• UMWAKA UNO YAVIILWE: 1941

• KUNO YAVYALIILWE: BENIN

• VINO UMI WALI: YAKWETI IMPALI, NUPYA YACUZYANGA YA NTE YAKWE YEOVA

VINO NAALI:

Nakulile umu musumba wa Kotunu (Cotonou), uku Benin. Lino nakulanga nali nene Katolika, nomba ntayanga uku ceici lyonsi. Kuno nikalanga, ya Katolika aingi yakweti impali pano pa nsita iiya ala impali zyazumiliziwa. Fwandi nizile intwala anaci 4.

Lino kwali ivimvulunganya muli ya 1970, nelenginye ukuti ivintu viivi vyali nu kulenga ivintu ukuzipa umu mpanga itu. Nupya natandike ukutungilila antu acitanga ivimvulunganya alino nu kuya umu vikanza vya miteekele. Antu acitanga ivimvulunganya yapaasile sana ya Nte Yakwe Yeova pano yataikanga umu vikanza vya miteekele. Nupya nali pa yantu aacuzyanga ya Nte. Lino yazinzile ya Nte aali ya misyonali umu mpanga itu mu 1976, nelenginye ukuti casila yatalatala yawele.

VINO BAIBO YANGAZWILE UKUSENUKA:

Vimvulunganya vyasizile umu 1990. Nupya icanzungwisye icakuti, ya Nte yaya aali ya misyonali yawezile. Lyene natandike ukwelenganya ukuti Leza afwile akatungilila antu yaa. Pa nsita kwene iya, natandike ukuombela kuze. Wenga pali yano twaombanga nayo wali aa Nte, nupya lino papisile sile insita inono wansimikileko pali vino wazumilamo. Lyene wandanzile vino Baibo ikalondolola Yeova ukuti a Leza uwaya nu kutemwa nu mulinganya. (Malango 32:4; 1 Yoani 4:8) Natemilwe sana imiyele iyo. Fwandi natandike ukulondesya ukusambilila ivingi pali Yeova, acino nazumile ukutandika ukusambilila Baibo.

Patalengiile, natandike ukuzanwa uku kulongana kwakwe ya Nte Yakwe Yeova. Natemilwe sana vino yatemwanine usi mulandu nu kupusana inkanda ni nkulilo. Lino natandike ukuzanwa sana na ya Nte, ali lino nasininkizye ukuti yaa aali alondezi yakwe Yesu acumi.—Yoani 13:35.

Nizile iniluka ukuti pakuti ntandike ukuombela Yeova, ndinzile ukufuma umu ceici cakwe ya Katolika. Nomba citangwike ukucita vivyo, pano natiinanga vino antu yanji yali nu kutandika ukwelenganya pali nene. Lino papisile insita, Yeova wangazwilizye, nupya nasifile nu kufuma umu ceici ciica.

Lelo kwali na cuze cino nalinzile ukusenukamo. Nasambilile muli Baibo ukuti Leza asizumilizya impali. (Utandiko 2:18-24; Mateo 19:4-6) Ukulingana na vino Leza akalola ivintu, icupo cane ica kutandikilapo i cali icizumiliziwe. Fwandi nasoolwilepo ukulembesya icupo cane ica kutandikilapo uku uteeko nu kuta anaci yauze, nupya nayapekanyizizye vino yalondekwanga. Lino papisile insita, anaci yaili yano natwazilepo izile iyaya aa Nte Yakwe Yeova.

VISUMA VINO NAZANA:

Nanti cakuti mamane watwalilila ukuya Katolika, wacindika vino napingwilepo ukulaombela Yeova. Nupya mamane nani, twailolela ukuti lyene naaya iya musuma.

Nelenganyanga ukuti lino nali umu vikanza vya miteekele nali nu kuzifya ivintu umu wikazi, nomba ukwelenganya vivyo kwali ukwa sile sile. Lyene namanya ukuti Uwene Wakwe Leza sile uungafumyapo intazi zino antu yakakwata. (Mateo 6:9, 10) Nkataizya sana Yeova pa kundanga vino ningacita pakuti inje ni nsansa umu umi.

• UMWAKA UNO YAVIILWE: 1977

• KUNO YAVYALIILWE: BRAZIL

• VINO UMI WALI: YALI AA PASITA UMU CEICI CAKWE YA PENTEKOSITI

VINO NAALI:

Nakuliile umu musumba wa Itu, umu mpanga ya São Paulo. Umusumba uwo wamanyikwe ukuti mwali sana unkalwe.

Nali sana nu unkalwe alino ni miyele iipe, nupya nakazyanga imilembo ikavulunganya uwongo. Lino papisile insita, nizile iniluka ukuti ukuya ni miyele yii kungalenga yakanyepe nanti sile ukufwa, fwandi natiile ukuya ni miyele iipe nu kukazya imilembo ikavulunganya uwongo. Nupya natandike ukupepa umu ceici cakwe ya Pentekositi, alino nizile inja pasita umu ceici kwene cico.

Nelenganyanga ukuti nali nu kulaazwa antu ukupitila umu kuyasimikilako lino nali umu ceici ciica. Nupya nasimikilanga pa ledyo iyali umu ncende iya, fwandi namanyikwe sana. Lyene panono panono natandike ukwiluka ukuti aa mu ceici ciica yatasakamalananga, nupya yatacindikanga Leza. Nayuvwanga ukuti iceici ciici calondanga sile ukupanga impiya. Fwandi nasoolwilepo ukufumamo.

VINO BAIBO YANGAZWILE UKUSENUKA:

Lino natandike sile ukusambilila Baibo na ya Nte Yakwe Yeova, naweni ukuti yapusanako ni mipepele yuze. Kwali ivintu viili vino natemilwe pali ya Nte. Ica nkoleelo, ya Nte Yakwe Yeova yasilanda sile ukuti tulinzile ukutemwa Leza na antu yanji, lelo yakacita na vivyo kwene. Cakwe ciili, yasiika umu vikanza vya miteekele nupya yasilwako inkondo. (Ezaya 2:4) Visinka vii viili, vyalenzile nsininkizye ukuti inzana ukupepa kwa cumi, kuli kuti umuseo ufyenkane uukatwala uku umi wa pe.—Mateo 7:13, 14.

Nilwike ukuti pakuti nazanzya Leza, ndinzile ukusenuka sana. Nalondekwanga ukutandika ukwika sana mano uku lupwa. Nupya nalondekwanga ukuya sana umuicefye. Kwene, cantalile sana ukusenuka, nomba pa mulandu wakuti Yeova wangazwilizye nakwanisye ukucita vivyo. Mamane watemilwe pali vino nacisile. Alino u watandikilepo ukusambilila Baibo, nomba lino nasenwike watandike ukulunduluka zuwa sana. Lino papisile insita inono, twizile itwiluka ukuti swensi twalondanga ukuya ya Nte Yakwe Yeova. Nupya twabatiziwe uwanda uli umwi.

VISUMA VINO NAZANA:

Mamane nani, twaipakizya sana ukwazwa ana itu yatatu ukupanga ucuza upalamisye na Yeova. Nupya twaya ni nsansa umu lupwa. Nkataizya sana Yeova pa kungazwa ukumanya icumi icaya umwi Izwi lyakwe, Baibo. Icumi kwene, Baibo ikaazwa antu ukusenuka! Nupya pa yantu yano yaazwa, nani kwene apano naya.

• UMWAKA UNO YAVIILWE: 1957

• KUNO YAVYALIILWE: AUSTRALIA

• VINO UMI WALI: YAKWETI INTAZI IZINGI LINO YALI ANCE

VINO NAALI:

Nakuliile umu musumba wa Newcastle, uku New South Wales. Nene indi iyeli pa yana 7 yano ya tata aali sana nu unkalwe nupya amwanga sana uwengwa alino na ya mayo ali sana nu unkalwe yakweti. Ya mayo yangumanga sana nu kuneena amazwi aipe. Nupya imiku iingi yaneenanga ukuti nene muntu umwipe, nu kuti nali nu kuyapya umu moto wa pe. Amazwi yayo yansakamikanga sana.

Pa mulandu na vino nacisikanga lino ya mayo yangumanga, ilingi ntayanga uku sukulu. Lino nali ni myaka 11, kaungwe kamwi aka mu uteeko kansenzile ukufuma pa yavyazi nu kutandika uku nsunga, nupya pa cisila kaungwe ka mu ceici cimwi ica Ina Klistu katandike ukunsunga. Lino nafizizye imyaka 14, nutwike ukufuma kuno yatusungilanga. Nomba ntalondanga ukuswilila uku ng’anda, fwandi natandike ukwikala umu miseo ya Kings Cross, umu citungu ca Sydney.

Lino nikalanga umu miseo, natandike ukuomvya imilembo ikavulunganya uwongo, kumwa sana uwengwa, kutamba ivya uzelele, alino nu kucita uzelele. Kwali cimwi icacitike icalenzile nuvwe sana intete. Pa nsita iya ala nkaikala umu ng’anda ya monsi umwi uwakweti icikuulwa muno antu yakaizizya (cino yakati nightclub). Wanda umwi usiku, aonsi yaili izile umu kumutandalila. Fwandi wanenyile ukuti inje uku muputule kuno nalalanga, nomba nuvwanga vino yalanzyanyanga. Umonsi wiya, walondanga ukunkazya uku yonsi yaya yaili. Yalondanga ukuti yamfise umu ciwato icikalamba icikasenda iviya nu kuntwala uku Japan pakuti nkaomba mu cikuulwa muno yakakazizya uwengwa cino yakati ba. Nasakamikwe sana, fwandi nafumiile api windo nu kuutuka pakuti mpusuke.

Nazanyile umonsi umwi uwizile umu musumba uwa Sydney nu kumulondolwela intazi ino nakweti ala nkwelenganya ukuti limwi amampeelako ulupiya. Lelo wansenzile uku ng’anda kuno wikalanga pakuti nkafulale nu kulyako ivyakulya. Nupya natwalilile ukwikala nawe. Lyene lino papisile umwaka onga, twatwaline.

VINO BAIBO YANGAZWILE UKUSENUKA:

Lino natandike ukusambilila Baibo na ya Nte Yakwe Yeova ntamanyile ivyakucita. Nasosile lino nasambilile ukuti Satana aakalenga ukuti twacula; pano pa nsita iya ala namanya ukuti Leza aakalenga twacula. Lelo nateekeziwe lino nasambilile ukuti Leza asioca antu umu moto, icisambilizyo icansakamikanga sana pa myaka iingi.

Natemilwe vino ya Nte yaomvyanga ivisinte ivya muli Baibo pali vyonsi vino yakupingulapo. Nupya yakacita vino yazumilamo. Nakweti ivikanza, lelo asi mulandu na vino nalandanga nu kucita, ya Nte yandanganga ukutemwa nu mucinzi.

Intazi ikalamba ino nakweti sana, u kuyuvwa uwa sile sile. Nupya nayuvwanga ukuti pasi vino nali na pa cisila ca kubatiziwa kwene nu kuya Inte Yakwe Yeova. Namanyile ukuti natemilwe Yeova, nomba nelenganyanga ukuti wene atanga atemwe umuntu uwaya wakwe nene.

Nizile inta ukuyuvwa uwa sile sile pa cisila ca myaka 15 ukufuma pano nabatiziwilwe. Uwanda umwi lino twali pa kulongana umu Ng’anda ya Wene Yakwe ya Nte Yakwe Yeova, umwina uwalandanga ilyasi walanzile api lembo lyakwe Yakobo 1:23, 24. Ilembo lii lyakolanya Izwi Lyakwe Leza kuli miila muno tungailola wakwe vivi kwene vino Yeova akatulola. Natandike ukwelenganya ndi cakuti nkailola wakwe vino Yeova akandola. Pa kutandika, naweni ukuti citanga cicitike. Pano ala ncili nkayuvwa ukuti Yeova atanga antemwe.

Pa cisila ica manda yanono, nabelenzile ilembo limwi ilyalenzile nsenuke sana. Ilembo lilyo a Ezaya 1:18, pano Yeova walanda ukuti: “Lekini tuvwane lyene. Amaifyo inu nanti yangayenza cee, nemo namayafula nga nayo yamaswepa mpe . . . wakwe pamba.” Nuvwile kwati Yeova akuneena akuti: “Viki, leka tuvwane. Nakumanya, namanya vino wacita, namanya umwenzo wako, nupya na kutemwa.”

Uwanda uwa, nafizilwe ukulaala usiku onsi. Nupya na pa nsita kwene iya ala ncili nkutwisika ndi cakuti Yeova angantemwa, lelo natandike ukwelenganya api lambo lino Yesu wapeezile pakuti atupususye. Lyene apa nsita kwene iya, nilwike ukuti Yeova watwalilila ukunteekelela apa nsita itali, nupya cico calangililanga ukuti wantemwa. Lelo cali kwati namunenanga ukuti: “Kutemwa kwako kwacepa. Na vino umwanako watufwilile vitanga vingazwe.” Fwandi cali kwati nkuswilizizya Yeova ilambo lino Yesu watupeezile. Nomba lino nizile intandika ukwelenganya sana api lambo lino Yesu wapeezile pakuti atupususye, natandike ukwiluka ukuti Yeova wantemwa.

VISUMA VINO NAZANA:

Ndakai lyene nsiyuvwa uwa mulandu, nupya nkaipakizya uumi. Ivintu vyazipa umu cupo citu, nupya nkaya ni nsansa lino nkwazwa yauze ukuomvya ivyancitikila. Lyene nkayuvwa ukuti napalama sana kuli Yeova.

• UMWAKA UNO YAVIILWE: 1974

• KUNO YAVYALIILWE: RUSSIA

• VINO UMI WALI: YUVWANGA INYIMBO ZYA UPONDO IZYA CONGO

VINO NAALI:

Navyalilwe umu musumba wa Votikinisiki (Votkinsk), umwavyalilwe nu monsi umwi uwamanyikwe sana ukuti aakalemba inyimbo, uwi zina lyakuti Pyoota Ilyeci Cakovisikai. Ulupwa lwitu lwali ulupiina. Ya tata yakweti imiyele iingi isuma, nomba yamwanga sana uwengwa, fwandi lyonsi twayanga asakamikwe pa ng’anda.

Ntaombanga ningo umu vya ku sukulu, nupya lino papisile insita natandike ukuyuvwa sana uwa sile sile. Natiile ukuzanwa na antu yauze alino nu kuyataila. Ntuvwanga ningo ukuya uku sukulu. Wakwe, ndi cakuti yaneena ukuti ndondolole ivintu vimwi, kumwi sile ni vintu ivyangupale, nafilwanga ukulondolola. Lino namazile giledi 8, api pepala ilyalangililanga imiombele yane, yalemvilepo ukuti: “Atamanyikisya ululimi, akafilwa nu kalanda vino akwelenganya.” Amazwi yayo yalenzile ukuti nuvwe sana uyi, nupya natandike nu kuyuvwa sana uwa sile sile. Natandike nu kwelenganya pa mulandu uno nayelako.

Lino nali umwance, natandike ukumwa uwengwa. Pa kutandika nuvwanga ningo nga namwa. Nomba nga nakoleka, kampingu yancuzyanga. Nupya nuvwanga ukuti uumi wane utacindama. Natandike ukulwala umu melenganyo, nupya insita izingi ntafumanga pa ng’anda pa manda aingi. Lyene nizile intandika ukwelenganya pa kuikulika.

Lino nafisizye imyaka 20, kwaliko cimwi icanteekizye pa nsita inono. Natandike ukuvwa inyimbo izya yapondo izya congo. Nuvwanga ningo nga nkuvwa inyimbo zizyo, nupya natandike ukulonda antu aatemilwe inyimbo kwene zizyo. Nateesile inyele, intula na matwi, nupya natandike ukuzwala ivya kuzwala wakwe vino ya kimba ya nyimbo yano natemilwe yazwalanga. Lyene panono panono natandike ukuya sana nu unkalwe, nupya insita izingi twalemanilananga na apa ng’anda.

Nelenganyanga ukuti ukukutika uku nyimbo ziizi kwali nu kulenga naya ni nsansa, lelo asi vino cali. Nomba zyalenzile inje ni miyele ipe! Nupya lino nizile imanya ivintu viipe vino ya kimba ya nyimbo yano natemilwe yacitanga, nuvwile sana uyi.

Nupya kwene natandike ukwelenganya pa kuikulika, nomba umuku uu wene cifile. Nomba ukwelenganya pali vino ya mayo yali nu kuyuvwa nga naikulika, kwalenzile ukuti ntacita vivyo. Yantemilwe sana, nupya yancitiile ivintu ivingi. Lelo pa nsita yii vintu vifile sana. Ntalondanga ukutwalilila ukuya nu umi, nomba pa nsita ili imwi kwene ntalondanga ukuikoma.

Pakuti ntaelenganya pa kuikulika, natandike ukubelenga mabuku aa mu Cirussia. Ilyasi limwi lino nabelenzile lyalandanga pa muntu uwaombelanga umu ceici cimwi uwazwanga sana antu. Lyene lilyo kwene sile natandike ukulondesya ukuombela Leza na antu yanji. Napefile kuli Leza nu kumunena vyonsi ivyali uku mwenzo, icintu cino ntatazile incitepo. Nalenzile Leza ukuti angazwe ukuya ni nsansa umu umi. Nupya lino napepanga, nizile inja nu mutende umu melenganyo. Nupya icintu icacitike pa cisila ci pepo, icacizilepo ukuzipa. Lino papisile sile maawazi yaili kufuma pano napeepile, Nte Wakwe Yeova umwi wakonkonsizye uku cisaasa nu kunguzya ndi cakuti ningatemwa ukusambilila Baibo. Nilwike ukuti ipepo lyane lyaswikwe. Nupya uwanda kwene uwa ali uno natandike ukuya ni nsansa umu umi.

VINO BAIBO YANGAZWILE UKUSENUKA:

Nasumvile vyonsi vino naomvyanga pa kukutika uku nyimbo zya upondo izya congo nanti cakuti citangupiile ukucita vivyo. Lelo, natwalilile ukwiusya inyimbo zizyo pa nsita itali. Lyonsi kwene nga nuvwa inyimbo zizi zikulila, niusyanga imiyele ino nakweti mpiti. Ntalondanga ukulaelenganya pa vintu iviipe vino nacitanga mpiti. Fwandi nasoolwilepo ukuta ukupitila uku ncende kuno yalizyanga inyimbo zizyo. Nupya lyonsi lino natandika ukwelenganya pali vino nali mpiti, napepanga sana. Ukucita vivyo, kwangazwanga ukuya na “umutende wakwe Leza, uwacila imyelenganyizizye yonsi iya yantu.”—Filipi 4:7.

Nasambilile ukuti Aina Klistu yalinzile ukulasimikilako yauze vino yazumilamo. (Mateo 28:19, 20) Nomba nelenganyanga ukuti ntanga nkwanisye ukusimikila. Lelo vino nasambililanga vyandenganga ukuya ni nsansa nu mutende umu melenganyo. Namanyile ukuti na yauze kwene yalondekwanga ukusambilila icumi cino namanyile. Asi mulandu na vino nuvwanga intete, natandike ukunenako yauze pali vino nasambililanga. Nomba ukunenako yauze pali Baibo, kwalenzile ukuti inte ukuvwa intete. Nupya kwalenzile ukuti ntandike ukutaila sana vino nasambililanga.

VISUMA VINO NAZANA:

Ndakai natwala nupya naya ni nsansa umu cupo alino naipakizya ukwazwa antu aingi ukusambilila, ukwikako na nkazi wane na ya mayo. Ukuombela Leza nu kwazwa antu yanji ukusambilila pali aliwe, kwangazwa ukuya ni nsansa zya cumi.