Navyalilwe nu kukulila uku Rome, incende ino apiina alembwa incito iikalangamo. Uwikazi wali utale. Ntaamanyile ya mayo nupya tutuvwananga na ya tata. Nasambilile ivya kuisakamala uku ncende ino twikalangako itale.

Lino nafisizye imyaka 10, ala natandika mpiti ukwiya. Lino nafisizye imyaka 12, napuusile pa ng’anda pa muku wa kutandikilako. Ukucila pa muku onga, ya tata izile iyantola ukwi ofesi likalamba lyakwe ya kapokola nu kuntwala uku ng’anda. Lyonsi nalemanilanga na antu, nali umunkalwe nupya nasokiile insi yonsi. Lino nali ni myaka 14, nafumile pa ng’anda impitilila. Natandike ukuomvya imilembo ikavulunganya uwongo nu kwikala umu miseo. Vino ntakweti ukwakulala natamanga ya motoka amuno iningila nu kwikala kufika katondo. Lyene nalondanga kuno ningazana manzi pakuti mfulale.

Nizile inja umucenjele umu kwiya, nasompolanga antu tuvyola nu kwiyila antu umu mang’anda usiku. Natandike ukupanga izina iliipe nupya pataalengile ivipondo ivipisye vyangamile ukuti naombela pamwi navyo, cii calenzile ntandike ukwiya umu banki. Pa mulandu wakuti nali umukalipe, izile iyatandika ukuncindika sana umwi umba lya vipondo. Nasendanga imfuti konsi kuno nkuya; nupya nalalanga nayo ku mitwe. Nizile inja umunkalwe, naomvyanga imilembo ikavulunganya uwongo, ukwiya, ukutukana nupya nizile inja ni miyele iipe. Ya kapokola yandondanga lyonsi. Yandemanga imiku iingi, nupya yanyepanga imyaka iingi mu cifungo nga nafuma nupya kwene iniza ningila.

Pa nsita imwi lino yamfumizye umu cifungo, napingwile ukuya umu kutandalila ya mayo yanono. Ntamanyile ukuti ya mayo na atowane yaili yali aa Nte yakwe Yeova. Yandalike umu kulongana kwakwe ya Nte Yakwe Yeova. Vino nalondesyanga ukumanya vino yakalongana napingwilepo ukuya nayo. Lino twafisile pa Ng’anda ya Wene, napingwilepo ukwikala apiipi nu mulyango pakuti nalola akwingila nu kufuma. Nasenzile ni mfuti.

Ukulongana kuuku kwasenwile umi wane. Nalolanga kwati insi pano nsi indi sile kuze. Antu yampokelile ni nsansa, nupya ala yakumwentula. Ncili nkwiusya vino ya Nte yalolekanga ukuti aa cikuuku nupya yaali na ucisinka. Vino naweni vyapusine sana na vino nalolanga vikucitika umu nsi!

Natandike ukusambilila Baibo na ya Nte Yakwe Yeova. Lino nasambilile ivingi, nizile imanya ukuti ndinzile ukusenula sana umi wane. Nalondiile amazwi aya pa Mapinda 13:20 aakati: ‘Wino akapita nu wa mano nawe kwene alaya na mano, lelo wino akacina na awelewele alacula wakwe cimwi.’ Nilwike ukuti nalondekwanga ukuta ukuya pamwi ni vipondo. Citangupile ukucita vivyo, lelo Yeova wangavwile ukukwanisya.

Natandike nu kuya nu usaka wa ku mwili. Pa mulandu nu kuombesya natiile ukupeepa fwaka nu kuomvya imilembo ikavulunganya uwongo. Napezile inyele, natiile ukuzwala maelena, nupya natiile ukutukana. Pa muku wa kutandikilapo umu umi wane natandike ukuikaanya muli vino nacitanga.

Ntatazile injipakizyapo ukubelenga nu kusambilila, fwandi cantaliile sana pakuti naika mano uku kuisambilizya Baibo. Lelo lino naombisye, panono panono natandike ukutemwa sana Yeova, nupya cimwi casenwike muli nene, kampingu yatandike ukuncuzya. Ilingi nuvwanga uyi, natwisikanga ndi cakuti Yeova anganjelela pa viipe vyonsi vino nacisile. Pa nsita kwene zizyo natekeziwanga sana lino nabelenganga pali vino Yeova welezile Umwene Devedi pa membu izipisye zino wacisile.—2 Samueli 11:1–12:13.

Intazi yuze ino nakweti u kuya umu kusimikila antu uku ng’anda ni ng’anda. (Mateo 28:19, 20) Natiinanga ukuti limwi ningakomaana na umwi wino nasosizye nanti ukucitila iviipe mpiti! Nomba umu kuya kwa nsita natiile ukuya ni ntete. Natandike ukuvwa ningo ukwazwa yauze ukusambilila pali Tata witu uwaya ningo sana uwa kwi yulu, aakaelela sana.

Ukusambilila pali Yeova kwampususya! Ya cuza yane aingi yafwa nupya yamwi yaya umu vifungo, lelo nemo naya nu umi usuma sana nu upaalilo wa vintu ivilacitika uku nkoleelo. Nasambilila ukuicefya nu kuya ni cuvwila nu kuta ukuya nu unkalwe. Ni cacitika i cakuti nkauvwana na antu yano nkazanwa nayo. Naya ni nsansa pano natwala mama umusuma, Carmen. Tukaya sana ni nsansa lino tukuombela pamwi ukwazwa antu yauze ukusambilila Baibo.

Lyene naya na ucisinka, insita zimwi nkaya umu kuombela umu mabanki, nomba nsiya umu kwiya nkaya umu kuzifya!