1 Korint 14:1-40
14 Kom̦win jibadek yokwe, bõtab kom̦win wõnm̦aanl̦o̦k wõt im kõttõpar* menin letok ko jãn Anij, el̦aptata maroñ eo ñan kanaan.
2 Eo ej kõnono kõn lo ko, ejjab kõnono ñan armej, bõtab ej kõnono ñan Anij kõnke ejjel̦o̦k en̦ ej roñjake ta ko ej ba. Ej kõnono ikijjeen jetõb kwõjarjar* kõn men ko rettino im rekkwõjarjar.
3 Bõtab, eo ej kwal̦o̦k kanaan ko ej kõkajoor im rõjañ im kaenõm̦m̦an ro jet kõn naan ko an.
4 Eo ej kõnono kõn lo ko ej kõkajoor e make, bõtab eo ej kwal̦o̦k kanaan ko ej kõkajoor juon eklejia.
5 Ikõn̦aan bwe kom̦win aolep kõnono kõn lo ko, bõtab el̦apl̦o̦k aõ kõn̦aan bwe kom̦win kwal̦o̦k kanaan ko. Ilo m̦ool, eo ej kwal̦o̦k kanaan ko el̦apl̦o̦k tokjãn jãn eo ej kõnono kõn lo ko. Unin ej kõnke el̦aññe ejjel̦o̦k en̦ ej ukok, ro ilo eklejia reban bõk naanin kõkajoor.
6 Ro jeiũ im jatũ, el̦aññe ij iwõj kiiõ im kõnono ñan kom̦ kõn lo ko, kom̦ naaj ke bõk tokjãn el̦aññe ijjab kwal̦o̦k naan ko jãn Anij, ak naanin jel̦ãl̦o̦kjen̦, ak kanaan ko, ak naanin katak ko?
7 Ejjel̦o̦k oktak men in jãn kein kõjañjañ ko ãinwõt flute im arp. El̦aññe juon ej kõjañ flute eo ak arp eo im juon wõt ton̦ in ainikieer, ewi wãween ad naaj jel̦ã ta eo rej kõjañe?
8 Im el̦aññe ejjab lukkuun alikkar ainikien jilel eo, wõn enaaj kõppojak ñan tarin̦ae?
9 Ejja ãindeinl̦o̦k wõt, el̦aññe kwõj kõnono kõn lo ko ijello̦kun am̦ kõjerbal naan ko epidodo mel̦el̦e kaki, ewi wãween an naaj ro jet mel̦el̦e ta ko kwõj ba? Ilo m̦ool, enaaj ãinwõt ñe kwõj kõnnaan ñan mejatoto.
10 Elõñ kain kajin ilo lal̦ in, bõtab aolep kajin kein armej remaroñ mel̦el̦e kaki.
11 El̦aññe ijjab mel̦el̦e kõn naan ko juon armej ej ba, innem inaaj ãinwõt juon ruwamãejet ñan eo ej kõnono, im eo ej kõnono enaaj ãinwõt juon ruwamãejet ñan ña.
12 Enaaj ãindein ñan bar kom̦. Kõnke kom̦ lukkuun kõn̦aan bõk menin letok ko jãn jetõb kwõjarjar,* kom̦win kate kom̦ bwe en l̦apl̦o̦k menin letok ko renaaj kõkajoor eklejia eo.
13 Kõn men in, eo ej kõnono kõn lo ko en jar bwe en maroñ jel̦ã kilen ukoti mel̦el̦e ko ej ba.
14 El̦aññe ij jar ilo aõ kõnono kõn lo ko, ilo m̦ool ejjab ña eo ij jar bõtab ej menin letok eo jãn jetõb kwõjarjar,* im ijjab mel̦el̦e ta ko ij ba.
15 Inaaj et kiiõ? Inaaj jar ikijjeen menin letok eo jãn jetõb kwõjarjar,* im inaaj bareinwõt jar ilo kajin eo imel̦el̦e kake. Inaaj al ikijjeen menin letok eo jãn jetõb kwõjarjar,* im inaaj bareinwõt al ilo kajin eo imel̦el̦e kake.
16 Ijoke, el̦aññe kwõj jar im kam̦m̦oolol Anij ilo am̦ kõjerbal menin letok eo jãn jetõb kwõjarjar,* ewi wãween an juon eo ejjab jel̦ã me ej pãd ibwiljimi maroñ ba “Amen” ãlikin am̦ jar, el̦aññe ejjab mel̦el̦e ta ko kwõj kõnnaan kaki?
17 M̦ool bwe em̦m̦an am̦ jar im kam̦m̦oolol, bõtab men in ejjab kõkajoorl̦o̦k armej eo juon.
18 Ij kam̦m̦oolol Anij bwe ij kõnono kõn lo ko el̦apl̦o̦k jãn kom̦ aolep.
19 Bõtab, ñe ij pãd ilo juon eklejia, em̦m̦anl̦o̦k ippa ñe ij kwal̦o̦k l̦alem wũdin naan me armej remaroñ mel̦el̦e kaki bwe in maroñ katakin ro jet,* ijello̦kun aõ kõnono kõn lo ko im kõjerbal 10,000 naan.
20 Ro jeiũ im jatũ, kom̦win jab ajri ilo kõl̦mãnl̦o̦kjen̦, bõtab kom̦win ajri ñe ej itok ñan men ko renana, im kom̦win rũtto ilo kõl̦mãnl̦o̦kjen̦.
21 Kar je ilo Kien eo: “Jeova* ej ba, ‘Inaaj kõnono ñan armej rein kõn kajin ko an ri-aelõñ ko jet im naan ko an ruwamãejet* ro, bõtab renaaj m̦akoko wõt in roñjake ña.’”
22 Kõn men in, kõnono kõn lo ko ej juon kõkal̦l̦e ñan ro rejjab rũttõmak im ejjab ñan rũttõmak ro. Bõtab, kanaan ko ej ñan rũttõmak ro im jab ñan ro rejjab rũttõmak.
23 El̦aññe aolepen eklejia eo ej kweilo̦k ippãn doon ilo juon jikin im kom̦ aolep kom̦ij kõnono kõn lo ko, innem ro rejjab jel̦ã ak ro rejjab rũttõmak rej kobawaj, ta reban ba bwe em̦õj an jorrããn kõmãlij ko ami ke?
24 Bõtab el̦aññe kom̦ij aolep kwal̦o̦k kanaan ko im juon eo ejjab rũttõmak ak juon eo ejjab jel̦ã ej kobawaj ippemi, naan ko ami renaaj kajim̦we armej in im kõm̦akũti bwe en lukkuun etale e make.
25 Men ko rettino ilo bũruon renaaj alikkar, innem enaaj buñpedo im kabuñ ñan Anij im ba: “Lukkuun m̦ool ke Anij epãd ibwiljimi.”
26 Ro jeiũ im jatũ, jenaaj ta kiiõ? Ñe kom̦ij kweilo̦k ippãn doon, juon ej al, juon ej kõm̦m̦an katak, juon ej kwal̦o̦k naan ko jãn Anij, bar juon ej kõnono kõn lo ko, im juon ej ukok. Men otemjej kom̦ij kõm̦m̦ani, kom̦win kõm̦m̦ani ñan kõkajoor doon.
27 El̦aññe ewõr en̦ ej kõnono kõn lo ko, ren juon illo̦k juon, im en jab lõñl̦o̦k jãn ruo ak jilu ri-kõnono, im ej aikuj wõr juon ej ukok.
28 Bõtab el̦aññe ejjel̦o̦k ri-ukok, innem eo ej kõnono kõn lo ko en ikõñ ilo eklejia eo, im en kõnono ñan e make ilo bũruon im ñan Anij.
29 Ruo ak jilu ri-kanaan ren kõnnaan, im ro jet ren kõl̦mãnl̦o̦kjen̦ kõn ta mel̦el̦ein kanaan kein.
30 Bõtab el̦aññe juon ej bõk ennaan jãn Anij ilo tõre eo ej jijet ijo, innem ri-kõnono eo en bõjrak.
31 Kom̦ aolep maroñ kwal̦o̦k kanaan ko juon illo̦k juon, bwe aolep ren maroñ katak im bõk kõketak.
32 Ri-kanaan ro ren kõjerbal menin letok eo jãn jetõb kwõjarjar* ilo juon wãween elaajrak.
33 Unin ej kõnke Anij ejjab juon Anij in pok ak ej juon Anij in aenõm̦m̦an.
Ãinwõt ilo aolep eklejia ko an ro rekkwõjarjar,
34 kõrã ro ren ikõñ ilo eklejia ko, kõnke ejjab mãlim ñan aer kõnono. Ren kõttãik er make, ãinwõt an bar Kien eo ba.
35 El̦aññe ewõr men en̦ rekõn̦aan jel̦ã, ren kajjitõk ippãn l̦õm̦aro pãleer ilo m̦õko im̦weer kõnke emenin kajjookok ñan an juon kõrã kõnono ilo eklejia eo.
36 Ta naanin Anij ear itok jãn kom̦ ke? Ke ta, ear itok ñan kom̦ wõt?
37 El̦aññe jabdewõt ej l̦õmn̦ak bwe ej juon ri-kanaan ak ej juon eo ewõr an menin letok jãn jetõb kwõjarjar,* ej aikuj errã bwe men ko ij jejewaj ñan kom̦ kaki rej kien ko jãn Irooj.
38 Bõtab el̦aññe jabdewõt ej kõjekdo̦o̦n men in, naaj bar kõjekdo̦o̦ne.*
39 Kõn men in, ro jeiũ im jatũ, kom̦win wõnm̦aanl̦o̦k wõt im kwal̦o̦k kanaan ko, ijoke kom̦win jab kõmo̦ an ro jet kõnono kõn lo ko.
40 Bõtab kom̦win kõm̦m̦an men otemjej ilo juon wãween ejim̦we im elaajrak.*
Footnotes
^ Ak “kanooj kappukot.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an.” Lale “Jetõb kwõjarjar” ilo Kõmel̦el̦e Ko.
^ Ak “katakin ro jet ilo naan.”
^ Lale “Jeova” ilo Kõmel̦el̦e Ko.
^ Kajin Grik, “tien ruwamãejet.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak emaroñ, “el̦aññe jabdewõt ejjab kõn̦aan jel̦ã kõn men in, enaaj wõnm̦aanl̦o̦k wõt ilo an jab jel̦ã.”
^ Ak “ekon̦.”
