umu ceici cico. Lelo ya Nte yaya yene yalolekanga ukuti yalandanga ivya cumi, nupya nizile iniluka ukuti ntanga inje nu umi usuma ukwaula ukutungululwa na Leza.

“Lelo ica ulanda icakuti ya Nte yayo yantandalile sile pa nsita inono. Nuvwile sana uyi. Natandike ukupeepa sana fwaka cila wanda alino nu kuomvya imilembo ikavulunganya uwongo. Pa mulandu wakuti nalondanga ukulalanzyanya na kuku uwafwile, natandike ukuomvya ivya mipasi. Wanda umwi usiku nuvwile sana intete lino iviwa vyatandike ukuncuzya. Nupya vii vyancitikiile pa myezi iingi. Cila wanda usiku nuvwanga intete pano nayanga sile nenga.

“Lyene uwanda umwi naile umu kutandala uku ncende imwi kuno ntatazile injapo, nupya naweni icikuulwa cimwi icikulu. Lyene naweni iumba lya yantu ilikalamba. Lino napalamile naweni ya Nte Yakwe Yeova ala yakukuula Ing’anda ya Wene. Nizile iniusya vino ya Nte yantandalilanga uku ng’anda nupya nelenginye ukuti cingazipa sana ndi cakuti antu yonsi yali wakwe ya Nte.

“Nalondanga sana ukuti ya Nte yaya yakize uku ng’anda nupya, fwandi nezizye ukulanzyanyako na yamwi pali yano nazanyile yakukuula Ing’anda ya Wene. Napefile kuli Leza, nupya lino papisile amanda 10 umonsi umwi wino twalanzyanyizyepo nawe wizile uku ng’anda. Wanenyile ukuti tutwalilile ukusambilila nawe Baibo, nupya nazumile. Lilyo kwene sile wanenyile ukuti nkazanweko uku kulongana uku Ng’anda ya Wene. Nupya nazumile. Ntatazile indolapo antu aya wakwe yaya. Pa myaka iingi nalondesyanga ukuzana antu aatemwana nupya aya ni nsansa. Nupya antu yayo nayazanyile lino naile umu kulongana.

“Kufuma lilyo kwene natandike ukuzanwa lyonsi umu kulongana. Lino papisile umupiipi ni milungu itatu natiile ukupeepa fwaka. Alino nasumvile amabuku yonsi alandanga pa kusapoola nupya natiile ukukutika uku nyimbo izikalanda pa viwa, naweni nu kuti iviwa vyatandike ukuntaluka. Lyene natandike ukulondela masunde yakwe Yeova aya muli Baibo nupya lino papisile imyezi itatu natandike ukusimikila ilyasi lisuma. Nupya lino papisile imyezi 6 nizile imbatiziwa. Lino papisile amanda yaili natandike ukuomba upainiya wa nsita inono.

“Nkataizya sana Yeova pa visuma vyonsi vino wancitila. Lyene ndakai ivintu vyanzipila umu umi. Icumi kwene, izina lyakuti Yeova u lupungu ulukome muno nuutukila nu kucingililwa. (Mapinda 18:10) Nupya nkayuvwa kwati avino kalemba wa masamu walemvile pali Masamu 84:10 ukuti: ‘Ukwikala wanda onga umwi sano lyako kwaluta amanda izimbi lyonga ukwikala kuze. Nupya ukwikala pa mulyango wa ng’anda yako we Leza, kwazipisya penepo ukucila ukwikala umu mang’anda ya antu aipe.’”

Umwanaci wii umufuuke ivintu vyamuzipila umu umi. Nupya vivyo kwene ivikacitikila antu yonsi aakalonda ukumanya Yeova nu mwenzo onsi.