1 Korint 5:1-13
5 Ilo m̦ool, ij roñ bwe ewõr rej mourin l̦õñ* ibwiljimi, im kain mourin l̦õñ* rot in kwõjjab loe ibwiljin armej in aelõñ ko. Ij roñ bwe juon n̦e em̦m̦aan ej pãd ippãn* lio pãleen jemãn.
2 Ta eutiej bũruomi kõn men in ke? Iar l̦õmn̦ak kom̦win kar bũrom̦õj im jol̦o̦k armej n̦e ej kõm̦m̦ane men in enana jãn ibwiljimi, ejjab ke?
3 Meñe ijako jãn kom̦ ilo ãnbwin, ak bũruõ* epãd ippemi, im em̦õj aõ kadede ekajete em̦m̦aan n̦e ear kõm̦m̦ane men in, ãinwõt ñe ij lukkuun pãd ijen̦e ippemi.
4 Ñe kom̦ij kweilo̦kl̦o̦k ippãn doon ilo etan ad Irooj Jesus, im ilo ami jel̦ã bwe bũruõ* kab kajoor eo an ad Irooj Jesus epãd ippemi,
5 kom̦ij aikuj lel̦o̦k armej rot n̦e ñan Setan bwe jerawiwi ko ej bõktok ñan eklejia eo ren jako, kõnke l̦õmn̦ak* eo an ro ilo eklejia eo en jim̦we wõt ilo raan eo an Irooj.
6 Ejjab jim̦we ami kõmjãje. Kom̦ij jab jel̦ã ke bwe jidik wõt iij ak enaaj kauweiki aolepen iiõk eo?
7 Kom̦win jol̦o̦k iij n̦e em̦or bwe kom̦win erom juon iiõk ekããl, kõnke kom̦ij ãinwõt juon iiõk eo ejjel̦o̦k iij ie. Ilo m̦ool, em̦õj an Christ ajel̦o̦k mour eo an ãinwõt juon menin katok, im ear erom l̦aam̦ in Kijoone eo ad.
8 Kõn men in, jen kõm̦m̦ane kwõjkwõj eo, ijoke jen jab kõjerbal iij m̦or ak iij in jerawiwi im nana, bõtab jen kõjerbale bũreet eo ejjab kauwe, eo ej jutak kõn jim̦we im m̦ool.
9 Ilo kar lõta eo aõ, iar jejewaj ñan kom̦ bwe kom̦win bõjrak jãn ami kobal̦o̦k ippãn* ro rej l̦õñ.*
10 Ejjab mel̦el̦e eo aõ in bwe kom̦win lukkuun bõjrak jãn ami kobal̦o̦k ippãn armej ro ilo lal̦ in me er ri-l̦õñ,* ri-arõk, ri-ko̦o̦t, ak ri-kabuñ ñan ekjab. El̦aññe kar mel̦el̦e eo aõ in, innem kom̦win kar aikuj etal jãn lal̦ in.
11 Bõtab ij jejewaj ñan kom̦ bwe el̦aññe jabdewõt jeid ak jatid ej juon ri-l̦õñ,* ak ri-arõk, ak ri-kabuñ ñan ekjab, ak juon eo elukkuun eddo im nana an kõnnaan, ak ri-kadek, ak ri-ko̦o̦t, kom̦win bõjrak jãn ami kobal̦o̦k ippãn.* Kom̦win jab m̦õñã ippãn armej rot in ñan jidik.
12 Ej ke aõ eddo ñan ekajete ro ilikin eklejia eo? Kom̦win kar ke ekajete ro ilowaan eklejia eo
13 bwe Anij ej ekajete ro ilikin? “Kom̦win jol̦o̦k armej n̦e enana jãn ibwiljimi.”
Footnotes
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
^ Kajin Grik, “em̦õj an bõk.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “aetõl.”
^ Lale “L̦õñ” ilo Kõmel̦el̦e Ko.
^ Lale “L̦õñ” ilo Kõmel̦el̦e Ko.
^ Lale “L̦õñ” ilo Kõmel̦el̦e Ko.
^ Ak “aetõle.”
